Lesson 98: Doktrina at mga Tipan 85–87

Doktrina at mga Tipan 86

Tinitipon ng Tagapagligtas ang Israel

Sa paghahayag na nakatala sa Doktrina at mga Tipan 86, naghayag ang Tagapagligtas ng karagdagang kahulugan sa Kanyang orihinal na interpretasyon ng talinghaga tungkol sa trigo at mga agingay o damo (Mateo 13:36–43). Itinuro Niya ang tungkol sa Kanyang mga pagsisikap na tipunin ang matwid bilang paghahanda para sa Kanyang Ikalawang Pagparito. Ang lesson na ito ay makatutulong sa mga estudyante sa kanilang mga pagsisikap na makibahagi sa Tagapagligtas sa pagtitipon ng Israel.

Mga Posibleng Aktibidad sa Pag-aaral

Tinitipon ng Tagapagligtas ang Kanyang mga tao

Maaari mong anyayahan ang mga estudyante na mag-isip ng mga halimbawa ng mga taong gusto nilang makasama at kung bakit.

Pagkatapos ay maaari mong anyayahan ang mga estudyante na mag-isip ng mga taong gustong makasama si Jesucristo sa panahon ng Kanyang ministeryo sa lupa. Kung kinakailangan, maaari kang magbahagi ng ilang halimbawa, tulad ng Mateo 9:10; 19:1–2, 13–15; Juan 6:1–14; 3 Nephi 17:1–5.

• Sa inyong palagay, bakit gustong makasama ng mga tao ang Tagapagligtas?

• Sa inyong palagay, bakit nais ng Tagapagligtas na matipon ang mga tao sa Kanya?

Maaari mong anyayahan ang mga estudyante na pag-aralan ang ilang banal na kasulatan na nagtuturo sa atin kung bakit nais ng Tagapagligtas na matipon tayo sa Kanya. Maaaring kabilang sa mga halimbawa ang Mateo 11:28–30; 3 Nephi 9:13–14; 10:4–6.

Isipin ang sarili ninyong mga hangarin na sumunod o matipon sa Tagapagligtas. Isipin din ang inyong mga hangarin na tumulong na tipunin ang iba sa Kanya. Sa inyong pag-aaral, alamin ang mga katotohanang makatutulong sa inyo na matukoy ang kahalagahan ng pagtitipon ng inyong sarili at ng iba kay Jesucristo.

Ang talinghaga tungkol sa trigo at mga agingay

Basahin o ibuod ang sumusunod na talata upang matulungan ang mga estudyante na maunawaan ang konteksto sa kasaysayan para sa paghahayag na nakatala sa Doktrina at mga Tipan 86.

Nang gawin nina Joseph Smith at Frederick G. Williams ang inspiradong pagsasalin ng Biblia, naghayag ang Tagapagligtas ng interpretasyon ng talinghaga tungkol sa trigo at mga agingay. Ang interpretasyong ito ay nakatala sa Doktrina at mga Tipan 86.

Bago pag-aralan ng mga estudyante ang Doktrina at mga Tipan 86, tulungan silang maunawaan ang talinghaga tungkol sa trigo at mga agingay. Maaari nilang basahin ang Mateo 13:24–30, maaaring magbahagi ang isang estudyante ng buod ng talinghaga, o maaari mong ipanood ang video na “Jesus Declares the Parables of the Wheat and Tares, Mustard Seed, and Leaven” mula sa time code na 0:00 hanggang 1:30. Mapapanood ang video na ito sa ChurchofJesusChrist.org.

Maaaring makatulong na ipaliwanag na ang mga agingay ay isang uri ng nakalalasong damo. Ang trigo at mga agingay ay halos magkatulad kapag umuusbong, ngunit makikita ang pagkakaiba ng mga ito kapag ganap nang tumubo. Kung susubukang bunutin ng isang tao ang mga agingay bago pa ganap na magsitubo ang trigo at mga agingay, malamang na mawawasak din niya ang karamihan sa trigo.

• Ano ang pinakanapansin ninyo mula sa talinghaga na ito?

• Ano ang isinasagisag ng trigo at mga agingay o damo? (Tingnan sa Mateo 13:38.)

Ang Tagapagligtas ay nagbigay ng interpretasyon sa talinghaga

Basahin ang Doktrina at mga Tipan 86:1–7, at alamin kung aling mga simbolo mula sa talinghaga ang naunawaan natin sa tulong ng Tagapagligtas.

• Ano ang natutuhan ninyo mula sa talinghagang ito tungkol sa paghahandang ginagawa ng Panginoon para sa Kanyang Ikalawang Pagparito?

  Matapos ibahagi ng ilang estudyante ang natuklasan nila, ipaliwanag ang sumusunod na katotohanan: Tinitipon ng Panginoon ang Israel bago ang Kanyang Ikalawang Pagparito.

• Paano makatutulong sa inyo ang kaalaman sa katotohanang ito para makadama kayo ng pag-asa at kapayapaan kapag iniisip ninyo ang Ikalawang Pagparito ni Jesucristo?

• Paano magagabayan ng katotohanang ito ang mga desisyong ginagawa ninyo ngayon?

Ibinahagi ni Russell M. Nelson kung paano tayo makakabahagi sa Panginoon sa pagtitipon ng Israel ngayon.

Tinitipon ng Panginoon ang mga taong pipiliin ang Diyos na maging pinakamahalagang impluwensya sa kanilang buhay.

Sa loob ng maraming siglo, ipinropesiya ng mga propeta ang pagtitipong ito [tingnan sa Isaias 11:11–12; 2 Nephi 21:11–12; Mosias 15:11], at nagaganap na ito ngayon! Dahil kailangan itong mangyari bago ang Ikalawang Pagparito ng Panginoon, ito ang pinakamahalagang gawain sa mundo! …

Kapag sinasabi nating pagtitipon ng Israel sa magkabilang panig ng tabing, ibig sabihin ay gawaing misyonero, gawain sa templo at family history. Ito rin [ay] pagpapatatag ng pananampalataya at patotoo sa puso ng mga taong kasama natin sa buhay, katrabaho, at pinaglilingkuran natin. Sa tuwing gumagawa tayo ng kahit ano na makatutulong sa kahit sino—sa magkabilang panig ng tabing—para gawin at tuparin ang kanilang mga tipan sa Diyos, tumutulong tayo na tipunin ang Israel. (Russell M. Nelson, “Hayaang Manaig ang Diyos,” Liahona, Nob. 2020, 92–93)

• Ano ang natutuhan ninyo mula sa pahayag na ito tungkol sa kung paano ninyo matutulungan ang Panginoon na tipunin ang Israel?

“Isang ilaw sa mga Gentil”

Basahin ang Doktrina at mga Tipan 86:11, at alamin ang itinuro ng Tagapagligtas tungkol sa kung paano tayo makatutulong sa pagtitipon ng mga tao sa Kanya.

Maaaring makatulong na ipaliwanag na ang mga salitang mga Gentil sa talata 11 ay maaaring tumukoy sa mga hindi miyembro ng Simbahan.

Bilang bahagi ng inyong talakayan tungkol sa susunod na tanong, maaari mong ipabasa sa mga estudyante ang Mateo 5:14–16 at 3 Nephi 18:24. Maaari nilang ibahagi kung ano ang idinaragdag ng mga talatang ito sa kanilang pang-unawa.

• Ano sa palagay ninyo ang ibig sabihin ng maging “ilaw sa mga Gentil”?

• Ano ang ilang paraan na makatutulong kayo sa pagtitipon ng Israel sa pamamagitan ng pagbabahagi ng liwanag ng Tagapagligtas sa iba?

Maaari mong ilista sa pisara ang mga ideya ng mga estudyante. Bilang bahagi ng talakayang ito, maaari mong anyayahan ang mga estudyante na magbahagi ng mga karanasan nila. Para makakita ng marami pang halimbawa, ipanood ang video na “Maging Ilaw ng Sanlibutan—Tularan ang Halimbawa ni Jesucristo. Share His Light—Serve as He Served” (2:17) mula sa time code na 0:29 hanggang 2:17, na mapapanood sa ChurchofJesusChrist.org.

Gumawa ng plano na tipunin ang Israel sa Tagapagligtas

Tulungan ang mga estudyante na ipamuhay ang mga katotohanang natutuhan nila sa pamamagitan ng pag-anyaya sa kanila na sagutin ang isa o lahat ng sumusunod na tanong sa kanilang study journal.

• Ano ang isang bagay na pagsisikapan mong gawin para matipon sa Tagapagligtas?

• Ano ang isang bagay na gagawin mo para matulungan ang Tagapagligtas sa pagtitipon ng Israel?

Isama ang mga detalye kung paano at kailan mo isasakatuparan ang iyong mithiin.

Maaaring ibahagi ng ilang estudyante ang isinulat nila. Patotohanan ang mga katotohanang tinalakay ninyo, at hikayatin ang mga estudyante na kumilos ayon sa mga mithiing itinakda nila para sa kanilang sarili.

Karagdagang Resources

Bakit tinitipon ng Tagapagligtas ang Kanyang mga tao?

Itinuro ni Elder David A. Bednar ng Korum ng Labindalawang Apostol:

Tinitipon ng Panginoon ang Kanyang mga tao kapag Siya ay tinatanggap nila at sinusunod nila ang Kanyang mga kautusan. …

… Tinitipon ng Panginoon ang Kanyang mga tao upang sila ay sumamba, magtayo ng Simbahan, mapangalagaan, at tumanggap ng payo at tagubilin. …

Sinabi ni Propetang Joseph Smith na sa lahat ng panahon, ang banal na layunin ng pagtitipon ay magtayo ng mga templo upang matanggap ng mga anak ng Panginoon ang pinakamatataas na ordenansa at sa gayon ay magtamo sila ng buhay na walang hanggan. (David A. Bednar, “The Spirit and Purposes of Gathering” [Brigham Young University–Idaho devotional, Okt. 31, 2006], byui.edu)

Paano ako makakabilang sa trigo na tinitipon ng Tagapagligtas?

Itinuro ni Elder Neil L. Andersen ng Korum ng Labindalawang Apostol:

Ipinaliwanag ng Panginoon na sa huling sandaling ito bago ang Kanyang pagbalik, ang “trigo,” na inilalarawan Niya bilang “mga anak ng kaharian” [Mateo 13:38], ay tutubo sa tabi ng “mga damo,” o ng mga taong hindi nagmamahal sa Diyos at hindi sumusunod sa Kanyang mga kautusan. “Magkasama silang [tutubo],” [Mateo 13:30] nang magkatabi.

Ito ang magiging mundo natin hanggang sa bumalik ang Tagapagligtas, na maraming kabutihan at maraming kasamaan sa bawat panig.

Maaaring hindi ninyo nadarama kung minsan na isa kayong matibay at hinog na tangkay ng trigo. Pagpasensyahan ang inyong sarili! Sinabi ng Panginoon na ang trigo ay may kasamang mga mura pang dahon na sumisibol [Doktrina at mga Tipan 86:4, 6]. Tayong lahat ay Kanyang mga Banal sa mga Huling Araw, at bagama’t hindi pa natin nararating nang lubusan ang lahat ng nais nating kahinatnan, tapat tayo sa ating pagnanais na maging Kanyang tunay na mga disipulo. (Neil L. Andersen, “Higit na Paglapit sa Tagapagligtas,” Liahona, Nob. 2022, 73)

Doktrina at mga Tipan 86:11. Ano ang ibig sabihin ng maging “tagapagligtas sa aking mga taong Israel”?

Sa pagsasalita tungkol sa gawain para sa ating mga yumaong ninuno, ipinaliwanag ni Pangulong Wilford Woodruff (1807–98):

May mga ama at ina at mga kaanak tayo sa daigdig ng mga espiritu, at may gawain tayong dapat gawin para sa kanila. Bilang indibiduwal malaki ang malasakit ko sa gawaing pagtubos ng mga patay, gayundin ang aking mga kapatid. Ito ang gawaing dapat nating ipagpatuloy hangga’t may pagkakataon tayo. … Ito ang gawaing nakaatang sa mga Banal sa mga Huling Araw. Gawin ang lahat ng magagawa ninyo sa mga bagay na ito, upang kapag kayo’y mamatay, bibiyayaan kayo ng inyong mga ama, ina, kamag-anak at kaibigan dahil sa ginawa ninyo, at dahil kayo ang naging mga kasangkapan sa mga kamay ng Diyos sa pagtatamo ng kanilang kaligtasan. Makikilala kayo bilang mga Tagapagligtas sa Bundok ng Sion sa pagsasakatuparan ng propesiyang ito. (Mga Turo ng mga Pangulo ng Simbahan: Wilford Woodruff [2004], 207)

Mga Karagdagang Aktibidad sa Pag-aaral

Paanyaya ni Pangulong Nelson na tipunin ang Israel

Ipaliwanag na noong 2018, ipinaabot ni Pangulong Russell M. Nelson ang mga sumusunod na paanyaya para tulungan ang mga kabataan na tipunin ang Israel.

• Mag-ayuno nang pitong magkakasunod na araw mula sa social media.

• Magsakripisyo ng oras linggu-linggo para sa Panginoon, tigilan ang paggawa ng isang bagay na gusto ninyong gawin at gamitin ang oras na iyan sa pagtulong na tipunin ang Israel.

• Manatili o bumalik sa landas ng tipan.

• Ipagdasal araw-araw na matanggap ng lahat ng anak ng Ama sa Langit ang mga pagpapala ng ebanghelyo ni Jesucristo.

• Mamukod tangi; maging kaiba sa mundo. (Tingnan sa Russell M. Nelson at Wendy W. Nelson, “Pag-asa ng Israel” [pandaigdigang debosyonal para sa mga kabataan, Hunyo 3, 2018], ChurchofJesusChrist.org.)

Maaari mong talakayin kung paano makatutulong ang mga paanyayang ito sa mga estudyante na makibahagi sa Panginoon sa pagtitipon ng Israel. Maaari mong anyayahan ang mga estudyante na pumili ng isang bagay mula sa listahan na gagawin sa susunod na linggo. Sa isang lesson sa hinaharap, maaari mong anyayahan ang mga estudyante na ibahagi ang pinili nila at kung paano ito nakatulong sa kanila na mas mapalapit sa Tagapagligtas.

Tingnan ang iba ayon sa pagtingin ng Diyos sa kanila

Sa pag-aaral ng mga estudyante ng Doktrina at mga Tipan 86:5–6, maaari mo silang anyayahang pag-isipan kung ano ang maaaring mangyari kapag kaagad nating hinahatulan ang iba.

• Ano ang itinuturo sa atin ng hangarin ng Tagapagligtas na ipagpaliban ang paghatol sa mga talatang ito tungkol sa Kanya?

Maaari mong ipakita ang isang larawan ng mga agingay o damo na lumalaki sa taniman ng trigo. Maaari mong tulungan ang mga estudyante na maunawaan na itinuring tayo ng Tagapagligtas na gaya ng mura pang dahon na sumisibol pa lamang. Siya ay matiyaga at mabait kapag nauukol sa ating paglago. Matutularan natin ang Kanyang halimbawa at magkakaroon tayo ng habag sa ating sarili at sa mga nakapaligid sa atin. Kasama ang Tagapagligtas, dapat nating tingnan ang lahat ng tao bilang “trigo” at anyayahan ang lahat na magtipon sa Kanya. Maaari kang maghikayat ng isang talakayan sa pamamagitan ng mga tanong na tulad ng mga ito:

• Ano ang makatutulong sa inyo para tingnan ang iba tulad ng pagtingin sa kanila ng Ama sa Langit at ni Jesucristo?

• Ano ang mga naging karanasan ninyo nang makita ninyo ang mga pakinabang ng pagsisikap na tingnan ang iba tulad ng pagtingin ng Ama sa Langit at ni Jesus sa kanila?

• Paano makatutulong sa inyo ang pag-uugaling iyon para matulungan ang Tagapagligtas sa pagtitipon ng Israel?

Kasama ng Tagapagligtas, matitipon natin ang Israel

Upang matulungan ang mga estudyante na mag-isip ng mga ideya kung paano nila matitipon ang Israel, maaari mong ipanood ang video na “Gatherers in the Kingdom” (1:51) o “Gathering and Growing: Eldon’s Story (2:10). Sabihin sa mga estudyante na maghanap ng mga praktikal na paraan kung paano sila makikibahagi sa pagtitipon ngayon.