Lēsoni 97: Tokāteline mo e Ngaahi Fuakava 84

Akoako Fakataukei Fakatokāteline 6

Ko e Mahino ki he Tokāteliné mo Hono Maʻu ʻo e ʻIlo Fakalaumālié

ʻE lava ke tokoni ʻa e fakataukei fakatokāteliné ki he kau akó ke langa ʻa e makatuʻunga ki heʻenau moʻuí ʻia Sīsū Kalaisi mo ʻEne ongoongoleleí. ʻE lava ke tokoni ʻa e lēsoni ko ʻení ke mahino ki he kau akó ʻa e ngaahi moʻoni ʻoku akoʻi ʻi he ngaahi potufolofola fakataukei fakatokāteliné pea tokoniʻi kinautolu ke nau ako mo fakaʻaongaʻi ʻa e ngaahi tefitoʻi moʻoni fakalangí ki hono maʻu ʻo e ʻilo fakalaumālié.

Ngaahi ʻEkitivitī Ako ʻOku Ala Fakahokó

Toe vakaiʻi ʻo e fakataukei fakatokāteliné: Mahinó

Ke tokoni ke maheni ange ʻa e kau akó mo e ngaahi potufolofola fakataukei fakatokāteline ʻi he toenga ʻo e ngaahi vahe ʻo e Tokāteline mo e Ngaahi Fuakavá, fakakaukau ke ʻoange ha ngaahi miniti siʻi ke nau fakaʻilongaʻi ai e ngaahi potufolofola ko ʻení ʻi ha founga makehe. ʻE lava ke kumi ʻe he kau akó ʻa e lisi ʻo e ngaahi potufolofola fakataukei fakatokāteliné mo e ngaahi kupuʻi lea folofola mahuʻingá ʻi he Fakamatala ki he ʻElito ʻo e Fakataukei Fakatokāteliné (2023).

Hili iá ʻe lava ke ke fakaafeʻi e kau akó ke nau fakahoko ʻa e ʻekitivitī ko ʻení ʻi ha fanga kiʻi kulupu iiki ke fakatupulaki ʻenau mahino ki he tokāteline ʻoku akoʻi ʻi he ngaahi potufolofola ko ʻení. Fakapapauʻi ʻoku miniti pē ʻe 10 ki he 15 hono fakaʻilongaʻi mo fakakakato e ʻekitivitī ko ʻení. ʻE maʻu heni ha taimi feʻunga maʻá e kau akó ke nau akoako fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻamui ange ʻi he lēsoní.

Hiki ha lisi ʻo e ngaahi faingataʻa angamaheni ʻoku fehangahangai mo e toʻu tupú ʻi heʻenau moʻui fakaʻahó.

Kumi e ngaahi potufolofola fakataukei fakatokāteline ʻo e Tokāteline mo e Ngaahi Fuakavá ʻe lava ʻo tokoni ki he ngaahi tūkunga ko iá. Lau ʻa e ngaahi potufolofola naʻá ke filí, pea teuteu ke vahevahe mo e kalasí hoʻo tali ki he ongo fehuʻi ko ʻení:

• Te ke fakamatalaʻi fēfē nai ʻi he ngaahi lea pē ʻaʻau ʻa e meʻa naʻe akoʻi ʻe he ngaahi potufolofola ko ʻení?

• ʻE tokoni fēfē ʻa e ngaahi akonaki ʻa Sīsū Kalaisi ʻi he ngaahi potufolofola ko ʻení ki he toʻu tupú ʻi he ngaahi faingataʻa angamaheni naʻá ke hiki?

Ako mo fakaʻaongaʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié

Kimuʻa pea fakafeʻiloaki ʻa e tūkunga ko ʻení, mahalo naʻa ʻaonga ke toe fakamanatu ʻe he kau akó ʻa e ngaahi tefitoʻi moʻoni ki hono maʻu ʻo e ʻilo fakalaumālié. (ʻOku fakakau atu e ngaahi ʻekitivitī fakamanatu ʻoku fokotuʻu atú ʻi he “Ngaahi ʻEkitivitī Toe Vakaiʻi ʻo e Fakataukei Fakatokāteliné” ʻi he fakamatala fakalahi ʻo e tohi lēsoni ko ʻení.)

Ko e founga ʻe taha ke fakamanatu aí ko hono hiki ʻa e tefitoʻi moʻoni takitaha ʻi he palakipoé ko ha ʻuluʻi tohi mavahe mo ha konga ʻatā ke tohi ai ʻi lalo he meʻa takitaha. Fakaafeʻi ʻa e kau akó ʻi ha tokolahi tatau ke nau fakamanatu ʻa e ngaahi tefitoʻi moʻoni kehekehe ʻo hono maʻu ʻo e ʻilo fakalaumālié mei he palakalafi 5–12 ʻi he Fakamatala ki he ʻElito ʻo e Fakataukei Fakatokāteliné (2023). Fakaafeʻi leva ha toko tolu te nau fiemālie ke takitaha ʻi ha tefitoʻi moʻoni, ke nau omi ki he palakipoé. Kole ange ke nau tohi ʻi lalo ʻi he ʻuluʻi tohi ʻoku fekauʻaki mo iá ha kupuʻi lea pe fakakaukau mahuʻinga mei he ngaahi palakalafi ne nau toe vakaiʻí. ʻE fakaʻaongaʻi ʻa e ngaahi kupuʻi lea pe ngaahi fakakaukau ko ʻení ʻamui ange ʻi he lēsoní.

Lau ʻa e tūkunga ko ʻení pea fakakaukau ki he founga ʻe lava ke tokoni ai ʻa e ngaahi tefitoʻi moʻoni ki hono maʻu ʻo e ʻilo fakalaumālié:

ʻOku ongoʻi puputuʻu ʻa Kulisi. Naʻe toki talaange ʻe hono tuofefine lahí, ʻa ia kuo ʻosi mali, kuó ne mavahe mei he Siasí pea ʻoku ʻikai ke ne toe fie hoko ko ha mēmipa. ʻOku ʻi ai mo ha kau mēmipa kehe ʻo e fāmili mo e ngaahi kaungāmeʻa ʻo Kulisí naʻa nau mālohi ʻi he ongoongoleleí ka kuo ʻikai ke nau toe maʻulotu maʻu pē. Ko ha kakai lelei kinautolu pea hangē ʻoku nau fiefia mo lavameʻa ʻi heʻenau moʻuí. Kuo palani maʻu pē ʻa Kulisi ke mālohi ʻi he Siasí, ka ʻoku kamata ke ne fifili pe ʻe fuʻu mahuʻinga nai ʻene mālohi ʻi he Siasí ʻi he kotoa ʻo ʻene moʻuí.

Fakaafeʻi ʻa e kau akó ke faʻu ha ngaahi kulupu tautau toko tolu, kapau ʻe lava, mo e kau ako ne nau toe vakaiʻi e ngaahi tefitoʻi moʻoni kehekehe ʻo hono maʻu ʻo e ʻilo fakalaumālié. Kole ki he ngaahi kulupú ke nau aleaʻi ʻa e founga ʻe ala tokoni ai ʻa e ngaahi kupuʻi lea pe fakakaukau takitaha ʻi he palakipoé kia Kulisí.

Makatuʻunga ʻi he taimi totonú, te ke lava ʻo toutou fakahoko ʻa e ʻekitivitī kimuʻá ʻaki hono fakaafeʻi ha kau ngāue tokoni kehe ke hiki ha ngaahi kupuʻi lea pe fakakaukau kehekehe ʻi he palakipoé ʻi lalo ʻi he tefitoʻi moʻoni takitaha. Ke kehekehe, lolotonga ʻo e takai takitaha ʻe lava ke faʻu ʻe he kau akó ha ngaahi kulupu kehekehe ʻo tautau toko tolu ke aleaʻi ʻa e ngaahi kupuʻi lea pe ngaahi fakakaukau foʻou ʻi he palakipoé.

Ke fakaʻosi ʻa e ʻekitivitī ko ʻení, ʻe lava ke faʻu ʻe he kau akó ha ngaahi kulupu foʻou ke nau toe aleaʻi ʻa e meʻa ko ʻení:

• Ko e potufolofola fakataukei fakatokāteline fē ʻi he Tokāteline mo e Ngaahi Fuakavá ʻe lava ʻo tokoni ke mahino kia Kulisi ʻa e meʻa ʻoku foaki ʻe Sīsū Kalaisi kiate kinautolu ʻoku nofo faivelenga ki Hono Siasí?

• Ko e ngaahi potufolofola fakataukei fakatokāteline fē mei he ngaahi tohi folofola kehé ʻe lava ʻo tokoni kiate iá?

Hili hono maʻu ʻe he kau akó ha taimi ke fekumi mo alēlea ai ʻi heʻenau ngaahi kulupú, fakaafeʻi kinautolu ke vahevahe mo e kalasí ʻa e ngaahi potufolofola ne nau ongoʻi ʻe ʻaonga tahá pea mo e ʻuhingá. Poupouʻi ha kau ako kehekehe ke vahevahe. (ʻE lava ke kau ʻi he ngaahi potufolofola ʻe fili ʻe he kau akó ʻa e Tokāteline mo e Ngaahi Fuakava 1:30; 84:20–22; Hilamani 5:12; Sosiua 24:15; ʻĪsaia 58:13–14; Luke 22:19–20; ʻEfesō 2:19–20.)

Te ke lava ʻo fakaʻosi ʻa e lēsoní ʻaki hono kole ki he kau akó ke nau tali ha niʻihi pe kotoa ʻo e ngaahi fakamatala ko ʻení ʻi heʻenau tohinoa akó:

Mei ha fakakaukau ʻoku taʻengatá, ʻoku finangalo ʻa e Tamai Hēvaní ke u faivelenga maʻu pē kia Sīsū Kalaisi mo mālohi ʻi Hono Siasí koeʻuhí .

Ko ha potufolofola ʻokú ne tokoniʻi au ke u fie tauhi faivelenga kia Sīsū Kalaisi mo mālohi ʻi Hono Siasí ko e .

Ko e meʻa ʻe taha te u lava ʻo fai ke u kei faivelenga ai pē kia Sīsū Kalaisi mo mālohi ʻi Hono Siasí ʻi he kotoa ʻo ʻeku moʻuí ko e .

Ngaahi ‘Ekitivitī Fakalahi ki he Akó

Tūkunga ʻe taha

ʻE ala tokoni ki hoʻo kau akó ke nau tokanga taha ki ha tūkunga ʻe lava ke tokoni ai ʻa e potufolofola fakataukei fakatokāteline Tokāteline mo e Ngaahi Fuakava 82:10. Kapau ko ia, fakaafeʻi kinautolu ke faʻu ha tūkunga ʻoku felāveʻi mo e toʻu tupu ʻi homou feituʻú ʻaki hono fakafonu ʻa e ngaahi konga ʻoku fakaava atu ko ʻení:

“ʻOku fie fakahoko ʻe (hingoá) e fekau ʻa e ʻEikí ke (ko ha fekau pe tuʻunga moʻui ʻa e ʻEikí ʻe lava ke faingataʻa hono tauhí, hangē ko e ngāue fakafaifekaú, ʻaukaí, tauhi e ʻaho Sāpaté ke māʻoniʻoní, moʻui maʻa maʻu peé) ka ʻoku faingataʻa ke ne fai ia koeʻuhí (ngaahi meʻa ʻe faingataʻa ai ke tauhi e fekau pe tuʻunga moʻui ko iá).”

Fakaafeʻi e kau akó ke nau ngāue fakataha ke fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié mo e ngaahi moʻoni ʻoku akoʻi ʻi he Tokāteline mo e Ngaahi Fuakava 82:10 ki he tūkungá.