Lesona 98: Mataupu Faavae ma Feagaiga 85–87

Mataupu Faavae ma Feagaiga 86

O Loo Faapotopotoina e le Faaola Isaraelu

I le faaaliga o loo tusia i le Mataupu Faavae ma Feagaiga 86, na faaali mai ai e le Faaola se faauigaga faaopoopo i Lana uluai faaliliuga o le faataoto i le saito ma le titania (Mataio 13:36–43). Sa Ia aoao atu e uiga i Ana taumafaiga e faapotopoto e amiotonu e sauniuni ai mo Lona Afio Mai Faalua. O lenei lesona e mafai ona fesoasoani i tagata aoga ia latou taumafaiga e auai faatasi ma le Faaola i le faapotopotoina o Isaraelu.

Gaoioiga E Ono Mafai Ona Aoao Ai

E faapotopoto e le Faaola Lona nuu

Mafaufau e valaaulia tagata aoga e mafaufau i faataitaiga o tagata latou te fiafia e faatasi i ai ma pe aisea foi.

Ona mafai lea ona e valaaulia tagata aoga e mafaufau i tagata sa mananao e faatasi ma Iesu Keriso i le taimi o Lana galuega i le lalolagi. Afai e manaomia, e mafai ona e faasoa atu ni nai faataitaiga, e pei o le Mataio 9:10; 19:1–2, 13–15; Ioane 6:1–14; 3 Nifae 17:1–5.

• Aisea e te manatu ai e manana’o tagata ia iai faatasi ma le Faaola?

• Aisea e te manatu ai e mana’o le Faaola ina ia faapotopoto atu tagata ia te Ia?

Mafaufau e valaaulia tagata aoga e suesue nisi o tusitusiga paia o loo aoao mai ai ia i tatou le mafuaaga e finagalo ai le Faaola ia tatou faapotopoto atu ia te Ia. O faataitaiga e mafai ona aofia ai le Mataio 11:28–30; 3 Nifae 9:13–14; 10:4–6.

Mafaufau i lou lava manao e mulimuli pe faapotopoto i le Faaola. Mafaufau foi i ou manaoga e fesoasoani e faapotopoto mai isi ia te Ia. A o e suesue, vaavaai mo upumoni e mafai ona fesoasoani ia te oe e iloa ai le taua o le faapotopotoina o oe lava ma isi ia Iesu Keriso.

O le faataoto i le saito ma le titania

Faitau pe aotele le parakalafa lenei e fesoasoani ai ia malamalama tagata aoga i le talaaga faasolopito mo le faaaliga o loo tusia i le Mataupu Faavae ma Feagaiga 86.

A o galulue Iosefa Samita ma Feterika G. Viliamu i le faaliliuga musuia o le Tusi Paia, sa faaali mai e le Faaola se faauigaga o le faataoto i le saito ma le titania. O lenei faaliliuga o loʻo tusia i totonu o le Mataupu Faavae ma Feagaiga 86.

A o lei suesueina e tagata aoga le Mataupu Faavae ma Feagaiga 86, fesoasoani ia latou malamalama i le faataoto i le saito ma le titania. E mafai ona latou faitauina le Mataio 13:24–30, e mafai e se tagata aoga ona faasoa mai se aotelega o le faataoto, pe e mafai foi ona e faaalia le vitio “Jesus Declares the Parables of the Wheat and Tares, Mustard Seed, and Leaven” mai le faailotaimi 0:00 i le 1:30. O loo maua lenei vitiō i le ChurchofJesusChrist.org.

Atonu e aogā le faamalamalama atu o le titania o se ituaiga o vao oona. E toeitiiti lava tutusa foliga o le saito ma le titania, pe a tatupu, ae e mafai ona iloa i latou i le taimi e tutupu tetele ai. Afai e taumafai se tagata e se’i ese muamua le titania a’o lei matutua le saito ma le titania, o le a faapea ona tele le saito na te faaleagaina ai.

Jesus Declares the Parables of the Wheat and Tares, Mustard Seed, and Leaven

• O le a se mea o tumatila ia te oe mai i lenei faataoto?

• O le a le mea e faatusa i ai saito ma titania? (Tagai i le Mataio 13:38.)

Ua saunia e le Faaola se faaliliuga o le faataoto

Faitau le Mataupu Faavae ma Feagaiga 86:1–7, ma vaavaai po o a faatusa mai le faataoto na fesoasoani le Faaola tatou te malamalama ai.

• O le a se mea na e aoaoina mai lenei faataoto e uiga i sauniuniga o loo faia e le Alii mo Lona Afio Mai Faalua?

  A uma ona faasoa mai e ni nai tagata aoga mea na latou mauaina, faasino atu le upumoni lenei: O loo faapotopotoina e le Alii ia Isaraelu a o lei oo i Lona Afio Mai Faalua.

• E mafai faapefea e le iloaina o lenei upumoni ona fesoasoani ia te oe e lagona ai le faamoemoe ma le filemu pe a e mafaufau e uiga i le Afio Mai Faalua o Iesu Keriso?

• E mafai faapefea e lenei upumoni ona taialaina faaiuga e te faia i le asō?

Sa faasoa e Peresitene Russell M. Nelson le auala e mafai ai ona tatou auai faatasi ma le Alii i le faapotopotoina o Isaraelu i aso nei.

Ia Faamuamua le Atua

O loo faapotopotoina e le Alii i latou o le a filifili e avea le Atua ma faatosinaga sili ona taua i o tatou olaga.

Mo le tele o seneturi, na valoia ai e perofeta lenei faapotopotoga [tagai Isaia 11:11–12; 2 Nifae 21:11–12; Mosaea 15:11], ma o loo tupu i le taimi nei! I le avea ai ma se teuteu ala taua i le Afio Mai Faalua o le Alii, o le galuega aupito sili ona taua lea i le lalolagi! …

Pe a tatou talanoa e uiga i le faapotopotoina o Isaraelu i itu uma e lua o le veli, o le mea moni o loo tatou faasino atu i le galuega faafaifeautalai, malumalu, ma talafaasolopito o aiga. O loo tatou faasino atu foi i le fausiaina o le faatuatua ma le molimau i loto o i latou o loo tatou ola faatasi, galulue, ma auauna i ai. Soo se taimi tatou te faia ai soo se mea e fesoasoani ai i soo se tasi—po o le fea lava itu o le veli—i le osia ma le tausia o feagaiga ma le Atua, ua tatou fesoasoani i le faapotopotoina o Isaraelu. (Russell M. Nelson, “Ia Faamuamua le Atua,” Liahona, Nov. 2020, 92–93)

• O le a se mea na e aoaoina mai lenei faamatalaga e uiga i le auala e mafai ona e fesoasoani ai i le Alii e faapotopoto Isaraelu?

“O se malamalama i tagata Nuuese”

Faitau le Mataupu Faavae ma Feagaiga 86:11, ma vaavaai mo mea na aoao mai e le Faaola e uiga i le ala e mafai ai ona tatou fesoasoani e faapotopoto mai tagata ia te Ia.

Atonu e fesoasoani le faamalamalama atu o le upu tagata Nuuese i le fuaiupu 11 e mafai ona faasino ia i latou e le o ni tagata o le Ekalesia.

I le avea o se vaega o la outou talanoaga i le isi fesili, mafaufau e valaaulia tagata aoga e faitau le Mataio 5:14–16 ma le 3 Nifae 18:24. E mafai ona latou faasoa mai mea ua faaopoopo e nei fuaiupu i lo latou malamalama.

• O le a sou manatu i le uiga o le avea o se “malamalama i tagata Nuuese”?

• O a nisi o auala e mafai ona e fesoasoani ai e faapotopoto Isaraelu e ala i le faasoa atu o le malamalama o le Faaola i isi?

Mafaufau e lisi i luga o le laupapa ia manatu o tagata aoga. I le avea ai ma se vaega o lenei talanoaga, e mafai ona e valaaulia tagata aoga e faasoa mai ni aafiaga na latou maua. Ina ia vaai i nisi faataitaiga, faaali le vitio “Light The World—Follow the Example of Jesus Christ. Faasoa Atu Lona Malamalama—Auauna Atu e Pei ona Ia Auauna Atu” (2:17) mai le faailotaimi 0:29 i le 2:17, o loo maua i ChurchofJesusChrist.org.

Follow the Example of Jesus Christ

Fai se fuafuaga e faapotopoto Isaraelu ma le Faaola

Fesoasoani i tagata aoga e faaaoga upu moni na latou aoaoina e ala i le valaauliaina o i latou e tali se tasi po o gaoioiga uma nei i a latou api faamaumau mo suesuega.

• O le a se mea o le a e taumafai e fai ina ia faapotopoto atu ai i le Faaola?

• O le a se mea patino o le a e faia e fesoasoani ai i le Faaola i le faapotopotoina o Isaraelu?

Ia aofia ai faamatalaga auiliili e uiga i le auala ma le taimi o le a e ausia ai lau sini.

E mafai e nai tagata aoga ona faasoa mai mea ua latou tusiaina. Molimau atu i upumoni na outou talanoaina, ma faamalosi i tagata aoga e faatino ia sini ua latou faatulagaina mo i latou lava.

Punaoa Faaopoopo

Aisea e faapotopoto ai e le Faaola Lona nuu?

Na aoao mai Elder David A. Bednar o le Korama a Aposetolo e Toasefululua:

E faapotopoto e le Alii Lona nuu pe a latou talia o Ia ma tausi Ana poloaiga. …

… E faapotopoto e le Alii Lona nuu e tapuai, e atinae le Ekalesia, mo se puipuiga, ma ia maua fautuaga ma faatonuga. …

Na ta’utino mai e le Perofeta o Iosefa Samita e faapea, o tupulaga uma, o le faamoemoega paia o le faapotopotoina o le fausia lea o malumalu ina ia mafai ai e fanau a le Alii ona maua sauniga aupito silisili ma maua ai le ola e faavavau. (David A. Bednar, “The Spirit and Purposes of Gathering” [faigalotu a le Iunivesite o Polika Iaga–Idaho, 31 Oke., 2006], byui.edu)

E mafai faapefea ona ou i ai faatasi ma le saito o loo faapotopotoina e le Faaola?

Ua aoao mai Elder Neil L. Andersen o le Korama a Aposetolo e Toasefululua:

Faalatalata Atili i le Faaola

Sa faamalamalama mai e le Alii i lea taimi mulimuli, a o loma Lona toe foi mai, o “saito,” i latou ua Ia faamatala “o fanau o le malo,” [Mataio 13:38], o le a tutupu a’e faatasi ma le “titania,” po o i latou e lē alolofa i le Atua ma e lē tausia Ana poloaiga. O le a “tutupu ae faatasi,” [Mataio 13:30] le tasi ma le isi.

O lo tatou lalolagi la lenei se’ia o’o ina toe foi mai le Faaola, faatasi ai ma le toatele e lelei ma le toatele e leaga i itu uma.

Atonu e i ai taimi e te le lagona ai le pei o lala saito malosi ma matua. Ia onosai ia te oe lava! Sa fetalai le Alii o le a aofia i le saito ni lau mu’amu’a ua totogo a’e.[Mataupu Faavae ma Feagaiga 86:4, 6]. O i tatou o Lana Au Paia o Aso e Gata Ai, ma e ui e le o mea uma ia tatou te mananao ia avea ai, ae o loo matua faatauaina o tatou naunauga ia avea ma Ona soo moni. (Neil L. Andersen, “Faalatalata Atili atu i le Faaola,” Liahona, Nov. 2022, 73)

Mataupu Faavae ma Feagaiga 86:11. O le a le uiga o le avea “o se faaola i lo’u nuu o Isaraelu”?

I le saunoa ai e uiga i galuega mo o tatou tuaa ua maliliu, sa faamalamalama mai ai e Peresitene Uilifoti Uitilafi (1807–98):

Ua i ai o tatou tama ma tina ma aiga i le lalolagi o agaga, ma e i ai sa tatou galuega e faatino mo i latou. I le avea ai ma se tagata ua ou fiafia tele i ai i lenei galuega o le togiolaina o e ua maliliu, ma e faapena foi o’u uso ma tuafafine. O se galuega lenei e tatau ona tatou faaauau pea i le mamao tatou te maua ai le avanoa. … O se galuega lenei o loo i luga o le Au Paia o Aso e Gata Ai. Fai le mea e te mafaia i lenei tulaga, ina ia e pasi atu i le isi itu o le veli o le a faamanuia ai outou e o outou tama, tina, aiga ma uo mo mea ua outou faia, ma o le tulaga e oo i ai le avea ai o outou ma meafaigaluega i aao o le Atua i le faataunuuina o lo latou togiolaina, o le a iloaina outou o ni Faaola i luga o le Mauga o Siona i le faataunuuina o valoaga. (Aoaoga a Peresitene o le Ekalesia: Wilford Woodruff [2004], 189)

Gaoioiga Faaopoopo e Aoao Ai

O le valaaulia a Peresitene Nelson e faapotopoto Isaraelu

Faamalamalama atu e faapea, i le 2018, na tuuina atu ai e Peresitene Russell M. Nelson valaaulia nei e fesoasoani i le autalavou e faapotopoto Isaraelu.

• Tuu le faaaogaina o le upega o fesootaiga mo aso sosoo e fitu.

• Ia faataulaga se taimi faalevaiaso i le Alii, ia tuu se mea e te manao e fai ma faaaogaina i lena taimi e fesoasoani ai e faapotopoto Isaraelu.

• Tumau ai pe toe foi i le ala o feagaiga.

• Tatalo i aso uma mo fanau uma a le Tama Faalelagi ia maua faamanuiaga o le talalelei a Iesu Keriso.

• Tu matila, ia ese mai le lalolagi. (Russell M. Nelson ma Wendy W. Nelson, “Faamoemoe o Isaraelu” [faigalotu a le autalavou i le lalolagi atoa, 3 Iuni, 2018], ChurchofJesusChrist.org.)

E mafai ona outou talanoaina pe mafai faapefea e nei valaaulia ona fesoasoani i tagata aoga e auai faatasi ma le Alii i le faapotopotoina o Isaraelu. E mafai ona e valaaulia tagata aoga e filifili se aitema se tasi mai le lisi e galue ai mo le vaiaso a sau. I se lesona i le lumanai, e mafai ona e valaaulia tagata aoga e faasoa mai mea na latou filifilia ma pe na faapefea ona fesoasoani ia i latou e lagona ai le latalata atili atu i le Faaola.

Vaai atu i isi e pei ona silasila le Atua ia i latou

A o suesue e tagata aoga le Mataupu Faavae ma Feagaiga 86:5–6, e mafai ona e valaaulia i latou e mafaufau po o le a se taunuuga e ono oo i ai pe a tatou vave tele e faamasino atu i isi.

• O le a se mea e mafai e le manao o le Faaola e faatuai le faamasinoga i nei fuaiupu ona aoao ai i tatou e uiga ia te Ia?

E mafai ona e faaali atu se ata o le titania o loo ola i se toga saito. E mafai ona e fesoasoani ia malamalama tagata aoga e silasila mai le Faaola ia i tatou o ni lau vaivai o loo atiina ae pea. E onosai ma agalelei o Ia pe a oo mai i lo tatou tuputupu ae. E mafai ona tatou mulimuli i Lana faataitaiga ma maua le agaalofa mo i tatou lava ma i latou o siomia i tatou. Faatasi ai ma le Faaola, e tatau ona tatou vaai atu i tagata uma o ni “saito” ma valaaulia tagata uma e faapotopoto faatasi ma Ia. E mafai ona e valaaulia se talanoaga ma fesili e pei o nei:

• O le a se mea e mafai ona fesoasoani ia te oe e vaai atu ai i isi o se Tama Faalelagi ma Iesu Keriso o vaai atu ia i latou?

• O a ni aafiaga na e maua i le vaaia o faamanuiaga o le taumafai e vaai atu i isi e pei ona faia e le Tama Faalelagi ma Iesu?

• E mafai faapefea e lena uiga ona fesoasoani ia te oe e fesoasoani ai i le Faaola i le faapotopotoina o Isaraelu?

Faatasi ai ma le Faaola, e mafai ona tatou faapotopotoina Isaraelu

Ina ia fesoasoani i tagata aoga e mafaufau i manatu pe mafai faapefea ona latou faapotopoto Isaraelu, e mafai ona e faaali atu le vitio “Gatherers in the Kingdom” (1:51) po o le “Gathering and Growing: Eldon’s Story (2:10). Valaaulia tagata aoga e vaavaai mo ni auala aoga e mafai ona latou auai ai i le faapotopotoina i aso nei.

Gatherers in the Kingdom

Gathering and Growing: Eldon’s Story