“Lēsoni 95—Tokāteline mo e Ngaahi Fuakava 84:33–44: Ko e Fakapapau mo e Fuakava ʻo e Lakanga Fakataulaʻeikí,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 84:33–44,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 95: Tokāteline mo e Ngaahi Fuakava 84
Tokāteline mo e Ngaahi Fuakava 84:33–44
Ko e Fakapapau mo e Fuakava ʻo e Lakanga Fakataulaʻeikí
ʻI he Tokāteline mo e Ngaahi Fuakava 84:20, naʻe fakahaaʻi ai ʻe he Fakamoʻuí ʻoku “fakahā ʻi [he] ngaahi ouau [ʻo e lakanga fakataulaʻeikí], ʻa e mālohi ʻo e anga faka-ʻOtuá.” ʻOku ʻatā ʻa e mālohi ko ʻeni ʻo e lakanga fakataulaʻeikí ki he kāingalotu kotoa pē ʻo e Siasí ʻoku nau fakahoko mo tauhi e ngaahi fuakava ʻo e papitaisó mo e temipalé. Naʻe akoʻi ʻe he Fakamoʻuí ʻi he Tokāteline mo e Ngaahi Fuakava 84:33–44, ha fakapapau mo ha fuakava ʻokú ne puleʻi hono fakaʻaongaʻi ʻa Hono mālohi ʻo e lakanga fakataulaʻeikí. ʻE lava ke tokoni ʻa e lēsoni ko ʻení ke fakaloloto e mahino ʻa e kau akó ki he fakapapau mo e fuakava ʻo e lakanga fakataulaʻeikí.
Ngaahi ʻEkitivitī Ako ʻOku Ala Fakahokó
ʻOku faitāpuekina ʻe he Tamai Hēvaní ʻa e kau tauhi-fuakavá ʻaki Hono mālohí
Te ke lava ʻo kamata ʻa e kalasí ʻaki hano tā ha hala ʻi he palakipoé ʻokú ne fakafofongaʻi e hala ʻo e fuakavá. Te ke lava ʻo fakahingoa e kamataʻanga ʻo e halá ko e “fanauʻí” mo e ngataʻangá ko e “moʻui taʻengata mo e Tamai Hēvaní.” Fakaafeʻi e kau akó ke nau omi ki he palakipoé ʻo tohi ʻa e ngaahi fuakava ʻoku tau fai ʻi he halá ʻo fakafou ʻi he ngaahi ouau hangē ko e papitaisó, hilifakinimá, fakanofo ʻo e lakanga fakataulaʻeikí maʻá e houʻeiki tangatá, ʻenitaumení, mo e silá.
Kapau ʻoku fiemaʻu tokoni ʻa e kau akó ke mahino kiate kinautolu ko e ngaahi fuakavá ko ha fepalōmesiʻaki ia mo e ʻOtuá, fakakaukau ke aleaʻi ha ngaahi fehuʻi hangē ko ʻení kimuʻa pea vahevahe ʻa e fakamatala ʻa Palesiteni Lāsolo M. Nalesoni ʻi laló:
-
Ko e hā ha niʻihi ʻo e ngaahi palōmesi ʻoku tau fai ki he Tamai Hēvaní ʻi he taimi ʻoku tau tali ai ʻa e ouau ʻo e papitaisó? (Vakai, Mōsaia 18:8–10 mo e Tokāteline mo e Ngaahi Fuakava 20:77–79.)
-
Ko e hā ʻoku talaʻofa mai ʻe he Tamai Hēvaní kiate kitautolu ʻi he taimi ʻoku tau feinga ai ke talangofua ki he fuakava ko ʻení?
Ako ʻa e lea ko ʻeni meia Palesiteni Lāsolo M. Nalesoní, ʻo kumi ha tāpuaki ʻoku foaki ʻe he Tamai Hēvaní kiate kinautolu ʻoku nau fakahoko mo tauhi ha ngaahi fuakava mo Iá.
Ko e tokotaha kotoa pē ʻokú ne fakahoko ha ngaahi fuakava ʻi he vai papitaisó pea ʻi he temipalé—mo tauhi kinautolú—kuo fakalahi ʻene maʻu ʻa e mālohi ʻo Sīsū Kalaisí. Kātaki ʻo fakakaukau ki he foʻi moʻoni fakaʻofoʻofa ko iá!
Ko e pale ki he tauhi ʻo e ngaahi fuakava mo e ʻOtuá, ko e mālohi fakalangi—ko e mālohi ʻokú ne fakamālohia kitautolu ke tau matuʻuaki lelei ange hotau ngaahi faingataʻá, ʻahiʻahí, mo e loto-mamahí. ʻOku fakafaingofuaʻi ʻe he mālohí ni ʻetau fonongá. ʻOku maʻu ʻe kinautolu ʻoku moʻui ʻaki e ngaahi fono māʻolunga ange ʻa Sīsū Kalaisí ʻa Hono mālohi māʻolunga angé. (Russell M. Nelson, “Ikuʻi ʻa Māmani mo Maʻu ha Fiemālie,” Liahona, Nōvema 2022, 96)
-
Ko e hā ʻoku fiemaʻu ai ʻa e ngaahi tāpuaki ʻo e fuakavá ʻa ia naʻe fakamatalaʻi ʻe Palesiteni Nalesoní, ʻi hotau hala foki ki he Tamai Hēvaní?
Ko e fakapapau mo e fuakava ʻo e lakanga fakataulaʻeikí
ʻI he Tokāteline mo e Ngaahi Fuakava 84, naʻe foaki ai ʻe Sīsū Kalaisi “ha fakahā ki he lakanga fakataulaʻeikí” kia Siosefa Sāmita (vakai ki he ʻuluʻi vahé). Naʻá Ne fakamatalaʻi ʻa e “fakapapau mo e fuakava” (veesi 39–40) ʻo e lakanga fakataulaʻeikí ko ha konga ʻo e fakahā ko ʻení. (Ko e fakapapaú ko ha talaʻofa molumalu ia.)
Tohi ʻi hoʻo tohinoa akó ʻa e “Fakapapau mo e Fuakava ʻo e Lakanga Fakataulaʻeikí” ʻi ʻolunga ʻi ha peesi. ʻAi ha kōlomu ʻe ua ʻi lalo ʻi he ʻuluʻi tohi ko ʻení. Fakahingoa ha kōlomu ʻe taha ko e “Ngaahi talaʻofa ʻa e Tamai Hēvaní” pea tahá ko e “Ko ʻetau ngaahi palōmesí.”
ʻE lava ke fakakakato fakafoʻituitui ʻe he kau akó ʻa e ʻekitivitī ako ʻi laló. Hili iá ʻe lava ke nau vahevahe ʻi ha fanga kiʻi kulupu iiki ʻa e meʻa naʻa nau maʻú.
Ko e founga ʻe tahá, te ke lava ʻo vahe tautau toko ua ʻa e kau akó, pea kumi ʻe he hoa ʻe taha ʻa e ngaahi talaʻofa ʻa e Tamai Hēvaní pea fekumi ʻa e taha ki heʻetau ngaahi palōmesí. Hili iá, ʻe lava ke na fevahevaheʻaki pea hiki e meʻa ne na aleaʻí ʻi heʻena tohinoa akó.
Lau ʻa e Tokāteline mo e Ngaahi Fuakava 84:33–44. Fakakaukau ke fakaʻilongaʻi ʻi ha founga ʻe taha ʻa e ngaahi palōmesi ʻoku fakaafeʻi kitautolu ʻe he Tamai Hēvaní ke tau faí mo fakaʻilongaʻi kehe ʻa e tāpuaki ʻokú Ne foaki kiate kinautolu ʻoku tauhi ʻenau ngaahi fuakavá. Hiki ʻa e meʻa ʻokú ke maʻú ʻi he ngaahi kōlomu ʻoku fekauʻaki mo iá ʻi hoʻo tohinoa akó.
Ko ha taimi lelei ʻeni ke ʻahiʻahi akoako ai ʻe he kau akó hono kumi ʻo e ngaahi tefitoʻi moʻoní. ʻE lava ke nau ʻiloʻi ha ngaahi tefitoʻi moʻoni kehekehe. Te ke lava ʻo ʻai ke nau ʻiloʻi ʻa e ngaahi tefitoʻi moʻoní ʻo fakaʻaongaʻi ʻa e ngaahi fakamatala ʻoku kamata ʻaki ʻa e meʻa ʻoku tau palōmesi ke faí pea fakaʻosi ʻaki ʻa e meʻa ʻoku talaʻofa mai ʻe he ʻOtuá ke faí. Hangē ko ʻení, ʻe ala maʻu ʻe he kau akó ʻa e ngaahi tefitoʻi moʻoni ko ʻení:
-
Kapau te tau fakahoko totonu hotau ngaahi uiuiʻí mo hotau ngaahi fatongia ʻi he Siasí, ʻe fakamāʻoniʻoniʻi kitautolu ʻe he ʻOtuá ʻaki Hono Laumālié pea fakafoʻou hotau sinó.
-
Kapau te tau maʻu faivelenga ʻa e Lakanga Taulaʻeiki Faka-ʻĒloné mo e Lakanga Taulaʻeiki Faka-Melekisētekí pea tali ʻa e kau tamaioʻeiki kuo fili ʻa e ʻOtuá, ʻe tāpuekina kitautolu ʻe he Tamai Hēvaní ʻaki e meʻa kotoa ʻokú Ne maʻú.
ʻOange ha taimi ki he kau akó ke nau ako ʻi he faʻa lotu ʻa e ngaahi talaʻofa ʻoku nau mahuʻingaʻia taha ke maʻu ha mahino lelei ange ki aí. ʻE lava ke ngāue ʻa e kau akó ʻi ha fanga kiʻi kulupu iiki mo e kau ako kehe naʻa nau fili ke ako ʻa e ngaahi talaʻofa tataú, pe te nau ako fakafoʻituitui.
ʻOku ʻomi ʻe he laʻipepa tufá ha ngaahi maʻuʻanga tokoni fakaako ʻe lava ʻo tokoni ke mahino lelei ange ki he kau akó ha niʻihi ʻo e ngaahi talaʻofa ʻi he fakapapau mo e fuakava ʻo e lakanga fakataulaʻeikí. Te ke lava ʻo ʻoange ki he kau akó ʻa e laʻipepa tufa ko ʻení kapau ʻe fiemaʻu.
Kapau ʻoku fie ako ʻe he kau akó ha kupuʻi lea ʻoku ʻikai kau ʻi he laʻipepa tufá, fakaafeʻi kinautolu ke nau ako ʻa e meʻa kotoa pē te nau lavá ʻaki haʻanau fekumi ki he tefito pe ngaahi tefito kuo filí ʻaki ha ngaahi maʻuʻanga tokoni hangē ko ʻení:
-
ChurchofJesusChrist.org pe polokalama Gospel Library
Fakaloloto Hoʻo Mahino ki he Fakapapau mo e Fuakava ʻo e Lakanga Fakataulaʻeikí
Fakamāʻoniʻoniʻi ʻe he Laumālié ki hono fakafoʻou ʻo e sinó (vakai, veesi 33)
ʻI he lea ʻa Palesiteni Henelī B. ʻAealingi ʻo e Kau Palesitenisī ʻUluakí kau ki he talaʻofa ʻa e Tamai Hēvaní, naʻá ne pehē:
Kuó u mātā hono fakahoko ʻo e talaʻofa ko iá ʻi heʻeku moʻuí pea mo ha niʻihi kehe. Naʻe ʻi ai haku kaungāmeʻa naʻe palesiteni fakamisiona. Naʻá ne fakahā mai ʻi he fakaʻosinga ʻo e ʻaho takitaha lolotonga ʻene ngāué, naʻe tātātaha ke ne lava ʻo aʻu ki ʻolunga ki hono mohengá mo ʻene fifili pe te ne maʻu nai ha mālohi ke toe fehangahangai mo ha ʻaho foʻou. Ka ʻi he hoko mai ʻa e pongipongí, te ne ʻiloʻi ai kuo toe fakafoʻou hono mālohí mo ʻene lototoʻá. Kuó ke mātā ia ʻi he moʻui ʻa e kau palōfita toulekeleká, ʻa ia naʻe hangē naʻe fakafoʻou maʻu pē ia he taimi kotoa pē ne nau tuʻu ai ke fakamoʻoniʻi ʻa e ʻEiki ko Sīsū Kalaisí mo e ongoongolelei kuo toe fakafoki maí. Ko ha talaʻofa ia kiate kinautolu ʻoku laka atu ʻi he tuí ʻi heʻenau ngāue ʻi he lakanga fakataulaʻeikí. (Henry B. Eyring, “Tui mo e Fakapapau mo e Fuakava ‘o e Lakanga Fakataulaʻeikí,” Liahona, Mē 2008, 62)
Faivelenga ʻi hono maʻu ʻo e Lakanga Taulaʻeiki Faka-ʻĒloné mo e Faka-Melekisētekí (vakai, veesi 33)
ʻOku kau ʻi he faivelenga ke maʻu e “ongo lakanga fakataulaʻeikí ni” (Tokāteline mo e Ngaahi Fuakava 84:33) ʻa hono maʻu ʻo e mālohi mo e ngaahi tāpuaki ʻoku maʻu ʻi hono maʻu e ngaahi ouau ʻo e Lakanga Taulaʻeiki Faka-ʻĒloné mo Faka-Melekisētekí pea faivelenga ʻi hono tauhi ʻo e ngaahi fuakava ʻoku kaunga ki aí. Naʻe akoʻi ʻe he Palōfita ko Siosefa Sāmitá ʻoku maʻu ʻe ha taha ʻa e kakato ʻo e lakanga fakataulaʻeikí “[ʻaki ʻene] tauhi kotoa ʻo e ngaahi fekaú mo talangofua ki he ngaahi ouau kotoa ʻo e fale ʻo e ʻEikí” (Ngaahi Akonaki ʻa e Kau Palesiteni ʻo e Siasí: Siosefa Sāmita, [2007], 485).
Ki he houʻeiki tangatá, ʻoku kau foki heni hono foaki kiate kinautolu ʻa e lakanga fakataulaʻeikí pea fakanofo ki he ngaahi tuʻunga ʻo e lakanga fakataulaʻeikí.
Fakahoko totonu hotau ngaahi uiuiʻí (veesi 33)
Ngaahi faingamālie ke maʻu ha ngaahi uiuiʻi pea kau ʻi he ngāue faifakamoʻui ʻa e ʻEikí
Naʻe akonaki ʻa Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
ʻI heʻetau ngāue ke fakahoko totonu hotau ngaahi uiuiʻí, ʻoku totonu ke tau fekumi ki he ueʻi ʻa e Laumālié ke fakaleleiʻi ʻa e ngaahi palopalemá ʻi ha ngaahi founga ʻe tokoni lelei taha ki he kakai ʻoku tau tokoniʻí. ʻOku tau maʻu ha ʻū tohi fakahinohino pea ʻoku totonu ke muimui ki heʻenau ngaahi fakahinohinó. Ka ʻoku ʻi loto ʻi he faʻunga ko iá ha ngaahi faingamālie lahi ke fakakaukau, mohu founga, pea mo fakaʻaongaʻi ʻa e ngaahi talēniti fakafoʻituituí. Ko e fakahinohino ko ia ke fua totonu hotau ngaahi uiuiʻí ʻoku ʻikai ko ha fekau ia ke fakalahi mo fakafaingataʻaʻiaʻi kinautolu. ʻOku ʻikai ʻuhinga ʻa e liliú ke fakalahi; ʻoku faʻa ʻuhinga ia ke fakafaingofuaʻi. (M. Russell Ballard, “O Be Wise,” Liahona, Nov. 2006, 19)
Meʻa kotoa pē ʻoku maʻu ʻe he Tamai Hēvaní (vakai, veesi 38)
Tokāteline mo e Ngaahi Fuakava 76:55–60; 81:6
Naʻe vahevahe ʻe ʻEletā Lainolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá:
Ke ʻiloʻi ʻoku ʻi ai ʻetau Tamai ʻi he Langí pea ko Sīsū Kalaisi ʻa Hono ʻAlo pē Taha naʻe Fakatupú, ʻoku ʻuhinga ia ʻoku tau sio mamaʻo atu ʻi he hala ʻo e fuakavá kae ʻikai ko e feituʻu pē ʻoku tau tuʻu ai he ʻaho ní. ʻOku ʻuhinga ia ʻoku tau houngaʻia ʻi heʻetau hoko ko e kau ʻea-hoko ki he meʻa kotoa pē ʻoku maʻu ʻe he Tamaí; ʻe lava ke ʻatautolu ʻa Hono ngaahi puleʻanga taʻefaʻalauá. Kuo talaʻofa ʻe he Fakamoʻuí, “Kapau te ke faivelenga ʻo aʻu ki he ngataʻangá, te ke maʻu ʻa e kalauni ʻo e moʻui taʻe-faʻa-maté, mo e moʻui taʻengatá ʻi he ngaahi nofoʻanga kuó u teuteu ʻi he fale ʻo ʻeku Tamaí.” (Ronald A. Rasband, “The Divine Destiny of His Daughters” [BYU Women’s Conference, Apr. 30, 2021], broadcasts.ChurchofJesusChrist.org)
Hili ha taimi feʻunga ke ako ai, fakaafeʻi e kau akó ke nau vahevahe mo ha hoa pe kulupu tokosiʻi ʻa e meʻa ne nau akó. Te ke lava ʻo fakaʻaongaʻi ha ngaahi fehuʻi fakatupu fakakaukau hangē ko ʻení ke tokoni ki hono tataki ʻo e fealēleaʻakí:
-
Ko e hā ka mahuʻinga ai e tāpuaki ko ʻení kiate koe he ʻaho ní?
-
Ko e hā ʻoku akoʻi atu ʻe he tāpuakí ni fekauʻaki mo e Tamai Hēvaní?
Vahevahe ha sīpinga (mei he folofolá pe ko hoʻo moʻuí) ʻo ha taha kuó ke mātā ʻene fakatātaaʻi hono tauhi e palōmesi naʻá ke filí.
Ke fakaʻosi e kalasí, te ke lava ʻo vahevahe e founga kuo tāpuekina ai koe ʻe he mālohi ʻo e lakanga fakataulaʻeikí ʻi hoʻo feinga ke tauhi faivelenga e ngaahi fuakava kuó ke fai mo e Tamai Hēvaní. Fakaafeʻi e kau mēmipa ʻo e kalasí ke nau kumi ha ngaahi faingamālie ke maʻu ai e mālohi ʻo e lakanga fakataulaʻeiki kuo talaʻofa ʻe he ʻOtuá ki Heʻene fānau ʻo e fuakavá.