Lesona 99: Mataupu Faavae ma Feagaiga 85–87

Mataupu Faavae ma Feagaiga 87

Sa Vavalo Iosefa Samita e Uiga i Taua

Ona o faigata faaupufai i le Iunaite Setete o Amerika i le vaitau o le 1830, sa tatalo Iosefa Samita i le Atua ia iloa Lona finagalo i lea tulaga. O le faaaliga na sosoo ai sa i ai valoaga e uiga i taua ma auiliiliga patino e na o le Atua e mafai ona silafia i lena taimi. O lenei lesona e mafai ona fesoasoani i tagata aoga ia malamalama o afioga uma a le Alii i Ana perofeta o le a faataunuuina.

Gaoioiga E Ono Mafai Ona Aoao Ai

Aafiaga o Orson Palate

Ina ia fesoasoani i tagata aoga ia saunia e suesue le Mataupu Faavae ma Feagaiga 87, mafaufau e aotele pe faitau aafiaga faafaifeautalai nei a Orson Palate.

O Orson Pratt o se uluai tagata o le Ekalesia sa auauna atu o se tasi o uluai uso o le Korama a Aposetolo e Toasefululua. Sa valaauina o ia e auauna atu i le tele o misiona i lona olaga e talai atu le talalelei toefuataiina a Iesu Keriso i le Iunaite Setete atoa ma Kanata. I ana malaga, sa ia tauaveina ai se kopi o se faaaliga patino lea na maua e Iosefa Samita mai le Alii i le 1832. E ui e lei faataunuuina lava le valoaga o loo i ai i le faaaliga, ae sa masani ona faasoa atu e Elder Palate i isi. Sa masani ona tauemuina o ia, ma toe manatua na fai mai tagata o le valoaga “o le maualuga o mea faavalevalea” ma o ia “o le tagata na afaina fua i se tagata faafoliga” (Orson Pratt, Journal of Discourses, 18:224–25).

• Ana faapea o oe o Orson Palate, o le a sou manatu o le a se aafiaga o le tali a tagata ia te oe?

O se valoaga mai le Alii

O le valoaga na faasoa atu e Orson Palate i isi o loo tusia i le Mataupu Faavae ma Feagaiga 87. Atonu e lelei mo tagata aoga le malamalama i faamatalaga o le talafaasolopito o loo i ai i le ulutala o le vaega a o lei faitauina le valoaga.

Fesoasoani i tagata aoao ia iloa aoaoga faavae ma mataupu faavae o le talalelei: Mo nisi faataitaiga i lenei mea, tagai i le aoaoga ua faaautuina “Aoao le aoaoga faavae a Iesu Keriso mo oe lava” o loo maua i Tomai o le Atinaega o Faiaoga: Aoao Atu le Aoaoga Faavae. Mafaufau e faataitai le tomai e ala i le fatuina o ni fesili tatala sailiili e fesoasoani i tagata aoga e iloa ai mataupu faavae o le talalelei mo i latou lava ma aua le tata’ia latou i se tali patino.

Faitau le Mataupu Faavae ma Feagaiga 87:1–4, ma vaavaai mo mea na faaali mai e Iesu Keriso e ala i Lana perofeta.

• O le a le mea na fetalai mai le Alii o le a “vave ona oo mai”?

• O le a se mea e mafai ona tatou aoaoina e uiga i le Alii mai nei fuaiupu?

Tuu i tagata aoga se avanoa e faasoa ai upu moni eseese ua latou aoaoina e uiga ia Iesu Keriso. E faaopoopo atu i mea o loo latou ta’ua, fesoasoani ia latou iloa e mafai e le Alii ona faaali mai mea e tutupu i le lumanai ia i tatou e ala mai i Ana perofeta.

Faitau nisi po o mau uma nei e fesoasoani ia te oe e malamalama atili ai i le malamalama o le Alii.

• Aperaamo 2:8

• 1 Nifae 9:6

• Mataupu Faavae ma Feagaiga 38:1–2

• O le a se mea na e aoaoina? Aisea e te manatu e aogā ai le malamalama i nei mea e uiga ia Iesu Keriso?

• E faapefea e lenei malamalamaaga ona aafia ai lou faatuatua ia te Ia?

Faatuatua i le Alii ma Ana valoaga

Faitau pe aotele le parakalafa lenei e fesoasoani ai ia malamalama tagata aoga i le mea na tupu ina ua uma ona faaali mai e le Alii nei mea na tutupu i le lumanai ia Iosefa Samita.

I le amataga o le 1833, e lei leva ona uma ona tuuina mai le valoaga ia Iosefa Samita, o feseeseaiga na foliga mai e le o toe mamao ona tupu lea o se taua i Amerika na foia filemu.

• O a ni fesili e te manatu atonu na i ai ia te oe pe ana faapea sa e masani i le valoaga a Iosefa Samita i lena taimi?

Sa manatua e Orson Palate ona mafaufauga na ia oo i ai ina ua le manino pe faapefea pe o afea foi o le a faataunuuina ai le valoaga.

Sa ou iloa e moni le valoaga, aua na fetalai mai le Alii ia te au ma tuuina mai ia te au faaaliga. Sa ou iloa foi e uiga i le paia o lenei galuega. I lea tausaga ma lea tausaga na mavae atu, a o laiti uma e ui o nisi o paaga sa ou faia muamua o le a faapea mai, “Ia, o le a le mea o le a tupu i lena valoaga? E le mafai ona faataunuuina.” Sa ou fai atu, “Faatali, ua i ai i le Alii lona taimi faatulagaina.” (Orson Pratt, Journal of Discourses,, 18:224–25)

• O le a se mea e tumatila ia te oe mai le tali a Orson Palate?

• Na faapefea ona ia filifili e faatino i le faatuatua ma tausia se vaaiga e faavavau?

Filifili e tutu faatasi ma le Alii

Mafaufau e valaaulia tagata aoga e talanoaina le fesili lenei ma se paga po o se vaega toalaiti ae latou te lei faasoa maia a latou tali i le vasega.

• O a nisi o tulaga e ono manaomia ai se tasi e faatino i le faatuatua e tali atu ai i se savali a se perofeta i aso nei?

Fautuaina tagata aoga e mafaufau loloto pe faapefea ona latou naunau e tutu faatasi ma perofeta a le Alii pe a latou aoao atu mea e le malilie i ai isi.

Faitau le Mataupu Faavae ma Feagaiga 1:37–38 ma le 21:4–6. Vaavaai mo aoaoga e mafai ona fesoasoani ia te oe e tumau faamaoni ai i le Alii ma Ana perofeta, e tusa lava pe le malilie isi ia latou upu.

• O le a se mea sa e mauaina?

Ina ia fesoasoani i tagata aoga ia iloa o le faatuatua ma le onosai e masani ona manaomia e iloa ai le faataunuuga o valoaga a le Alii, mafaufau e faasoa atu faamatalaga faasolopito nei.

E ui ina sa le i soifua Iosefa Samita e vaai i le faataunuuga o le valoaga, ae o se vaega o le valoaga sa faataunuuina i le toeitiiti atoa le 30 tausaga talu ona tuuina mai. Na amata le feteenaiga i Karolaina i Saute, ma sa faasagatau setete i Saute ma Matu i le tasi ma le isi mai le 1861 i le 1865. E pei ona valoia, sa valaau atu le itu i Saute i Peretania Tele mo se fesoasoani ma o le toatele o e sa pologa sa tau faasaga i o latou matai sa i ai muamua (tagai Mataupu Faavae ma Feagaiga 87:1–4). E toatele tagata na maliliu i lenei taua. E pei ona faamatalaina i le valoaga, o taua e sosoo ai ua tauina i atunuu i le salafa o le lalolagi (tagai Mataupu Faavae ma Feagaiga 87:6–7).

Tutu i nofoaga paia

Atonu e lagona e nisi tagata aoga le lē mautonu po o le fefe pe a latou mafaufau e uiga i le taua ma le faatafunaga o loo faamatala mai i lenei valoaga. Faamalamalama atu o upu mulimuli a le Alii i lenei faaaliga ua tuuina mai ai fautuaga e mafai ona fesoasoani ia i tatou i taimi o faalavelave o aso e gata ai.

Faitau le Mataupu Faavae ma Feagaiga 87:8, ma vaavaai mo le fautuaga a le Alii.

• O a nisi o nofoaga paia ua tuuina mai e le Alii ia i tatou e mafai ona fesoasoani ia te oe e maua ai le filemu ma le saogalemu i lo tatou lalolagi?

Mafaufau e faamalamalama atu o le tumau faamaoni i le Alii ma Ana perofeta o se tasi lea o auala e mafai ai ona tatou “tutu … i nofoaga paia, ma aua le masii ese.” Molimau atu e uiga i upumoni sa outou talanoaina i lenei aso ma faamalosi i tagata aoga e faatino soo se uunaiga na latou maua.

Punaoa Faaopoopo

O a ni tulaga na oo atu ai i le Taua Faalemalo a Amerika?

Ina ia aoao atili e uiga i nei tulaga, faitau i Autu o le Talafaasolopito o le Ekalesia, “Taua Faalemalo a Amerika,” ChurchofJesusChrist.org.

O le a se mea e mafai ona ta’u mai e perofeta ia te a’u e uiga i mea e tutupu i le lumanai?

“I nisi taimi, e mafai ona musuia perofeta e valoia le lumanai mo le manuia o tagata. E ui i lea, o lona tiute muamua lava, o le molimau atu lea e uiga ia Keriso” (Taiala i Tusitusiga Paia, “Perofeta,” scriptures.ChurchofJesusChrist.org).

E mafai faapefea ona ou lagonaina le filemu i le lotolotoi o vevesi o aso e gata ai?

Na aoao mai Peresitene Russell M. Nelson:

E foliga mai tatou te feagai ma lu’itau i aso uma ma talafou faapopole tagata. Atonu ua e oo i ni aso na e moomoo ai na o le fai lava o le ofumoe, moe faapupuu, ma fai i se tasi e fafagu oe i luga pe a mavae atu uma faigata ma tofotofoga.

Ae, o’u uso e ma tuafafine pele, e anoanoa’i mea matagofie o loo i luma atu. I aso a sau, o le a tatou vaai ai i le faailoaga silisili o le mana o le Faaola e le’i vaai muamua lava i ai le lalolagi. I le va o le taimi nei ma le taimi e toe fo’i mai ai o Ia “faatasi ma le mana ma le mamalu silisili” (Iosefa Samita—Mataio 1:36), O le a ia faae’e mai avanoa e le mafaitaulia, faamanuiaga, ma vavega i luga o e faamaoni. (Russell M. Nelson, “Manumalo i le Lalolagi ma Maua le Malologa,” Liahona, Nov. 2022, 95)

O le a se mea e mafai ona ou faia e tutu faatasi ai ma le Alii ma Ana perofeta?

Na aoao mai Elder Ronald A. Rasband o le Korama a Aposetolo e Toasefululua:

Ua tatou lagolagoina ia taitai i le asō e ala i musumusuga faalelagi, o ē ua valaauina e aoao mai ma taitai i tatou ma o ē o loo valaau mai ia i tatou ia faaeteete i mea lamatia o loo tatou feagai ai i aso taitasi—mai le faasamasamanoa i le aso Sapati, e oo i lamatiaga i le aiga, i sauaga i le saolotoga o tapuaiga, ma e oo lava i le finauina o faaaliga o aso e gata ai. Uso e ma tuafafine, o tatou faalogo atu ea i ā latou fautuaga? …

O le fesili faatupulaia o nei aso ua manino: o outou tutu faatasi ea ma taitai o le Ekalesia i se lalolagi pogisa ina ia mafai ona e faasusulu atua le Malamalama o Keriso? …

Ou te tatalo o le a tatou aapa atu—aapa atu ma uu i le aao o le Faaola o loo Ia faaloaloa mai ia i tatou, e tele lava ina auala mai i Ana taitai na valaauina mai le lagi ma tagata o o tatou aiga—ma faalogo mo Lana valaau ia o mai. (Ronald A. Rasband, “Tutu Faatasi ma Taitai o le Ekalesia,” Liahona, Me 2016, 47, 48, 49)

O le a se mea e tatau ona ou faia pe a ou lagona ua lu’itauina lo’u faatuatua i masalosaloga?

Ua aoao mai Elder Neil L. Andersen o le Korama a Aposetolo e Toasefululua:

E te faatofu oe lava ia i mea moni o loo fesoasoani e fausia le fatu o lou faatuatua: e te faatinoina le faatuatua ia Keriso, e te tatalo, e te mafaufau loloto i tusitusiga paia, e te salamo, e te tausi i poloaiga, ma e auauna atu i isi.

Pe fetaiai ma se tofotofoga o le faatuatua—po o le a lava lau mea o fai, e te le laa ese lava mai le Ekalesia! O le faataumamaoina o oe lava ia mai le malo o le Atua i taimi o se tofotofoga o le faatuatua ua tai pei lava o le tuua o le saogalemu o se malutaga malupuipuia o afā ae ua oo mai se asiosio. (Neil L. Andersen, “Tofotofoina o lo Outou Faatuatua,” Liahona, Nov. 2012, 40)

Mataupu Faavae ma Feagaiga 86:7. E mafai faapefea ona ou tu i nofoaga paia?

Na aoao mai Peresitene Russell M. Nelson:

Soo se taimi lava e tupu ai soo se ituaiga o faalavelave i lou olaga, o le nofoaga sili ona saogalemu e i ai faaleagaga o le ola lea i totonu o au feagaiga o le malumalu!

Faamolemole talitonu mai ia te a’u pe a ou fai atu, a atiae lou faavae faaleagaga ma le mausali i luga o Iesu Keriso, e lē manaomia la ona e fefe. (Russell M. Nelson, “O Le Malumalu ma Lou Faavae Faaleagaga,” Liahona, Nov. 2021, 96)

Gaoioiga Faaopoopo e Aoao Ai

Mataupu Faavae ma Feagaiga 87:5–7. O le a le “aao a’oa’i” o le Atua?

Atonu e i ai ni fesili a tagata aoga e uiga i le Mataupu Faavae ma Feagaiga 87:5–7. Atonu e lelei le fesoasoani i tagata aoga ia iloa e aapa mai le Alii ma aao agaalofa ia i tatou taitoatasi i le tele o auala. Mafaufau e valaaulia tagata aoga e fai se lisi o nisi o na auala. Ona fesoasoani lea i tagata aoga e aoao mai i tusitusiga paia eseese mea e fai e le Atua pe a tatou le amanaiaina auala e aapa mai ai o Ia i le alofa. Fesoasoani ia latou iloa afai tatou te faamaaa o tatou loto e faasaga i le siufofoga o le Atua, o nisi taimi Na te faaaogaina faititili, mafuie, ma isi auala sili ona malolosi e aoai ai i tatou (tagai i le 1 Nifae 17:45). E finagalo le Atua ia tatou salamo ia tatou agasala ma manatua o Ia ma Lona agalelei (tagai i le Helamana 12:1–3). E le gata i lea, o nisi o faamasinoga o loo faamatala mai i le Mataupu Faavae ma Feagaiga 87:5–7 o le a tutupu a o aoai e le Alii i latou o e taulimaina ma le lē tonu e amiotonu.

Mataupu Faavae ma Feagaiga 87:8. E mafai faapefea ona ou mulimuli i le valaaulia a le Alii e tu i nofoaga paia?

Ina ia fesoasoani i tagata aoga ia malamalama atili i le fautuaga a le Alii i le fuaiupu 8, mafaufau e valaaulia i latou e talanoaina fesili e pei o nei:

• O le a sou manatu i le uiga o le tutu i nofoaga paia?

• O le a se mea e ono aveese ai se tagata mai se nofoaga paia?

• E mafai faapefea ona tatou mautinoa e le o aveesea i tatou?

• O a nofoaga paia e fesoasoani ia te oe e lagona ai le filemu i le lalolagi i aso nei?

O se vaega o la outou talanoaga, mafaufau e faasino i le tusiga i le New Era ia Tesema 2013 “Tutu i Nofoaga Paia.” I lenei tusiga, ua faasoa mai e le autalavou mai le salafa o le lalolagi le auala latou te filifili ai e tutu i nofoaga paia.

E mafai foi ona outou talanoaina le saunoaga mulimuli a Peresitene Russell M. Nelson i le “Punaoa Faaopoopo.”

Faatumauina pea le faatuatua ia Iesu Keriso ma Ana perofeta

E ono fesoasoani mo tagata aoga le aoao mai faataitaiga i le talafaasolopito atoa lea na tofotofoina ai le faatuatua o e talitonu. O nei faataitaiga e mafai ona faatusi paia, e pei o le tala o loo i le 3 Nifae 1:4–13. E mafai foi ona e faaaogaina se faataitaiga na faasoa mai e Elder Neil L. Andersen o le Korama a Aposetolo e Toasefululua.

I tausaga ua mavae sa ou faitau ai i se tusiga i le mekasini o le Time lea sa lipotia mai ai le mauaina o se tusi, masalo sa tusia e Matini Harisi, lea na feteenai ma le tala a Iosefa Samita e uiga i le mauaina o papatusi o le Tusi a Mamona.

Sa tuua e nisi tagata le Ekalesia ona o lenei tusiga.

O le mea e faanoanoa ai, sa vave tele ona latou o ese. I nai masina mulimuli ane na maua ai e tagata atamamai (ma sa tautino mai lava le tagata taufaasese) e matua pepelo lava le tusi. Atonu e mafai ona e fesiligia ma le iloa mea e te faalogo i ai i luga o talafou, ae e le tatau lava ona e masalosalo i le molimau a perofeta a le Atua. (Neil L. Andersen, “Iosefa Samita,” Liahona, Nov. 2014, 29)

Fesoasoani i tagata aoga e talanoaina mea e mafai ona faia e nei faataitaiga mo i latou pe a tutu faatasi ma le Alii ma Ana perofeta atonu e faigata ona fai. Valaaulia i latou e molimau atu i taimi na latou tumau faamaoni ai i le Alii ma Ana aoaoga.

Tutu faatasi ma le Alii ma Ana perofeta e ala i le nonofo i totonu o le vaa

Mafaufau e faaaoga se tasi o vitiō nei e fesoasoani ai ia malamalama tagata aoga i le taua o le tutu faatasi ma le Alii ma Ana perofeta. O nei vitio e faaaoga ai le faatusatusaga o le mauaina o le saogalemu i totonu o se vaa e maua ai le saogalemu i le Ekalesia toefuataiina a le Alii. Atonu e te taofia le vitio i taimi taua e faataga ai tagata aoga e talanoaina mea ua latou aoaoina.