“Pagpundok diha sa Iyang Kahayag: Paglikay sa Pagkaulipon,” Alang sa Kalig-on sa mga Kabatan-onan, Okt. 2022.
Pagpundok diha sa Iyang Kahayag: Paglikay sa Pagkaulipon
Samtang kamo magpuyo nga matarong, dili lang kamo makaikyas sa pagkaulipon gikan sa kaaway, apan kamo mahimo usab nga maayong ehemplo sa paglaom ug kahayag ngadto sa uban.
Mga paghulagway pinaagi ni Maggie Stephenson
Kitang tanan mibati nga nag-inusara sa usa ka higayon o sa laing panahon. Gani, tingali mibati ka nga nag-inusara bag-ohay lang. Apan ang nakanindot sa ebanghelyo mao nga, bisan asa ka, mobati gihapon ka nga nahisakop. Kini mahimong tinuod bisan kon adunay pipila lamang ka miyembro sa Simbahan sa duol.
Sa among kaugalingong pamilya, kami migahin ug 33 ka tuig sa San Francisco Peninsula sa Estados Unidos [United States]. Sa akong hunahuna walay higayon nga adunay labaw pa sa usa ka laing miyembro diha sa mga klase sa high school sa among mga anak.
Bisan pa niana, sulod niadtong mga katuigan, kami nasayod nga ang Ginoo mipundok kanamo isip kabahin sa balay ni Israel. Among gibati nga nahisakop samtang kami nagsunod sa ebanghelyo. Ingon nga si Presidente Russell M. Nelson mipahayag, ang pagpundok “wala magdepende kon asa ka nagpuyo; nagdepende kini sa indibidwal nga pasalig. Ang mga tawo mahimong ‘pagadad-on sa kasayoran sa Ginoo’ [3 Nephi 20:13] nga dili mobiya sa ilang mga yutang natawhan.”1
Sa inyong pagsunod sa ebanghelyo, inyong gipundok ang inyong kaugalingon ngadto sa Ginoo. Samtang inyong buhaton ang inyong bahin sa pagpundok sa uban ngadto sa ebanghelyo, inyong gituman ang importante nga buhat sa pagtabang sa Ginoo sa pagpundok sa Israel.
Paglikay sa Pagkaulipon ug Pagkadili-matarong
Samtang kita magpundok sa atong mga kaugalingon ngadto kang Kristo pinaagi sa pagsunod sa Iyang mga pagtulun-an, atong masinati ang kalingkawasan ug kagawasan nga ang ebanghelyo lamang ang makahatag—kagawasan nga makabaton og personal nga pagpadayag ug kagawasan nga mahimong kinsa ang gusto sa Langitnong Amahan nga kita mamahimo. Ang dili matarong nga pagkinabuhi mahimong mosangpot sa pagkaulipon ug mga limitasyon, sa pisikal ug espirituwal.2 Samtang kita motabang sa pagpundok sa atong mga higala ug mga minahal ngadto sa ebanghelyo, lakip sa pagtabang kanila sa paghimo ug pagtuman og sagradong mga pakigsaad uban sa Dios, kita makatabang kanila nga makakita og kagawasan gikan sa daghang matang sa pagkaulipon.
Usa ka opera nga ako malingaw naghulagway sa baroganan sa espirituwal ug pisikal nga pagkaulipon. Sa iyang pagkabatan-on si Giuseppe Verdi nainteres ni propeta Jeremias sa Daang Tugon. Niadtong 1842, sa edad nga 28, nagsulat siya sa opera Nabucco, usa ka paghisgot kang Nabucodonosor, ang hari sa Babelonia, kinsa nabuhi sa panahon ni Jeremias.
Kini nga opera naghisgot sa pagsakop sa Jerusalem ug sa pagkabihag ug pagkaulipon sa mga Judeo, nga naggikan sa dili matarong nga pagkinabuhi (tan-awa sa Jeremias 13:9–19). Ang Mga Salmo 137 mao ang inspirasyon sa makapatandog ug makapadasig nga “Chorus of the Hebrew Slaves” [Koro sa mga Ulipon nga Hebreohanon] ni Verdi. Ang ulohan niining salmo diha sa atong kasulatan makapatandog: “Samtang nangabihag, ang mga Judeo nanaghilak haduol sa mga suba sa Babelonia—Tungod sa kaguol, dili sila makakanta sa mga awit sa Zion.”
Gusto sa Dios nga ang tawo mahimong gawasnon sa pagpili tali sa maayo ug daotan. Kon ang daotan nga pagpili nahimong kinaiya nga nagpasulabi sa usa ka kultura o nasod, adunay grabeng mga sangpotanan niini nga kinabuhi ug sa umaabot nga kinabuhi. Ang mga tawo mahigot o maulipon dili lamang ngadto sa makadaot, makaadik nga drugas apan ngadto usab sa makadaot, makaadik nga mga pilosopiya nga makaguba sa matarong nga pagpuyo. Makita nato kana nga nahitabo sa atong panahon.
Buhaton nato kutob sa atong mahimo nga molikay sa sala ug pagsukol nga mosangpot sa pagkaulipon.3 Sa pagbuhat nato, atong himoong sarang ang atong mga kaugalingon alang sa inspirasyon samtang kita motabang sa Ginoo sa pagpundok sa Iyang mga pinili ug sa literal nga pagpundok sa Israel.
Samtang kamo magpuyo nga matarong, dili lang kamo makaikyas sa pagkaulipon gikan sa kaaway, apan kamo mahimo usab nga maayong ehemplo sa paglaom ug kahayag ngadto sa uban.
Pasigaa ang Inyong Kahayag
Aduna bay bisan kinsa nga mga higala o mga minahal sa inyong kinabuhi nga puno sa kasubo nga dili sila makaawit sa mga kanta sa Zion, o mobati sa kalipay sa ebanghelyo?
Bisan sa inyong kaugalingong panimalay o uban sa mga estranghero, kon bahin sa pagpakigbahin sa ebanghelyo, mahimo kamo nga usa ka nagsidlak nga kahayag (positibo nga impluwensiya) samtang inyong gidawat ug gisunod ang kahayag sa ebanghelyo.4 Ug bisan pa kong ang mga tawo wala mahibalo nga inyo silang gihigugma, dili parehas ang inyong impluwensiya. Busa kinahanglan natong tinguhaon nga mapuno kanunay sa gugma alang sa uban. Kon puno kamo sa gugma alang sa tanang anak sa Langitnong Amahan, ang tanan makakita sa inyong kahayag. Kini nga kahayag mahimong adunay daghang mga epekto nga labaw pa sa inyong mamatikdan.
Pinaagi lamang sa pagkahimong kinsa kamo ug pinaagi sa pagpuyo og matarong nga kinabuhi, makadani kamo sa uban nga makamatikod kaninyo ug sa paagi sa inyong pagpakabuhi. Kini magtanom ug dili maihap nga mga liso nga mahimong mamunga og daghan sa tukmang panahon.5 Sa dili pa gani igo ang inyong edad sa pagserbisyo og misyon, makatabang kamo sa pagtanom og mga liso, sa pagpangita sa mga pinili, ug pagpundok kanila ngadto kang Kristo.
Kamo makasugod pinaagi sa pagpalambo niini nga gugma ug kahayag sa inyong kaugalingong panimalay. Kini mahimong usa ka taas nga proseso, busa palihog ayaw pagbati nga mawad-an og kadasig sa indibidwal nga mga panagbingkil o mga panaglalis sulod sa inyong pamilya. Ang taas nga termino nga pagtahod nanginahanglan og dugay nga paningkamot. Paggahin ug panahon sa pagtrabaho sa mga relasyon sa pamilya. Makasugod kamo pinaagi sa pagpakita og pagtahod ug pagkat-on sa paglikay sa pagsaway.
Sa panimalay, ang pagsaway maoy usa ka matang sa hilo nga makaguba sa panaghiusa. Kon adunay masayop, sama sa pagkahagbong sa usa ka plato gikan sa lamesa, wala kini magkinahanglan og paghinulsol o pagsaway. Hinuon, ang malumo nga pagtudlo mao lamang ang gikinahanglan. Kinahanglang makat-on kita sa pagpailob sa usag usa, ilabina sa atong mga pamilya. Sa akong hunahuna kon ang usa ka panimalay mahimong usa ka matang sa dapit diin walay pagsaway, nan ang gugma molambo.
Pagtapok diha sa Kahilwasan [Safety]
Sa makausa pa, kon kita anaa sa pagkaulipon, ang atong magamit nga mga aksiyon mahimong limitado. Ang solusyon mao ang pagpangita og kagawasan ug kahayag ug gugma diha sa kaluwasan sa ebanghelyo. Ang pagkaulipon sa sala makapabati ninyo nga ingon og dili kamo makakanta sa mga awit sa Zion. Apan ang paghinulsol anaa kanunay. Mahimo kitang mapundok diha sa balay ni Israel ug makatabang sa uban nga magpundok nga luwas uban kanato.
Samtang ipadayon ninyo ang inyong pagpokus sa ebanghelyo, sa Manluluwas, ug sa templo, gibuhat ninyo ang eksakto nga gikinahanglan ninyo. Makapuyo kamo bisan asa sa kalibotan, bisan kauban sa diyotay nga gidaghanon sa mga miyembro sa Simbahan, ug sa gihapon mahimong dakong kabahin sa Simbahan ug sa gingharian ug sa panagpundok. Dili gayod kamo mag-inusara kon anaa kamo diha sa balay ni Israel.