Դաս 99. Վարդապետություն և Ուխտեր 85–87

Վարդապետություն և Ուխտեր 87

Ջոզեֆ Սմիթը մարգարեացել է պատերազմի մասին

1830-ականներին Ամերիկայի Միացյալ Նահանգներում քաղաքական անկարգությունների համար Ջոզեֆ Սմիթն աղոթեց Աստծուն, իմանալու իրավիճակի վերաբերյալ Նրա միտքը: Դրան հաջորդած հայտնությունը պարունակում էր մարգարեություններ՝ պատերազմի վերաբերյալ որոշակի մանրամասներով, որոնք միայն Աստված կարող էր իմանալ այդ ժամանակ: Այս դասը կօգնի ուսանողներին հասկանալ, որ Իր մարգարեներին ուղղված Տիրոջ բոլոր խոսքերը կատարվելու են:

Հնարավոր ուսումնական վարժություններ

Օրսոն Պրատի փորձառությունը

Որպեսզի օգնեք ուսանողներին նախապատրաստվել ուսումնասիրել Վարդապետություն եւ Ուխտեր 87 բաժինը, կարող եք ամփոփ ներկայացնել կամ կարդալ Օրսոն Պրատի հետևյալ միսիոներական փորձառության մասին:

Օրսոն Պրատը Եկեղեցու առաջին անդամներից էր, որը ծառայում էր որպես Տասներկու Առաքյալների Քվորումի սկզբնական անդամներից մեկը: Նա իր կյանքի ընթացքում կանչվել էր ծառայելու բազմաթիվ միսիաներում՝ քարոզելու Հիսուս Քրիստոսի վերականգնված ավետարանը Միացյալ Նահանգների և Կանադայի ողջ տարածքում: Ճամփորդությունների ժամանակ նա իր հետ վերցնում էր այն հայտնության օրինակը, որը Ջոզեֆ Սմիթը ստացել էր Տիրոջից 1832 թվականին: Թեև հայտնության մեջ պարունակվող մարգարեությունը դեռ չէր կատարվել, Երեց Պրատը հաճախ դրանով կիսվում էր ուրիշների հետ: Նրան հաճախ ծաղրում էին և կրկնում որոշ մարդկանց ասածը, որ այդ մարգարեությունը «կատարյալ անհեթեթություն է», և որ նա «խաբեբայի զոհ է» դարձել (Օրսոն Պրատ, Journal of Discourses, 18․224–25)։

• Եթե դուք լինեիք Օրսոն Պրատը, ըստ ձեզ, մարդկանց արձագանքն ինչպե՞ս կազդեր ձեզ վրա:

Մարգարեություն Տիրոջից

Այն մարգարեությունը, որով Օրսոն Պրատը կիսվում էր ուրիշների հետ, գրանցված է Վարդապետություն և Ուխտեր 87 բաժնում։ Ուսանողների համար լավ կլինի, որ նախքան մարգարեությունը կարդալը հասկանան բաժնի գլխագրում պարունակվող պատմական մանրամասները:

Ուսանողներին օգնեք բացահայտել ավետարանի վարդապետությունն ու սկզբունքները. դրա վերաբերյալ լրացուցիչ ուսուցում ստանալու համար տես «Ինքնուրույն սովորեք Հիսուս Քրիստոսի վարդապետությունը» դասընթացը Ուսուցչի կատարելագործման հմտություններ․ Ուսուցանեք վարդապետությունը ուսուցողական նյութում։ Կարող եք կիրառել հետևյալ հմտությունը՝ կազմելով բաց, ուսումնասիրության մղող հարցեր, որոնք կօգնեն ուսանողներին ինքնուրույն բացահայտել ավետարանի վարդապետությունն ու սկզբունքները և ուսանողներից չեն պահանջի որոշակի պատասխան:

Կարդացեք Վարդապետություն և Ուխտեր 87․1–4 հատվածները և փնտրեք, թե ինչ հայտնեց Հիսուս Քրիստոսն Իր մարգարեի միջոցով:

• Ի՞նչ է ասել Տերը, որը «շուտով կկատարվի»:

• Այս հատվածներից ի՞նչ կարող ենք սովորել Տիրոջ մասին:

Ուսանողներին հնարավորություն տվեք կիսվել Հիսուս Քրիստոսի մասին իրենց սովորած տարբեր ճշմարտություններով: Ի լրումն իրենց նշածի՝ օգնեք նրանց հասկանալ, որ Տերը կարող է մեզ հայտնել ապագա իրադարձությունների մասին Իր մարգարեների միջոցով։

Կարդացեք ստորև նշված սուրբ գրություններից մի քանիսը կամ բոլորը, որոնք կօգնեն ձեզ ավելի լավ հասկանալ Տիրոջ գիտելիքը:

• Աբրահամ 2․8

• 1 Նեփի 9.6

• Վարդապետություն և Ուխտեր 38․1–2

• Ի՞նչ սովորեցիք: Ըստ ձեզ, ինչո՞ւ է օգտակար ունենալ այդ գիտելիքը Հիսուս Քրիստոսի մասին։

• Ինչպե՞ս է այդ գիտելիքն ազդում Նրա հանդեպ ձեր վստահության վրա:

Հավատք առ Տերը և Նրա մարգարեությունները

Կարդացեք կամ ամփոփ ներկայացրեք հետևյալ պարբերությունը՝ օգնելու ուսանողներին հասկանալ, թե ինչ տեղի ունեցավ այն բանից հետո, երբ Տերը հայտնեց Ջոզեֆ Սմիթին այս ապագա իրադարձությունների մասին:

1833 թվականի սկզբին, Ջոզեֆ Սմիթի մարգարեությունից շատ չանցած, տարաձայնությունները, որոնց պատճառով թվում էր, որ Ամերիկայում շուտով պատերազմ կարող է սկսվել, խաղաղ ճանապարհով լուծվեցին:

• Ըստ ձեզ, ի՞նչ հարցեր կարող էիք ունենալ, եթե այդ ժամանակ ծանոթ լինեիք Ջոզեֆ Սմիթի մարգարեությանը:

Օրսոն Պրատը հիշել է իր այն ժամանակվա մտքերը, երբ անհասկանալի էր, թե ինչպես և երբ պետք է կատարվի մարգարեությունը:

Ես գիտեի, որ մարգարեությունը ճշմարիտ է, քանի որ Տերը խոսել էր ինձ հետ և ինձ հայտնություն էր տվել: Ես գիտեի նաև այս աշխատանքի աստվածայնության մասին: Տարիներն անցնում էին և իմ նախկին ծանոթներից ոմանք ասում էին. «Եվ ի՞նչ եղավ այդ կանխատեսումը: Այն երբեք չի կատարվի»: Ես ասացի. «Սպասեք, Տերն ունի Իր սահմանված ժամանակը»: (Օրսոն Պրատ, Journal of Discourses, 18․224–25)

• Օրսոն Պրատի պատասխանում հատկապես ի՞նչն է առանձնանում ձեզ համար։

• Նա ինչպե՞ս որոշեց գործել հավատքով և պահպանել հավերժության հեռանկարը:

Տիրոջ կողքին կանգնելու ընտրությունը

Կարող եք ուսանողներին առաջարկել քննարկել հետևյալ հարցը դասընկերոջ հետ կամ փոքր խմբերով՝ նախքան դասարանի հետ կիսվելը:

• Որո՞նք են այն իրավիճակներն այսօր, որոնց ժամանակ անհրաժեշտ է, որ մարդը գործի հավատքով՝ արձագանքելով մարգարեի ուղերձին:

Ուսանողներին խրախուսեք խորհել, թե որքանով են իրենք պատրաստ կանգնել Տիրոջ մարգարեների կողքին, երբ նրանք ուսուցանում են բաներ, որոնց հետ ուրիշները համաձայն չեն:

Կարդացեք Վարդապետություն և Ուխտեր 1․37–38 և 21․4–6 հատվածները։ Փնտրեք ուսմունքներ, որոնք կարող են օգնել ձեզ հավատարիմ մնալ Տիրոջը և Նրա մարգարեներին, նույնիսկ, երբ ուրիշները համաձայն չեն նրանց խոսքերի հետ:

• Ի՞նչ գտաք:

Որպեսզի օգնեք ուսանողներին հասկանալ, որ Տիրոջ մարգարեությունների կատարումը տեսնելու համար հաճախ պահանջվում է հավատք և համբերություն, կարող եք կիսվել հետևյալ պատմական մանրամասներով:

Թեև Ջոզեֆ Սմիթն արդեն ողջ չէր, որպեսզի տեսներ մարգարեության կատարումը, դրա մի մասը կատարվեց այն տրվելուց մոտ 30 տարի անց: Հակամարտությունը սկսվեց Հարավային Կարոլինայում․ 1861-1865 թվականներին հարավային և հյուսիսային նահանգները պատերազմեցին միմյանց դեմ: Ինչպես ասվում էր մարգարեության մեջ, Հարավն օգնության կանչեց Մեծ Բրիտանիային, և ստրուկներից շատերը կռվեցին իրենց նախկին տերերի դեմ (տես Վարդապետություն և Ուխտեր 87.1–4): Բազմաթիվ մարդիկ մահացան այդ պատերազմում։ Ինչպես նկարագրված է մարգարեության մեջ, հետագայում պատերազմներ մղվեցին աշխարհի տարբեր երկրներում (տես Վարդապետություն և Ուխտեր 87.6–7):

Կանգնեք սուրբ տեղերում

Որոշ ուսանողներ կարող են անորոշության կամ վախի զգացողություն ունենալ՝ այս մարգարեության մեջ նկարագրված պատերազմի և ավերածությունների մասին մտածելիս: Բացատրեք, որ այս հայտնության մեջ Տիրոջ վերջին խոսքերը խորհուրդ են տալիս, որը կարող է օգնել մեզ վերջին օրերի փորձությունների ժամանակ:

Կարդացեք Վարդապետություն և Ուխտեր 87․8 հատվածը՝ փնտրելով Տիրոջ խորհուրդը:

• Որո՞նք են Տիրոջ կողմից տրված այն սուրբ տեղերը, որոնք կարող են օգնել ձեզ խաղաղություն և ապահովություն գտնել մեր աշխարհում:

Կարող եք բացատրել, որ Տիրոջը և Նրա մարգարեներին հավատարիմ մնալն այն եղանակներից մեկն է, որով մենք կարող ենք «անսասան կանգնել … սուրբ տեղերում»: Վկայեք այսօր ձեր քննարկած ճշմարտությունների մասին և խրախուսեք ուսանողներին գործել ըստ իրենց ստացած տպավորությունների։

Լրացուցիչ նյութեր

Ո՞ր հանգամանքները հանգեցրեցին Ամերիկայի քաղաքացիական պատերազմին:

Այդ հանգամանքների մասին ավելին իմանալու համար կարդացեք Եկեղեցու պատմության թեմաները, «Քաղաքացիական պատերազմ Ամերիակայում» բաժնում՝ ChurchofJesusChrist.org կայքում։

Մարգարեները ի՞նչ կարող են ինձ ասել ապագա իրադարձությունների մասին:

«Երբեմն մարգարեները կարող են ոգեշնչվել՝ կանխատեսելու ապագան ի շահ մարդկության։ Նրա առաջնային պարտականությունն է վկայել Քրիստոսի մասին» (Սուրբ գրքերի ուղեցույց, «Մարգարեներ», scriptures.ChurchofJesusChrist.org)։

Ինչպե՞ս կարող եմ խաղաղություն գտնել վերջին օրերի խառնաշփոթի մեջ։

Նախագահ Ռասսել Մ. Նելսոնն ուսուցանել է․

Հաղթել աշխարհին և հանգստություն գտնել

Մտահոգիչ լուրերի մի տարափ ամեն օր կարծես գրոհում է մեզ վրա։ Գուցե եղել են օրեր, երբ ցանկացել եք հագնել ձեր գիշերազգեստը, կծկվել և խնդրել որևէ մեկին արթնացնել ձեզ, երբ այս ամբողջ խառնաշփոթն ավարտվի:

Սակայն, իմ սիրելի եղբայրներ և քույրեր, այնքան հրաշալի իրադարձություններ են մեզ սպասվում։ Գալիք օրերին մենք ականատես ենք լինելու Փրկչի զորության ամենամեծ դրսևորումներին, որոնք երբևէ տեսել է աշխարհը: Ներկայի և «զորությունով ու մեծ փառքով» (Ջոզեֆ Սմիթ—Մատթեոս 1․36) Նրա վերադարձի միջև ընկած ժամանակահատվածում Նա անհամար արտոնություններ, օրհնություններ և հրաշքներ կշնորհի հավատարիմներին: (Ռասսել Մ․ Նելսոն, «Հաղթել աշխարհին և գտնել հանգստություն», Լիահոնա, նոյ. 2022 թ․, 95)

Ի՞նչ կարող եմ ես անել, որպեսզի կանգնեմ Տիրոջ և Նրա մարգարեների կողքին:

Տասներկու Առաքյալների Քվորումից երեց Ռոնալդ Ա․ Ռասբանդն ուսուցանել է.

Մենք այսօր աջակցում ենք ղեկավարների, որոնք աստվածային ոգեշնչմամբ կանչվել են ուսուցանելու և առաջնորդելու մեզ, և որոնք կոչ են անում մեզ զգուշանալ վտանգներից, որոնց մենք հանդիպում ենք ամեն օր՝ սկսած Հանգստության օրը հազվադեպ հիշելուց մինչև ընտանիքին սպառնացող վտանգներ, կրոնական ազատության ոտնահարում և նույնիսկ վերջին օրերի հայտնության վիճարկում: Եղբայրներ և քույրեր, լսո՞ւմ ենք արդյոք մենք նրանց խորհուրդը: …

Այսօր բարձրացվող հարցը հստակ է. արդյոք դուք կանգնա՞ծ եք Եկեղեցու ղեկավարների կողքին այս մթագնող աշխարհում, այնպես, որ կարողանաք տարածել Քրիստոսի Լույսը: …

Ես աղոթում եմ, որ մենք հասնենք՝ հասնենք ու բռնենք Փրկչի ձեռքը, որը Նա մեկնում է մեզ, հաճախ Իր աստվածային զորությամբ կանչված ղեկավարների և մեր ընտանիքի անդամների միջոցով, և լսենք Իր մոտ գալու Նրա կանչը: (Ռոնալդ Ա. Ռասբանդ, «Կանգնել Եկեղեցու ղեկավարների կողքին», Լիահոնա, մայիս 2016 թ․, 47, 48, 49)

Ի՞նչ պետք է անեմ, երբ զգում եմ, որ իմ հավատքը կասկածի տակ է դրվում:

Տասներկու Առաքյալների Քվորումից երեց Նիլ Լ․ Անդերսենն ուսուցանել է.

Ձեր հավատքի փորձությունը

Դուք ընկղմվում եք այն ամենի մեջ, ինչն օգնել է ձեզ կառուցել ձեր հավատքի առանցքը. դուք գործադրում եք հավատք առ Քրիստոս, դուք աղոթում եք, դուք խորհում եք սուրբ գրքերի մասին, դուք ապաշխարում եք, դուք պահում եք պատվիրանները և դուք ծառայում եք ուրիշներին:

Երբ հավատքի փորձության եք հանդիպում, ինչ էլ որ անեք, մի շրջվեք Եկեղեցուց: Աստծո արքայությունից հեռանալը, երբ հավատքի փորձության մեջ եք, նման է ապահով տանիքի տակից դուրս գալուն հենց այն պահին, երբ փոթորիկը մոտենում է: (Նիլ Լ․ Անդերսեն, «Ձեր հավատքի փորձությունը», Լիահոնա, նոյ. 2012 թ․, 40)

Վարդապետություն և Ուխտեր 86․7: Ինչպե՞ս կարող եմ կանգնել սուրբ տեղերում:

Նախագահ Ռասսել Մ. Նելսոնն ուսուցանել է․

Տաճարը և ձեր հոգևոր հիմքը

Ամեն անգամ, երբ ձեր կյանքում որևէ ցնցում է տեղի ունենում, հոգևոր առումով ամենաանվտանգ ապրելու վայրը գտնվում է ձեր տաճարային ուխտերի սահմանների ներսում:

Խնդրում եմ, հավատացեք ինձ, երբ ես ասում եմ, որ երբ ձեր հոգևոր հիմքն ամուր կառուցված է Հիսուս Քրիստոսի վրա, դուք վախենալու կարիք չունեք: (Ռասսել Մ․ Նելսոն, «Տաճարը և ձեր հոգևոր հիմքը», Լիահոնա, նոյեմբեր 2021 թ․, 96)

Օժանդակ ուսումնական վարժություններ

Վարդապետություն և Ուխտեր 87․5–7։ Ի՞նչ է Աստծո «խրատող ձեռքը»:

Ուսանողները կարող են հարցեր ունենալ Վարդապետություն և Ուխտեր 87.5–7 հատվածների վերաբերյալ: Օգտակար կլինի օգնել ուսանողներին հասկանալ, որ Տերը տարբեր եղանակներով Իր սիրող ձեռքն է մեկնում մեզանից յուրաքանչյուրին: Կարող եք ուսանողներին առաջարկել թվարկել այդ եղանակներից մի քանիսը։ Այնուհետև օգնեք ուսանողներին տարբեր սուրբ գրություններից իմանալ, թե ինչ է անում Աստված, երբ մենք անտեսում ենք այն եղանակները, որոնցով Նա սիրով ձեռք է մեկնում մեզ: Օգնեք նրանց հասկանալ, որ երբ մենք կարծրացնում ենք մեր սրտերն Աստծո ձայնի հանդեպ, Նա երբեմն օգտագործում է ամպրոպ, փոթորիկ, երկրաշարժ և ուրիշ ավելի հզոր եղանակներ՝ մեզ խրատելու համար (տես 1 Նեփի 17.45): Աստված ցանկանում է, որ մենք ապաշխարենք մեր մեղքերից և հիշենք Իրեն ու Իր բարությունը (տես Հելաման 12.1–3): Բացի այդ, Վարդապետություն և Ուխտեր 87.5–7 հատվածներում նկարագրված որոշ դատաստաններ տեղի կունենան այն ժամանակ, երբ Տերը կխրատի նրանց, ովքեր անարդար են վարվում արդարների հետ:

Վարդապետություն և Ուխտեր 87.8։ Ինչպե՞ս կարող եմ հետևել սուրբ տեղերում կանգնելու Տիրոջ հրավերին:

Որպեսզի օգնեք ուսանողներին ավելի լավ հասկանալ Տիրոջ խորհուրդը հատված 8-ում, կարող եք առաջարկել նրանց քննարկել հետևյալ հարցերը.

• Ըստ ձեզ, ի՞նչ է նշանակում կանգնել սուրբ տեղերում:

• Ի՞նչը կարող է տեղաշարժել մարդուն սուրբ տեղից:

• Ինչպե՞ս կարող ենք հավաստիանալ, որ մենք տեղաշարժված չենք:

• Ո՞ր սուրբ տեղերն են օգնում ձեզ խաղաղություն գտնել այսօրվա աշխարհում:

Քննարկման ընթացքում կարող եք անդրադառնալ 2013 թվականի դեկտեմբեր ամսվա New Era ամսագրի «Կանգնել սուրբ տեղերում» հոդվածին։ Այս հոդվածում աշխարհի տարբեր երկրների երիտասարդները պատմում են, թե ինչպես են ընտրություն կատարում կանգնել սուրբ տեղերում:

Կարող եք նաև քննարկել նախագահ Ռասսել Մ. Նելսոնի եզրափակիչ ուղերձը «Լրացուցիչ նյութեր» բաժնում:

Պահպանել հավատքը Հիսուս Քրիստոսի և Նրա մարգարեների հանդեպ

Ուսանողների համար օգտակար կլինի դասեր քաղել պատմության այն օրինակներից, որոնցում հավատացյալների հավատքը փորձության է ենթարկվել: Այս օրինակները կարող են լինել սուրբգրային, օրինակ՝ 3 Նեփի 1.4–13 հատվածների պատմությունը: Կարող եք նաև օգտագործել այն օրինակը, որով կիսվել է Տասներկու Առաքյալների Քվորումից երեց Նիլ Լ. Անդերսենը:

Ջոզեֆ Սմիթ

Տարիներ առաջ Time ամսագրում մի հոդված կարդացի, որտեղ ներկայացվում էր ենթադրաբար Մարտին Հարրիսի կողմից գրված մի նամակ, որը հակասում էր Մորմոնի Գրքի թիթեղները գտնելու մասին Ջոզեֆ Սմիթի պատմությանը:

Այդ փաստաթղթի պատճառով մի քանի անդամներ հեռացան Եկեղեցուց:

Ցավոք, նրանք չափազանց արագ հեռացան: Մի քանի ամիս անց փորձագետները պարզեցին (և կեղծարարը խոստովանեց), որ այդ նամակն ամբողջովին սուտ էր: Պարզ է, որ դուք կարող եք կասկածի ենթարկել այն, ինչ լսում եք լուրերով, բայց երբեք չպետք է կասկածի ենթարկեք Աստծո մարգարեների վկայությունը: (Նիլ Լ․ Անդերսեն, «Ջոզեֆ Սմիթ», Լիահոնա, նոյեմբեր 2014 թ․, 29)

Օգնեք ուսանողներին քննարկել, թե ինչպես կարող են այս օրինակներն օգնել իրենց, երբ Տիրոջ և Նրա մարգարեների կողքին կանգնելը դժվար լինի: Առաջարկեք նրանց վկայել այն դեպքերի մասին, երբ իրենք հավատարիմ են մնացել Տիրոջը և Նրա ուսմունքներին:

Կանգնեք Տիրոջ և Նրա մարգարեների կողքին՝ մնալով նավակի մեջ

Կարող եք օգտագործել հետևյալ տեսանյութերից մեկը, որպեսզի օգնեք ուսանողներին հասկանալ Տիրոջ և Նրա մարգարեների կողքին կանգնելու կարևորությունը: Այս տեսանյութերում համեմատություն է արվում նավակի մեջ անվտանգություն գտնելու և Տիրոջ վերականգնված Եկեղեցում անվտանգություն գտնելու միջև: Կարևոր պահերին կարող եք կանգնեցնել տեսանյութը, որպեսզի ուսանողները կարողանան քննարկել այն, ինչ սովորում են:

Stay In The Boat

«Մի կասկածեք, այլ եղեք հավատացող»