“Pagpangalagad Pinaagi sa Basahon ni Mormon,” Alang sa Kalig-on sa mga Kabatan-onan, Okt. 2022.
Ang Tema ug Ako
Pagpangalagad Pinaagi sa Basahon ni Mormon
“Naningkamot ko nga … mangalagad sa uban diha sa Iyang balaan nga ngalan.”
Sa batan-on pa ako, nakaamiga ko og dili miyembro sa Simbahan. Siya ug ang iyang pamilya nadapit na sa simbahan kaniadto, apan dili sila interisado. Nag-ampo ko kabahin niini ug mibati nga kinahanglan ko nga moadto sa ilang balay ug hatagan sila og kopya sa Basahon ni Mormon.
Pagkasunod adlaw mihatag ko og Basahon ni Mormon sa akong higala ug sa iyang pamilya ug nangutana kon andam ba sila nga mobasa bisan usa lang ka kapitulo. Mipauli ko sa balay ug giingnan ang akong mama nga dili ko sigurado kon himoon ba nila kini. Pagkataud-taod, ang akong higala nangutana kon ganahan ba ko nga adto matulog sa ilang balay. Samtang naa didto, ang iyang pamilya miingon nga nakabasa sila og gamay gikan sa Basahon ni Mormon apan wala mobati nga mao na kadto ang tukmang panahon nga magkat-on og dugang kabahin sa Simbahan.
Sa panihapon, ang papa sa akong higala nangutana kon unsa ang kasagarang buhaton sa mga miyembro sa Simbahan sa dili pa mokaon. Akong gipasabot nga kita nag-ampo sa pagkaon. Nangutana siya kon ganahan ba ko nga mag-ampo. Nasurprisa ko! Apan mahinamon usab ako nga mopaambit sa unsay akong gituohan. Gipasalamatan ko nila alang sa akong pag-ampo, ug ang akong higala miingon nga siya adunay gibati samtang ako nag-ampo nga nakahimo niya nga mobati og nindot sa sulod. Nag-istorya kami sa nahabiling oras sa panihapon kabahin sa pag-ampo ug dugang pa sa unsay akong gituohan.
Pagka-buntag panahon sa pamahaw, ang papa sa akong higala nag-ampo alang sa panalangin sa pagkaon. Iya dayon nga gihisgotan nga nag-ampo usab siya sa wala pa matulog sa miaging gabii.
Bisan tuod og wala sila mopasakop sa Simbahan, nagpadayon gihapon ko sa pagpangumusta nila ug pagtubag sa ilang mga pangutana kabahin sa Simbahan ug midasig nila sa pagbasa sa Basahon ni Mormon.
Nalipay ko nga mahimo ko nga misyonaryo ug makatabang nila nga mobati sa Espiritu. Nakahibalo ko nga pinaagi sa pagpangalagad nila ug pagtabang nila nga mobati sa Espiritu, ako mitabang nila nga mas mapaduol ni Kristo.
Ang tagsulat nagpuyo sa Idaho, USA.