Սեմինարիա
Դաս 89. Վարդապետություն և Ուխտեր 78. Տիրոջ շտեմարանը

«Դաս 89․ Վարդապետություն և Ուխտեր 78․ Տիրոջ շտեմարանը», Վարդապետություն և Ուխտեր․ Սեմինարիայի ուսուցչի ձեռնարկ (2025)

«Վարդապետություն և Ուխտեր 78», Վարդապետություն և Ուխտեր․ Սեմինարիայի ուսուցչի ձեռնարկ

Դաս 89. Վարդապետություն և Ուխտեր 77–80

Վարդապետություն և Ուխտեր 78

Տիրոջ շտեմարանը

Նյուել Ք. Ուիթնիի խանութը

Տերը հրահանգեց Ջոզեֆ Սմիթին, Սիդնի Ռիգդոնին, Նյուել Ք. Ուիթնիին և այլ քահանաների կազմել մի խումբ, որը կոչվում է Միացյալ Միաբանություն: Միաբանությունը տնօրինում էր Եկեղեցու ունեցվածքը, շտեմարանները և հրատարակչական գործունեությունը, ինչպես նաև միջոցներ տրամադրում՝ Սրբերի նյութական կարիքները հոգալու համար: Այս դասը կօգնի ուսանողներին մեծացնել Փրկչին նմանվելու իրենց ցանկությունը՝ կարիքավորների մասին հոգ տալու միջոցով։

Հնարավոր ուսումնական վարժություններ

Միացյալ Միաբանություն

Դասը սկսելու համար կարող եք ուսանողներին օգնել ստեղծել սցենար նյութական կարիքներ ունեցող ընտանիքի մասին։ Սցենարում ներառեք ֆինանսական դժվարությունները, որոնց ընտանիքը բախվում է, ինչպես նաև ընտանիքի անդամների հատուկ կարիքները: Այս սցենարն օգտագործվելու է ավելի ուշ՝ դասի ընթացքում։

Բացատրեք, որ Վարդապետություն և Ուխտեր 78 բաժինն ուսումնասիրելիս ուսանողներն ավելին կիմանան այն մասին, թե Տերն ինչպես է օգնում մեզ հոգ տանել կարիքի մեջ գտնվողների մասին։ Առաջարկեք ուսանողներին փնտրել հայտնություն՝ իմանալու համար, թե Տերը ում է ուզում, որ իրենք օգնեն և իրենք ինչ կարող են անել:

1832 թվականի մարտի 1-ին Մարգարե Ջոզեֆ Սմիթը հանդիպեց մի խումբ քահանաների հետ Կիրթլենդում (Օհայո): Հանդիպման ժամանակ Մարգարեն հայտնություն ստացավ, որը նկարագրված է Վարդապետություն և Ուխտեր 78 բաժնում: Այնուհետև ստեղծվեց Միացյալ Միաբանությունը: Հիմնվելով նվիրաբերման օրենքի վրա՝ Միացյալ Միաբանությունը կառավարում էր Եկեղեցու ունեցվածքը, ֆինանսական գործունեությունը և տպագրական աշխատանքները Օհայոյում և Միսսուրիում: Միաբանության միջոցով Տերը հիմնեց շտեմարան՝ կարիքավորների մասին հոգ տանելու համար, և Ջոզեֆ Սմիթին, Սիդնի Ռիգդոնին և Նյուել Ք. Ուիթնիին հրահանգվեց մեկնել Միսսուրի (Սիոն)՝ այն կազմակերպելու համար:

Կարդացեք Վարդապետություն և Ուխտեր 78․1–6 հատվածները՝ փնտրելով պատճառները, թե ինչու Տերը ցանկացավ, որ իր ծառաները ստեղծեն Միաբանությունը։

  • Ի՞նչ են այս հատվածներն ուսուցանում այն մասին, թե Տերն ինչ էր ցանկանում, որ Իր ժողովուրդն անի։

  • Ձեր կարծիքով, աղքատների մասին հոգ տանելն ինչո՞ւ է անհրաժեշտ, «որպեսզի առաջ գնա [Սիոնի] գործը»: Դա ինչպե՞ս կարող է փառք բերել Երկնային Հորը:

Տիրոջ շտեմարանը

Կարող եք դասարան բերել մի արկղ և վրան գրել՝ «Տիրոջ շտեմարան»։ Հարցրեք ուսանողներին, թե իրենց կարծիքով, ինչ է Տիրոջ շտեմարանը: Կարող եք հրավիրել եպիսկոպոսին կամ ճյուղի նախագահին՝ քննարկելու, թե ինչպես է Տիրոջ շտեմարանը գործում ձեր տարածքում:

Կարդացեք Տիրոջ շտեմարանի հետևյալ սահմանումը՝ փնտրելով, թե ինչպես է Փրկիչն օգնում կարիքավորներին:

Եկեղեցում առկա բոլոր ռեսուրսները, որոնք նախատեսված են նյութական կարիք ունեցողներին օգնելու համար, կոչվում են Տիրոջ շտեմարան (տես Վարդապետություն և Ուխտեր 82․18-19)։ Դրանց թվում են՝ անդամների առաջարկած ժամանակը, տաղանդները, կարեկցանքը, նյութերը և ֆինանսական միջոցները՝ կարիքավորներին օգնելու համար:

Տիրոջ շտեմարանը գոյություն ունի յուրաքանչյուր ծխում և ցցում: Ղեկավարները հաճախ կարող են օգնել անհատներին և ընտանիքներին լուծումներ գտնել իրենց կարիքների համար՝ հիմնվելով ծխի և ցցի անդամների կողմից առաջարկվող գիտելիքների, հմտությունների և ծառայության վրա: (Ընդհանուր ձեռնարկ. Ծառայել Հիսուս Քրիստոսի Վերջին Օրերի Սրբերի Եկեղեցում, 22.2.1, ChurchofJesusChrist.org)

Քննարկեք, թե երիտասարդներն ինչ հատուկ եղանակներով կարող են իրենց ներդրումն ունենալ Տիրոջ շտեմարանում (այն է՝ ժամանակ, տաղանդներ, կարեկցանք, նյութեր, ֆինանսական միջոցներ): Յուրաքանչյուր ուսանողի տվեք մի թերթիկ։ Խնդրեք ուսանողներին գրել առնվազն մի որոշակի բան, որ իրենք անձամբ կարող են ներդնել Տիրոջ շտեմարանում, ապա իրենց թերթիկը դնեն տուփի մեջ:

Առաջարկեք ուսանողներից մեկին հանել դրանք շտեմարանից և սկսեք քննարկում այն մասին, թե այդ հատուկ ներդրումներն ինչպես կարող են օգնել դասարանի ստեղծած սցենարի կարիքավոր ընտանիքին: Այս վարժությունը կարող եք կրկնել մի քանի անգամ։

Հետևյալ պարբերության վրա ուսանողները պետք է ինքնուրույն մտածեն:

Մտածեք այն մասին, թե որքանով եք պատրաստկամ տրամադրել ձեր ժամանակը, տաղանդները և միջոցները՝ կարիքավորներին օգնելու համար (շատ պատրաստակամ եմ, որոշ չափով պատրաստակամ եմ, այդքան էլ պատրաստակամ չեմ):

Խրախուսեք ուսանողներին ոգեշնչում փնտրել Սուրբ Հոգու միջոցով, որը կօգնի իրենց ավելի պատրաստակամ լինել՝ օգնելու կարիքավորներին, ինչպես նաև իմանալ, թե իրենք ինչպես կարող են ներդրում ունենալ Տիրոջ շտեմարանում:

Կարդացեք Վարդապետություն և Ուխտեր 78․7–8, 14–15 հատվածները՝ փնտրելով, թե ինչ օրհնություններ է խոստացել Տերը:

  • Ինչպե՞ս կարող են այդ օրհնություններն ազդել ձեր և ձեր ծանոթների վրա:

  • Ի՞նչ է Տերը խոստացել նրանց, ովքեր հոգ են տանում կարիքավորների մասին:

    Օգնեք ուսանողներին բացահայտել հետևյալ ճշմարտությունը. Աղքատների և կարիքավորների մասին հոգ տանելն օգնում է մեզ նախապատրաստվել սելեստիալ արքայությունում տեղ ունենալուն։

    Կարող են օգտագործվել Մատթեոս 25․31–40 հատվածները՝ օգնելու ուսանողներին հասկանալ սկզբունքը:

  • Ձեր կարծիքով, կարիքավորների մասին հոգ տանելը ինչո՞ւ է օգնում մեզ նախապատրաստվել ժառանգելու սելեստիալ արքայությունը:

  • Ինչո՞ւ է Փրկիչը կարիքավորների մասին հոգ տանելու օրինակ հանդիսանում:

  • Ինչպե՞ս կարող է մարդը մեծացնել կարիքավորներին սիրելու և նրանց մասին հոգալու իր ցանկությունն այնպես, ինչպես դա անում է Փրկիչը:

Ինչ կարող ենք մենք անել

Կարդացեք Վարդապետություն և Ուխտեր 78.17–22 հատվածները՝ փնտրելով հիմնական բառերն ու արտահայտությունները, որոնք կարող են օգնել մեզ հետևել Փրկչին:

Որպեսզի օգնեք ուսանողներին ներգրավվել քննարկման մեջ, կարող եք ցուցադրել հետևյալ հարցերը և առաջարկել նրանց մտածել, թե իրենք ինչպես կպատասխանեին դրանց: Կարող եք պատահականության սկզբունքով ընտրել այն ուսանողներին, որոնք պետք է պատասխանեն հարցերին՝ խնդրելով դասարանից որևէ մեկին ընտրել տարվա որևէ ամիս: Պատրաստակամ ուսանողները, որոնք ծնվել են այդ ամսին, կարող են ընտրել այն հարցը, որին ցանկանում են պատասխանել, սակայն չպետք է իրենց պարտադրված զգան մասնակցելու քննարկմանը:

դասընթացի պատկերակ Յուրաքանչյուր ուսանողի օգնեք մասնակցել ուսումնական գործընթացին․ Դրա վերաբերյալ լրացուցիչ ուսուցում ստանալու համար տես «Ստեղծեք միջավայր, որտեղ բոլորն իրենց հարգված են զգում և գիտեն, որ իրենց ներդրումը գնահատվում է» դասընթացը Ուսուցչի կատարելագործման հմտություններ․ Սիրեք նրանց, ում ուսուցանում եք ուսուցողական նյութում։ Կարող եք զարգացնել այդ հմտությունը, ասելով, որ արժևորում եք ուսանողներին՝ մինչև նրանք կարտահայտվեն կամ երբ կբարձրացնեն ձեռքը։

  • Ո՞ր բառերն ու արտահայտություններն էին առավել կարևոր ձեզ համար: Ինչո՞ւ։

  • Ի՞նչ գտաք, որը կարող է օգնել մեզ կատարել կարիքավորների մասին հոգ տանելու Փրկչի պատվիրանը:

  • Ի՞նչ գտաք, որն արտացոլում է Փրկչի ցանկությունը, որ մենք նմանվենք Իրեն:

Ուսանողներին տվեք ևս մեկ թերթիկ: Նրանց ժամանակ տվեք հասկանալու այն հուշումները, որոնք իրենք ստացել են կարիքավոր մեկին օգնելու վերաբերյալ կամ այն հատուկ եղանակները, որոնցով, ըստ իրենց, կարող են ներդրում ունենալ Տիրոջ շտեմարանում: Առաջարկեք նրանց գրել իրենց զգացածը: Այնուհետև ուսանողները կարող են իրենց թերթիկը դնել Տիրոջ շտեմարանը խորհրդանշող տուփի մեջ՝ որպես օգնելու պատրաստակամություն ցույց տալու եղանակ, կամ կարող են այդ թերթիկը տանել տուն՝ որպես հիշեցում: