Lesson 94: Doktrina at mga Tipan 84

Doktrina at mga Tipan 84:1–32

“Ang Kapangyarihan ng Kabanalan”

Pagkauwi mula sa kanilang mga misyon, isang grupo ng mga elder ang nakipagpulong kay Propetang Joseph Smith. Habang sama-samang nagdarasal, ang Propeta ay nakatanggap ng paghahayag na nagbigay ng mga kabatiran tungkol sa “kapangyarihan ng kabanalan” (Doktrina at mga Tipan 84:20) na matatamo ng kababaihan at kalalakihan sa pamamagitan ng mga ordenansa ng priesthood. Ang lesson na ito ay makatutulong sa mga estudyante na madama ang kahalagahan ng pagtanggap ng kapangyarihan ng kabanalan na ibinibigay ni Jesucristo sa pamamagitan ng Kanyang mga ordenansa ng priesthood.

Mga Posibleng Aktibidad sa Pag-aaral

Mga ordenansa ng priesthood

Maaari mong ipakita ang sumusunod na pahayag ni Elder Neil L. Andersen ng Korum ng Labindalawang Apostol. Anyayahan ang mga estudyante na magbahagi ng kanilang nadarama tungkol sa kanyang mga tanong at kung paano nila sasagutin ang mga ito.

Sa mga paglalakbay ko bilang miyembro ng Korum ng Labindalawang Apostol, nakakasalamuha ko ang mga kabataan sa buong mundo. Marami sa kanila ang nahihirapan sa mga tunay na alalahanin: “Tutulungan ba ako ng Diyos? Gagabayan ba Niya ang buhay ko? Paano ko matatanggap ang tulong, patnubay, at kapayapaang kailangan ko?” (Neil L. Andersen, “Ang Kapangyarihan ng Kabanalan sa Pamamagitan ng mga Ordenansa at Basbas ng Priesthood,” Para sa Lakas ng mga Kabataan, Ago. 2021, 10)

• Isipin ang mga pagkakataon sa inyong buhay kung saan kinailangan ninyo ng tulong, patnubay, at kapayapaan. Ano ang ginawa ninyo o maaari sanang ginawa ninyo upang hingin ang tulong at patnubay ng Diyos?

Basahin ang natitirang pahayag ni Elder Neil L. Andersen, at alamin ang isang bagay na ibinigay ng Diyos na tutulong sa atin.

Mahal kong mga kabataan, tutulungan kayo ng Diyos, at handa Siyang pagpalain kayo. Bilang mapagmahal nating Ama, binigyan Niya tayo ng mga ordenansang nagpapadama sa atin ng Kanyang kapangyarihan sa ating buhay—ang kapangyarihan ng kabanalan. (Neil L. Andersen, “Ang Kapangyarihan ng Kabanalan sa Pamamagitan ng mga Ordenansa at Basbas ng Priesthood,” Para sa Lakas ng mga Kabataan, Ago. 2021, 10)

Maaaring hindi maisip ng mga estudyante kung paano makatutulong ang mga ordenansa sa kanilang buhay. Maaari mong anyayahan ang mga estudyante na pagnilayan ang kanilang mga naiisip at nadarama tungkol sa mga ordenansa. Maaari mong ipakita ang sumusunod na self-assessment upang magawa ito:

Gamit ang scale na 1–5 (1 = mababa; 5 = mataas), paano mo ia-assess ang iyong kumpiyansa sa mga sumusunod na pahayag:

• Alam ko ang mga ordenansa ng priesthood.

• Batid ko kung paano pinagpala ng Diyos ang aking buhay sa pamamagitan ng mga ordenansa ng priesthood.

• Kusa akong naghahanda para tanggapin ang susunod na ordenansa sa aking buhay.

Anyayahan ang mga estudyante na maging handa sa pagtanggap ng mga impresyon mula sa Espiritu Santo habang pinag-aaralan nila ang bahagi 84 at matuto pa tungkol sa kapangyarihan ng Diyos na maaaring dumating sa kanilang buhay sa pamamagitan ng mga ordenansa ng priesthood.

Ang templo at priesthood

Isipin kung paano mo maibabahagi sa mga estudyante ang sumusunod na impormasyon:

Noong Setyembre 1832, bumalik ang mga misyonero sa Kirtland, Ohio, matapos mangaral ng ebanghelyo sa silangang Estados Unidos. Sa muli nilang pagsasama-sama, natanggap ni Propetang Joseph Smith ang paghahayag na nakatala sa Doktrina at mga Tipan 84. Sa paghahayag na ito, pinalawak ng Panginoon ang pagkakaunawa ng mga Banal tungkol sa priesthood. Basahin ang Doktrina at mga Tipan 84:1–5, at alamin kung ano ang iniutos ng Panginoon na unahin ng mga Banal sa pagtatayo nila ng lunsod ng Bagong Jerusalem.

• Sa inyong palagay, bakit mahalaga na sinimulan ng Panginoon ang paghahayag tungkol sa priesthood sa pamamagitan ng pagtuturo ng tungkol sa kahalagahan ng mga templo?

Kung hindi ito mababanggit ng mga estudyante, maaari mong ipaliwanag na sa templo, isinasagawa ang mga ordenansa ng priesthood na kailangan para sa ating kaligtasan at kadakilaan.

Maaari mong ibahagi sa mga estudyante na sa talata 6–18, ipinahayag ng Panginoon na ang Kanyang priesthood ay ipinagkaloob kay Adan at nagpatuloy hanggang sa panahon ni Moises. Ipinagkaloob din ni Jesucristo ang priesthood kay Aaron at sa kanyang mga inapo. Maaari mong ipaliwanag na ang Kanyang priesthood ay nagpapatuloy sa kasalukuyan sa ipinanumbalik na Simbahan ni Jesucristo. Lahat ng awtoridad ng priesthood, kabilang na ang kinakailangan upang maisagawa ang mga ordenansa sa templo, ay nagmumula kay Jesucristo.

Ang kapangyarihan ng kabanalan ay nakikita sa pamamagitan ng mga ordenansa ng priesthood

Maaaring isang magandang pagkakataon ito na itanong sa iyong mga estudyante kung ano ang ordenansa. Kung nahihirapan silang ipaliwanag ito, maaari mo silang anyayahan na gamitin ang mga tulong sa pag-aaral ng mga banal na kasulatan upang alamin ito. Tulungan silang maunawaan na ang ordenansa ay isang sagrado at pormal na gawain o seremonya na isinasagawa sa pamamagitan ng awtoridad ng priesthood. Ang ilang ordenansa ay kinakailangan para sa ating kadakilaan.

Maaari kang maglista ng mga ordenansa ng priesthood sa pisara, gaya ng binyag, sakramento, pagbibigay ng basbas para sa kapanatagan at payo, patriarchal blessing, kumpirmasyon at kaloob na Espiritu Santo, endowment sa templo, at pagbubuklod sa templo.

Basahin ang Doktrina at mga Tipan 84:19–22, at alamin kung ano ang itinuro ng Panginoon tungkol sa mga ordenansa.

Ang Doktrina at mga Tipan 84:20–22 ay isang doctrinal mastery passage. Maaari mong sabihin sa mga estudyante na markahan ang mga doctrinal mastery passage sa natatanging paraan para madali nilang mahanap ang mga ito.

• Ano ang natutuhan ninyo tungkol sa mga ordenansa ng priesthood?

• Ano ang mga tanong ninyo tungkol sa inyong binasa?

  Depende sa pagkakaunawa ng mga estudyante at sa kanilang mga tanong, maaari mong ibahagi ang ilan sa o lahat ng sumusunod:

• “Ang nakatataas na pagkasaserdoteng ito ang nangangasiwa ng ebanghelyo” ay tumutukoy sa awtoridad ng Melchizedek Priesthood na nangangasiwa sa mga ordenansa na kinakailangan para sa ating kaligtasan at kadakilaan.

• “Ang mga hiwaga” ay “mga espirituwal na katotohanang nalalaman lamang sa pamamagitan ng paghahayag” (Gabay sa mga Banal na Kasulatan, “Hiwaga ng Diyos, Mga,” scriptures.ChurchofJesusChrist.org).

• Ang “kapangyarihan ng kabanalan” ay tumutukoy sa kapangyarihang nagmumula sa Diyos upang tulungan tayo sa buhay na ito at ihanda tayo para sa buhay na walang hanggan.

Tulungan ang mga estudyante na malaman na sa pamamagitan ng mga ordenansa ng priesthood, matatanggap natin ang kapangyarihan ng kabanalan sa ating buhay.

Upang matulungan ang mga estudyante na mapalalim pa ang kanilang pagkakaunawa sa katotohanang ito, anyayahan sila na pumili ng isa sa mga ordenansang nakalista sa pisara na nais pa nilang matutuhan. Bigyan sila ng oras na magsulat ng dalawa hanggang tatlong tanong tungkol sa ordenansang iyon. O maaari mong ipakita ang tatlong tanong na nakalista sa ibaba upang mapag-isipan nila.

• Paano makapaghahanda ang isang tao sa pagtanggap ng ordenansang ito?

• Sa inyong palagay, paano tayo tinutulungan ng ordenansa ng priesthood na ito na matanggap ang kapangyarihan ng kabanalan na tutulong sa atin sa buhay na ito?

• Paano tayo matutulungan ng pagtanggap sa ordenansang ito na maging higit na katulad ng Ama sa Langit at ni Jesucristo?

Anyayahan ang mga estudyante na saliksikin ang sources na itinalaga ng Diyos upang matutuhan pa ang tungkol sa ordenansa na napili nila at para sa mga sagot sa kanilang mga tanong. Maaari nila itong gawin nang mag-isa o kasama ang iba na pinili rin ang parehong ordenansa. Ang Pangkalahatang Hanbuk: Paglilingkod sa Ang Simbahan ni Jesucristo ng mga Banal sa mga Huling Araw, na makikita sa ChurchofJesusChrist.org, ay nagbibigay ng makatutulong na impormasyon sa mga taong nais pag-aralan ang endowment sa templo (27.2) at pagbubuklod (27.3). Maaari din nilang pagnilayan ang mga personal na karanasan noong nakatulong sa kanila ang mga ordenansang natanggap nila upang madama ang kapangyarihan ng kabanalan sa kanilang buhay.

Pagkatapos ng sapat na oras, mag-anyaya ng mga indibiduwal o grupo upang ibahagi sa klase ang kanilang natutuhan.

Ang kahalagahan ng mga ordenansa

Upang matulungan ang mga estudyante na mapagnilayan ang kanilang natutuhan tungkol sa kahalagahan ng mga ordenansa ng priesthood, maaari mong ipasagot sa mga estudyante ang ilan o lahat ng sumusunod na tanong. Maaaring pumili ng tanong ang mga estudyante at ibahagi ang kanilang mga sagot sa isang kaklase.

• Ano ang natutuhan mo tungkol sa kapangyarihan ng kabanalan at mga ordenansa ng priesthood?

• Paano makatutulong sa iyo ang pagsisikap na magawa at matanggap ang mga ordenansang ito upang mas mapalapit ka kay Jesucristo?

• Kailan mo nadama ang kapangyarihan ng Diyos sa pamamagitan ng mga ordenansa ng priesthood na iyong natanggap?

Maaari mong ibahagi ang iyong mga naiisip at nadarama tungkol sa kapangyarihan ng Diyos na natanggap mo sa iyong buhay sa pamamagitan ng mga ordenansa ng priesthood.

Isaulo

Maaari mong tulungan ang mga estudyante na isaulo ang doctrinal mastery reference at mahalagang parirala ng banal na kasulatan sa lesson na ito at rebyuhin ang mga ito sa mga susunod na lesson. Ang mahalagang parirala ng banal na kasulatan ay “Sa mga ordenansa nito, ang kapangyarihan ng kabanalan ay makikita.” Ang mga ideya para sa mga aktibidad sa pagsasaulo ay nasa mga materyal sa appendix sa ilalim ng “Mga Aktibidad sa Pagrerebyu ng Doctrinal Mastery.”

Karagdagang Resources

Doktrina at mga Tipan 84:20–21. Ano ang kaugnayan ng nakapagliligtas na mga ordenansa at ng kapangyarihan ng kabanalan?

Ipinahayag ni Elder David A. Bednar ng Korum ng Labindalawang Apostol:

Ang mga ordenansa ng priesthood ang landas tungo sa kapangyarihan ng kabanalan. … Ang mga ordenansa ng priesthood ay kailangan para lubos na “[makalapit] kay Cristo, at maging ganap sa kanya” (tingnan sa Moroni 10:30–33). Kung wala ang mga ordenansa, hindi matatanggap ng isang tao ang lahat ng pagpapalang ginawang posible sa pamamagitan ng walang-katapusan at walang-hanggang pagbabayad-sala ng Panginoon (tingnan sa Alma 34:10–14)—maging ang kapangyarihan ng kabanalan. (David A. Bednar, “Paggawa ng Gawaing Misyonero, Family History, at Gawain sa Templo,” Liahona, Okt. 2014, 16)

Doktrina at mga Tipan 84:22. Ano ang ibig sabihin ng “kung wala nito walang tao ang makakikita sa mukha ng Diyos … at mabubuhay”?

Itinuro ng Panginoon kay Adan na “walang maruming bagay ang makatatahan … sa kanyang kinaroroonan” (Moises 6:57). Sa pagtanggap lamang ng mga ordenansa sa pamamagitan ng kapangyarihan ng priesthood at pagtupad sa mga kaugnay na tipan tayo malilinis mula sa kasalanan at magiging banal at dalisay gaya ng Diyos. Itinuro ni Propetang Joseph Smith, “Kung pangarap ninyong mapunta sa kinaroroonan ng Diyos, dapat kayong maging katulad ng Diyos, o magtaglay ng mga alituntuning taglay ng Diyos” (Mga Turo ng mga Pangulo ng Simbahan: Joseph Smith [2007], 84).

Sino ang nagtatamo ng kapangyarihan ng priesthood?

Itinuro ni Pangulong Camille N. Johnson, Relief Society General President:

Ang kababaihan, kalalakihan at mga bata ay nagtatamo at gumagamit ng kapangyarihan ng priesthood, ang kapangyarihan ng Tagapagligtas, upang tulungan ang mga taong mahal nila (tingnan sa Dallin H. Oaks, “Ang Melchizedek Priesthood at ang mga Susi,” Liahona, Mayo 2020, 69–72). Ang mga pagpapala ng kapangyarihan ng priesthood na maaaring matamo ng lahat ng miyembro ng Simbahan na tumutupad sa kanilang mga tipan—kababaihan, kalalakihan at mga bata—ay kinabibilangan ng:

• Patnubay para sa kanilang buhay.

• Inspirasyon na malaman kung paano paglilingkuran ang mga miyembro ng pamilya at ibang tao.

• Lakas na magtiis at madaig ang mga hamon.

• Mga kaloob ng Espiritu na magpapahusay sa kanilang mga kakayahan.

• Paghahayag upang malaman kung paano gagampanan ang gawain na inorden, itinalaga, o inatas na gawin.

• Tulong at lakas upang maging higit na katulad ni Jesucristo at ng Ama sa Langit (Pangkalahatang Hanbuk, 3.5).

Ang Tagapagligtas ang pinagmumulan ng lahat ng pagpapalang ito. Ang patnubay, inspirasyon, mga kaloob ng Espiritu at paghahayag ay dumarating sa pamamagitan ng Espiritu Santo, na ipinadala ng Ama sa ngalan ng Tagapagligtas. …

Sa aking karanasan, ang kapangyarihan ng priesthood, partikular na ang ipinagkaloob sa akin sa bahay ng Panginoon, ang nagpapalakas sa patnubay ng Espiritu Santo at sa pagkaunawa ko sa Pagbabayad-sala ni Jesucristo. (Camille N. Johnson, “President Camille N. Johnson: What Must Women and Men Do to Have Access to Priesthood Power?,” Church News, Okt. 30, 2022, thechurchnews.com)

Paano ako matutulungan ng templo na matamo ang kapangyarihan ng Diyos?

Itinuro ni Pangulong Russell M. Nelson:

Ang templo ang sentro sa pagpapalakas ng ating pananampalataya at espirituwal na katatagan dahil ang Tagapagligtas at ang Kanyang doktrina ang pinakasentro ng templo. Ang lahat ng bagay na itinuturo sa templo, sa pamamagitan ng mga tagubilin at ng Espiritu, ay nakadaragdag sa nauunawaan natin tungkol kay Jesucristo. Ang Kanyang mahahalagang ordenansa ang nagbibigkis sa atin sa Kanya sa pamamagitan ng mga sagradong tipan ng priesthood. Pagkatapos, kapag tinupad natin ang ating mga tipan, pagkakalooban Niya tayo ng Kanyang nagpapagaling at nagpapalakas na kapangyarihan [tingnan sa Doktrina at mga Tipan 109:15, 22]. At, talagang kakailanganin natin ang Kanyang kapangyarihan sa mga darating na araw. (Russell M. Nelson, “Ang Templo at ang Inyong Espirituwal na Pundasyon,” Liahona, Nob. 2021, 93–94)

Mga Karagdagang Aktibidad sa Pag-aaral

Ang sakramento

Kung gusto mong mag-ukol ng karagdagang oras sa pagtulong sa mga estudyante na maunawaan ang kahalagahan ng sakramento, maaari mong ibahagi ang sumusunod na pahayag:

[A]ng sacrament ay isang ordenansa kung saan tinatanggap ng mga miyembro ng Simbahan ang tinapay at tubig bilang pag-alaala sa nagbabayad-salang sakripisyo ni Jesucristo. Ang ordenansang ito ay mahalagang bahagi ng pagsamba at espirituwal na pag-unlad. Sa pamamagitan ng ordenansang ito, pinaninibago ng mga miyembro ng Simbahan ang mga tipang ginawa nila sa Diyos noong nabinyagan sila. (Mga Paksa ng Ebanghelyo “Sacrament,” topics.ChurchofJesusChrist.org)

Maaari mong talakayin ang kahalagahan ng ordenansa ng sakramento sa mga estudyante. Tulungan silang maunawaan na mahalagang bahagi ito ng kanilang pagsamba at espirituwal na pag-unlad. Maaari silang magtakda ng mithiin tungkol sa isang bagay na magagawa nila sa oras ng sakramento na tutulong sa kanila na mapag-ibayo ang kanilang pagsamba at espirituwal na pag-unlad.

Linya ng awtoridad [Line of authority]

Basahin ang Doktrina at mga Tipan 84:6–16. Anyayahan ang mga estudyante na tukuyin kung ano ang nakapaloob sa mga talatang ito at kung ano ang maituturo ng mga passage sa atin tungkol sa priesthood. Kung maaari, magdala sa klase ng kopya ng linya ng awtoridad ng priesthood ng isang tao. Maaari mong isulat sa pisara ang linya ng awtoridad. Tulungan ang mga estudyante na maunawaan na ipinapakita ng linya ng awtoridad ng priesthood kung paano ipinagkaloob ang awtoridad ng priesthood mula sa isang tao na maytaglay ng priesthood tungo sa isa pa, mula kay Jesucristo hanggang sa isa na maytaglay ng priesthood sa kasalukuyan. Maaari mo ring ipakita kung paano humiling ng linya ng awtoridad [line of authority].

Ipaliwanag ang kahalagahan ng mga ordenansa

Maaari mong isulat sa pisara ang sumusunod: “Bakit mahalaga ang mga ordenansa ng priesthood sa aking buhay?” Bigyan ang mga estudyante ng ilang minuto para pag-isipan kung paano nila sasagutin ang tanong na ito. Maaari mo itong ipagawa sa mga estudyante sa simula ng lesson upang masukat ang kanilang pagkaunawa sa mga ordenansa o sa pagtatapos ng lesson upang maipakita nila kung ano ang kanilang natutuhan. Matapos nilang pag-isipan kung paano nila sasagutin ang tanong na ito, anyayahan ang ilang estudyante na ibahagi ang kanilang sagot.