“Mokatawa Kita og Gamay, Pwede ba?,” Alang sa Kalig-on sa mga Kabatan-onan, Okt. 2022.
Mokatawa Kita og Gamay, Pwede ba?
Ang maayo nga pasiaw usahay makatabang nimo nga moatubang sa kinabuhi ug moingon, “Dili ko nimo mapildi—ug usa pa diay, adunay utan sa imong ngipon.”
Ang mga tawo gusto nga mokatawa. Ug nindot kana nga butang, tungod kay ang kinabuhi kasagaran nga kataw-anan. Aniay usa lang ka ehemplo:
Ang Autocorrect usa ka klase sa software sa phonetic languages nga makabantay sa dili mao nga pagka-ispeling nga mga pulong ug pulihan kini og eksakto na nga pagka-ispeling nga mga pulong samtang ikaw nag-type. Kini makatabang kaayo, apan makalingaw usab kaayo kini.
Usa ka batan-on nga babaye nga ginganlan og Megan gusto nga mopadala og hulagway sa iyang iro ngadto sa iyang higala ug niingon nga ang iyang iro miingon og hi. (Kahibalo ka ni Megan—cute siya nga ingon niana.) Ang autocorrect misapaw. Mao nga, imbes og “Hi,” ingon ang iyang iro, “Juice.” Ang higala ni Megan siguro natingala ngano nga ang usa ka iro moingon niana, mao nga si Megan nagpadala og pipila ka nagkatawa nga mga emoji ug mipasabot unsay nahitabo.
Usa ka batan-on nga lalaki nga ginganlan og Kyle adunay swipe-to-type nga feature nga kanunay nga moilis sa “about [kabahin]” ngadto sa “shot [pusilon].” “Kon imong mahunahuna, kana tingali magbilin og sayop nga impresyon,” miingon si Kyle. “‘Unsay imong hunahuna kabahin ni Joey?’ kalit lang nahimong ‘Unsay imong hunahuna pusilon si Joey?’” Agay! Kinahanglan magbantay si Kyle nga walay tawo nga “pusilon.” Apan nakita niya ang kataw-anan niini.
Lain nga batan-ong lalaki nga ginganlan og Ben nag-text sa iyang mga higala ug nagsulay sa pagsulat, “Me neither [Dili pud ko],” apan napadala kini isip “Me burger [Burger ko].” Katingalahan. Apan gibuhat nila ang labing maayo gikan niini. “Among gipadad-an ang kada usa og mga hulagway sa mga cheeseburger,” miingon si Ben.
Nganong Gikinahanglan ang Pasiaw?
Ang pag-atubang sa kinabuhi uban sa maayo nga pasiaw makahatag og positibo nga mga epekto. Pananglitan, kini nga mga kapalpakan sa autocorrect mahimong makatabang sa mga tawo nga mahimong mas mapainubsanon ug mapasayloon ug dili daling mohusga.
Ang maayo nga pasiaw mahimong makatambal. Makahimo kini sa kinabuhi nga mas sayon og gamay nga pas-anon. Usa ka Apostol kaniadto miingon: “Sa sunod nga panahon kamo tintalon sa pagbagutbot, sulayan kaha ang pagkatawa. Kini mopataas sa inyong kinabuhi ug mohimo sa kinabuhi sa tanan nga naglibot kaninyo nga mas makalingaw.”1
Unsa ang Mahimo sa Maayo nga Pasiaw
Ang mga kasulatan nag-ingon nga “adunay panahon alang sa tanang butang,” lakip na ang “panahon sa pagkatawa” (Ecclesiastes 3:1, 4). Kon kini usa sa mga malisod nga panahon, adunay daghan nga positibong mga butang nga mahimo sa maayo nga pasiaw aron matabangan ka. Ania ang tulo lamang.
-
Mopagaan sa kahasol. Kon ang mga tawo naluya o nabalaka, ang gamay nga maayong pasiaw mahimong sama sa pampahungaw nga balbula alang sa mga kahasol sa kinabuhi. Dili kini makatambal sa tanan, apan ilado nga pamaagi sa pagtabang sa mga tawo nga makalma ang ilang mga emosyon.
-
Mohatag og mas himsog nga panglantaw. Usahay kinahanglan nato nga sundon ang tambag nga “mokatawa og gamay.” Uban sa maayo nga pasiaw, kita makahinumdom kon unsa gayod ang importante sa kinabuhi. Ang ubang butang dili gayod angayan nga atong ikasapot.
-
Makapasuod sa katawhan. Ang pag-inambitay og maayo nga pasiaw usa gayod ka makapasuod nga kasinatian. Kini makalig-on og mga relasyon. Makatabang kini sa mga tawo nga mobati nga gidawat.
Unsaon sa Pagpalambo og Maayo nga Pasiaw
Ang maayo nga pasiaw dili lang kabahin sa pag-istorya og mga pakatawa. Kabahin kini sa pagtugot sa imong kaugalingon ug sa uban nga mobati og kasayon. Ania ang pipila ka ideya alang sa pagpalambo og maayo nga pasiaw (samtang magsunod sa mga baroganan diha sa talaan sa ubos).
-
Hinumdomi ang usa ka butang nga nakapakatawa nimo. Dayon sultihi ang lain nga tawo kabahin niini.
-
Kon ang lain nga tawo mobati og kaulaw, sultihi siya kabahin sa higayon nga ikaw mibati niana—ug giunsa nga kini nahimong OK. Kon maistorya nimo kini sa kataw-anan nga paagi, himoa kini.
-
Tan-awa ang mga bag-ong natawo nga bata ug ang mga gagmayng bata, labi na kon sila mokatawa. Tinuod lagi. Sila kataw-anan kaayo. Sulayi sa pagpangita kanang susama nga tim-os nga kalipay sa kinabuhi.