Lesson 96: Doktrina at mga Tipan 84

Doktrina at mga Tipan 84:49–102

“Sa Buong Sanlibutan Sa Bawat Kinapal”

Noong taglagas ng 1832, nagsimulang bumalik sa Kirtland, Ohio, ang mga misyonero, kabilang na sina Jared Carter at Stephen Burnett, mula sa pangangaral ng ebanghelyo ni Jesucristo. Masayang panahon iyon nang magbigay-ulat ang mga elder tungkol sa paglilingkod sa Panginoon sa silangang Estados Unidos. Kalaunan ay marami ang tatanggap ng mga karagdagang tawag upang patuloy na maglingkod. Sa ating panahon, tayo ay makapaglilingkod rin sa Panginoon sa pamamagitan ng pagbabahagi ng Kanyang ebanghelyo. Ang lesson na ito ay makatutulong sa mga estudyante na madama ang pagnanais na tulad ng kay Cristo na ibahagi ang ebanghelyo sa lahat ng tao sa mundo.

Mga Posibleng Aktibidad sa Pag-aaral

Ang buong mundo

Upang tulungan ang mga estudyante na mapagtanto kung gaano karami ang anak ng Diyos sa mundo at nangangailangan ng Kanyang ebanghelyo, maaari mong simulan ang klase sa pamamagitan ng pagpapakita ng mapa ng mundo. Maaari mong anyayahan ang mga estudyante na magbanggit ng maraming bansa na maiisip nila sa loob ng isang minuto, o maaari mo silang anyayahan na ituro ang ilang bansa sa mapa. Maaari ding alamin ng mga estudyante ang populasyon ng inyong bansa o ng mundo.

Pagkatapos ay talakayin ang tungkol sa ipinanumbalik na ebanghelyo ni Jesucristo sa buong mundo. Maaari mong itanong ang tulad ng mga ito:

• Saan naglilingkod ang mga missionary sa iba’t ibang panig ng mundo? Saang lugar sa iba’t ibang panig ng mundo ang walang mga missionary?

• Paano maihahambing ang bilang sa buong mundo ng miyembro ng Ang Simbahan ni Jesucristo ng mga Banal sa mga Huling Araw sa kabuuang populasyon ng mundo? Paano maihahambing ang bilang ng mga miyembro ng Simbahan sa lugar ninyo sa kabuuang populasyon ng inyong lugar?

Bilang tulong sa pagsagot sa mga istatistikal na tanong tungkol sa Simbahan, sumangguni sa “Facts and Statistics” page na nasa newsroom.ChurchofJesusChrist.org.

Maaari mong sabihin sa mga estudyante na pag-isipan ang kabutihang magagawa nila sa pagpiling magmisyon. Basahin ang sumusunod na pahayag at anyayahan ang mga estudyante na ibahagi ang kanilang mga naiisip o nadarama.

Itinuro ni Pangulong Russell M. Nelson ang sumusunod:

Lahat ay nararapat na magkaroon ng pagkakataong malaman ang tungkol sa ipinanumbaik na ebanghelyo ni Jesucristo. Bawat tao ay nararapat na malaman kung saan siya makasusumpong ng pag-asa at kapayapaan na “hindi maabot ng pag-iisip” [Filipos 4:7]. (Russell M. Nelson, “Pangangaral ng Ebanghelyo ng Kapayapaan,” Liahona, Mayo 2022, 7)

Hilingin sa mga estudyante na magsulat ng ilang saloobin bilang tugon sa sumusunod na prompt o tanong:

Maglaan ng ilang sandali upang pagnilayan ang nadarama ng Diyos tungkol sa lahat ng Kanyang mga anak sa buong mundo. Ano ang hindi natatamasa ng maraming tao dahil hindi nila nalalaman ang tungkol kay Jesucristo at sa Kanyang ipinanumbalik na Simbahan? Ano ang nalalaman mo at anong mga pagpapala ang naranasan mo na maaaring makapagdulot ng makabuluhang pagbabago sa buhay ng ibang tao?

Ang mga kalagayan ng mundo

Ang Setyembre 1832 ay isang panahon ng kagalakan sa Kirtland matapos bumalik ang mga misyonero mula sa pagmimisyon at nag-ulat ng kanilang mga karanasan sa mga estado sa silangan ng Amerika. Sa panahong ito, nakatanggap si Joseph Smith ng mga tagubilin mula sa Panginoon. Ang ilan sa mga tagubiling ito ay tugon sa kalagayan at mga pangangailangan ng mundo.

Basahin ang Doktrina at mga Tipan 84:49–53, at maghanap ng mga salita at parirala na ginamit ng Panginoon upang ilarawan ang nararanasan ng mga tao sa mundo.

Anyayahan ang mga estudyante na ibahagi ang mga salita at pariralang nahanap nila at kung ano sa kanilang palagay ang kahulugan ng mga ito. Posibleng matukoy nila ang tema ng kasalanan at pagkaalipin. Maaari ding mapansin ng mga estudyante na nasa kadiliman ang mga tao at dumadaing dahil sa mga kalagayang ito. Ibig sabihin nito ay nakadarama sila ng kawalan ng kakayahan, kalungkutan, at sakit. Maaaring ibahagi ng mga estudyante kung paano nila nakita na ang kasalanan ay nagdudulot ng sakit at pighati at humahantong sa pagkaalipin. Paalalahanan ang mga estudyante na huwag magbahagi ng mga detalye na maaaring kawalang-galang sa privacy ng isang tao.

Binigyang-diin ng Panginoon na maging ang mga miyembro ng Kanyang Simbahan ay nakararanas din ng antas ng kadiliman at kaparusahan sa panahong iyon.

Basahin ang Doktrina at mga Tipan 84:54–57 upang malaman kung ano ang nagdudulot ng kadiliman at kaparusahan sa mga miyembro ng Simbahan.

• Ano ang nalaman ninyo?

• Ano ang matututuhan natin mula sa mga talatang ito tungkol sa kahalagahan ng Aklat ni Mormon at ng mga paghahayag sa Doktrina at mga Tipan?

Tulungan ang mga estudyante na maunawaan kung ano ang nadarama ni Jesucristo at ng Kanyang mga disipulo kapag nakikita nilang nagdurusa ang mga tao sa kasalanan at kadiliman. Maaari nilang pag-aralan ang isa o dalawa sa mga sumusunod na passage nang mag-isa o sa maliliit na grupo.

• Moises 7:26, 28, 41 (pangitain ni Enoc)

• Mosias 28:3 (ang mga anak ni Mosias)

• Alma 31:2 (Nakababatang Alma)

• 3 Nephi 17:14 (Jesucristo)

• Ano ang mga salitang makatutulong sa inyo na maunawaan ang nadarama ng Tagapagligtas para sa mga taong nasa kasalanan at kadiliman? Isipin kung ano ang pakiramdam na mahirapan sa kasalanan at kadiliman.

• Paano makatutulong ang pag-unawa sa nadarama ng Panginoon?

• Sa inyong palagay, paano matutulungan ng Aklat ni Mormon ang isang tao na madaig ang espirituwal na kadiliman?

Ang tinig ng Tagapagligtas

Basahin ang Doktrina at mga Tipan 84:60–62, at alamin kung ano ang ipinagagawa ni Jesucristo sa mga taong ito. Makatutulong na malaman na ang “mga bagay na ito” sa talata 60 at ang “mga bagay na yaon” sa talata 61 ay tumutukoy sa inihayag ng Panginoon sa bahagi 84, na kinapapalooban ng pag-alaala sa Aklat ni Mormon.

• Ano ang ipinagagawa ni Jesus sa kanila?

• Anong mga pagpapala ang matatanggap nila sa pamamagitan ng pagsunod sa Kanyang tagubilin?

Hayaang ibahagi ng mga estudyante ang natutuhan nila. Ang isang katotohanan na maaari nilang matukoy ay nais ni Jesucristo na ibahagi natin ang Aklat ni Mormon at ang ating mga patotoo sa lahat ng anak ng Diyos sa iba’t ibang panig ng mundo.

Tulungan ang mga estudyante na maunawaan kung bakit nais ni Jesucristo na ibahagi natin ang Kanyang ebanghelyo sa lahat ng tao. Maaari kang magsimula sa pagtulong sa mga estudyante na matuklasan ang mga pagpapalang nais ng Panginoon na matanggap ng lahat. Ang sumusunod na aktibidad ay maaaring kasiya-siyang gawin ng mga estudyante nang may kapartner habang pinag-aaralan pa nila ang Doktrina at mga Tipan 84.

Ipakita ang mga sumusunod na tagubilin, at tulungan ang mga estudyante na sundin ang mga ito. Para sa hakbang 2, maaari kang paunang pumili ng partikular na mga mission na pagpipilian ng mga estudyante.

1. Pumili ng isang taong makatutulong ninyo bilang “kompanyon sa mission” para sa natitirang bahagi ng lesson.

2. Pumili ng isang mission sa mundo kung saan nais ninyong maglingkod. (Kung nagsasalita ang mga tao ng ibang wika sa mission na inyong pinili, tingnan kung mabilis ninyong matututuhan kung paano batiin sa wikang iyon ang inyong kompanyon.)

3. Basahin ang Doktrina at mga Tipan 84:64–73, at gumawa ng listahan ng mga pagpapalang nais ibigay ni Jesucristo sa lahat ng tatanggap sa Kanya at sa Kanyang ebanghelyo.

4. Talakayin kung paano makatutulong sa isang tao ang bawat isa sa mga pagpapalang inilista ninyo para madaig niya ang kadiliman at pagkaalipin sa kasalanan.

Bigyan ang mga estudyante ng pagkakataong ibahagi ang malalaking pagpapalang nagmumula sa pagsunod kay Jesucristo. Bilang karagdagan sa pagtatanong ng tulad sa sumusunod, maaari mong ipanood ang video na “A Change of Heart” (4:39).

A Change of Heart

A young man in Honduras was drifting toward a life of apathy, selfishness, and trouble until a friend showed him he was born for so much more.

• Kung magbabahagi ka ng isang bagay tungkol kay Jesucristo sa isang taong hindi nakakikilala o sumusunod sa Kanya, ano ito?

Ang mga kaibigan ng Tagapagligtas

Pag-isipan sandali kung bakit napakaraming kabataang babae at lalaki ang handang tumanggap ng tawag mula sa Panginoon upang maging service o proselyting missionary.

Habang nag-iisip ang mga estudyante, maaari mong hilingin sa kanila na magbahagi tungkol sa kakilala nila na nakatanggap kamakailan ng tawag na maglingkod mula sa Panginoon. Kung mayroon, maaari kang magbahagi ng isang social media post ng isang taong nagbabalita ng kanyang mission call sa pamilya at mga kaibigan. Tulungan ang mga estudyante na makita ang kagalakang maaaring dumating sa mga taong nais maglingkod sa Panginoon.

• Anong mga bagay ang maaaring mahirap o nakakatakot tungkol sa paglilingkod sa Panginoon bilang isang missionary?

Maaari mong anyayahan ang mga estudyante na basahin ang mga sumusunod na talata kasama ang kanilang “kompanyon sa mission.” Maaari mo silang anyayahang pumili ng dalawa o tatlo sa mga turo ng Tagapagligtas na nagbibigay ng kumpiyansa sa mga taong nais ibahagi ang ebanghelyo sa iba. Pagkatapos ay maaaring ibahagi ng magkaka-partner ang kanilang natutuhan sa iba pang magkapartner na estudyante sa klase.

Basahin ang Doktrina at mga Tipan 84:77–88, at hanapin ang mga nakapanghihikayat na salita ng Panginoon sa mga taong maaaring kinakabahan sa pagtanggap ng tawag na maglingkod sa Kanya.

Maaari ka ring magbahagi ng mga nakapanghihikayat na salita mula sa mga lider ng Simbahan. (Tingnan sa “Karagdagang Resources.”)

• Alin sa mga salita ng Panginoon ang pinakamahalaga para sa inyo?

• Mula sa natutuhan ninyo sa araw na ito, sa inyong palagay, bakit ituturing ni Jesucristo bilang Kanyang mga kaibigan ang mga taong nangangaral ng Kanyang ebanghelyo? (tingnan sa talata 77).

• Ano ang natutuhan ninyo sa araw na ito na nakatulong sa inyo na mas maunawaan ang nadarama ng Panginoon tungkol sa lahat ng tao sa mundo? Anong mga bagay ang maaaring ipinagagawa sa inyo ng Espiritu Santo dahil sa inyong natutuhan?

Karagdagang Resources

Gaano kahalagang ibahagi ang ebanghelyo ni Jesucristo?

Ipinaliwanag ni Pangulong Russell M. Nelson:

Mga kapatid, ang ebanghelyo ni Jesucristo ay kailangan ngayon nang higit kailanman. … Mahal ko ang Panginoong Jesucristo at pinatototohanan ko na ang Kanyang ebanghelyo ang tanging pangmatagalang solusyon para sa kapayapaan. Ang Kanyang ebanghelyo ay isang ebanghelyo ng kapayapaan [Doktrina at mga Tipan 27:16]. …

Lahat ng missionary ay nagtuturo at nagpapatotoo tungkol sa Tagapagligtas. Kailangan ngayon ang liwanag ni Jesucristo nang higit kailanman dahil sa espirituwal na kadiliman sa mundo. (Russell M. Nelson, “Pangangaral ng Ebanghelyo ng Kapayapaan,” Liahona, Mayo 2022, 6–7)

Anong mga pagpapala ang maaaring dumating sa pamamagitan ng service o proselyting mission?

Sinabi ni Elder Denelson Silva ng Pitumpu:

Ang pribilehiyong katawanin ang Tagapagligtas na si Jesucristo at ang Kanyang Simbahan ay hindi maaaring balewalain. Ang pakikibahagi sa di-mabilang na panalangin, pagkakaroon at pagbabahagi ninyo ng patotoo nang ilang beses sa isang araw, pag-aaral ng mga banal na kasulatan nang maraming oras, at pagkausap sa mga taong hindi sana ninyo makikilala kailanman kung nanatili kayo sa bahay, ay mga karanasang mahirap ilarawan. Ang ganito ring antas ng karanasan ay nakalaan para sa mga kabataang tinawag ng Panginoon na maglingkod sa mga service mission. Lubos namin kayong tinatanggap at kailangan. Huwag sana ninyong maliitin ang kahalagahan ng isang service mission, sapagkat ang mga service mission ay naglalaan din ng mga karanasang mahirap ilarawan. “Ang kahalagahan ng mga kaluluwa ay dakila sa paningin ng Diyos” (Doktrina at mga Tipan 18:10), kabilang na ang kahalagahan ng inyong kaluluwa. (Denelson Silva, “Tapang na Ipahayag ang Katotohanan,” Liahona, Nob. 2022, 71)

Doktrina at mga Tipan 84:73. Bakit nagbabala ang Panginoon na huwag ipagyabang ang mga himalang nararanasan natin?

Itinuro ni Pangulong Dallin H. Oaks ng Unang Panguluhan:

Sa pagbabahagi ng mga patotoo at sa ating mga mensahe sa publiko, bihira nating banggitin ang karamihan sa ating mga mahimalang karanasan, at bihira tayong umasa sa mga palatandaan na totoo ang ebanghelyo. … Karaniwang hindi angkop na banggitin ang mga mahimalang pangyayari sa maraming tagapakinig na kinabibilangan ng mga taong may iba’t ibang antas ng espirituwalidad. Sa maraming tagapakinig, ang mga himala ay nagpapatibay ng pananampalataya para sa ilan, ngunit di-angkop na palatandaan para sa iba. (Dallin H. Oaks, “Miracles,” Ensign, Hunyo 2001, 10)

Doktrina at mga Tipan 84:88. Anong tulong ang ibinibigay sa atin ng Tagapagligtas kapag naglilingkod tayo sa Kanya?

Sinabi ni Pangulong Henry B. Eyring ng Unang Panguluhan:

Pinatototohanan ko na ang Panginoon ay magpapauna sa inyong harapan sa tuwing kayo ay nasa Kanyang paglilingkod. Kung minsan kayo ang anghel na isinusugo ng Panginoon upang tulungan ang iba. Kung minsan kayo ang paliligiran ng mga anghel na tutulong sa inyo. Ngunit laging mapapasainyong puso ang Kanyang Espiritu, tulad nang ipinangako sa inyo sa bawat sacrament meeting. Kailangan lamang ninyong sundin ang Kanyang mga kautusan. (Henry B. Eyring, “Huwag Matakot na Gumawa ng Mabuti,” Liahona, Nob. 2017, 103)

Mga Karagdagang Aktibidad sa Pag-aaral

Pag-alaala sa Aklat ni Mormon

Tulungan ang mga estudyante na matutuhan ang katotohan na nais ng Panginoon na pag-aralan natin ang Aklat ni Mormon at mamuhay ayon sa mga turo nito. Maaari kang magsimula sa pagpapapunta sa mga estudyante sa ChurchofJesusChrist.org upang tingnan kung ilang wika na isinalin ang Aklat ni Mormon.

Anyayahan ang mga estudyante na talakayin kung bakit napakaraming pagsisikap ang ginagawa upang isalin ang Aklat ni Mormon sa maraming wika. Pagkatapos ay maaari ninyong basahin ang Doktrina at mga Tipan 84:54–57 bilang isang klase, at alamin kung ano ang nadarama ng Panginoon tungkol sa Aklat ni Mormon. Maaari kang magbigay ng paraan para ma-assess ng mga estudyante kung gaano nila pinahahalagahan ang Aklat ni Mormon. Personal bang nadarama ng mga estudyante na ang mensahe sa talata 54 ay naaangkop sa kanila? Ano ang ginagawa nila upang pag-aralan ang Aklat ni Mormon? Paano nila ibinabahagi, o paano nila maibabahagi sa iba, ang patotoo tungkol kay Cristo na matatagpuan sa Aklat ni Mormon? Maaari mong anyayahan ang mga estudyante na nakaaalam kung paano ibahagi ang Aklat ni Mormon gamit ang Gospel Library app na turuan ang iba sa klase.

Sinusuportahan ng Panginoon

Maaaring makinabang ang mga estudyante sa pag-alam sa suportang ibinibigay ni Jesucristo ayon sa inilarawan sa Doktrina at mga Tipan 84:88. Maaari kang magpadrowing sa mga estudyante ng stick figure na kumakatawan sa kanila bilang isang missionary. Pagkatapos ay maaari nilang basahin ang talata 88 at isulat o idrowing ang lahat ng paraan na sinusuportahan tayo ng Tagapagligtas kapag sinisikap nating ibahagi ang Kanyang ebanghelyo. Tulungan ang mga estudyante na talakayin ang kanilang nadarama tungkol sa pagsuporta ng Panginoon sa mga naglilingkod sa Kanyang pangalan. Maaari kang magbahagi ng isang salaysay mula sa banal na kasulatan gaya ng 2 Mga Hari 6:15–17 upang ilarawan ang kadalasang hindi nakikitang suporta mula sa langit.