Sa Culiacán, Mexico

Hi, Ako si Deseret! Ako 17, ug adunay pito ka mga tawo sa akong pamilya.

Sa panahon sa pandemya sa COVID-19, kinahanglan kong mangita og bag-ong mga butang nga buhaton. Nagpintal ko, nag-ayo ug naghimo og mga sinina, nagmanikyur sa mga kuko, naminaw og musika, nagtan-aw og mga salida, ug naggahin og panahon uban sa akong pamilya. Naghimo sab ko og lain-laing klase sa kuwintas uban sa akong pamilya.

Ang akong mama usa ka magtutudlo sa espesyal nga edukasyon. Panahon sa bakasyon sa ting-init ako nagtabang sa mga bata nga iyang gitudloan. Naa pa koy usa ka tuig nga kulang sa high school. Human niana, gusto ko nga mahimong usa ka internasyonal nga flight attendant o mahimong usa ka magtutudlo sa espesyal nga edukasyon, sama sa akong mama. Gusto ko usab nga mobiyahe.

Pagka-Miyembro sa Mexico

Ang akong mga higala sa eskwelahan kaniadto naningkamot sa pagpabuhat o pagpasulti nako og mga butang nga supak sa akong mga sumbanan, apan karon nga nahibalo na sila nga miyembro ko sa Simbahan ug unsay akong gibarogan, ilang gitahod ang akong mga limitasyon.

Ako nasayod nga samtang maningkamot ko sa pagsunod sa mga sugo, mahingpit ko pinaagi ni Jesukristo. Ang akong pagpamatuod naghatag kanako og kalig-on sa pagpadayon. Ako nasayod nga ako anak sa Dios. Mahimo kong ehemplo ug mobarog sa unsay akong nahibaloan nga tinuod. Nalipay ko nga nakahibalo nga makatabang ko sa uban nga maduol kang Kristo.

Ang Hermosillo Mexico Temple mao ang labing duol nga templo kanako. Sa unang higayon nga mibisita ko sa templo uban sa akong grupo sa kabatan-onan, gibati nako ang dakong kalinaw. Wala pa gyod ko mobati og ingon niana kaniadto.

Nangandam ko sa paghimo og mga pakigsaad diha sa templo pinaagi sa pagtambong sa mga klase sa pagpangandam sa templo sa panimalay ug pagtuon sa mga leksiyon.

Ang akong igsoong babaye ug ako mao ang mga presidente sa among mga klase sa Young Women. Kada semana sa dihang magkita mi isip kabatan-onan, among ipaambit ang mga butang nga among nakat-onan gikan sa Dali, Sumunod Kanako. Nasurprisa ko sa kadako sa akong pagkalingaw sa pagpaminaw sa ilang mga hunahuna ug sa akong kaugalingong pagpaambit.

Pagpangandam alang sa Misyon

Ang akong mga ginikanan parehong nagmisyon sa Mexico. Gusto gyod kong magmisyon sukad niadtong mga 15 anyos pa ko, mao nga nangandam ko sa pagserbisyo. Ang akong manghod nga lalaki mag-18 anyos na kon mag-19 na ko, mao nga dungan namong ipadala ang among mga papeles sa misyon. Nagtigom ko og kwarta para sa akong misyon pinaagi sa pagtrabaho uban sa akong mama. Duna koy gamay nga banga [jar] nga akong gisudlan sa akong kuwarta, ug naningkamot ko nga pun-on kini. Gusto ko nga magdala og daghang mga tawo ngadto kang Kristo ug sa Iyang Simbahan aron magdala og maayo sa ilang kinabuhi ug sa akoa.

Nagpadala ko og mga kasulatan pinaagi sa social media. Nagkuha ko og mga kinutlo ug hugpong sa mga pulong gikan sa website sa Simbahan ug ipadala kini sa akong mga higala sa social media. Ang mga misyonaryo mihatag usab kanamo og mga kopya sa Basahon ni Mormon, ug ganahan kong ihatag kini sa akong mga higala.