Lesona 89: Fotopampianarana sy Fanekempihavanana 77–80

Fotopampianarana sy Fanekempihavanana 78

Ny trano fitehirizan’ny Tompo

Nandidy an’i Joseph Smith, i Sidney Rigdon, i Newel K. Whitney, ary ireo mpisorona avo hafa ny Tompo mba hanao fandaminana eo amin’izy samy izy ho lasa vondrona iray antsoina hoe Orinasa Miray. Ilay orinasa dia nitantana ny fananan’ny Fiangonana sy ny trano fitehirizany ary ny ezaka nataony teo amin’ny fanontana, ary nanome loharanom-pitaovana hanampiana amin’ny fanomezana fahafaham-po ny zavatra ara-nofo ilain’ny Olomasina. Ity lesona ity dia afaka manampy ireo mpianatra hampitombo ny faniriany ho tonga tahaka ny Mpamonjy amin’ny alalan’ny fikarakarana ireo izay sahirana.

Sahanasa fianarana azo atao

Ilay Orinasa Miray

Ny fomba iray hanombohana ny lesona dia ny fanampiana ireo mpianatra hamorona rafi-tantara iray ahitana fianakaviana manana zavatra ilaina ara-nofo. Ao anatin’ny rafi-tantara, dia ampidiro ny fahasahiranana ara-bola atrehin’ilay fianakaviana sy ny zavatra ilainy manokana. Horesahina any aoriana any ao amin’ny lesona io rafi-tantara io.

Hazavao fa hianatra bebe kokoa momba ny fomba hanampian’ny Tompo antsika hikarakara ireo sahirana ireo mpianatra rehefa mandalina ny Fotopampianarana sy Fanekempihavanana 78. Asao ny mpianatra hikatsaka fanambarana mba hahafantarana izay olona mety hasain’ny Tompo hampian’izy ireo sy ny zavatra azon’izy ireo atao.

Tamin’ny 1 martsa 1832, dia nihaona tamin’ny andiana mpisorona avo iray tao Kirtland, Ohio, ny Mpaminany Joseph Smith. Nandritra ilay fivoriana, ny Mpaminany dia nanonona ny fanambarana voarakitra ao amin’ny Fotopampianarana sy Fanekempihavanana 78. Taty aoriana dia noforonina ny Orinasa Miray. Araka ny lalàn’ny fanokanana dia nitantana ny fananan’ny Fiangonana sy ny ezaka ara-bola nataony ary ny fanontana printy tany Ohio sy Missouri ny Orinasa Miray. Tamin’ny alalan’ilay orinasa no nanorenan’ny Tompo trano fitehirizana hikarakarana ireo sahirana, ary i Joseph Smith sy i Sidney Rigdon ary i Newel K. Whitney dia nasaina nandeha tany Missouri (Ziona) mba handamina izany.

Vakio ny Fotopampianarana sy Fanekempihavanana 78:1–6 mba hitadiavana ny antony nanirian’ny Tompo ny mpanompony mba handamina eo amin’izy samy izy amin’izany fomba izany.

• Inona no ampianarin’ireo andininy ireo mikasika ny fanirian’ny Tompo ho an’ny olony?

• Nahoana araka ny eritreritrao no ilaina ny fikarakarana ny mahantra mba “hampandroso[ana] ny foto-kevitr[’i]” Ziona? Ahoana no ahafahan’izany mitondra voninahitra ho an’ny Ray any An-danitra?

Ny trano fitehirizan’ny Tompo

Hevero ny hitondra baoritra iray ao an-dakilasy ary asio soratra hoe “Ny trano fitehirizan’ny Tompo” izany. Anontanio ny mpianatra ny atao hoe trano fitehirizan’ny Tompo araka ny eritreritr’izy ireo. Azonao atao ny manasa eveka na filohan’ny sampana iray mba hiresaka momba ny fomba fiasan’ny trano fitehirizan’ny Tompo ao amin’ny faritra misy anao.

Vakio ity famaritana manaraka ity momba ny trano fitehirizan’ny Tompo, ka tadiavo ny fomba nanampian’ny Mpamonjy ireo izay sahirana.

Ireo loharanom-panampiana rehetra misy ao amin’ny Fiangonana mba hanampiana ireo izay mila fanampiana ara-nofo dia antsoina hoe trano fitehirizan’ny Tompo (jereo ny Fotopampianarana sy Fanekempihavanana 82:18–19). Tafiditra ao anatin’izany ny fanoloran’ireo mpikambana fotoana, talenta, fangorahana, fitaovana ary fanampiana ara-bola mba hanampiana ireo izay sahirana.

Ny trano fitehirizan’ny Tompo dia misy isaky ny paroasy sy ny tsatòka tsirairay. Ny mpitarika dia afaka manampy ny isam-batan’olona sy ny fianakaviana mba hahita vahaolana mahakasika ny zavatra ilain’izy ireo amin’ny alalan’ny fampiasana ny fahalalana sy ny fahaiza-manao ary ny fahafaha-manompo atolotr’ireo mpikambana ao amin’ny paroasy sy tsatòka. (General Handbook: Serving in The Church of Jesus Christ of Latter-day Saints, 22.2.1, ChurchofJesusChrist.org)

Ifanakalozy hevitra ireo fomba manokana ahafahan’ny tanora mandray anjara amin’ny trano fitehirizan’ny Tompo (izany hoe, fotoana, talenta, fangorahana, fitaovana, loharano ara-bola). Omeo taratasy kely ny mpianatra. Angataho ny mpianatra mba hanoratra zavatra manokana iray farafahakeliny izay azon’izy ireo atolotra manokana ao amin’ny trano fitehirizan’ny Tompo ary avy eo dia hametraka ny taratasiny ao anaty boaty.

Asao ny mpianatra iray hanala ireo zavatra ao amin’ny trano fitehirizana ary hitarika fifanakalozan-kevitra mikasika ny fomba ahafahan’ny fandraisana anjara manokana manampy ny fianakaviana ao anatin’ilay rafi-tantara noforonin’ny kilasy. Avereno imbetsaka io fanazaran-tena io.

Natao hosaintsainin’ny mpianatra samirery ity teny nambara manaraka ity.

Eritrereto hoe hatraiza ny fahavononanao hanome ny fotoananao, ny talentanao, ary ny fanananao mba hanampiana ireo sahirana (tena vonona, vonombonona kely ihany, na tsy tena vonona).

Amporisiho ny mpianatra hikatsaka fitaomam-panahy amin’ny alalan’ny Fanahy Masina mba hanampiana azy ireo hahatsapa ho vonona kokoa hanampy ireo sahirana ary koa hahafantatra ny fomba ahafahan’izy ireo mitondra anjara biriky ao amin’ny trano fitehirizan’ny Tompo.

Vakio ny Fotopampianarana sy Fanekempihavanana 78:7–8, 14–15 mba hitadiavana ireo fitahiana nampanantenain’ny Tompo.

• Ahoana no ahafahan’ireo fitahiana ireo hisy fiantraikany eo aminao sy eo amin’ny olona fantatrao?

• Inona no nampanantenain’ny Tompo ireo izay mikarakara ireo sahirana?

  Ampio ny mpianatra hamantatra fahamarinana iray toy izao manaraka izao: Ny fikarakarana ny mahantra sy ny sahirana dia manampy antsika hiomana amin’ny toerana iray ao amin’ny fanjakana selestialy.

  Ny Matio 25:31–40 dia azo ampiasaina mba hanampiana ireo mpianatra hahatakatra ilay fitsipika.

• Amin’ny fomba ahoana araka ny eritreritrao no manampy antsika handova ny fanjakana selestialy ny fikarakarana ireo sahirana?

• Ahoana no mahatonga ny Mpamonjy ho ohatra amin’ny fikarakarana ireo sahirana?

• Ahoana no ahafahan’ny olona iray mampitombo ny faniriany hitia sy hikarakara ireo izay sahirana tahaka ny ataon’ny Mpamonjy?

Ny zavatra azontsika atao

Vakio ny Fotopampianarana sy Fanekempihavanana 78:17–22 mba hitadiavana ireo teny na andian-teny manan-danja izay afaka manampy antsika hanaraka ny Mpamonjy.

Mba hanampiana ireo mpianatra handray anjara amin’ny fifanakalozan-kevitra dia azonao atao ny mampiseho ireto fanontaniana manaraka ireto ary manome fahafahana ny mpianatra hieritreritra ny fomba hamaliany izany. Azonao atao ny misafidy an-kisendrasendra mpianatra mba hamaly amin’ny alalan’ny fangatahana olona iray mba hisafidy volana iray ao anatin’ny taona. Ireo mpianatra vonona izay teraka tamin’io volana io dia afaka misafidy fanontaniana iray hovalina nefa tsy tokony hahatsiaro ho voatery handray anjara.

Ampio ny mpianatra tsirairay handray anjara amin’ny traikefa amin’ny fianarana: Raha mila fanazaran-tena bebe kokoa momba izany, dia jereo ny fanofanana mitondra ny lohateny hoe “Mamoròna tontolo isian’ny fanajana ny rehetra sy hahafantarany fa sarobidy ny anjara biriky entiny” hita ao amin’ny Fahaiza-manao ho fampivoarana ny mpampianatra: Tiavo ireo izay ampianarinao. Hevero ny hampihatra ilay fahaiza-manao amin’ny alalan’ny fampitana fa manome lanja ny mpianatra ianao alohan’ny hanehoany hevitra na rehefa manangana ny tanany izy ireo mba haneho hevitra.

• Inona no teny na andian-teny manan-danja indrindra aminao? Nahoana?

• Inona no hitanao fa afaka manampy antsika hankatò ny didin’ny Mpamonjy mba hahafahana mikarakara ireo izay sahirana?

• Inona no hitanao izay maneho ny fanirian’ny Mpamonjy mba hahatongavantsika tahaka Azy?

Omeo taratasy hafa ny mpianatra. Omeo fotoana izy ireo hamantatra ireo bitsika mety ho azony mikasika ny fanampiana olona sahirana na ireo fomba manokana tsapany fa azony itondrana anjara biriky ao amin’ny trano fitehirizan’ny Tompo. Asao izy ireo hanoratra ny zavatra tsapany. Azon’ny mpianatra atao avy eo ny mametraka ny taratasiny ao anatin’ilay efajoro maneho ny trano fitehirizan’ny Tompo ho fomba iray hanehoana ny fahavononany hanampy, na azony entina mody ilay taratasy ho fampahatsiahivana.

Loharanom-pitaovana fanampiny

Ahoana no fomba anampian’ny Fiangonan’ny Tompo antsika hikarakara ireo izay mila fanampiana?

Nanazava izao ny Filoha Russell M. Nelson:

Mba hanamaivanana ny hanoanana dia mampiasa trano fitehirizan’ny eveka miisa 124 manerana izao tontolo izao ny Fiangonana. Amin’ny alalan’izy ireo dia fangatahana sakafo tokotokony ho 400.000 eo no valina isan-taona ho an’ireo olona sahirana. Any amin’ireo toerana tsy misy trano fitehirizana dia mampiasa vola avy amin’ny kitapom-bolan’ny fanatitra amin’ny fifadian-kanin’ny Fiangonana ireo eveka sy filohan’ny sampana mba hanomezana sakafo sy vatsy ho an’ireo mpikambana sahirana ao amin’izy ireo. (Russell M. Nelson, “Ny didy lehibe faharoa,” Liahona, nôv. 2019, 98)

Nampianatra izao ny Filoha Henry B. Eyring ao amin’ny Fiadidiana Voalohany hoe:

Satria ren’ny Tompo ny hiaka ataon’izy ireo ary tsapany ny fangorahanao lalina [ireo sahirana], dia efa nanome fomba Izy hatrany am-piandohana hahafahan’ireo mpianany manampy. Nanasa ireo zanany Izy hanokana ny fotoanany, ny fananany ary ny tenany mba hiaraka Aminy amin’ny fanompoana ny hafa.

Nisy fotoana niantsoana izany fombany entina manampy izany hoe fiainana ny lalàn’ny fanokanana. Nandritra ny fotoana hafa dia nantsoina hoe lamina miray izany. Amin’izao fotoanantsika izao izany dia antsoina hoe fandaharan’asa fifanampiana an’ny Fiangonana.

Novaina ny anarana sy ireo pitsopitsony amin’ny fanatanterahana izany mba hifanaraka amin’ny zavatra ilaina sy ny toe-javatra iainan’ny olona. Kanefa ny fomban’ny Tompo entina hanampiana ireo izay mila fanampiana ara-nofo dia mitaky ny fitiavana tsy misy tambiny avy amin’ireo olona izay manokana ny tenany sy ny zavatra ananany ho an’ Andriamanitra sy ho an’ny Asany.

Nanasa sy nandidy antsika Izy handray anjara amin’ny Asany mba hoentina hampitraka ireo izay mila fanampiana. Manao fanekempihavanana hanao izany isika ao amin’ny ranon’ny batisa sy any amin’ny tempoly masin’ Andriamanitra. Manavao izany fanekempihavanana izany isika isaky ny Alahady rehefa mandray ny fanasan’ny Tompo. (Henry B. Eyring, “Fahafahana hanao zava-tsoa,” Liahona, mey. 2011, 22)

Fotopampianarana sy Fanekempihavanana 78:3–4. Ahoana no ampiasan’ny Fiangonana ny loharano ara-bolany mba hampandrosoana ny asan’ny Mpamonjy?

Ireto loharano manaraka ireto dia afaka manampy ny mpianatra hahatakatra ny fomba itahian’ireo loharano ara-nofon’ny Fiangonana ireo zanaky ny Ray any An-danitra manerana izao tontolo izao.

• Church Finances—Commercial Businesses (Fitantanam-bolan’ny Fiangonana—Orinasa ara-barotra) (ChurchofJesusChrist.org)

• Church Finances and a Growing Global Faith (Fitantanam-bolan’ny Fiangonana sy fitomboan’ny finoana maneran-tany) (ChurchofJesusChrist.org)

• The Church and Its Financial Independence (Ny Fiangonana sy ny Fahaleovan-tenany ara-bola) (ChurchofJesusChrist.org)

• Russell M. Nelson, “Ny didy lehibe faharoa,” Liahona, nôv. 2019, 96–100

• Dallin H. Oaks, “Manampy ny mahantra sy ny ory,” Liahona, nôv. 2022, 6–8

• newsroom.ChurchofJesusChrist.org

Fotopampianarana sy Fanekempihavanana 78:5–6. Inona no dikan’ny hoe “hitovy amin’ny zavatra ety an-tany”?

Ny hoe “hitovy amin’ny zavatra ety an-tany” dia tsy midika hoe hanana fananana ara-nofo mitovy ny tsirairay, fa kosa hanana zo mitovy eo amin’ireo fananana araka ny toe-javatra samihafa misy azy sy ireo zavatra samihafa ilainy. (jereo ny Fotopampianarana sy Fanekempihavanana 51:3; 82:17). Nampanantena ireo Olomasina izay niaina io fitsipika io ny Tompo fa hizara izay rehetra ananany amin’izy ireo Izy ary “hitovy amin’ny famatoran’ny zavatra any an-danitra,” izy ireo (Fotopampianarana sy Fanekempihavanana 78:5).

Aiza no ahafahako mianatra misimisy kokoa momba ny Orinasa Miray?

ChurchofJesusChrist.org

Sahanasa fianarana fanampiny

Fotopampianarana sy Fanekempihavanana 78:15. Ilay Iray Masin’i Ziona

Mba hanampiana ny mpianatra hianatra momba ny Mpamonjy amin’ny alalan’ny fifantohana amin’ireo anarana fiantsoana Azy sy ireo anjara asany dia azonao atao ny mandalina an’ilay fiantsoana Azy hoe ilay Iray Masin’i Ziona. Mety hahasoa ny mamaky sy mifanakalo hevitra momba ny Fotopampianarana sy Fanekempihavanana 97:19–21; Mosesy 7:18, 53. Azon’ny mpianatra atao ny mamantatra ireo toetra ilaina mba hanorenana an’i Ziona sy ny fomba mahatonga ny Mpamonjy ho ohatra eo amin’ireo toetra ireo.

Fotopampianarana sy Fanekempihavanana 78:18. “Hitari-dalana anareo Aho”

Azonao atao ny manampy ny mpianatra hampitombo ny fahatokian-tenany fa ny Ray any An-danitra dia hitarika sy hitantana ny fiainany. Rehefa avy mamaky ny Fotopampianarana sy Fanekempihavanana 78:18 ianao dia afaka mifanakalo hevitra momba ny fomba itarihan’ny Ray any An-danitra antsika (amin’ny alalan’ny Fanahy Masina, ray aman-dreny, mpitarika ao amin’ny Fiangonana, tsodranon’ny patriarika, sy ny maro hafa). Afaka mizara zavatra niainana manokana ny mpianatra. Azonao atao ihany koa ny mifanakalo hevitra mikasika ny fomba ahafahan’ny fahafantarantsika fa hitari-dalana antsika ny Ray any An-danitra manampy antsika hifaly. Ity teny nambara manaraka ity dia mety hanatsara ny fifanakalozan-kevitra.

Nilaza izao ny Loholona Ronald A. Rasband ao amin’ny Kôlejin’ny Apôstôly Roambinifolo:

Enga anie isika handray amim-pahamatorana ilay antson’ny Tompo hoe “matokia fa hitari-dalana anareo Aho” [Fotopampianarana sy Fanekempihavanana 78:18]. Mitarika antsika amin’ny alalan’ny Fanahy Masina Izy. Enga anie isika hiaina eo akaikin’ny Fanahy, hanao asa haingana araka ireo bitsika voalohany azontsika, noho ny fahafantarantsika fa avy amin’ Andriamanitra izy ireny. Mijoro ho vavolombelona aho ny amin’ny herin’ny Fanahy Masina izay hitarika antsika sy hiaro antsika ary hiaraka amintsika mandrakariva. (Ronald A. Rasband, “Avelao hitarika anao ny Fanahy Masina,” Liahona, mey 2017, 96)

Fotopampianarana sy Fanekempihavanana 78:19. Raiso amim-pankasitrahana ny zava-drehetra

Mba hahatsapana ny maha-zava-dehibe ny fankasitrahana dia afaka mamaky sy mifanakalo hevitra momba ny Fotopampianarana sy Fanekempihavanana 78:19 ny mpianatra. Rehefa mifanakalo hevitra momba ny dikan’ny hoe “mandray ny zava-drehetra amin’ny fankasitrahana” izy ireo dia ataovy lisitra ny zavatra azon’izy ireo isaorana ny Tompo ary tadiavo ireo fitahiana nampanantenain’ny Tompo an’ireo izay “mandray ny zava-drehetra amin’ny fankasitrahana.”