Դաս 96․ Վարդապետություն և Ուխտեր 84

Վարդապետություն և Ուխտեր 84․49–102

«Ողջ աշխարհին՝ ամեն մի արարածի»

1832 թվականի աշնանը միսիոներները, այդ թվում՝ Ջարեդ Քարթերը և Սթիվեն Բերնեթը վերադարձան Կիրթլենդ, Օհայո՝ Հիսուս Քրիստոսի ավետարանը քարոզելուց հետո: Դա մի հիանալի ժամանակ էր, երբ երեցները պատմեցին Միացյալ Նահանգների արևելքում Տիրոջը ծառայելու մասին: Նրանցից շատերը պետք է շուտով կանչվեին՝ շարունակելու ծառայությունը: Մեր օրերում մենք նույնպես կարող ենք ծառայել Տիրոջը՝ կիսվելով Նրա ավետարանով: Այս դասը կօգնի ուսանողներին զգալ աշխարհում բոլորի հետ ավետարանով կիսվելու քրիստոսանման ցանկությունը:

Հնարավոր ուսումնական վարժություններ

Ամբողջ աշխարհը

Որպեսզի օգնեք ուսանողներին հասկանալ, թե քանի Աստծո զավակ կա երկրի վրա և Նրա ավետարանի կարիքն ունեն, կարող եք սկսել դասը՝ ցուցադրելով աշխարհի քարտեզը: Խնդրեք ուսանողներին մեկ րոպեում նշել հնարավորինս շատ երկրներ, կամ կարող եք առաջարկել նրանց քարտեզի վրա նշել մի քանի երկիր: Ուսանողները կարող են նաև ծանոթանալ ձեր երկրի կամ աշխարհի բնակչության թվին:

Խոսեք ամբողջ աշխարհում Հիսուս Քրիստոսի վերականգնված ավետարանի մասին: Կարող եք տալ հետևյալ հարցերը.

• Աշխարհի ո՞ր երկրներում են միսիոներները ծառայում: Որտե՞ղ նրանք չկան:

• Ինչպե՞ս է Հիսուս Քրիստոսի Վերջին Օրերի Սրբերի Եկեղեցու անդամների թիվն ամբողջ աշխարհում համեմատվում աշխարհի ընդհանուր բնակչության հետ: Ինչպե՞ս է ձեր տարածքում Եկեղեցու անդամների թիվը համեմատվում ձեր տարածքի ընդհանուր բնակչության թվի հետ:

Եկեղեցու վերաբերյալ վիճակագրական հարցերին պատասխանելու համար այցելեք «Փաստեր և վիճակագրություն» էջը newsroom.ChurchofJesusChrist.org կայքում։

Կարող եք խնդրել ուսանողներին խորհել այն բարի գործերի մասին, որ նրանք կարող են անել՝ ընտրելով ծառայությունը միսիայում: Կարդացեք հետևյալ խոսքերը և առաջարկեք ուսանողներին կիսվել իրենց մտքերով կամ զգացմունքներով:

Նախագահ Ռասսել Մ. Նելսոնն ուսուցանել է հետևյալը.

Յուրաքանչյուր ոք արժանի է իմանալու Հիսուս Քրիստոսի վերականգնված ավետարանի մասին: Յուրաքանչյուր ոք արժանի է իմանալու, թե որտեղ կարող է գտնել այն խաղաղությունը, որը «[վեր է] ամեն հասկացողությունից» [Փիլիպպեցիս 4․7]։ (Ռասսել Մ․ Նելսոն, «Քարոզեք խաղաղության ավետարանը», Լիահոնա, մայիս 2022 թ․, 7)

Խնդրեք ուսանողներին գրել մի քանի միտք՝ ի պատասխան հետևյալ հուշման.

Մի պահ խորհեք, թե ինչպես է Աստված վերաբերվում Իր բոլոր զավակներին ողջ աշխարհում: Ի՞նչ են կորցնում շատ մարդիկ՝ չիմանալով Հիսուս Քրիստոսի և Նրա վերականգնված Եկեղեցու մասին: Ի՞նչ գիտեք և ի՞նչ օրհնություններ եք զգացել, որոնք կարող են փոխել մարդկանց կյանքը:

Աշխարհի վիճակը

1832 թվականի սեպտեմբերը մի հիանալի ժամանակ էր Կիրթլենդում, երբ միսիոներները վերադարձան միսիաներից և պատմեցին Ամերիկայի արևելյան նահանգներում իրենց փորձառությունների մասին: Այդ ընթացքում Ջոզեֆ Սմիթը ցուցումներ ստացավ Տիրոջից: Այդ ցուցումներից մի քանիսը վերաբերում էին աշխարհի վիճակին և կարիքներին:

Կարդացեք Վարդապետություն և Ուխտեր 84․49–53 հատվածները՝ փնտրելով բառեր և արտահայտություններ, որոնք Տերն օգտագործել է նկարագրելու համար, թե ինչ են զգում մարդիկ աշխարհում:

Ուսանողներին առաջարկեք կիսվել իրենց գտած բառերով և արտահայտություններով և բացատրել, թե, ըստ իրենց, ինչ են դրանք նշանակում: Նրանք հավանաբար կնշեն մեղքի և ստրկության թեման։ Ուսանողները կարող են նաև տեսնել, որ մարդիկ խավարի մեջ էին և հառաչում էին այդ պատճառով: Դա նշանակում է, որ նրանք իրենց անօգնական, տխուր և հիվանդ էին զգում: Ուսանողները կարող են կիսվել, թե ինչպես են իրենք տեսել, որ մեղքը ցավ և վիշտ է պատճառում և տանում է դեպի ստրկություն: Ուսանողներին զգուշացրեք, որ չկիսվեն որևէ մեկի խիստ անձնական մանրամասներով:

Տերը մատնանշել է, որ նույնիսկ Իր Եկեղեցու անդամներն այդ ժամանակ ապրում էին խավարի մեջ և իրենց դատապարտության տակ էին զգում:

Կարդացեք Վարդապետություն և Ուխտեր 84.54–57 հատվածները, որպեսզի տեսնեք, թե ինչն էր խավարի և դատապարտության պատճառը Եկեղեցու անդամների համար:

• Ի՞նչ գտաք:

• Ի՞նչ կարող ենք սովորել այս հատվածներից Մորմոնի Գրքի և Վարդապետություն և Ուխտեր սուրբ գրության հայտնությունների կարևորության մասին:

Օգնեք ուսանողներին հասկանալ, թե ինչ են զգում Հիսուս Քրիստոսը և Նրա աշակերտները, երբ տեսնում են, որ մարդիկ տառապում են մեղքի և խավարի մեջ: Նրանք կարող են ուսումնասիրել հետևյալ հատվածներից մեկը կամ երկուսն անհատապես կամ փոքր խմբերով։

• Մովսես 7․26, 28, 41 (Ենովքի տեսիլքը)

• Մոսիա 28.3 (Մոսիայի որդիները)

• Ալմա 31.2 (Ալմա կրտսեր)

• 3 Նեփի 17.14 (Հիսուս Քրիստոս)

• Ո՞ր բառերն են օգնում ձեզ հասկանալ Փրկչի վերաբերմունքը մեղքի և խավարի մեջ գտնվողների հանդեպ: Մտածեք, թե ինչպիսին կարող է լինել պայքարը մեղքի և խավարի դեմ:

• Ինչո՞ւ է օգտակար հասկանալ Տիրոջ վերաբերմունքը:

• Ըստ ձեզ, ինչպե՞ս կարող է Մորմոնի Գիրքն օգնել որևէ մեկին հաղթահարել հոգևոր խավարը:

Փրկչի ձայնը

Կարդացեք Վարդապետություն և Ուխտեր 84․60–62 հատվածները՝ փնտրելով, թե ինչ ուղղորդեց Հիսուս Քրիստոսն անել այս մարդկանց: Օգտակար կլինի իմանալ, որ «այս բաները» հատված 60-ում և «այդ բաները» հատված 61-ում վերաբերում են այն ամենին, ինչ Տերը հայտնել է բաժին 84-ում, որը ներառում է Մորմոնի Գիրքը հիշելը։

• Ի՞նչ ուղղորդեց Հիսուսը նրանց անել։

• Ի՞նչ օրհնություններ կստանան նրանք՝ հնազանդվելով Նրա ուղղորդմանը:

Ուսանողներին հնարավորություն տվեք կիսվել իրենց սովորածով: Ճշմարտություններից մեկը, որը նրանք կարող են բացահայտել, այն է, որ Հիսուս Քրիստոսը ցանկանում է, որ մենք կիսվենք Մորմոնի Գրքով և մեր վկայություններով Աստծո բոլոր զավակների հետ ամբողջ աշխարհում։

Օգնեք ուսանողներին հասկանալ, թե ինչու է Հիսուս Քրիստոսը ցանկանում, որ մենք կիսվենք Իր ավետարանով բոլոր մարդկանց հետ: Կարող եք սկսել նրանից, որ օգնեք ուսանողներին բացահայտել այն օրհնությունները, որոնք Տերը ցանկանում է, որ բոլորն ունենան: Հետևյալ վարժությունը միմյանց հետ աշխատելու լավ տարբերակ կլինի ուսանողների համար՝ Վարդապետություն և Ուխտեր 84 բաժինն ավելի մանրամասն ուսումնասիրելու համար։

Ցուցադրեք հետևյալ ցուցումները և օգնեք ուսանողներին հետևել դրանց: 2-րդ փուլի համար կարող եք նախապես ընտրել հատուկ միսիաներ, որոնցից ուսանողները կարող են ընտրություն կատարել:

1. Ընտրեք որևէ մեկին, ում հետ կաշխատեք որպես ձեր «միսիայի ընկերակից» դասի ընթացքում:

2. Ընտրեք որևէ միսիա աշխարհի այն մասում, որտեղ կցանկանայիք ծառայել: (Եթե ձեր ընտրած միսիայում մարդիկ խոսում են այլ լեզվով, փորձեք արագ սովորել, թե ինչպես ողջունել ձեր ընկերակցին այդ լեզվով։)

3. Կարդացեք Վարդապետություն և Ուխտեր 84.64–73 հատվածները և կազմեք այն օրհնությունների ցանկը, որոնք Հիսուս Քրիստոսը ցանկանում է տալ բոլոր նրանց, ովքեր ընդունում են Իրեն և Իր ավետարանը:

4. Քննարկեք, թե ինչպես կարող է ձեր թվարկած օրհնություններից յուրաքանչյուրն օգնել մարդուն հաղթահարել խավարը և մեղքի ստրկությունը:

Ուսանողներին հնարավորություն տվեք կիսվելու այն մեծ օրհնություններով, որոնք գալիս են Հիսուս Քրիստոսին հետևելու արդյունքում: Բացի հետևյալ հարցից՝ կարող եք ցուցադրել նաև «Սրտի փոփոխություն» տեսանյութը (4:39):

A Change of Heart

• Եթե հնարավորություն ունենայիք Հիսուս Քրիստոսի մասին որևէ բանով կիսվելու մի մարդու հետ, որը չի ճանաչում կամ չի հետևում Նրան, ինչով կկիսվեիք:

Փրկչի ընկերները

Մի պահ խորհեք, թե ինչու են այդքան շատ երիտասարդ կանայք և երիտասարդ տղամարդիկ պատրաստակամորեն ընդունել ծառայող կամ քարոզող միսիոներ լինելու Տիրոջ կանչը:

Մինչ ուսանողները խորհում են, կարող եք խնդրել նրանց կիսվել, թե ում են ճանաչում, ով վերջերս է Տիրոջ կողմից կանչվել ծառայելու: Հնարավորության դեպքում կարող եք կիսվել սոցիալական ցանցերի գրառումով, որտեղ որևէ մեկը իր ընտանիքին և ընկերներին հայտնումէ իր միսիոներական կանչի մասին: Ուսանողներին օգնեք տեսնել այն ուրախությունը, որ ապրում են նրանք, ովքեր ցանկանում են ծառայել Տիրոջը:

• Ինչը կարող է դժվար կամ վախեցնող թվալ՝ Տիրոջը որպես միսիոներ ծառայելիս:

Կարող եք ուսանողներին առաջարկել կարդալ հետևյալ հատվածներն իրենց «միսիայի ընկերակցի» հետ։ Կարող եք առաջարկել նրանց ընտրել Փրկչի ուսմունքներից երկուսը կամ երեքը, որոնք վստահություն կտան այն մարդկանց, ովքեր ցանկանում են ավետարանով կիսվել ուրիշների հետ: Այնուհետև ընկերակիցները դասարանում կարող են կիսվել իրենց սովորածով ուսանողների այլ զույգերի հետ:

Կարդացեք Վարդապետություն և Ուխտեր 84.77–88 հատվածները՝ փնտրելով Տիրոջ քաջալերող խոսքերը նրանց համար, ովքեր գուցե տարակուսեն՝ ընդունել Նրան ծառայելու կանչը, թե ոչ:

Կարող եք նաև կիսվել Եկեղեցու ղեկավարների քաջալերող խոսքերով: (Տես «Լրացուցիչ նյութեր»։)

• Տիրոջ խոսքերից ո՞րն է առանձնահատուկ ձեզ համար:

• Հիմնվելով այսօրվա ձեր սովորածի վրա ինչո՞ւ եք կարծում, որ Հիսուս Քրիստոսն Իր ավետարանը քարոզողներին համարում է Իր ընկերները (տես հատված 77):

• Ի՞նչ սովորեցիք այսօր, որը կօգնի ձեզ ավելի լավ հասկանալ, թե ինչպես է Տերը վերաբերվում բոլոր մարդկանց ամբողջ աշխարհում: Ըստ ձեր սովորածի, ի՞նչ գործողություններ կարող է Սուրբ Հոգին խրախուսել ձեզ կատարել։

Լրացուցիչ նյութեր

Որքա՞ն կարևոր է կիսվել Հիսուս Քրիստոսի ավետարանով:

Նախագահ Ռասսել Մ. Նելսոնը բացատրել է․

Եղբայրներ և քույրեր, Հիսուս Քրիստոսի ավետարանը երբևէ ավելի անհրաժեշտ չի եղել, քան այսօր։ … Ես սիրում եմ Տեր Հիսուս Քրիստոսին և վկայում եմ, որ Նրա ավետարանը խաղաղության միակ մնայուն լուծումն է: Նրա ավետարանը խաղաղության ավետարան է [Վարդապետություն և Ուխտեր 27.16]: …

Բոլոր միսիոներներն ուսուցանում և վկայում են Փրկչի մասին: Աշխարհում տիրող հոգևոր խավարը Հիսուս Քրիստոսի լույսի կարիքն ավելի է մեծացնում: (Ռասսել Մ․ Նելսոն, «Քարոզենք խաղաղության ավետարանը», Լիահոնա, մայիս 2022 թ․, 6–7)

Ի՞նչ օրհնություններ կարող են գալ ծառայության կամ քարոզելու միսիայի միջոցով:

Յոթանասունից Երեց Դենելսոն Սիլվան ասել է․

Փրկիչ Հիսուս Քրիստոսին և Նրա Եկեղեցին ներկայացնելու արտոնությունը չի կարելի անտեսել: Անթիվ աղոթքները, օրվա ընթացքում ձեր վկայությունով կիսվելը, սուրբ գրությունների ուսումնասիրության բազմաթիվ ժամերը, ծանոթությունները մարդկանց հետ, որոնց հետ երբեք չէիք ծանոթանա, եթե տանը մնայինք․ այս բոլորը աննկարագրելի փորձառություններ են: Նմանատիպ փորձառություններ վերապահված են այն երիտասարդներին, որոնց Տերը կանչում է ծառայելու ծառայողական միսիաներում: Դուք շատ ընդունված և պահանջված եք: Խնդրում եմ, չթերագնահատեք ծառայողական միսիայի կարևորությունը, քանի որ ծառայողական միսիաները նույնպես աննկարագրելի փորձառություններ են տալիս: Հոգիների արժեքը մեծ է Աստծո աչքում, (Վարդապետություն եվ Ուխտեր 18․10) այդ թվում՝ ձեր հոգու արժեքը։ (Դենելսոն Սիլվա «Ճշմարտությունը հռչակելու քաջություն», Լիահոնա, նոյ․ 2022, 71)

Վարդապետություն և Ուխտեր 84․73: Տերն ինչո՞ւ է նախազգուշացրել, որ չպարծենանք այն հրաշքներով, որոնք մենք ունենում ենք մեր կյանքում:

Առաջին նախագահությունից նախագահ Դալլին Հ. Օուքսն ուսուցանել է.

Վկայություններ տալիս և մեր հանրային ուղերձներում մենք հազվադեպ ենք նշում մեր ամենահրաշալի փորձառությունները և հազվադեպ ենք ապավինում ավետարանի ճշմարտացիությանը վերաբերող նշաններին: … Սովորաբար պատշաճ չէ հրաշքների մասին պատմել ընդհանուր լսարանին, որի մեջ կան հոգևոր հասունության տարբեր մակարդակներ ունեցող մարդիկ: Ընդհանուր լսարանին պատմած հրաշքները կարող են ամրապնդել ոմանց հավատքը, սակայն մյուսների համար դա կարող է ոչ պատշաճ լինել: (Դալլին Հ. Օուքս, «Հրաշքներ», Ensign, հունիս 2001 թ․, 10)։

Վարդապետություն և Ուխտեր 84․88 Ի՞նչ օգնություն է առաջարկում մեզ Փրկիչը, երբ մենք ծառայում ենք Իրեն:

Առաջին Նախագահությունից Նախագահ Հենրի Բ. Այրինգն ասել է.

Ես վկայում եմ, որ Տերը գնում է ձեր առջևից, երբ դուք ծառայում եք Նրան։ Երբեմն, դուք կլինեք այն հրեշտակը, որին Տերը կուղարկի մյուսներին բարձրացնելու համար։ Երբեմն, դուք կլինեք այն մեկը, ով շրջապատված կլինի հրեշտակներով, ովքեր կբարձրացնեն ձեզ։ Բայց դուք ընդմիշտ կունենաք Նրա Հոգին ձեր սրտերում, ինչպես ձեզ խոստացել են բոլոր հաղորդության ժողովներին։ Դուք միայն պետք է պահեք Նրա պատվիրանները։ (Հենրի Բ. Այրինգ, «Մի վախեցեք բարիք գործել», Լիահոնա, նոյեմբեր 2017 թ․, 103)

Օժանդակ ուսումնական վարժություններ

Հիշեք Մորմոնի Գիրքը

Օգնեք ուսանողներին սովորել այն ճշմարտությունը, որ Տերն ուզում է, որ մենք ուսումնասիրենք Մորմոնի Գիրքը և ապրենք համաձայն դրա ուսմունքների։ Կարող եք սկսել՝ ուսանողների հետ այցելելով ChurchofJesusChrist.org կայքը՝ տեսնելու, թե քանի լեզուներով է թարգմանված Մորմոնի Գիրքը։

Ուսանողներին առաջարկեք քննարկել, թե ինչու է այդքան մեծ ջանքեր գործադրվում Մորմոնի Գիրքն այդքան շատ լեզուներով թարգմանելու համար: Այնուհետև ամբողջ դասարանով կարող եք կարդալ Վարդապետություն և Ուխտեր 84.54–57 հատվածները՝ փնտրելով, թե ինչպես է Տերը վերաբերվում Մորմոնի Գրքին: Կարող եք ուսանողներին հնարավորություն տալ գնահատելու, թե որքան են իրենք արժևորում Մորմոնի Գիրքը: Ուսանողներն անձամբ զգո՞ւմ են, որ հատված 54-ի ուղերձը վերաբերում է իրենց: Ի՞նչ են նրանք անում Մորմոնի Գիրքն ուսումնասիրելու համար: Ինչպե՞ս են նրանք կիսվում կամ ինչպե՞ս կարող են կիսվել ուրիշների հետ Քրիստոսի մասին վկայությամբ, որը գրված է Մորմոնի Գրքում։ Կարող եք առաջարկել այն ուսանողներին, որոնք գիտեն, թե ինչպես Gospel Library հավելվածի օգնությամբ կիսվել Մորմոնի Գրքով, ուսուցանել այդ մասին դասարանի այլ ուսանողներին։

Տիրոջ աջակցությամբ

Ուսանողների համար օգտակար կլինի իմանալ այն օգնության մասին, որն առաջարկում է Հիսուս Քրիստոսը, ինչպես նկարագրված է Վարդապետություն և Ուխտեր 84.88 հատվածում։ Կարող եք խնդրել ուսանողներին նկարել մարդուկի պատկեր, որը ներկայացնում է նրանց որպես միսիոներ: Այնուհետև նրանք կարող են կարդալ հատված 88-ը և գրել կամ նկարել այն բոլոր եղանակները, որոնցով Փրկիչն օգնում է մեզ, երբ մենք փորձում ենք կիսվել Իր ավետարանով: Ուսանողներին օգնեք քննարկել իրենց մտքերն այն մասին, որ Տերն օգնում է նրանց, ովքեր ծառայում են Իր անունով: Կարող եք կիսվել սուրբգրային պատմությամբ, օրինակ՝ Դ Թագավորաց 6.15–17 հատվածներով՝ հաճախ չերևացող երկնային օգնությունը ցույց տալու համար: