“Paghimo og usa ka Mas Langitnong Panimalay,” Alang sa Kalig-on sa mga Kabatan-onan, Okt. 2022.
Ang Tema ug Ako
Ang kabatan-onan nagpaambit kon giunsa nila sa pagsunod ang mga pulong sa mga Tema sa Young Women ug sa Korum sa Aaronic nga Pagkapari
Paghimo og usa ka Mas Langitnon nga Panimalay
“Ako mangandam nga mahimong usa ka … maunongon nga bana, ug mahigugmaong amahan pinaagi sa pagkahimong tinuod nga disipulo ni Jesukristo.”
Pinaagi sa pagsunod sa ebanghelyo, nagkat-on ko sa pagserbisyo sa uban—ilabi na sa panimalay. Kon tabangan nako ang akong mama, dili kaayo siya mabug-atan, ug mas gaan ang buluhaton sa balay alang kaniya.
Kanunay kaming gisultihan sa among inahan sa paghapsay sa balay. Malisod kini kon dunay pito ka tawo sa balay, apan kon anaa kita sa usa ka hapsay ug limpiyo nga balay, mobati kita nga mas duol sa Dios.
Ang mga propeta nagtudlo nga ang pinakamaayong dapit alang kanato sa pagkat-on mahitungod sa ebanghelyo anaa diha sa atong mga panimalay. Sa kasagaran kami magtuon sa mga kasulatan isip usa ka pamilya. Usahay kini lisod, apan uban sa paningkamot makadumala kami sa pagtuon. Kini nakatabang sa Espiritu nga mas maanaa sa among panimalay ug makatabang namo nga makasugakod sa mga pag-atake sa kalibotan ngadto sa mga pamilya.
Ang laing butang nga makapalig-on gayod sa among pamilya mao ang pagbuhat og mga kalihokan nga magkauban. Mahimong yano nga mga butang sama sa paglingkod sa gawas sa atubangan sa among balay aron mag-istorya o mag-snack. Kung buhaton namo kini, ang tanan mobati og maayo, ug ang among mga relasyon nahimong mas lig-on.
Akong nakat-onan nga dakong responsibilidad ang mahimong tighupot sa pagkapari. Daghan kog mahimo sa pagserbisyo ug pagpanalangin sa akong mga silingan ug ilabi na sa pagserbisyo sa akong pamilya pinaagi sa pagkapari. Ang pagka responsable sa akong calling importante usab. Matag higayon nga makadawat ko og tawag sa pagserbisyo, naningkamot ko nga ipahinungod kini uban sa akong labing maayo nga mga paningkamot. Nasayod ko nga mao usab ang mahitabo kon ako adunay dakong responsibilidad sa pagkahimong amahan.
Pinaagi sa paggamit niini nga mga butang ug pagsunod sa ehemplo sa atong Manluluwas nga si Jesukristo, akong giandam ang akong kaugalingon nga mahimong maayong bana ug amahan sa umaabot. Ang pagtabang sa akong mama ug pagpaningkamot sa pagsunod sa ebanghelyo nakatudlo nako niini. Nasayod ko sa gugma sa Dios alang kanako ug sa Iyang tinguha nga usa ka adlaw ako makagiya sa akong pamilya uban sa dungog.
Ang tagsulat nagpuyo sa Rio Grande do Sul, Brazil.