Fotopampianarana sy Fanekempihavanana 77–80

Fotopampianarana sy Fanekempihavanana 77–80

Topimaso ankapobeny

Ny Tompo dia nanome toromarika an’i Joseph Smith sy ireo mpitarika hafa ao amin’ny Fiangonana mba hanangana orinasa iray hitantana ny asa aman-draharahan’ny Fiangonana sy ny ezaka atao eo amin’ny fanontana printy. Io orinasa io dia nantsoina hoe Orinasa Miray ary nanara-maso ny ezaka nataon’ny Fiangonana mba hanangonam-bola sy hikarakarana ireo sahirana. Mba hanatanterahana ny didin’ny Mpamonjy hoe “hitory ny filazantsara amin’ny olombelona rehetra” (Fotopampianarana sy Fanekempihavanana 80:1), dia nantsoina hanao asa fitoriana ny tsirairay. Nahazo antso hanao asa fitoriana i Jared Carter, i Stephen Burnett, ary i Eden Smith.

Ampio ny mpianatra tsirairay handray anjara amin’ny traikefa amin’ny fianarana: Tena ekeo fa ilaina ny mpianatra tsirairay ary manana anjara biriky tokony hatao. Ny sasany dia mety hirona handray anjara kokoa noho ny hafa. Manaova ezaka fanampiny ary mahaiza mamorona mba hanampiana ny mpianatra tsirairay handray anjara amin’ny fomba izay mampahazo aina azy ireo. Mba hahitana ny fomba nanaovan’ny Mpamonjy izany dia jereo ny fizarana “Nataon’ny Mpamonjy izay hahatsapan’ny rehetra ho voahaja sy manana ny lanjany” ao amin’ny Mampianatra araka ny fomban’ny Mpamonjy. Afaka mahita ohatra iray momba ny fomba hanaovana izany ianao ao amin’ny lesona ho an’ity herinandro ity izay mitondra ny lohateny hoe “Fotopampianarana sy Fanekempihavanana 78.”

Miomana hampianatra

Ity fampahalalana manaraka ity dia manome hevitra anao momba ny zavatra mety hilaina homanina mialoha ho an’ny lesona tsirairay.

Fotopampianarana sy Fanekempihavanana 78

Tanjon’ny lesona: Mba hanampiana ireo mpianatra hampitombo ny faniriany ho tonga tahaka ny Mpamonjy amin’ny alalan’ny fikarakarana ireo izay sahirana.

• Fanomanana ny mpianatra: Ny fandalinana ny soratra masina dia fomba iray ahafahan’ny mpianatra miomana tsara kokoa handray fanambarana ho an’ny tena manokana. Asao ny mpianatra hivavaka mangina mandritra ny lesona mba hahafantarana ny zavatra tian’ny Ray any An-danitra hianarany, na ho tsapany, na na hataony vokatry ny zavatra nianarany.

• Fitaovana ilaina: Baoritra misy soratra hoe “Trano fitehirizan’ny Tompo”; taratasy kely ho an’ny mpianatra tsirairay

Fotopampianarana sy Fanekempihavanana 79–80

Tanjon’ny lesona: Mba hanampiana ireo mpianatra hizara ny filazantsaran’ny Mpamonjy mandritra ny fiainany.

• Fanomanana ny mpianatra: Hevero ny hanasa ny mpianatra mba handinika ombam-bavaka ireo olona izay azony izarana ny filazantsaran’i Jesoa Kristy. Amporisiho ny mpianatra hieritreritra ny fomba hitahiana ireo olona ireo amin’ny alalan’ny hafatry ny filazantsara ary hieritreritra ireo fomba tsotra ahafahan’izy ireo mizara izany.

• Fitaovana ilaina: Tahadikan’ireo taratasy nozaraina hoe “Torio ny Filazantsarako”