Դաս 88․ Վարդապետություն և Ուխտեր 76

Վարդապետություն և Ուխտեր 76․71–112

«Անվեհեր՝ Հիսուսի մասին վկայության մեջ»

Բազմաթիվ տեսիլքներ տեսնելուց հետո, այդ թվում՝ Հոր և Որդու փառքի տեսիլքները, Լյուցիֆերի անկումը և սելեստիալ արքայությունը, Ջոզեֆ Սմիթը և Սիդնի Ռիգդոնը տեսան նրանց, ովքեր կժառանգեն թերեստրիալ և թելեստիալ արքայությունները: Թերեստրիալ արքայության մեջ գտնվողների առանձնահատուկ հատկանիշն այն էր, որ նրանք անվեհեր չէին Հիսուսի մասին իրենց վկայության մեջ: Այս դասը կօգնի ուսանողներին դառնալ ավելի անվեհեր՝ Հիսուս Քրիստոսի մասին իրենց վկայության մեջ:

Հնարավոր ուսումնական վարժություններ

Վկայություն Հիսուս Քրիստոսի մասին

Կարող եք գրատախտակին գրել Հիսուս Քրիստոսի մասին վկայություն խոսքերը: Հարցրեք ուսանողներին, թե իրենց կարծիքով ինչ է նշանակում ունենալ Փրկչի մասին վկայություն: Անհրաժեշտության դեպքում բացատրեք, որ վկայությունը մի բան է, որը մենք գիտենք, որ ճշմարիտ է՝ մեր սրտերում և մտքում, և որը տրված է մեզ Սուրբ Հոգու վկայությամբ (տես Վարդապետություն և Ուխտեր 8․2)։ Այնուհետև քննարկեք հետևյալ հարցը.

Տվեք հարցեր, որոնք հանգեցնում են ինքնաճանաչման․ Դա անելու վերաբերյալ լրացուցիչ ուսուցում ստանալու համար տես «Սովորողների համար ստեղծել պայմաններ և հնարավորություններ Սուրբ Հոգով ուսուցում ստանալու համար» վերնագրով դասընթացը, որը հասանելի է Ուսուցչի կատարելագործման հմտություններ․ Ուսուցանեք Հոգով ուսուցողական նյութում։ Կարող եք կիրառել հմտությունը՝ ստեղծելով ուսանողների ինքնագնահատում վարդապետության, ճշմարտության կամ սկզբունքի վերաբերյալ:

• Ինչպե՞ս կարող է Փրկչի մասին վկայությունը ազդել ձեզ վրա՝ այս կյանքում և ողջ հավերժության մեջ:

Առաջարկեք ուսանողներին մտածել Հիսուս Քրիստոսի վերաբերյալ իրենց վկայությունների մասին, այդ թվում՝ թե ինչպես են իրենց վկայություններն ազդել իրենց գործողությունների վրա: Կարող եք նաև առաջարկել նրանց մտածել իրենց վկայությունների վերաբերյալ իրենց ունեցած ցանկությունների մասին:

Խրախուսեք ուսանողներին ուսումնասիրելիս փնտրել ուսմունքներ, որոնք կարող են օգնել նրանց հասկանալ Հիսուս Քրիստոսի մասին վկայություն ունենալու և իրենց իմացածի համաձայն ապրելու կարևորությունը:

Փառքի արքայությունների տեսիլքը

Առաջարկեք ուսանողներին ամփոփել այն, ինչ նրանք մինչ այժմ ուսումնասիրել են Վարդապետություն և Ուխտեր 76 բաժնում նկարագրված տեսիլքի մասին: Այնուհետև բացատրեք հետևյալը.

Դուք երևի հիշում եք, որ Վարդապետություն և Ուխտեր 76 բաժինը պարունակում է մի մեծ տեսիլքի նկարագրություն, որ Տերը տվեց Ջոզեֆ Սմիթին և Սիդնի Ռիգդոնին: Իրենց տեսիլքի ընթացքում Ջոզեֆը և Սիդնին իմացան այն մարդկանց հատկանիշները, որոնք Հարությունից հետո բնակվելու են փառքի տարբեր արքայություններում:

Օգտակար կլինի բացատրել, որ ուսանողներն այս դասի ընթացքում չեն ուսումնասիրելու փառքի արքայությունները նկարագրող բոլոր հատվածները։ Սելեստիալ փառքը նկարագրված է հատվածներ 50–70, 92–96, թերեստրիալ փառքը՝ հատվածներ 71–80, իսկ թելեստիալ փառքը՝ հատվածներ 81–90, 98–112։ Առաջարկեք ուսանողներին նշել կամ պիտակավորել այս հատվածները իրենց սուրբ գրություններում, որպեսզի կարողանան ինքնուրույն ուսումնասիրել դրանք ավելի մանրամասն:

Կարդացեք հետևյալ սուրբ գրությունները՝ փնտրելով տարբերություններ փառքի արքայություններից յուրաքանչյուրի բնակիչների վկայություններում.

• Վարդապետություն և Ուխտեր 76․51–52 (սելեստիալ)

• Վարդապետություն և Ուխտեր 76․75, 79 (թերեստրիալ)

• Վարդապետություն և Ուխտեր 76․82, 101–103 (թելեստիալ)

Երբ ուսանողները ավարտեն ուսումնասիրությունը, առաջարկեք նրանց քննարկել հետևյալ հարցերը դասարանով կամ փոքր խմբերով:

• Ի՞նչ տարբերություններ նկատեցիք այս խմբերի վկայությունների միջև:

• Ի՞նչ կարող է սա ուսուցանել ձեզ վկայության այն տեսակի մասին, որն անհրաժեշտ է սելեստիալ արքայությունը ժառանգելու համար:

Օգնեք ուսանողներին բացահայտել հետևյալ ճշմարտությունը. Եթե մենք անվեհեր ենք Հիսուս Քրիստոսի մասին վկայության մեջ, մենք կարող ենք ստանալ Աստծո սելեստիալ արքայությունը:

Անվեհեր՝ Հիսուս Քրիստոսի մասին մեր վկայության մեջ

• Ձեր կարծիքով, ի՞նչ է նշանակում լինել անվեհեր՝ Հիսուս Քրիստոսի մասին մեր վկայության մեջ:

Նախորդ հարցի քննարկման ընթացքում կարող եք առաջարկել ուսանողներին ուսումնասիրել 2 Նեփի 31․20–21 հատվածները և փնտրել ուսմունքներ, որոնք կարող են ավելացնել իրենց հասկացողությունը: Ստորև ներկայացվող խոսքերը նույնպես կարող են օգտակար լինել։

Տասներկու Առաքյալների Քվորումից երեց Քվենթին Լ. Քուքն օգնել է մեզ հասկանալ, թե ինչ է նշանակում անվեհեր լինել՝ Հիսուսի մասին վկայության մեջ.

Վարդապետություն և Ուխտերի 76-րդ բաժինը պարզաբանում է, որ «Հիսուսի մասին վկայության մեջ անվեհեր լինելը» [Վարդապետություն և Ուխտեր 76․79] պարզ, հիմնական ստուգարքն է՝ որոշելու նրանց, ովքեր կժառանգեն սելեստիալ արքայության օրհնությունները, և նրանց, ովքեր կժառանգեն ավելի ցածր՝ թերեստրիալ արքայության օրհնությունները: Անվեհեր լինելու համար մենք պետք է կենտրոնանանք Հիսուս Քրիստոսի զորության և Նրա քավիչ զոհաբերության վրա, որը հաղթահարում է մահին և մեր ապաշխարության միջոցով մեղքից մաքրում է մեզ, ինչպես նաև պետք է հետևենք Քրիստոսի վարդապետությանը [տես 2 Նեփի 31․17–21]: Մենք նաև Փրկչի կյանքի լույսի, գիտելիքի և ուսմունքների կարիքն ունենք, որ առաջնորդի մեզ ուխտի արահետում, ներառյալ՝ տաճարի սրբազան արարողությունները: Մենք պետք է անսասան լինենք Քրիստոսում, սնվենք Նրա խոսքով և համբերենք մինչև վերջ [2 Նեփի 31․20–21]: (Քվենթին Լ. Քուք, «Անվեհեր՝ Հիսուսի մասին վկայության մեջ», Լիահոնա, նոյեմբերի 2016, 43)

• Ձեզ կամ ուրիշների համար ի՞նչը կարող է դժվարացնել անվեհեր մնալ Հիսուս Քրիստոսի մասին ձեր վկայության մեջ:

• Ի՞նչն է ձեզ օգնում ձգտել անվեհեր լինել՝ Փրկչի մասին ձեր վկայության մեջ:

Նախորդ հարցի քննարկման ընթացքում կարող եք առաջարկել ուսանողներին գտնել և կիսվել սուրբ գրություններով, որոնք մղում են իրենց լինել անվեհեր՝ Հիսուս Քրիստոսի մասին իրենց վկայության մեջ: Կարող եք առաջարկել, որ սկսեն Հելաման 5.12 հատվածից։

Ծրագիր կազմեք

Մի պահ խորհեք, թե ինչ կարող եք անել Հիսուս Քրիստոսի մասին ձեր վկայության մեջ ավելի անվեհեր լինելու համար: Սուրբ գրությունների ուսումնասիրության ձեր օրագրում ավարտեք հետևյալ երեք նախադասությունները:

1. Այսօր ես կարող եմ անվեհեր լինել Հիսուսի մասին իմ վկայության մեջ՝ անելով հետևյալը․ …

2. Հաջորդ մի քանի ամիսների ընթացքում ես կարող եմ անվեհեր լինել Հիսուսի մասին իմ վկայության մեջ՝ անելով հետևյալը․ …

3. Ես կարող եմ օգնել ուրիշներին անվեհեր մնալ Հիսուսի մասին իրենց վկայություններում՝ անելով հետևյալը․ …

Մի քանի կամավոր ուսանողների կարող եք առաջարկել կիսվել իրենց ավարտած նախադասություններից մեկով կամ մի քանիսով։ Եզրափակելով՝ առաջարկեք որևէ մեկին կիսվել Հիսուս Քրիստոսի մասին իր վկայությամբ կամ կիսվեք Նրա մասին ձեր վկայությամբ:

Լրացուցիչ նյութեր

Ի՞նչ ազդեցություն են ունեցել Վարդապետություն և Ուխտեր 76 բաժնի ուսմունքները Եկեղեցու վաղ շրջանի անդամների վրա:

Նախագահ Վիլֆորդ Վուդրուֆը (1807–1898) խոսել է այս հայտնությունից ստացած իր տպավորությունների մասին.

Մանկությունից ինձ սովորեցրել են, որ գոյություն ունի մի երկինք և մի դժոխք, և ամբարիշտներն ունեն մի պատիժ, իսկ արդարները մի փառք: …

… Երբ ես կարդացի տեսիլքը … , այն լուսավորվեց իմ միտքը և ինձ տվեց մեծ ուրախություն, ինձ թվաց, որ Աստված, ով հայտնել էր այդ սկզբունքը մարդուն, իմաստուն էր, արդար և ճշմարիտ, և ուներ թե լավագույն հատկանիշները, թե լավ խելք ու գիտելիք, ես զգացի, որ Նա կայուն էր թե սիրով, ողորմությամբ, արդարությամբ, թե դատողությամբ, և հասկացա, որ ավելի շատ եմ սիրում Տիրոջը, քան երբևէ իմ կյանքում: (Վիլֆորդ Վուդրուֆ, “Remarks,” Deseret News, մայիսի 27, 1857 թ․, 91)

Վարդապետություն և Ուխտեր 76․72–74։ Ի՞նչ է նշանակում այն, որ նրանք, ովքեր «մահացել են առանց օրենքի», ժառանգում են թերեստրիալ արքայությունը։

Վարդապետություն և Ուխտեր 76.72–74 հատվածներից մենք սովորում ենք, որ թերեստրիալ արքայությունում մարդկանց որոշ մասը կլինեն նրանք, ովքեր «մահացան առանց օրենքի», և ովքեր «չընդունեցին Հիսուսի մասին վկայությունը մարմնում», այլ դա արեցին հոգևոր աշխարհում: Այնուամենայնիվ, կարևոր է հասկանալ, որ որոշ մարդիկ, որոնք սովորում են ավետարանը հոգևոր աշխարհում, ժառանգում են սելեստիալ արքայությունը: Մարգարե Ջոզեֆ Սմիթի միջոցով Տերը հայտնել է, որ «բոլոր նրանք, ովքեր մահացել են այս ավետարանի մասին գիտելիք չունենալով, որոնք կընդունեին այն, եթե նրանց թույլ տրվեր մնալ, կլինեն Աստծո սելեստիալ արքայության ժառանգները» (Վարդապետություն և Ուխտեր 137․7)։

Վարդապետություն և Ուխտեր 76.79 Ինչպես ես կարող եմ անվեհեր լինել Հիսուս Քրիստոսի մասին իմ վկայության մեջ:

Նախագահ Էզրա Թավտ Բենսոնը (1899–1994) բացատրել է.

Նրանք, ովքեր [անվեհեր են Հիսուսի մասին վկայության մեջ] քաջություն ունեն պաշտպանելու ճշմարտությունն ու արդարությունը: Նրանք Եկեղեցու անդամներն են, որոնք մեծարում են իրենց կոչումները Եկեղեցում (տես Վարդապետություն և Ուխտեր 84․33), վճարում են տասանորդ ու նվիրատվություններ կատարում, ապրում են բարոյապես մաքուր կյանքով, խոսքով և գործով աջակցում են Եկեղեցու իրենց ղեկավարներին, Հանգստության օրը սուրբ են պահում և հնազանդվում Աստծո բոլոր պատվիրաններին։ (Էզրա Թաֆտ Բենսոն, «Անվեհեր՝ Հիսուսի մասին վկայության մեջ», Ensign, մայիս 1982 թ․, 63)

Ինչպե՞ս կարող է Հիսուս Քրիստոսի մասին իմ վկայությունն ազդել իմ կյանքի վրա։

Տասներկու Առաքյալների Քվորումից երեց Դիտեր Ֆ. Ուխդորֆն ուսուցանել է.

Վկայությունը տալիս է համապատասխան տեսանկյուն, ոգեշնչում և ամուր հիմք, որի վրա կարելի է կառուցել նպատակասլաց կյանք և անձնական աճ: Այն վստահության մշտական ​​աղբյուր է, իրական և հավատարիմ ուղեկից՝ լավ և վատ ժամանակներում: Վկայությունը մեզ հույսի և ուրախության պատճառ է տալիս: Այն օգնում է մեզ զարգացնել լավատեսության և երջանկության ոգին և հնարավորություն է տալիս մեզ ուրախանալ բնության գեղեցկությամբ: Վկայությունը մեզ ոգևորում է ընտրել լավը՝ բոլոր դեպքերում և հանգամանքներում: Այն մեզ մղում է ավելի շատ մոտենալ Աստծուն՝ թույլ տալով Նրան ավելի շատ մոտենալ մեզ (տես Հակոբոս 4.8):

Մեր անձնական վկայությունը պաշտպանիչ վահան է և երկաթե ձողի նման ապահով առաջնորդում է մեզ խավարի ու խառնաշփոթի միջով: (Դիտեր Ֆ. Ուխդորֆ, «Անձնական վկայության ուժը», Լիահոնա, նոյեմբեր 2006, 39)

Օժանդակ ուսումնական վարժություններ

Վարդապետություն և Ուխտեր 76․40–43։ Ուրախության ավետիք բոլորի համար

Ուսանողները կարող են պատրաստվել ուսումնասիրելու հատվածներ 40–43-ը՝ քննարկելով հետևյալ հարցերը.

• Ի՞նչ բարի լուր եք ստացել վերջերս:

• Որո՞նք են աշխարհին երբևէ տրված մեծագույն բարի լուրերի օրինակները:

Ուսանողներին առաջարկեք Վարդապետություն և Ուխտեր 76:40–43 հատվածներում փնտրել ուրախության ավետիքը երկնքից։ Նշեք, որ ավետարան բառը հատված 40-ում նշանակում է «բարի լուր»

• Ի՞նչ բարի լուր գտաք այս հատվածներում։

Որպեսզի օգնեք ուսանողներին հասկանալ, թե ինչ է նշանակում այն, որ Հիսուս Քրիստոսը «փրկում է իր ձեռքի բոլոր գործերը» (Վարդապետություն և Ուխտեր 76․43), բացատրեք, որ նրանք, ովքեր ժառանգում են սելեստիալ արքայությունը, կստանան վեհացման օրհնությունները կամ հավերժական կյանք՝ Երկնային Հոր հետ։ Բայց Իր ողորմածությամբ Փրկիչը նաև փառքի այլ արքայություններում փրկության այլ օրհնություններ է առաջարկում նրանց, ովքեր չեն համապատասխանում սելեստիալ արքայությանը:

Կարող եք ցուցադրել «Փրկություն և վեհացում» տեսանյութը 2:55-6:05, որը կօգնի ուսանողներին ավելի լավ հասկանալ այն փրկությունը, որ Փրկիչը տալիս է Երկնային Հոր զավակներին:

Վարդապետություն և Ուխտեր 76․75։ «Կուրաց[ած]՝ մարդկային խորամանկության պատճառով»

Որպեսզի օգնեք ուսանողներին ավելի լավ հասկանալ հատված 75-ի խորհրդանշականությունը, կարող եք առաջարկել որևէ պատրաստակամ ուսանողի կապել աչքերը։ Այնուհետև մեկ այլ ուսանողի առաջարկեք, որ աչքերը կապած ուսանողին պարզ առաջադրանքներ կատարելու ցուցումներ տա, օրինակ՝ հասարակ նկար նկարել կամ սենյակում որևէ առարկա տեղադրել: Բավարար ժամանակից հետո արձակեք աչքերի կապը և խնդրեք այն ուսանողին, որի աչքերը կապված էին, նկարագրել, թե ինչ զգացողություններ ուներ այդ փորձառության ժամանակ։

Այնուհետև ուսանողները կարող են ուսումնասիրել Վարդապետություն և Ուխտեր 76.75 հատվածը՝ փնտրելով այն մարդկանց նկարագրությունը, որոնք կժառանգեն թերեստրիալ արքայությունը: Առաջարկեք ուսանողներին քննարկել, թե իրենց կարծիքով, ինչ է նշանակում լինել հոգևորապես կույր, և ինչպես կարող է իրենց սահմանափակել հոգևոր կուրությունը: Այնուհետև խնդրեք ուսանողներին նշել մի քանի բան, որ այսօր դեռահասների մոտ կարող է առաջացնել հոգևոր կուրություն:

Վարդապետություն և Ուխտեր 76․111: «Ապարանքներում, որոնք պատրաստված են»

Երբ ուսանողներն ուսումնասիրեն փառքի երեք աստիճանները, օգնեք նրանց Նոր Կտակարանից իրենց սովորածը կապել Փրկչի ուսմունքների հետ։ Առաջարկեք որևէ ուսանողի բարձրաձայն կարդալ Հովհաննես 14.2 հատվածը և խնդրեք դասարանի անդամներին կիսվել, թե ինչ են հասկանում Փրկչի խոսքերից: Առաջարկեք նրանց խաչաձև կապել Հովհաններ 14․2 հատվածը Վարդապետություն և Ուխտեր 76․111 հատվածի հետ և փնտրել նմանություններ այդ երկու հատվածների միջև: