Lesson 99: Doktrina at mga Tipan 85–87

Doktrina at mga Tipan 87

Nagpropesiya si Joseph Smith tungkol sa Digmaan

Dahil sa kaguluhan sa pulitika sa Estados Unidos ng Amerika noong 1830s, nanalangin si Joseph Smith sa Diyos upang malaman ang Kanyang kalooban tungkol sa sitwasyon. Ang kasunod na paghahayag ay naglalaman ng propesiya tungkol sa digmaan na may partikular na mga detalye na tanging ang Diyos lang ang makakaalam noong panahong iyon. Ang lesson na ito ay makatutulong sa mga estudyante na maunawaan na lahat ng salita ng Panginoon sa Kanyang mga propeta ay matutupad.

Mga Posibleng Aktibidad sa Pag-aaral

Karanasan ni Orson Pratt

Upang matulungan ang mga estudyante na makapaghanda sa pag-aaral ng Doktrina at mga Tipan 87, maaari mong ibuod o basahin ang sumusunod na mga karanasan ni Orson Pratt bilang misyonero.

Si Orson Pratt ay naunang miyembro ng Simbahan na naglingkod bilang isa sa mga orihinal na miyembro ng Korum ng Labindalawang Apostol. Tinawag siya upang maglingkod sa maraming misyon sa kanyang buhay upang ipangaral ang ipinanumbalik na ebanghelyo ni Jesucristo sa buong Estados Unidos at Canada. Sa kanyang mga paglalakbay, dala-dala niya ang isang kopya ng isang partikular na paghahayag na natanggap ni Joseph Smith mula sa Panginoon noong 1832. Bagama’t hindi pa natutupad ang propesiyang nakapaloob sa paghahayag, madalas itong ibahagi ni Elder Pratt sa iba. Madalas siyang kutyain, at naaalala niyang sinabi ng mga tao na ang propesiya ay “walang kabuluhan” at na siya ay “nalinlang ng isang impostor” (Orson Pratt, Journal of Discourses, 18:224–25).

• Kung kayo si Orson Pratt, paano kaya kayo maaapektuhan ng reaksyon ng mga tao?

Isang propesiya mula sa Panginoon

Ang propesiyang ibinahagi ni Orson Pratt sa iba ay nakatala sa Doktrina at mga Tipan 87. Maaaring makabuti sa mga estudyante na maunawaan ang mga detalye sa kasaysayan na nakapaloob sa section heading bago basahin ang propesiya.

Tulungan ang mga mag-aaral na tuklasin ang doktrina at mga alituntunin ng ebanghelyo: Para sa karagdagang pagsasanay rito, tingnan ang training na may pamagat na “Pag-aralan ang doktrina ni Jesucristo para sa iyong sarili” na matatagpuan sa Mga Kasanayan para sa Pag-unlad ng Guro: Ituro ang Doktrina. Maaari mong praktisin ang kasanayan sa pamamagitan ng paggawa ng mga tanong na nanghihikayat ng pagsasaliksik na tutulong sa mga estudyante na matuklasan ang doktrina at mga alituntunin ng ebanghelyo para sa sarili nila at hindi naghihikayat ng partikular na sagot mula sa mga estudyante.

Basahin ang Doktrina at mga Tipan 87:1–4, at alamin kung ano ang ipinahayag ni Jesucristo sa pamamagitan ng Kanyang propeta.

• Ano ang sinabi ng Panginoon na “di magtatagal ay darating na”?

• Ano ang maaari nating matutuhan tungkol sa Panginoon mula sa mga talatang ito?

Bigyan ng pagkakataon ang mga estudyante na magbahagi ng iba’t ibang katotohanan na kanilang nalaman tungkol kay Jesucristo. Bukod pa sa binanggit nila, tulungan silang maunawaan na maipapahayag ng Panginoon sa atin ang mga pangyayari sa hinaharap sa pamamagitan ng Kanyang mga propeta.

Basahin ang ilan o lahat ng sumusunod na banal na kasulatan para matulungan kayong mas maunawaan ang kaalaman ng Panginoon.

• Abraham 2:8

• 1 Nephi 9:6

• Doktrina at mga Tipan 38:1–2

• Ano ang natutuhan ninyo? Sa inyong palagay, bakit makatutulong ang pag-unawa sa mga bagay na ito tungkol kay Jesucristo?

• Paano nakakaapekto ang kaalamang ito sa inyong pagtitiwala sa Kanya?

Pananampalataya sa Panginoon at sa Kanyang mga propesiya

Basahin o ibuod ang sumusunod na talata upang matulungan ang mga estudyante na maunawaan ang nangyari matapos ipahayag ng Panginoon kay Joseph Smith ang mga pangyayaring ito sa hinaharap.

Noong unang bahagi ng 1833, hindi nagtagal matapos ibigay ang propesiya ni Joseph Smith, ang mga di-pagkakasunduan na tila nagbabadya na hindi magtatagal ay maaaring magkaroon ng digmaan sa Amerika, ay mapayapang nalutas.

• Sa palagay ninyo, ano ang itatanong ninyo kung pamilyar na kayo sa propesiya ni Joseph Smith noong panahong iyon?

Inalala ni Orson Pratt ang mga naisip niya noong naging hindi malinaw kung paano o kailan matutupad ang propesiya.

Alam kong totoo ang propesiya, sapagkat nangusap sa akin ang Panginoon at binigyan ako ng paghahayag. Alam ko rin ang tungkol sa kabanalan ng gawaing ito. Maraming taon ang lumipas, bagama’t paminsan-minsan, ilan sa mga kakilala ko ay nagtatanong, “Ano ang mangyayari sa pagbabadyang iyon? Hindi ito kailanman matutupad.” Sabi ko, “Maghintay lang, ang Panginoon ay may itinakdang panahon.” (Orson Pratt, Journal of Discourses, 18:224–25)

• Ano ang pinakamahalaga para sa inyo sa tugon ni Orson Pratt?

• Paano niya piniling kumilos nang may pananampalataya at magkaroon ng walang-hanggang pananaw?

Pagpiling pumanig sa Panginoon

Maaari mong anyayahan ang mga estudyante na talakayin ang sumusunod na tanong sa kapartner o sa maliit na grupo bago nila ibahagi sa klase ang kanilang mga sagot.

• Ano ang ilang sitwasyon na maaaring kinakailangang kumilos ang isang tao nang may pananampalataya bilang tugon sa mensahe ng propeta ngayon?

Hikayatin ang mga estudyante na pag-isipan kung gaano sila kahandang pumanig sa mga propeta ng Panginoon kapag nagtuturo sila ng mga bagay na hindi sinasang-ayunan ng iba.

Basahin ang Doktrina at mga Tipan 1:37–38 at 21:4–6. Maghanap ng mga turo na makatutulong sa inyo na manatiling matapat sa Panginoon at sa Kanyang mga propeta, kahit hindi sang-ayon ang iba sa kanilang mga salita.

• Ano ang nalaman ninyo?

Upang matulungan ang mga estudyante na malaman na ang pananampalataya at pagtitiis ay kadalasang kinakailangan upang makita ang katuparan ng mga propesiya ng Panginoon, maaari mong ibahagi ang sumusunod na mga detalye ng kasaysayan.

Bagama’t hindi na nakita ni Joseph Smith ang katuparan ng propesiya, ang isang bahagi nito ay natupad halos 30 taon matapos itong ibigay. Nagsimula ang labanan sa South Carolina, at ang mga estado sa Timog at Hilaga ay nakipaglaban sa isa’t isa mula 1861 hanggang 1865. Tulad ng ipinropesiya, ang Timog ay humingi ng tulong sa Great Britain at marami sa mga naging alipin ang nakipaglaban sa kanilang mga dating panginoon (tingnan sa Doktrina at mga Tipan 87:1–4). Maraming tao ang namatay sa digmaang ito. Tulad ng inilarawan sa propesiya, ang sumunod na mga digmaan ay naganap sa mga bansa sa buong mundo (tingnan sa Doktrina at mga Tipan 87:6–7).

Tumayo sa mga banal na lugar

Maaaring makadama ang ilang estudyante ng kawalang katiyakan o takot kapag iniisip nila ang tungkol sa digmaan at pagkawasak na inilarawan sa propesiyang ito. Ipaliwanag na ang mga huling salita ng Panginoon sa paghahayag na ito ay nagbibigay ng payo na makatutulong sa atin sa mga kaguluhan sa mga huling araw.

Basahin ang Doktrina at mga Tipan 87:8, at alamin ang payo ng Panginoon.

• Ano ang ilang banal na lugar na ibinigay sa atin ng Panginoon na makatutulong sa inyo na humanap ng kapayapaan at kaligtasan sa ating mundo?

Maaari mong ipaliwanag na ang pananatiling matapat sa Panginoon at sa Kanyang mga propeta ay isang paraan upang tayo ay “[makatayo] … sa mga banal na lugar, at huwag matinag.” Patotohanan ang mga katotohanang tinalakay ninyo sa araw na ito at hikayatin ang mga estudyante na kumilos ayon sa anumang impresyong natanggap nila.

Karagdagang Resources

Ano ang mga sitwasyon na humantong sa Digmaang Sibil sa Amerika?

Para malaman pa ang tungkol sa mga sitwasyong ito, basahin ang Mga Paksa sa Kasaysayan ng Simbahan, “Digmaang Sibil sa Amerika,” ChurchofJesusChrist.org.

Ano ang masasabi sa akin ng mga propeta tungkol sa mga pangyayari sa hinaharap?

“May pagkakataon na ang mga propeta ay binibigyang-inspirasyon na maghayag ng mangyayari sa hinaharap para sa kapakinabangan ng sangkatauhan. Ang una niyang tungkulin, gayunman, ay magpatotoo kay Cristo” (Gabay sa mga Banal na Kasulatan, “Propeta,” scriptures.ChurchofJesusChrist.org).

Paano ako makadarama ng kapayapaan sa gitna ng kaguluhan sa mga huling araw?

Itinuro ni Pangulong Russell M. Nelson:

Tila araw-araw tayong binubugbog ng mga nakapanlulumong balita. Maaaring may mga araw na ninais ninyong isuot ang inyong pantulog, mamaluktot, at magpagising na lamang kapag tapos na ang kaguluhan.

Ngunit, mahal kong mga kapatid, napakaraming magagandang bagay na mangyayari. Sa mga darating na araw, masasaksihan natin ang mga pinakadakilang pagpapakita ng kapangyarihan ng Tagapagligtas na hindi pa nasasaksihan ng mundo kailanman. Mula ngayon hanggang sa oras ng Kanyang pagbalik “na may kapangyarihan at dakilang kaluwalhatian“ (Joseph Smith—Mateo 1:36), magkakaloob Siya ng napakaraming pribilehiyo, pagpapala, at himala sa matatapat. (Russell M. Nelson, “Daigin ang Mundo at Makasumpong ng Kapahingahan,” Liahona, Nob. 2022, 95)

Ano ang magagawa ko upang pumanig sa Panginoon at sa Kanyang mga propeta?

Itinuro ni Elder Ronald A. Rasband ng Korum ng Labindalawang Apostol:

Sinang-ayunan natin ang mga pinunong tinawag ngayon, sa pamamagitan ng inspirasyon ng langit, na turuan at gabayan tayo at binabalaan tayo sa mga panganib na kinakaharap natin sa bawat araw—mula sa pagbabalewala sa paggalang sa araw ng Sabbath, hanggang sa mga pagbabanta sa pamilya, sa mga pagkalaban sa kalayaang pangrelihiyon, at sa pakikipagtalo tungkol sa paghahayag sa mga huling araw. Mga kapatid, nakikinig ba tayo sa kanilang payo? …

Ang malaking tanong sa ngayon ay malinaw: kasama ba kayo ng mga pinuno ng Simbahan sa isang mundong nag-iibayo ang kasamaan upang maipalaganap ninyo ang Liwanag ni Cristo? …

Dalangin ko na iunat natin ang ating kamay—iunat at abutin ang kamay ng Tagapagligtas na iniaabot Niya sa atin, na kadalasa’y sa pamamagitan ng Kanyang mga pinuno na tinawag ng langit at ng ating mga kapamilya—at pakinggan ang tawag Niyang lumapit. (Ronald A. Rasband, “Pagtayo na Kasama ang mga Pinuno ng Simbahan,” Liahona, Mayo 2016, 47, 48, 49)

Ano ang dapat kong gawin kapag nadarama ko na nasusubok ang aking pananampalataya sa mga pag-aalinlangan?

Itinuro ni Elder Neil L. Andersen ng Korum ng Labindalawang Apostol:

Magtuon kayo sa mismong mga bagay na nagpalakas sa inyong pananampalataya: manampalataya kay Cristo, manalangin, pagnilayan ang mga banal na kasulatan, magsisi, sundin ang mga utos, at maglingkod sa kapwa.

Kapag naharap sa pagsubok ng pananampalataya—anuman ang gawin ninyo, huwag kayong lumayo sa Simbahan! Ang paglayo ninyo sa kaharian ng Diyos sa oras ng pagsubok sa pananampalataya ay parang pag-alis sa ligtas na kanlungan nang matanaw ninyo ang buhawi. (Neil L. Andersen, “Pagsubok sa Inyong Pananampalataya,” Liahona, Nob. 2012, 40)

Doktrina at mga Tipan 86:7. Paano ako makatatayo sa mga banal na lugar?

Itinuro ni Pangulong Russell M. Nelson:

Anumang uri ng problema ang dumating sa inyong buhay, ang pinakaligtas na lugar para maging ligtas sa espirituwal ay pamumuhay ayon sa inyong mga tipan sa templo!

Mangyaring paniwalaan ako na kapag matibay na nakatayo ang inyong espirituwal na pundasyon kay Jesucristo, hindi kayo kailangang matakot. (Russell M. Nelson, “Ang Templo at ang Inyong Espirituwal na Pundasyon,” Liahona, Nob. 2021, 96)

Mga Karagdagang Aktibidad sa Pag-aaral

Doktrina at mga Tipan 87:5–7. Ano ang “nagpaparusang kamay” ng Diyos?

Maaaring may mga tanong ang mga estudyante tungkol sa Doktrina at mga Tipan 87:5–7. Maaaring makabuting tulungan ang mga estudyante na malaman na mapagmahal na tinutulungan ng Panginoon ang bawat isa sa atin sa maraming paraan. Maaari mong anyayahan ang mga estudyante na gumawa ng listahan ng ilan sa mga paraang iyon. Pagkatapos, tulungan ang mga estudyante na malaman mula sa iba’t ibang banal na kasulatan kung ano ang ginagawa ng Diyos kapag binabalewala natin ang mga paraan ng pagtulong Niya nang may pagmamahal. Tulungan silang makita na kapag pinatigas natin ang ating puso laban sa tinig ng Diyos, ginagamit Niya kung minsan ang kulog, mga lindol, at iba pang mas matinding paraan upang kastiguhin tayo (tingnan sa 1 Nephi 17:45). Nais ng Diyos na pagsisihan natin ang ating mga kasalanan at alalahanin Siya at ang Kanyang kabutihan (tingnan sa Helaman 12:1–3). Bukod pa rito, ang ilan sa mga kahatulang inilarawan sa Doktrina at mga Tipan 87:5–7 ay mangyayari dahil kinakastigo ng Panginoon ang mga taong hindi makatarungan ang pakikitungo sa mga matwid.

Doktrina at mga Tipan 87:8. Paano ko masusunod ang paanyaya ng Panginoon na tumayo sa mga banal na lugar?

Upang matulungan ang mga estudyante na mas maunawaan ang payo ng Panginoon sa talata 8, maaari mo silang anyayahang talakayin ang mga tanong na gaya ng mga sumusunod:

• Ano sa palagay ninyo ang ibig sabihin ng pagtayo sa mga banal na lugar?

• Ano ang maaaring makapagpaalis sa isang tao mula sa isang banal na lugar?

• Paano natin matitiyak na hindi tayo matitinag?

• Aling mga banal na lugar ang tumutulong sa inyo na makadama ng kapayapaan sa mundo ngayon?

Bilang bahagi ng inyong talakayan, maaaring sumangguni sa artikulong “Nakatayo sa mga Banal na Lugar” ng Liahona, Disyembre 2013. Sa artikulong ito, ibinahagi ng kabataan mula sa iba’t ibang panig ng mundo kung paano nila pinipiling tumayo sa mga banal na lugar.

Maaari mo ring talakayin ang huling pahayag ni Pangulong Russell M. Nelson sa “Karagdagang Resources.”

Pagpapanatili ng pananampalataya kay Jesucristo at pagtitiwala sa Kanyang mga propeta

Maaaring makatulong sa mga estudyante na matuto mula sa mga halimbawa sa buong kasaysayan kung saan nasubukan ang pananampalataya ng mga mananampalataya. Ang mga halimbawang ito ay maaaring magmula sa banal na kasulatan, tulad ng salaysay sa 3 Nephi 1:4–13. Maaari mo ring gamitin ang isang halimbawa na ibinahagi ni Elder Neil L. Andersen ng Korum ng Labindalawang Apostol.

Maraming taon na ang nakalipas may nabasa akong artikulo sa Time magazine na nag-ulat tungkol sa pagkatuklas sa isang liham, na isinulat daw ni Martin Harris, na salungat sa salaysay ni Joseph Smith ukol sa pagkatuklas sa mga lamina ng Aklat ni Mormon.

Tumalikod ang ilang miyembro ng Simbahan dahil sa dokumento.

Nakalulungkot na umalis sila kaagad. Makalipas ang ilang buwan natuklasan ng mga eksperto (at inamin ng nanghuhuwad) na ang sulat ay tahasang panlilinlang. Makatwiran din naman na pag-alinlanganan ninyo ang naririnig ninyo sa balita, ngunit kailanman ay huwag ninyong pagdudahan kailanman ang patotoo ng mga propeta ng Diyos. (Neil L. Andersen, “Joseph Smith,” Liahona, Nob. 2014, 29)

Tulungan ang mga estudyante na talakayin kung ano ang magagawa ng mga halimbawang ito para sa kanila kapag nahihirapan silang pumanig sa Panginoon at sa Kanyang mga propeta. Anyayahan silang patotohanan ang mga pagkakataong nanatili silang tapat sa Panginoon at sa Kanyang mga turo.

Pumanig sa Panginoon at sa Kanyang mga propeta sa pamamagitan ng pananatili sa bangka

Maaari mong gamitin ang isa sa mga sumusunod na video upang matulungan ang mga estudyante na maunawaan ang kahalagahan ng pagpanig sa Panginoon at sa Kanyang mga propeta. Ginagamit ng mga video na ito ang paghahambing ng paghahanap ng kaligtasan sa isang bangka sa paghahanap ng kaligtasan sa ipinanumbalik na Simbahan ng Panginoon. Maaari mong i-pause ang video sa mahahalagang sandali upang pahintulutan ang mga estudyante na talakayin kung ano ang mga natutuhan nila.