Սեմինարիա
Դաս 95․ Վարդապետություն և Ուխտեր 84.33–44․ Քահանայության երդումը և ուխտը

«Դաս 95․ Վարդապետություն և Ուխտեր 84․33–44. Քահանայության երդումը և ուխտը», Վարդապետություն և Ուխտեր․ Սեմինարիայի ուսուցչի ձեռնարկ (2025)

«Վարդապետություն և Ուխտեր 84․33–44», Վարդապետություն և Ուխտեր․ Սեմինարիայի ուսուցչի ձեռնարկ

Դաս 95․ Վարդապետություն և Ուխտեր 84

Վարդապետություն և Ուխտեր 84․33–44

Քահանայության երդումը և ուխտը

երիտասարդ կինը ստանում է քահանայության օրհնությունը

Վարդապետություն և Ուխտեր 84.20 հատվածում Փրկիչը հայտնել է, որ «[քահանայության] արարողություններում է բացահայտվում աստվածայնության զորությունը»: Քահանայության այս զորությունը հասանելի է Եկեղեցու բոլոր անդամներին, որոնք կապում և պահում են մկրտության և տաճարային ուխտերը: Վարդապետություն և Ուխտեր 84.33–44 հատվածներում Փրկիչն ուսուցանել է այն երդումը և ուխտը, որոնցով կարգավորվում է Նրա քահանայության զորության օգտագործումը։ Այս դասը կօգնի ուսանողներին խորացնել իրենց հասկացողությունը քահանայության երդման և ուխտի վերաբերյալ:

Հնարավոր ուսումնական վարժություններ

Երկնային Հայրն Իր զորությամբ օրհնում է ուխտը պահողներին

Կարող եք սկսել դասը՝ գրատախտակին նկարելով ճանապարհ, որը խորհրդանշում է ուխտի ճանապարհը: Կարող եք ճանապարհի սկիզբն անվանել «ծնունդ», իսկ վերջը՝ «հավերժական կյանք Երկնային Հոր հետ»: Ուսանողներին առաջարկեք գալ գրատախտակի մոտ և նշել այն ուխտերը, որոնք ճանապարհի ընթացքում մենք կապում ենք արարողությունների միջոցով, օրինակ՝ մկրտություն, հաստատում, տղամարդկանց համար՝ քահանայության կարգում, տաճարային օժտում, տաճարային կնքում։

Եթե ուսանողներն օգնության կարիք ունեն՝ հասկանալու, որ ուխտերը երկկողմանի խոստումներ են Աստծո հետ, ապա քննարկեք հետևյալ հարցերը՝ նախքան Նախագահ Ռասել Մ. Նելսոնի ստորև բերված խոսքերով կիսվելը․

  • Ի՞նչ խոստումներ ենք մենք տալիս Երկնային Հորը, երբ ընդունում ենք մկրտության արարողությունը: (Տես Մոսիա 18.8–10 և Վարդապետություն և Ուխտեր 20.77–79)։

  • Ի՞նչ է մեզ խոստանում Երկնային Հայրը, երբ մենք ձգտում ենք հնազանդվել այս ուխտին:

Ուսումնասիրեք Նախագահ Ռասել Մ. Նելսոնի հետևյալ խոսքերը՝ փնտրելով օրհնություն, որը Երկնային Հայրը տալիս է նրանց, ովքեր Իր հետ ուխտեր են կապում և պահում:

Նախագահ Ռասսել Մ. Նելսոն

Ամեն ոք, ով ուխտ է կապում մկրտության ավազանում և տաճարում ու պահում է այդ ուխտը, ավելի շատ է ստանում Հիսուս Քրիստոսի զորությունը: Խնդրում եմ, խորհեք այդ հիանալի ճշմարտության շուրջ:

Աստծո հետ ուխտեր պահելու պարգևը երկնային զորություն է, մի զորություն, որն ուժ է տալիս մեզ՝ ավելի լավ դիմակայելու մեր փորձություններին, գայթակղություններին ու ցավերին: Այդ ուժը հեշտացնում է մեր ճանապարհը: Նրանք, ովքեր ապրում են Հիսուս Քրիստոսի բարձրագույն օրենքներով, կարող են ստանալ Նրա բարձրագույն զորությունը: (Ռասսել Մ․ Նելսոն, «Հաղթել աշխարհին և գտնել հանգստություն», Լիահոնա, նոյ. 2022 թ․, 96)

  • Ինչո՞ւ են Նախագահ Նելսոնի նկարագրած ուխտի օրհնություններն անհրաժեշտ՝ դեպի Երկնային Հայրը վերադառնալու մեր ճանապարհին:

Քահանայության երդումը և ուխտը

Վարդապետություն և Ուխտեր 84 բաժնում Հիսուս Քրիստոսը Ջոզեֆ Սմիթին «հայտնություն է տվել քահանայության մասին» (տես բաժնի վերնագիրը): Այս հայտնության մեջ Նա նկարագրել է քահանայության «երդումը և ուխտը» (հատվածներ 39–40): (Երդումը հանդիսավոր խոստում է):

Ձեր օրագրում՝ էջի վերևում գրեք «Քահանայության երդումը և ուխտը»: Այս վերնագրի տակ երկու սյունակ կազմեք: Մի սյունակը վերնագրեք «Երկնային Հոր խոստումները», իսկ մյուսը՝ «Մեր խոստումները»:

Ուսանողները կարող են ստորև բերված ուսումնական վարժությունը կատարել անհատապես: Այնուհետև նրանք կարող են փոքր խմբերում կիսվել իրենց գտածով:

Որպես այլընտրանք, կարող եք ուսանողներին բաժանել զույգերի, որոնցից մեկը կփնտրի Երկնային Հոր խոստումները, իսկ մյուսը՝ մեր խոստումները: Այնուհետև նրանք կարող են կիսվել միմյանց հետ իրենց գտածով և իրենց օրագրում գրել, թե ինչ են քննարկում:

Կարդացեք Վարդապետություն և Ուխտեր 84․33–44 հատվածները: Կարող եք մի ձևով նշել այն խոստումները, որոնք Երկնային Հայրը հրավիրում մեզ տալ․ իսկ մեկ այլ ձևով նշել այն օրհնությունը, որը Նա առաջարկում է նրանց, ովքեր պահում են իրենց ուխտերը: Ձեր օրագրի համապատասխան սյունակներում գրեք ձեր գտածը։

Սա լավ հնարավորություն է, որպեսզի ուսանողները վարժվեն գտնել սկզբունքները: Նրանք կարող են տարբեր սկզբունքներ գտնել: Կարող եք առաջարկել նրանց գտնել սկզբունքները՝ օգտագործելով նախադասություններ, որոնք սկսվում են նրանով, թե ինչ ենք մենք խոստանում անել և ավարտվում նրանով, թե ինչ է Աստված խոստանում անել: Օրինակ՝ ուսանողները կարող են գտնել հետևյալ սկզբունքները.

  • Եթե մենք մեծարենք մեր կոչումները և պարտականությունները Եկեղեցում, Աստված կսրբագործի մեզ Իր Հոգով և կնորացնի մեր մարմինները:

  • Եթե մենք հավատարմորեն ստանանք Ահարոնյան և Մելքիսեդեկյան Քահանայությունները և ընդունենք Աստծո ընտրյալ ծառաներին, Երկնային Հայրը կօրհնի մեզ այն ամենով, ինչ ունի:

Ուսանողներին ժամանակ տրամադրեք՝ աղոթքով իմանալու այն խոստումների մասին, որոնք իրենք առավել շատ են ուզում ավելի լավ հասկանալ։ Ուսանողները կարող են փոքր խմբերով աշխատել այլ ուսանողների հետ, որոնք որոշել են ուսումնասիրել նույն խոստումները, կամ կարող են անհատապես ուսումնասիրել դրանք:

աշխատաթերթի պատկերակ Աշխատաթերթը տրամադրում է ուսումնասիրության աղբյուրներ, որոնք կօգնեն ուսանողներին ավելի լավ հասկանալ քահանայության երդման և ուխտի որոշ խոստումներ: Ցանկության դեպքում կարող եք ուսանողներին տրամադրել այս աշխատաթերթը:

Եթե ուսանողները ցանկանում են ուսումնասիրել աշխատաթերթում չներառված որևէ արտահայտություն, առաջարկեք նրանց իմանալ այն ամենն, ինչ հնարավոր է՝ ուսումնասիրելով իրենց ընտրած թեման կամ թեմաները հետևյալ աղբյուրների օգնությամբ.

Խորացրեք Քահանայության երդման և ուխտի վերաբերյալ ձեր հասկացողությունը

Սրբագործվել Հոգու միջոցով՝ ի նորացումն մարմնի (տես հատված 33)

Խոսելով Երկնային Հոր խոստման մասին՝ Առաջին Նախագահության Նախագահ Հենրի Բ. Այրինգը բացատրել է.

Նախագահ Հենրի Բ. Այրինգ

Ես տեսել եմ այդ խոստումի կատարումը իմ և ուրիշների կյանքում: Իմ ընկերը ծառայում էր որպես միսիայի նախագահ: Նա պատմել է ինձ, որ իր ծառայության յուրաքանչյուր օրվա վերջում հազիվ էր կարողանում գիշերը բարձրանալ իր սենյակ՝ քնելու և մտածում էր, թե արդյոք ուժ կունենա ևս մեկ օր ծառայելու համար: Այնուհետև առավոտյան նա զգում էր, որ իր ուժն ու քաջությունը վերականգնվել են։ Դուք դա տեսել եք տարեց մարգարեների կյանքում․ նրանք կարծես նորացվում էին ամեն անգամ, երբ կանգնում էին վկայելու Տեր Հիսուս Քրիստոսի և վերականգնված ավետարանի մասին: Դա խոստում է նրանց համար, ովքեր հավատքով առաջ են գնում իրենց քահանայության ծառայության մեջ: (Հենրի Բ. Այրինգ, «Հավատքը և Քահանայության երդումը և ուխտը», Լիահոնա, մայիս 2008 թ․, 62)

Հավատարիմ եղեք Ահարոնյան և Մելքիսեդեկյան քահանայությունները ստանալու մեջ (տես հատված 33)

«Այս երկու քահանայությունները ստանալու մեջ» հավատարիմ լինելը (Վարդապետություն և Ուխտեր 84.33) ենթադրում է զորություն և օրհնություններ ստանալը, որոնք գալիս են Ահարոնյան և Մելքիսեդեկյան Քահանայությունների արարողությունները ստանալուց և դրա հետ կապված ուխտերը հավատարմորեն պահելուց: Մարգարե Ջոզեֆ Սմիթն ուսուցանել է, որ մարդը ստանում է քահանայության լրիվությունը՝ «պահելով բոլոր պատվիրանները և հնազանդվելով Տիրոջ տան բոլոր արարողություններին» (Եկեղեցու Նախագահների ուսմունքները. Ջոզեֆ Սմիթ [2007], 419):

Տղամարդկանց համար սա նաև ներառում է քահանայության շնորհումը և կարգումը քահանայության պաշտոններում:

Մեծարենք մեր կոչումները (հատված 33)

Վարդապետություն և Ուխտեր 58․27–28, 107․99–100

Կոչումներ ստանալու և Տիրոջ փրկության աշխատանքին մասնակցելու հնարավորությունները

Տասներկու Առաքյալների Քվորումից նախագահ Մ. Ռասսել Բալլարդն ուսուցանել է.

Նախագահ Մ․ Ռասսել Բալլարդ

Մեծարելով մեր կոչումները՝ մենք պետք է փնտրենք Հոգու ոգեշնչումը, որպեսզի լուծենք խնդիրներն այնպիսի եղանակներով, որոնք լավագույնս կօգնեն մարդկանց, որոնց ծառայում ենք: Մենք ունենք ուղեցույց ձեռնարկներ, և անհրաժեշտ է հետևել դրանց ուղղորդումներին: Սակայն այդ շրջանակի սահմաններում մեծ հնարավորություններ կան մտածելու, ստեղծագործելու և անձնական տաղանդներն օգտագործելու համար: Մեր կոչումները մեծարելու հրահանգը դրանք զարդարելու և բարդացնելու հրաման չէ: Նորարարություններ մտցնելը չի նշանակում պարտադիր բարդացնել. շատ հաճախ դա նշանակում է պարզեցնել: (Մ․ Ռասսել Բալլարդ «Օ, եղեք իմաստուն», Լիահոնա, նոյ. 2006 թ․, 19)

Այն ամենն, ինչ ունի Երկնային Հայրը (տես հատված 38)

Վարդապետություն և Ուխտեր 76․55–60, 81․6

Տասներկու Առաքյալների Քվորումից երեց Ռոնալդ Ա․ Ռասբանդը կիսվել է.

Երեց Ռոնալդ Ա. Ռասբանդ

Այն ճշմարտության իմացությունը, որ մենք Երկնային Հայր ունենք, և որ Հիսուս Քրիստոսը Նրա Միածին Որդին է, նշանակում է, որ մենք ավելի հեռուն ենք տեսնում ուխտի ճանապարհին, այլ ոչ միայն պարզապես այն կետը, որտեղ գտնվում ենք այսօր։ Դա նշանակում է, որ մենք երախտապարտ ենք, որ ժառանգորդն ենք այն ամենի, ինչ Հայրն ունի. Նրա անթիվ թագավորությունները կարող են լինել մերը: Փրկիչը խոստացել է. «Եվ եթե դու հավատարիմ լինես մինչև վերջ, դու կունենաս անմահության պսակը, և հավերժական կյանք ապարանքներում, որոնք ես պատրաստել եմ իմ Հոր տան մեջ»: (Ռոնալդ Ա. Ռասբանդ, «Նրա դուստրերի աստվածային ճակատագիրը» [BYU Women’s Conference, ապր․ 30, 2021 թ․], broadcasts.ChurchofJesusChrist.org)

Բավարար ժամանակ տրամադրելուց հետո ուսանողներին առաջարկեք դասընկերոջ հետ կամ փոքր խմբերում կիսվել իրենց սովորածով։ Կարող եք օգտագործել հետևյալ հուշումները, որոնք կօգնեն ուղղորդել քննարկումը.

  • Այս օրհնությունն ինչո՞ւ է կարևոր ձեզ համար այսօր:

  • Ի՞նչ է այս օրհնությունն ուսուցանում ձեզ Երկնային Հոր մասին:

Կիսվեք օրինակով (սուրբ գրություններից կամ ձեր կյանքից) այն մասին, թե ձեզ ծանոթ որևէ մեկն ինչպես է պահում ձեր ընտրած խոստումը:

Դասի ավարտին կարող եք կիսվել, թե ինչպես եք օրհնվել քահանայության զորությամբ, երբ փորձել եք հավատարմորեն պահել այն ուխտերը, որոնք կապել եք Երկնային Հոր հետ: Ուսանողներին առաջարկեք հնարավորություններ փնտրել՝ օգտվելու քահանայության զորությունից, որն Աստված խոստացել է Իր ուխտյալ զավակներին: