“Unsaon sa Paglikay sa Malikayan nga Kasubo,” Alang sa Kalig-on sa mga Kabatan-onan, Okt. 2022.

Dali, Sunod Kanako

Jeremiah; Lamentaciones

Unsaon sa Paglikay sa Malikayan nga Kasubo

Ni Eric B. Murdock

Mga Magasin sa Simbahan

Usa ka karaan ug usa ka modernong propeta nagtudlo kanato nga ang pagdangop ngadto sa Dios mao kanunay ang labing maayong paagi nga buhaton.

“Ang kalaglagan moabot!”

Pagkalisod nga mensahe nga ihatag! Apan gikinahanglan kini nga ihatag. Ang mga tawo sa Jerusalem mitalikod sa Dios, misalikway sa Iyang mga propeta, ug mipuyo diha sa sala ug pagkamasupakon. Ang Dios gusto nga sila makahibalo nga Siya misulay sa pagtabang kanila, apan karon makalilisang nga mga sangputanan moabot.

Ang Dios mitawag ni Jeremias aron sa pagpasidaan sa mga tawo. Lisod kadto nga trabaho tungod kay bisan usa walay naminaw. Sa kataposan, ang pagkaylap sa pagkadili-matarong miresulta sa kalaglagan sa Jerusalem ug ang mga tawo gidala nga binihag ngadto sa Babelonia.

Ang Gahom sa mga Pagpili

Usahay ang kasubo moabot gikan sa mga panghitabo nga dili nato kontrolado o gikan sa mga pagpili sa uban. Apan ang daghang kasubo mahimong malikayan pinaagi sa mga pagpili nga atong himoon.

Si Jeremias mipasidaan sa mga tawo nga ang ilang pagpili sa pagtalikod sa Dios ug pagbaliwala sa Iyang mga pagtulun-an mosangpot sa kasubo. Salamat, ang mga kasulatan ug ang mga pulong sa modernong mga propeta nagtabang kanato nga makahibalo unsa nga mga pagpili ang modala ngadto sa hingpit nga kalipay ug motabang kanato sa paglikay sa malikayan nga kasubo. Ania ang pipila ka ehemplo:

Pagtagad sa Pulong sa Dios

Pinaagi kang Jeremias, ang Dios misulti sa mga tawo sa Jerusalem nga “sila mingbiya kanako ang tuboran sa mga tubig nga buhi.” (Jeremias 2:13). Ang tubig mahinungdanon aron mapadayon ang pisikal nga kinabuhi. Diha sa mga kasulatan, ang tubig usa ka simbolo ni Jesukristo ug sa Iyang mga pagtulun-an, nga mahinungdanon alang sa kinabuhing dayon.

Si Presidente Russell M. Nelson mitudlo nga kon kita magtagad sa pulong sa Dios, “Ang Dios mohatag nato og sundanan alang sa kalamposan, ug hingpit nga kalipay niini nga kinabuhi. …

“… Ako mosaad nga kamo mapanalanginan og dugang gahom sa pag-atubang sa tintasyon, mga pakigbisog, ug kahuyang. Ako mosaad og mga milagro sa inyong … mga relasyon sa pamilya, ug inadlaw nga trabaho. Ug ako mosaad nga ang inyong kapasidad sa pagbati og hingpit nga kalipay madugangan bisan kon ang unos magkadaghan sa inyong kinabuhi.”¹

Ang Panalangin sa Regular nga Paghinulsol

Ang usa ka dakong problema sa mga tawo sa panahon ni Jeremias mao nga sila mipakita sama nga sila mahalaron [devoted] ngadto sa Dios, pero sila dili sinsero (tan-awa sa Jeremias 3:10; 7:8–11). Ang Dios nagpakabana sa mga tinguha sa atong mga kasingkasing. Sa unsa nga paagi kita makasiguro nga kita sinsero sa pagsunod Kaniya?

Ang Ginoo misulti kang Jeremias nga kita “[maka]usab sa [atong] mga kagawian ug [sa] [atong] mga binuhatan” (Jeremias 7:3). Sa laing pagkasulti, mahimo kita nga makahinulsol. Si Presidente Nelso miawhag kanato nga magbaton og “kanunay, matag-adlaw nga paghatag og gibug-aton sa paghinulsol.” Siya miingon: “Ang paghinulsol dili usa ka panghitabo; usa kini ka proseso. … [Kini ang] pagbuhat ug mahimong mas maayo matag adlaw. …

“Kon kita mopili nga maghinulsol, kita mopili nga mag-usab! Atong gitugotan ang Manluluwas nga mousab kanato ngadto sa labing maayo nga bersyon sa atong mga kaugalingon. Kita mopili nga molambo sa espirituhanon nga paagi ug modawat sa hingpit nga kalipay …ang hingpit nga kalipay sa katubsanan diha Kaniya. Kon kita mopili nga maghinulsol, kita mopili nga mas mahisama ni Jesukristo!”²

Sunda ang Propeta

Ang mga pagtulun-an ni Jeremias kanunay nga gisalikway. Ang samang butang nahitabo sa mga propeta sa tibuok kasaysayan. Gipasidan-an kita nila mahitungod sa espirituhanong mga kapeligrohan sa pagsalikway o pagtuis sa mga kamatuoran sa ebanghelyo aron mahimo kining mas madanihon o madawat.

“Ang kamatuoran maoy kamatuoran,” si Presidente Nelson misulti. “Ang kamatuoran nakabase sa mga balaod nga giestablisar sa Dios.” Siya miingon usab: “Tungod niini kami nagpakabana pag-ayo sa tanang mga anak sa Dios nga among gisangyaw ang Iyang kamatuoran. Mahimong dili kami mosulti kanunay sa mga tawo kon unsay ilang gusto nga paminawon. Ang mga propeta panagsa ra nga mailado. Apan kami kanunay motudlo sa kamatuoran!”³

Tabang samtang Nagpadayon

Usahay ang mga butang nga atong giatubang sobra kabug-at. Si Jeremias sigurado nga ingon niana ang gibati. Sa dihang gitawag siya sa Dios nga mahimong propeta, si Jeremias wala makaseguro sa iyang mga abilidad. Ang Dios mipasabot nga Siya nakaila kang Jeremias sa wala pa siya matawo ug nga Siya mi-orden nang daan, o mipili, kaniya ug mitabang sa pag-andam kaniya alang sa iyang misyon (tan-awa sa Jeremias 1:5).

Ang Dios nakaila usab kaninyo. Samtang modangop kamo Kaniya, tabangan kamo Niya nga makalikay sa kasubo nga naggikan sa sala ug pagkamasinupakon. Hatagan kamo Niya og kusog aron matuman ang Iyang gikinahanglan nga inyong buhaton, bisan unsa pa ang mga pagsulay nga moabot kaninyo.