“Lēsoni 94—Tokāteline mo e Ngaahi Fuakava 84:1–32: ‘Mālohi ʻo e Anga Faka-ʻOtuá,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 84:1–32,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 94: Tokāteline mo e Ngaahi Fuakava 84
Tokāteline mo e Ngaahi Fuakava 84:1–32
“Mālohi ʻo e Anga Faka-ʻOtuá”
Hili e foki ki ʻapi ha kulupu ʻo e Kaumātuʻá mei heʻenau ngāue fakafaifekaú, naʻa nau fakataha mo e Palōfita ko Siosefa Sāmitá. Lolotonga ʻenau lotu fakatahá, naʻe maʻu ʻe he Palōfitá ha fakahā naʻá ne ʻomi ha ngaahi fakakaukau fekauʻaki mo e “mālohi ʻo e anga faka-ʻOtuá” (Tokāteline mo e Ngaahi Fuakava 84:20) ʻoku lava ke maʻu ʻe he houʻeiki fafiné mo tangatá ʻo fakafou ʻi he ngaahi ouau ʻo e lakanga fakataulaʻeikí. ʻE lava ke tokoni ʻa e lēsoni ko ʻení ke ongoʻi ʻe he kau akó ʻa e mahuʻinga hono maʻu e mālohi ʻo e anga faka-ʻOtua ʻoku ʻomi ʻe Sīsū Kalaisi ʻo fakafou ʻi Heʻene ngaahi ouau ʻo e lakanga fakataulaʻeikí.
Ngaahi ʻEkitivitī Ako ʻOku Ala Fakahokó
Ngaahi ouau ‘o e lakanga fakataulaʻeikí
Fakakaukau ke fakaʻaliʻali ʻa e lea ko ʻeni naʻe fai ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá. Fakaafeʻi ʻa e kau akó ke vahevahe ʻenau ongo fekauʻaki mo ʻene ngaahi fehuʻí pea mo e founga te nau ala tali ʻaki iá.
ʻI heʻeku ngaahi fefolauʻaki ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻoku ou feʻiloaki ai mo e toʻu tupu ʻi he funga ʻo e māmaní. Ko e tokolahi ʻo kinautolu ʻoku nau fefaʻuhi mo ha ngaahi loto-hohaʻa moʻoni: “ʻE tokoniʻi nai au ʻe he ʻOtuá? Te Ne tataki nai ʻeku moʻuí? Te u maʻu fēfē ʻa e tokoni, fakahinohino, mo e melino ʻoku ou fie maʻú?” (Neil L. Andersen, “Ko e Mālohi ʻo e Anga Faka-ʻOtuá ʻo fakafou ʻi he Ngaahi Ouau mo e Ngaahi Tāpuaki ʻo e Lakanga Fakataulaʻeikí,” Ki Hono Fakamālohia ʻo e Toʻu Tupú, ʻAokosi 2021, 10)
-
Fakakaukau ki ha ngaahi taimi ʻi hoʻo moʻuí naʻá ke fiemaʻu ai ha tokoni, fakahinohino, mo ha nonga. Ko e hā naʻá ke fai pe naʻá ke mei lava ʻo fai ke fekumi ki he tokoni mo e fakahinohino ʻa e ʻOtuá?
Lau ʻa e toenga ʻo e lea ʻa ʻEletā Niila L. ʻEnitasení, ʻo kumi ha meʻa ʻe taha kuo foaki mai ʻe he ʻOtuá ke tokoniʻi kitautolu.
Siʻoku kaungāmeʻa kei talavou, ʻe tokoniʻi koe ʻe he ʻOtuá, pea ʻokú Ne mateuteu ke tāpuekina koe. ʻI Heʻene hoko ko ʻetau Tamai ʻofá, kuó Ne ʻomi ha ngaahi ouau ke tokoniʻi kitautolu ke tau ongoʻi Hono mālohí ʻi heʻetau moʻuí—ʻa e mālohi ʻo e anga faka-ʻOtuá. (Neil L. Andersen, “Ko e Mālohi ʻo e Anga Faka-ʻOtuá ʻo fakafou ʻi he Ngaahi Ouau mo e Ngaahi Tāpuaki ʻo e Lakanga Fakataulaʻeikí,” Ki Hono Fakamālohia ʻo e Toʻu Tupú, ʻAokosi 2021, 10)
Mahalo naʻe ʻikai fakakaukau ʻa e kau akó ki he founga ʻe lava ke tokoniʻi ai kinautolu ʻe he ngaahi ouaú ʻi heʻenau moʻuí. Te ke lava ʻo fakaafeʻi e kau akó ke nau fakakaukauloto ki heʻenau ngaahi fakakaukau mo e ongo fekauʻaki mo e ngaahi ouaú. Te ke lava ʻo fakaʻaliʻali ʻa e siviʻi-fakaekita ko ʻení ke fakahoko ʻeni:
ʻI hono fakaʻaongaʻi ha meʻafua mei he 1–5 (1 = maʻulalo; 5 = māʻolunga), te ke fakafuofuaʻi fēfē hoʻo loto-falalá ʻi he ngaahi fakamatala ko ʻení:
-
ʻOku ou ʻiloʻi ʻa e ʻuhinga ʻo e ngaahi ouau ʻo e lakanga fakataulaʻeikí.
-
ʻOku ou ʻiloʻi ʻa e founga kuo tāpuekina ai ʻe he ʻOtuá ʻeku moʻuí ʻo fakafou ʻi he ngaahi ouau ʻo e lakanga fakataulaʻeikí.
-
ʻOku ou teuteu moʻoni ke maʻu ʻa e ouau hoko ʻi heʻeku moʻuí.
Fakaafeʻi ʻa e kau akó ke nau ongoʻingofua e ngaahi ueʻi mei he Laumālie Māʻoniʻoní ʻi heʻenau ako ʻa e vahe 84, pea ako lahi ange fekauʻaki mo e mālohi ʻo e ʻOtuá ʻe lava ke maʻu ʻi heʻenau moʻuí ʻo fakafou ʻi he ngaahi ouau ʻo e lakanga fakataulaʻeikí.
Ko e temipalé mo e lakanga fakataulaʻeikí
Fakakaukau ki ha founga te ke lava ai ʻo vahevahe ʻa e fakamatala ko ʻení mo e kau akó:
ʻI Sepitema 1832, naʻe foki ʻa e kau faifekaú ki Ketilani, ʻOhaiō, hili hono malangaʻi ʻo e ongoongoleleí ʻi he feituʻu fakahahake ʻo e ʻIunaiteti Siteití. Lolotonga ʻenau fakatahá, naʻe maʻu ʻe he Palōfita ko Siosefa Sāmitá ʻa e fakahā ʻoku lekooti ʻi he Tokāteline mo e Ngaahi Fuakava 84. Naʻe fakalahi ʻe he ʻEikí ʻi he fakahā ko ʻení, ʻa e mahino ʻa e Kāingalotú fekauʻaki mo e lakanga fakataulaʻeikí. Lau ʻa e Tokāteline mo e Ngaahi Fuakava 84:1–5, ʻo kumi e meʻa naʻe fakahinohinoʻi ʻe he ʻEikí ki he Kāingalotú ke nau fakamahuʻingaʻi ʻi heʻenau langa ʻa e kolo ko Selusalema Foʻoú.
-
ʻOkú ke pehē ko e hā ʻoku mahuʻinga ai ke kamata ʻe he ʻEikí ha fakahā ki he lakanga fakataulaʻeikí ʻaki hono akoʻi ʻa e mahuʻinga ʻo e ngaahi temipalé?
Kapau he ʻikai talaatu ʻe he kau akó, te ke lava ʻo fakamahinoʻi ange ʻoku fakahoko ʻi he temipalé ʻa e ngaahi ouau ʻo e lakanga fakataulaʻeikí ʻa ia ʻoku mahuʻinga ki hotau fakamoʻuí mo e hakeakiʻí.
Mahalo te ke fie vahevahe mo e kau akó naʻe fakahā ʻe he ʻEikí ʻi he veesi 6–18, naʻe foaki Hono lakanga fakataulaʻeikí kia ʻĀtama pea hokohoko atu ki he kuonga ʻo Mōsesé. Naʻe foaki foki ʻe Sīsū Kalaisi ʻa e lakanga fakataulaʻeikí kia ʻĒlone mo hono hakó. Mahalo te ke fie fakamahinoʻi ange ʻoku hokohoko atu Hono lakanga fakataulaʻeikí ʻi he Siasi ʻo Sīsū Kalaisi kuo fakafoki maí ʻi he ʻahó ni. Ko e mafai kotoa pē ʻo e lakanga fakataulaʻeikí, kau ai mo e mafai ʻoku fiemaʻu ke fakahoko ʻaki e ngaahi ouau fakatemipalé, ʻoku maʻu ia meia Sīsū Kalaisi.
ʻOku fakahā ʻa e mālohi ʻo e ʻOtuá ʻi he ngaahi ouaú
Mahalo ko ha taimi lelei ʻeni ke fehuʻi ai ki hoʻo kau akó pe ko e hā ʻa e ouau. Kapau ʻe faingataʻa ke nau fakamatalaʻi ia, te ke lava ʻo fakaafeʻi ke nau fakaʻaongaʻi ʻa e ngaahi tokoni ki he ako folofolá ke ʻiloʻi ai. Tokoni ke mahino kiate kinautolu, ko e ouaú ko ha ngāue toputapu ia ʻoku fakahoko ʻi he mafai ʻo e lakanga fakataulaʻeikí. ʻOku ʻi ai ʻa e ngaahi ouau ʻe niʻihi ʻoku mahuʻinga ia ki hotau hakeakiʻí.
Mahalo te ke fie hiki e ngaahi ouau ʻo e lakanga fakataulaʻeikí ʻi he palakipoé, hangē ko e papitaisó, sākalamēnití, tāpuaki fakafiemālié mo e faleʻí, tāpuaki fakapēteliaké, hilifakinimá mo e meʻafoaki ʻo e Laumālie Māʻoniʻoní, ʻenitaumeni temipalé, mo e sila ʻi he temipalé.
Lau ʻa e Tokāteline mo e Ngaahi Fuakava 84:19–22, ʻo kumi e ngaahi akonaki ʻa e ʻEikí fekauʻaki mo e ngaahi ouaú.
Ko e Tokāteline mo e Ngaahi Fuakava 84:20–22 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻu ngofua kinautolu.
-
Ko e hā naʻá ke ako fekauʻaki mo e ngaahi ouau ʻo e lakanga fakataulaʻeikí?
-
Ko e hā haʻo ngaahi fehuʻi fekauʻaki mo e meʻa kuó ke laú?
Fakatatau mo e mahino ʻa e kau akó mo e ngaahi fehuʻi ʻoku nau ʻeké, mahalo te ke fie vahevahe ha niʻihi pe kotoa ʻo e ngaahi meʻa ko ʻení:
-
ʻOku ʻuhinga ʻa e “lakanga fakataulaʻeiki lahi ange [ʻokú ne puleʻi] ʻa e ongoongoleleí” ki he mafai ʻo e Lakanga Taulaʻeiki Faka-Melekisētekí ke fakahoko ʻa e ngaahi ouau ʻoku fiemaʻu ki hotau fakamoʻuí mo e hakeakiʻí.
-
Ko e “ngaahi meʻa lilo” ʻa e ʻOtuá ʻa e “ngaahi moʻoni fakalaumālie ʻoku toki ʻiloʻi pē ʻi he fakahā” (Fakahinohino ki he Ngaahi Folofolá, “Meʻa Lilo ʻa e ʻOtuá, Ngaahi,” scriptures.ChurchofJesusChrist.org).
-
ʻOku ʻuhinga ʻa e “mālohi ʻo e anga faka-ʻOtuá” ki he mālohi ʻoku maʻu mei he ʻOtuá ke tokoniʻi kitautolu ʻi he moʻuí ni mo teuteuʻi kitautolu ki he moʻui taʻengatá.
Tokoni ke ʻiloʻi ʻe he kau akó ʻe lava ke tau maʻu ʻa e mālohi ʻo e anga faka-ʻOtuá ʻi heʻetau moʻuí, ʻo fakafou ʻi he ngaahi ouau ʻo e lakanga fakataulaʻeikí.
Ke tokoni ke fakaloloto e mahino ʻa e kau akó ki he moʻoni ko ʻení, fakaafeʻi kinautolu ke fili ha taha ʻo e ngaahi ouau ʻoku hiki atu ʻi he palakipoé te nau fie ako lahi ange ki ai. ʻOange ha taimi ke nau hiki ai ha fehuʻi ʻe ua ki he tolu ʻoku nau maʻu fekauʻaki mo e ouau ko iá. Pe ko hoʻo fakaʻaliʻali ʻa e fehuʻi ʻe tolu ʻoku hiki atu ʻi laló ke nau fakakaukau ki ai.
-
ʻE teuteu fēfē ha taha ke ne maʻu ʻa e ouau ko ʻení?
-
ʻOkú ke pehē ʻoku tokoniʻi fēfē kitautolu ʻe he ouau lakanga fakataulaʻeiki ko ʻení ke tau maʻu ʻa e mālohi ʻo e anga faka-ʻOtuá ke tokoniʻi kitautolu ʻi he moʻuí ni?
-
ʻE tokoni fēfē nai hono maʻu ʻo e ouau ko ʻení ke tau hoko ʻo hangē ange ko e Tamai Hēvaní mo Sīsū Kalaisi?
Fakaafeʻi ʻa e kau akó ke nau fekumi ki he ngaahi maʻuʻanga tokoni kuo fokotuʻu fakalangí ke nau ʻilo lahi ange ai ki he ouau ne nau filí pea mo e tali ki heʻenau ngaahi fehuʻí. Te nau lava ʻo fai ʻeni ʻiate kinautolu pē pe mo ha niʻihi kehe naʻa nau fili ʻa e ouau tatau. ʻOku ʻomi ʻe he Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku maʻu ʻi he ChurchofJesusChrist.org, ha fakamatala ʻaonga kiate kinautolu ʻoku nau fili ke ako ʻa e ʻenitaumeni ʻi he temipalé (27.2) mo e silá (27.3). Te nau lava foki ʻo fakalaulauloto ki ha ngaahi aʻusia fakataautaha ʻo ha taimi kuo tokoniʻi ai kinautolu ʻe he ngaahi ouau kuo nau aʻusiá ke nau ongoʻi ʻa e mālohi ʻo e anga faka-ʻOtuá ʻi heʻenau moʻuí.
Hili ha taimi feʻunga, fakaafeʻi ha niʻihi fakafoʻituitui pe ngaahi kulupu ke vahevahe ʻa e meʻa naʻa nau akó mo e kalasí.
Ko e mahuʻinga ʻo e ngaahi ouaú
Ke tokoni ki he kau akó ke nau fakakaukau ki he meʻa kuo nau ako fekauʻaki mo e mahuʻinga ʻo e ngaahi ouau ʻo e lakanga fakataulaʻeikí, te ke lava ʻo ʻai ke tali ʻe he kau akó ha niʻihi pe kotoa ʻo e ngaahi fehuʻi ko ʻení. ʻE lava ke fili ʻe he kau akó ha fehuʻi pea vahevahe ʻenau ngaahi talí mo ha kaungā ako.
-
Ko e hā kuó ke ako fekauʻaki mo e mālohi ʻo e anga faka-ʻOtuá mo e ngaahi ouau ʻo e lakanga fakataulaʻeikí?
-
ʻE tokoniʻi fēfē koe ʻe he ngāue mo hono maʻu ʻo e ngaahi ouau ko ʻení ke ke ofi ange ai kia Sīsū Kalaisí?
-
Ko e fē ha taimi kuó ke ongoʻi ai e mālohi ʻo e ʻOtuá ʻo fakafou ʻi he ngaahi ouau ʻo e lakanga fakataulaʻeikí kuó ke maʻú?
Fakakaukau ke vahevahe hoʻo ngaahi fakakaukau mo e ongo fekauʻaki mo e mālohi ʻo e ʻOtuá kuó ke maʻu ʻi hoʻo moʻuí ʻo fakafou ʻi he ngaahi ouau ʻo e lakanga fakataulaʻeikí.
Ako Ma‘uloto
Mahalo te ke fie tokoni ki he kau akó ke ako maʻuloto ʻa e fakamoʻoni fakafolofola ki he fakataukei fakatokāteliné mo e kupuʻi lea mahuʻinga ʻo e potufolofolá lolotonga ʻa e lēsoni ko ʻení pea toe vakaiʻi ia ʻi he ngaahi lēsoni ʻi he kahaʻú. Ko e kupuʻi lea folofola mahuʻingá ko e, “ʻOku fakahā ʻi hono ngaahi ouaú ʻa e mālohi ʻo e anga faka-ʻOtuá.” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Toe Vakaiʻi ʻo e Fakataukei Fakatokāteliné.”