“Lēsoni 96—Tokāteline mo e Ngaahi Fuakava 84:49–102: ‘Ki he Māmaní Kotoa pē ki he Kakai Fulipē,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 84:49–102,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 96: Tokāteline mo e Ngaahi Fuakava 84
Tokāteline mo e Ngaahi Fuakava 84:49–102
“Ki he Māmaní Kotoa pē ki he Kakai Fulipē”
ʻI he faʻahitaʻu fakatōlau ʻo e 1832, naʻe kamata ke foki ha kau faifekau ʻo kau ai ʻa Sēleti Kaata mo Sitīveni Puaneti ki Ketilani, ʻOhaiō, mei hono malanga ʻaki e ongoongolelei ʻo Sīsū Kalaisí. Ko ha taimi fakafiefia ia ʻi hono ʻomi ʻe he kaumātuʻá ha ngaahi lipooti ʻo e ngāue maʻá e ʻEikí ʻi he fakahahake ʻo e ʻIunaiteti Siteití. Naʻe vave ai mo hano tali ʻe ha tokolahi ha ngaahi ui kehe ke hokohoko atu ʻenau ngāué. ʻI hotau kuongá ni, te tau lava foki ʻo tokoni ki he ʻEikí ʻaki hono vahevahe ʻEne ongoongoleleí. ʻE lava ke tokoni ʻa e lēsoni ko ʻení ke ongoʻi ʻe he kau akó ʻa e holi faka-Kalaisi ke vahevahe ʻa e ongoongoleleí mo e tokotaha kotoa pē ʻi he māmaní.
Ngaahi ʻEkitivitī Ako ʻOku Ala Fakahokó
Ko e māmaní kotoa
Ke tokoni ke ʻiloʻi ʻe he kau akó ʻa e tokolahi ʻo e fānau ʻa e ʻOtuá ʻoku nau ʻi he māmaní pea ʻoku nau fiemaʻu ʻEne ongoongoleleí, te ke lava ʻo kamata e kalasí ʻaki hano fakaʻaliʻali ha mape ʻo e māmaní. Fakakaukau ke kole ki he kau akó ke nau fakahingoa ki he lahi taha ʻo e ngaahi fonua te nau lava ʻo fakakaukau ki aí ʻi ha miniti ʻe taha, pe ko hoʻo fakaafeʻi kinautolu ke nau fakamahinoʻi ange ha ngaahi fonua lahi ʻi he mapé. ʻE lava foki ke kumi ʻe he kau akó ʻa e tokolahi ho fonuá pe ko e māmaní.
Liliu ke talanoa fekauʻaki mo e ongoongolelei ʻo Sīsū Kalaisi kuo fakafoki maí ʻi he funga ʻo e māmaní. ʻE lava ke ke ʻeke ha ngaahi fehuʻi hangē ko ʻení:
-
Ko e fē ʻoku ngāue ai ʻa e kau faifekaú ʻi he funga ʻo e māmaní? Ko e fē ʻa e ngaahi feituʻu ʻoku ʻikai ke nau ʻi aí?
-
ʻOku fēfē ʻa hono fakafehoanaki ʻa e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he funga ʻo e māmaní ki he tokolahi fakakātoa ʻo e māmaní? ʻOku fēfē hono fakafehoanaki ʻa e kāingalotu ʻo e Siasí ʻi homou feituʻú ki he tokolahi fakakātoa homou feituʻú?
Ki ha tokoni ki hono tali ʻo e ngaahi fehuʻi fakasitētisitika fekauʻaki mo e Siasí, vakai ki he peesi “Facts and Statistics” newsroom.ChurchofJesusChrist.org.
Te ke lava ʻo kole ki he kau akó ke nau fakalaulauloto ki he lelei te nau lava ʻo fakahoko ʻi heʻenau fili ke ngāue fakafaifekaú. Lau ʻa e fakamatala ko ʻení pea fakaafeʻi ʻa e kau akó ke vahevahe ʻenau ngaahi fakakaukaú pe ongó.
Naʻe akoʻi ʻe Palesiteni Lāsolo M. Nalesoni ʻa e meʻá ni:
ʻE fiemaʻu ʻe he taha kotoa pē ha faingamālie ke ne ʻilo fekauʻaki mo e ongoongolelei ʻo Sīsū Kalaisi kuo fakafoki maí. ʻE fiemaʻu ʻe he taha kotoa pē ke ne ʻilo ʻa e feituʻu te nau lava ke maʻu ai ʻa e ʻamanaki leleí mo e melino ʻoku “[ope] atu ʻi he ʻilo kotoa pē” [Filipai 4:7]. (Russell M. Nelson, “Malangaʻi e Ongoongolelei ʻo e Melinó,” Liahona, Mē 2022, 7)
Kole ki he kau akó ke hiki ha ngaahi fakakaukau ko e tali ki he fehuʻi ko ʻení:
Tuku ha kiʻi taimi ke fakalaulauloto ai ki he ongo ʻoku maʻu ʻe he ʻOtuá ki Heʻene fānau kotoa ʻi he funga ʻo e māmaní. Ko e hā ʻoku mole mei ha kakai tokolahi ʻi he ʻikai ke nau ʻilo fekauʻaki mo Sīsū Kalaisi mo Hono Siasi kuo fakafoki maí? Ko e hā ʻokú ke ʻilo pea ko e hā ha ngaahi tāpuaki kuó ke aʻusia te ne lava ʻo fai ha liliu ʻi he moʻui ʻa e niʻihi kehé?
Ko e ngaahi tūkunga ʻo e māmaní
ʻI Sepitema ʻo e 1832, ko ha taimi ia ʻo e fiefia ʻi Ketilani ʻi he foki mai ʻa e kau faifekaú mei he ngāue fakafaifekaú mo lipooti ʻenau ngaahi aʻusia ʻi he ngaahi siteiti fakahahake ʻo ʻAmeliká. Lolotonga e taimi ko ʻení, naʻe maʻu ʻe Siosefa Sāmita ha ngaahi fakahinohino mei he ʻEikí. Naʻe lave ha niʻihi ʻo e ngaahi fakahinohino ko ʻení ki he tūkunga mo e ngaahi fiemaʻu ʻa e māmaní.
Lau ʻa e Tokāteline mo e Ngaahi Fuakava 84:49–53, ʻo kumi e ngaahi foʻi lea mo e kupuʻi lea naʻe fakaʻaongaʻi ʻe he ʻEikí ke fakamatalaʻi ʻaki ʻa e meʻa naʻe aʻusia ʻe he kakai ʻi he māmaní.
Fakaafeʻi ʻa e kau akó ke vahevahe ʻa e ngaahi foʻi lea mo e ngaahi kupuʻi lea ne nau maʻú pea mo e meʻa ʻoku nau pehē ʻoku ʻuhinga ki aí. ʻOku ngalingali te nau talaatu ha kaveinga ʻo e angahalá mo e nofo pōpulá. Mahalo foki ʻe fakatokangaʻi ʻe he kau akó naʻe ʻi he fakapoʻulí mo toʻe ʻa e kakaí koeʻuhí ko e ngaahi tūkunga ko ʻení. ʻOku ʻuhinga ʻeni naʻa nau ongoʻi tuenoa, loto-mamahi mo faingataʻaʻia. ʻE lava ke vahevahe ʻe he kau akó ʻa e founga kuo nau mamata ai ʻoku fakatupu ʻe he angahalá ʻa e mamahí mo e faingataʻá pea iku ki he pōpulá. Fakatokanga ki he kau akó ke ʻoua naʻa nau vahevahe ha ngaahi fakaikiiki ʻe lava ke taʻefakaʻapaʻapaʻi ai ha totonu fakafoʻituitui ʻa ha taha.
Naʻe fakamahinoʻi ʻe he ʻEikí, naʻa mo e kāingalotu ʻo Hono Siasí naʻa nau aʻusia ha tuʻunga fakapoʻuli mo mamahi ʻi he taimi ko iá.
Lau ʻa e Tokāteline mo e Ngaahi Fuakava 84:54–57 ke ʻiloʻi pe ko e hā naʻá ne fakatupu ʻa e fakapoʻulí mo e mamahí ki he kāingalotu ʻo e Siasí.
-
Ko e hā naʻá ke maʻú?
-
Ko e hā te tau lava ʻo ako mei he ngaahi veesi ko ʻení fekauʻaki mo e mahuʻinga ʻo e Tohi ʻa Molomoná mo e ngaahi fakahā ʻi he Tokāteline mo e Ngaahi Fuakavá?
Tokoni ke mahino ki he kau akó ʻa e ongo ʻoku maʻu ʻe Sīsū Kalaisi mo ʻEne kau ākongá ʻi heʻenau mamata ki he faingataʻaʻia ʻa e kakaí ʻi he angahalá mo e fakapoʻulí. Te nau lava ʻo ako fakafoʻituitui pe ʻi ha fanga kiʻi kulupu iiki ha potufolofola ʻe taha pe ua.
-
Mōsese 7:26, 28, 41 (mata meʻa-hā-mai ʻa ʻĪnoké)
-
Mōsaia 28:3 (ngaahi foha ʻo Mōsaiá)
-
ʻAlamā 31:2 (ʻAlamā ko e Siʻí)
-
3 Nīfai 17:14 (Sīsū Kalaisi)
-
Ko e hā ha ngaahi lea ʻoku nau tokoniʻi koe ke mahino e ngaahi ongo ʻa e Fakamoʻuí kiate kinautolu ʻoku faiangahala mo ʻi he fakapoʻulí? Fakakaukau ki he tuʻunga ʻo e fefaʻuhi ʻi he angahalá mo e fakapoʻulí.
-
ʻE tokoni fēfē ha mahino kiate koe e ngaahi ongo ʻa e ʻEikí?
-
ʻOkú ke pehē ʻe tokoni fēfē ʻa e Tohi ʻa Molomoná ki ha taha ke ne ikunaʻi ʻa e fakapoʻuli fakalaumālié?
Ko e leʻo ʻo e Fakamoʻuí
Lau ʻa e Tokāteline mo e Ngaahi Fuakava 84:60–62, ʻo kumi ʻa e meʻa naʻe fakahinohino ʻe Sīsū Kalaisi ki he kau tangatá ni ke nau fakahokó. ʻE ala tokoni ke ʻiloʻi ʻoku ʻuhinga ʻa e “ngaahi meʻa ko ʻení” ʻi he veesi 60 mo e “ngaahi meʻa ʻa ia” ʻi he veesi 61 ki he meʻa naʻe fakahā ʻe he ʻEikí ʻi he vahe 84, ʻa ia ʻoku kau ai hono manatuʻi ʻo e Tohi ʻa Molomoná.
-
Ko e hā naʻe fakahinohino kinautolu ʻe Sīsū ke nau fakahokó?
-
Ko e hā ha ngaahi tāpuaki te nau maʻu ʻi he talangofua ki Heʻene fakahinohinó?
Fakaʻatā ʻa e kau akó ke vahevahe ʻa e meʻa naʻa nau akó. Ko e moʻoni ʻe taha te nau lava ʻo ʻiló ʻoku fiemaʻu ʻe Sīsū Kalaisi ke tau vahevahe ʻa e Tohi ʻa Molomoná mo ʻetau fakamoʻoní mo e fānau kotoa ʻa e ʻOtuá ʻi he funga ʻo e māmaní.
Tokoni ke mahino ki he kau akó ʻa e ʻuhinga ʻoku finangalo ai ʻa Sīsū Kalaisi ke tau vahevahe ʻEne ongoongoleleí mo e kakai kotoa pē. Te ke lava ʻo kamata ʻaki hano tokoniʻi e kau akó ke nau ʻiloʻi ʻa e ngaahi tāpuaki ʻoku finangalo ʻa e ʻEikí ke maʻu ʻe he tokotaha kotoa pē. ʻE lava ke hoko ʻa e ʻekitivitī ko ʻení ko ha founga fakafiefia ke ngāue fakataha ai ʻa e kau akó mo hanau hoa ʻi heʻenau ako lahi ange ʻa e Tokāteline mo e Ngaahi Fuakava 84.
Fakaʻaliʻali e ngaahi fakahinohino ko ʻení, pea tokoni ki he kau akó ke muimui ki ai. Ki he sitepu 2, te ke lava ʻo tomuʻa fili ha ngaahi misiona pau ke fili mei ai ʻa e kau akó.
-
Fili ha taha ke ke ngāue mo ia ko hoʻo “hoa ngāue fakafaifekaú” ʻi he toenga ʻo e lēsoní.
-
Fili ha misiona ʻi he māmaní te ke fie ngāue aí. (Kapau ʻoku lea ʻaki ʻe he kakaí ha lea fakafonua kehe ʻi he misiona naʻá ke filí, vakai pe te ke lava ʻo ako vave e founga ke talitali ai ho hoá ʻi he lea fakafonua ko iá.)
-
Lau ʻa e Tokāteline mo e Ngaahi Fuakava 84:64–73, pea hiki ha lisi ʻo e ngaahi tāpuaki ʻoku finangalo ʻa Sīsū Kalaisi ke foaki kiate kinautolu kotoa pē ʻoku nau tali Ia mo ʻEne ongoongoleleí.
-
Aleaʻi ʻa e founga ʻe lava ke tokoniʻi ai ʻe he ngaahi tāpuaki takitaha naʻá ke lisí ha taha ke ne ikunaʻi ʻa e fakapoʻulí mo e pōpula ʻo e angahalá.
ʻOange ha faingamālie ki he kau akó ke vahevahe ʻa e ngaahi tāpuaki maʻongoʻonga ʻoku maʻu mei he muimui kia Sīsū Kalaisí. Makehe mei hono fai ha fehuʻi hangē ko ʻení, te ke lava ʻo huluʻi e vitiō “A Change of Heart” (4:39).
-
Kapau te ke lava ʻo vahevahe ha meʻa fekauʻaki mo Sīsū Kalaisi mo ha taha ʻoku ʻikai ke ne ʻilo pe muimui ʻiate Ia, ko e hā nai ia?
Ko e ngaahi kaungāmeʻa ʻo e Fakamoʻuí
Tuku ha kiʻi taimi ke fakalaulauloto ai ki he ʻuhinga kuo tali loto-fiemālie ai ʻe ha kau finemui mo ha kau talavou tokolahi ha ui mei he ʻEikí ke nau hoko ko ha faifekau tokoni pe malangá.
Lolotonga e fakalaulauloto ʻa e kau akó, te ke lava ʻo kole ange ke nau vahevahe pe ko hai ʻoku nau ʻilo naʻá ne toki maʻu ha ui ke ngāue mei he ʻEikí. Kapau ʻe lava, te ke lava ʻo vahevahe ha fakamatala ʻi he mītia fakasōsialé ʻo ha taha ʻokú ne lau hono uiuiʻi ngāue fakafaifekaú ki he fāmilí mo e ngaahi kaungāmeʻá. Tokoni ki he kau akó ke nau ʻilo ʻa e fiefia ʻe lava ke maʻu ʻe kinautolu ʻoku nau fie ngāue maʻá e ʻEikí.
-
Ko e hā ha ngaahi meʻa ʻe ala faingataʻa pe fakailifia fekauʻaki mo e ngāue maʻá e ʻEikí ko ha faifekaú?
Fakakaukau ke fakaafe‘i ʻa e kau akó ke lau e ngaahi veesi ko ʻení mo honau “hoa ngāue fakafaifekaú.” Te ke lava ʻo fakaafeʻi kinautolu ke fili ha akonaki ʻe ua pe tolu ʻa e Fakamoʻuí ʻokú ne ʻoange ha loto-falala kiate kinautolu ʻoku nau fie vahevahe ʻa e ongoongoleleí mo e niʻihi kehé. Hili iá, ʻe lava ke vahevahe ʻe he ngaahi hoá ʻa e meʻa ne nau akó mo e ngaahi hoa kehe ʻo e kau ako ʻi he kalasí.
Lau ʻa e Tokāteline mo e Ngaahi Fuakava 84:77–88, ʻo kumi e ngaahi lea fakalotolahi ʻa e ʻEikí kiate kinautolu te nau manavasiʻi ke tali ha ui ke ngāue Maʻaná.
Te ke lava foki ʻo vahevahe ha ngaahi lea fakalotolahi mei he kau taki ʻo e Siasí. (Vakai, “Ngaahi Maʻuʻanga Tokoni Kehé.”)
-
Ko e fē ʻi he ngaahi lea ʻa e ʻEikí naʻe makehe kiate koé?
-
Mei he meʻa naʻá ke ako ʻi he ʻaho ní, ʻokú ke pehē ko e hā ʻe fakakaukau ai ʻa Sīsū Kalaisi kiate kinautolu ʻoku nau malanga ʻaki ʻEne ongoongoleleí ko Hono ngaahi kaungāmeʻá? (vakai, veesi 77).
-
Ko e hā kuó ke ako ʻi he ʻahó ni ʻoku tokoni ke mahino lelei ange kiate koe ʻa e ongo ʻoku maʻu ʻe he ʻEikí ki he tokotaha kotoa pē ʻi he māmaní? Ko e hā ha ngaahi ngāue ʻe ala poupouʻi koe ʻe he Laumālie Māʻoniʻoní ke ke fakahoko koeʻuhí ko e meʻa naʻá ke akó?