Դաս 101․ Վարդապետություն և Ուխտեր 88

Վարդապետություն և Ուխտեր 88․14–41

Ձգտեք հնազանդվել սելեստիալ օրենքին

Վարդապետություն և Ուխտեր 88 բաժնում Տերը հայտնել է ճշմարտություններ Հարության և փառքի արքայությունների մասին՝ ներառելով սելեստիալ փառքը: Այս ճշմարտությունները կարող են միավորել և օրհնել Եկեղեցու անդամներին, եթե նրանք հավատարմորեն հետևեն Հիսուս Քրիստոսին: Այս դասը կօգնի ուսանողներին մեծացնել իրենց վստահությունն առ այն, որ իրենք կարող են սելեստիալ փառք ստանալ:

Հնարավոր ուսումնական վարժություններ

Սելեստիալ փառքի նպատակը

Ուսանողներին առաջարկեք իրենց օրագրերում սանդուղք նկարել և աստիճանների վերևի մասում գրել «սելեստիալ արքայություն»: Ուսանողներին խնդրեք նկարել, թե աստիճանների որ մասում են իրենք տեսնում իրենց: Խրախուսեք նրանց գրել ստորև ներկայացվող հարցերի իրենց պատասխանները։

• Զգո՞ւմ եք, որ ձեր ներկայիս ընտրություններն օգնում են ձեզ առաջ շարժվել դեպի սելեստիալ արքայություն: Ինչո՞ւ այո, կամ ինչո՞ւ ոչ։

• Որքանո՞վ եք վստահ, որ կարող եք ի վերջո հասնել սելեստիալ փառքի Հիսուս Քրիստոսի օգնությամբ:

Հիշեցրեք ուսանողներին, որ քանի որ Հիսուս Քրիստոսը մեր Փրկիչն է, մենք կարող ենք ապավինել Նրան, որպեսզի Նա օգնի մեզ փոխվել, ապաշխարել և ուժ տա՝ մինչ մենք ձգտում ենք հասնել սելեստիալ փառքի:

Վարդապետություն և Ուխտեր 88 բաժնում արձանագրված Տիրոջ հայտնությունն աստվածային լույս է տալիս և օգնում է մեզ հասկանալ հավերժական ճշմարտություններ: 88-րդ բաժնում մենք սովորում ենք մանրամասներ մեր Երկնային Հոր ծրագրի մասին, ճշմարտություններ Հիսուս Քրիստոսի մասին և այն, թե ինչպես կարող ենք վերադառնալ Նրանց ներկայություն:

Կարող եք կիսվել Երկնային Հոր ծրագրի գեղեցկության և վեհության մասին ձեր մտքերով: Խրախուսեք ուսանողներին այսօրվա ուսումնասիրության ժամանակ ոգեշնչում փնտրել՝ իմանալու, թե իրենք ինչպես կարող են գործել հավատքով և ստանալ Փրկչի օգնությունը, երբ առաջ են շարժվում դեպի սելեստիալ արքայություն:

Մեր մահկանացու մարմինները

Բացատրեք, որ Աստծո ծրագրի կարևոր մասն այն է, որ մենք նմանվենք Իրեն՝ և հոգևոր առումով, և ֆիզիկապես: Ծնվելիս մենք ստանում ենք ֆիզիկական մարմին: Այդ մարմինը մի օր կմեռնի և հարություն կառնի:

Կարող եք գրատախտակին գրել ուսանողների պատասխանները հետևյալ հարցի վերաբերյալ․

• Ի՞նչ գիտեք Հարության մասին:

Անհրաժեշտության դեպքում ուսանողները կարող են օգտվել Թեմաներ և հարցեր բաժնի «Հարություն» թեմայից topics.ChurchofJesusChrist.org կայքում՝ իրենց պատասխանների հաստատումը գտնելու համար։

Ուսանողները կարող են կատարել հետևյալ վարժությունը դասընկերոջ հետ: Դուք կարող եք ցուցադրել ուսանողներին հարցերը և հանձնարարել, որ զույգի ուսանողներից յուրաքանչյուրը պատասխանի հարցերից մեկին։ Այս վարժությունը կօգնի ուսանողներին իմանալ, որ կենդանացնել բառը կարող է նշանակել կյանք տալ կամ վերադարձնել կյանքի:

Կարդացեք Վարդապետություն և Ուխտերի 88․14–17, 27–31 հատվածները: Կարդալիս խորհեք հետևյալի մասին.

• Ի՞նչ եք սովորում Հարության մասին:

• Ի՞նչ եք սովորում փառքի երեք աստիճանների մասին:

Խնդրեք ուսանողներին պատմել իրենց սովորածի մասին: Ուշադիր լսեք ուսանողներին և տվեք հետևյալ հարցերը, որպեսզի անհրաժեշտության դեպքում հստակեցնեք նրանց ընկալումը: Եթե ուսանողները լրացուցիչ հարցեր ունենան, կարող եք դրանք քննարկել դասարանով:

Ուսանողների գիտելիքների գնահատում. սրա վերաբերյալ լրացուցիչ ուսուցում ստանալու համար տես «Միշտ պատրաստ եղեք արձագանքելու սովորողների կարիքների վերաբերյալ հոգևոր հուշումներին» վերնագրով դասընթացը, որը հասանելի է Ուսուցչի կատարելագործման հմտություններ. Ուսուցանեք Հոգով ուսուցողական նյութում։ Կարող եք կիրառել «Հարց տվեք, որպեսզի գնահատեք գիտելիքները՝ նախքան դասին անցնելը» հմտությունը:

Աստծո օրենքներին հնազանդվելը հանգեցնում է փառքի

Կարող եք առաջարկել ուսանողներին կիսվել, թե ինչպես են պատկերացնում սելեստիալ մարմին ունենալը կամ ինչու են ցանկանում սելեստիալ մարմին ստանալ Հարության ժամանակ:

Եթե ուսանողները նախորդ վարժության ժամանակ աշխատել են զույգերով, նրանք կարող են աշխատել այլ դասընկերոջ հետ՝ հետևյալ վարժությունը կատարելու համար:

Կարդացեք Վարդապետություն և Ուխտեր 88.21–24, 34–36, 38–39 հատվածները՝ փնտրելով, թե մենք ինչպես կարող ենք հարություն առնել սելեստիալ մարմնով: Կարող եք նշեք այն բառերն ու արտահայտությունները, որոնք կարևոր են ձեզ համար:

• Ըստ ձեզ, որո՞նք են այս հատվածների այն կարևոր մասերը, որոնք պետք է հասկանալ։

• Ի՞նչն է որոշում այն փառքը, որը մենք կարող ենք ստանալ Վերջին Դատաստանից հետո: Ինչո՞ւ։

Ուսանողներին ժամանակ տվեք՝ քննարկելու իրենց սովորածը: Ուսանողները կարող են ասել տարբեր ճշմարտություններ, օրինակ՝ եթե մենք հնազանդվենք սելեստիալ օրենքներին, մենք կստանանք սելեստիալ փառք կամ Հարության ժամանակ մենք կստանանք փառք՝ համաձայն այն օրենքի, որին հնազանդվում ենք։ Հետևյալ ճշմարտությունները կարող եք գրել գրատախտակին։

Որպեսզի օգնեք ուսանողներին հասկանալ և զգալ աստվածային օրենքների կարևորությունը, կարող եք կիսվել հետևյալ խոսքերով.

Տասներկու Առաքյալների Քվորումից երեց Դ. Թոդ Քրիստոֆերսոնն ուսուցանել է.

Սելեստիալ արքայության օրենքն, իհարկե, ավետարանի օրենքն ու ուխտերն են, որոնք ընդգրկում են մշտապես Փրկչին հիշելու և հնազանդության, զոհաբերության, նվիրաբերման և հավատարմության մեր պարտավորությունը: (Դ. Թոդ Քրիստոֆերսոն, «Եկեք Սիոն», Լիահոնա, նոյեմբեր 2008 թ․, 38)

• Ի՞նչ եք սովորում Երկնային Հոր սիրո, արդարության և ողորմածության մասին:

• Ի՞նչ եք մտածում այն մասին, թե ինչպես է Նա անհատապես աշխատում Իր զավակների հետ:

Օգնեք ճանապարհի ընթացքում

Ուսանողներին առաջարկեք խորհել, թե իրենք ինչպես կպատասխանեին իրենց ընկերոջը, որը հուսահատված է և կարծում է, որ ինքը բավականաչափ լավը չէ սելեստիալ փառք ստանալու համար: Կարող եք առաջարկել ուսանողներին կարդալ հետևյալ հատվածները, այնուհետև գրել կարճ պատասխան իրենց ընկերոջ մտահոգության վերաբերյալ:

Կարդացեք 3 Նեփի 27.19–20 հատվածները՝ փնտրելով, թե ինչպես է Երկնային Հայրը հնարավորություն տվել Իր զավակներին սելեստիալ փառք ստանալ: Կարող եք առաջարկել ուսանողներին կապել այս հատվածները Վարդապետություն և Ուխտեր 88․21, 34 հատվածների հետ։

Կարող եք առաջարկել ուսանողներին նշել բացի նրանցից բառերը 3 Նեփի 27.19 հատվածում։ Նշեք, որ այս բառերը կարող են նշանակել «բացառությամբ» կամ «եթե ոչ»: Կարող եք հարցնել ուսանողներին, թե ինչպես է դա օգնում իրենց հասկանալ Հիսուսի խոսքերն՝ ուղղված նեփիացիներին:

Որպեսզի օգնեք ուսանողներին ճանաչել Հիսուս Քրիստոսի միջոցով իրենց հասանելի հույսն ու փոփոխությունը, կարող եք կիսվել հետևյալ խոսքերով.

Տասներկու Առաքյալների Քվորումից երեց Դ. Թոդ Քրիստոֆերսոնն ուսուցանել է.

Ապաշխարության աստվածային պարգևը

Միայն ապաշխարությունն է տանում դեպի ավելի լավ կյանքի պայծառ բարձրունքները:

Թերևս որքան որ աղոթում ենք ողորմածության համար, մենք պետք է աղոթենք ժամանակի և հնարավորության համար՝ աշխատելու, ձգտելու և հաղթահարելու: Անշուշտ, Տերը ժպտում է նրան, ով ցանկանում է արժանիորեն դատաստանի գալ, ով օրեցօր վճռականորեն աշխատում է, որպեսզի փոխարինի թուլությունները զորությամբ: Իրական ապաշխարությունը, իրական փոփոխությունը կարող են պահանջել բազմակի փորձեր, սակայն այդ աշխատանքի մեջ կա մի կատարելագործող և սուրբ տարր: Աստվածային ներումը և բժշկումը այդպիսի հոգու վրա բնականորեն են իջնում, քանզի իսկապես «առաքինությունը սիրում է առաքինությանը. լույսը հարում է լույսին. ողորմածությունը գութ ունի ողորմածության վրա և պահանջում է յուրայիններին» (Վ&Ու 88․40)։

Ապաշխարությամբ մենք կարող ենք հետևողականորեն մեծացնել սելեստիալ արքայության օրենքով ապրելու մեր ունակությունը, քանզի մենք հասկանում ենք, որ «նա, ով չի կարողանում մնալ սելեստիալ արքայության օրենքում, չի կարողանա մնալ սելեստիալ փառքում» (Վ&Ու 88․22): (Դ. Թոդ Քրիստոֆերսոն, «Ապաշխարության աստվածային պարգևը», Լիահոնա, նոյ. 2011, 39)

• Ինչպե՞ս կարող է Փրկչի Քավության մասին ձեր հասկացողությունն ազդել սելեստիալ փառքի հասնելու ձեր հավատի վրա:

• Ելնելով ձեր այսօրվա ուսումնասիրածից՝ ի՞նչ կարող եք ասել այն մարդուն, որը վախենում է, որ չի կարող հասնել սելեստիալ փառքի:

Ուսանողներին առաջարկեք վերանայել դասի սկզբում իրենց նկարած սանդուղքի պատկերը։ Խրախուսեք նրանց սանդուղքի վրա կամ դրա շուրջը գրել այն, ինչ իրենք սովորեցին, որը կարող է օգնել իրենց ավելի մոտենալ սելեստիալ արքայությանը: Ուսանողները կարող են գրի առնել իրենց մտքերը կամ զգացմունքները Երկնային Հոր և Հիսուսի մասին: Նրանք կարող են նաև ներառել, թե ինչպես է ամրապնդվել սելեստիալ փառքին հասնելու իրենց վճռականությունն ու հույսը կամ իրենց սովորած ճշմարտություններն ինչպես կարող են ազդել իրենց ընտրությունների վրա ներկայումս և ապագայում:

Եթե ժամանակը թույլ է տալիս, կարող եք մեկ կամ երկու ուսանողի առաջարկել իրենց մտքերով կիսվել դասարանի հետ:

Լրացուցիչ նյութեր

Ինչպե՞ս են Աստծո օրենքները վկայում մեր հանդեպ Նրա սիրո մասին:

Նախագահ Ռասսել Մ. Նելսոնն ուսուցանել է․

Աստվածային օրենքներն Աստծո պարգևներն են Իր զավակներին: … Թույլ տվեք հնարավորինս հակիրճ ասել. Երբ դուք պահում եք Աստծո օրենքները, դուք գնում եք դեպի վեհացում: …

… Աստծո մեծագույն օրհնությունները վերապահված են նրանց համար, ովքեր հնազանդվում են Նրա օրենքներին, ինչպես Նա է բացատրել. «Քանզի բոլոր նրանք, ովքեր կամենում են օրհնություն ստանալ իմ ձեռքից, պետք է պահեն այն օրենքը, որը նշանակվել է այդ օրհնության համար» [Վարդապետություն և Ուխտեր 132.5]։ Աստծո օրենքներն ամբողջովին բխում են մեր հանդեպ Նրա անսահման սիրուց և Նրա ցանկությունից, որ մենք առավելագույնս իրագործենք մեր ներուժը։ …

… Վեհացումը հեշտ չէ: Աստծո օրենքները պահելու համար պահանջվում են կենտրոնացած և համառ ջանքեր և խիստ ապաշխարություն, երբ դա չենք անում: Սակայն դա անելու համար պարգևը մեր պատկերացրածից շատ ավելի մեծ է, քանի որ այն մեզ ուրախություն է բերում այստեղ և «անվերջ երջանկություն»՝ [Մոսիա 2.41] ապագայում: (Ռասսել Մ․ Նելսոն, «Աստծո սերը և օրենքները» [Բրիգամ Յանգ համալսարանի հոգևոր հավաք, 17-ը սեպտեմբերի, 2019 թ․], speeches.byu.edu)

Վարդապետություն և Ուխտեր 88․27 Ի՞նչ է նշանակում, որ մենք վեր կբարձրանանք որպես «հոգևոր մարմին»:

Նախագահ Ջոզեֆ Ֆիլդինգ Սմիթն (1876–1972) ուսուցանել է.

Մեռելներից հարություն առնելիս մահացած բնական մարմինները վեր կբարձրանան որպես հոգևոր մարմիններ: Այլ կերպ ասած, մահկանացու կյանքում մարմնի կենսունակությունն արյան մեջ է, սակայն, երբ մարմինը վեր է բարձրանում դեպի անմահություն՝ կենդանանում է հոգով և ոչ թե արյունով։ Հետևաբար, այն դառնում է հոգևոր, սակայն այն կազմված կլինի մսից և ոսկորներից, ինչպես որ Հիսուսի մարմինն էր, որը նախատիպ է հանդիսանում: (Ջոզեֆ Ֆիլդինգ Սմիթ, Փրկության վարդապետություններ, կազմ․ Բրյուս Ռ. Մակքոնքին [1955], 2․284–85)

Վարդապետություն և Ուխտեր 88․20–24։ Ի՞նչը կորոշի, թե փառքի որ արքայությունը ես կստանամ Վերջին Դատաստանի ժամանակ:

Նախագահ Ռասսել Մ. Նելսոնը վկայել է․

Ձեզանից յուրաքանչյուրը կդատվի՝ համաձայն ձեր գործերի ու ձեր սրտի ցանկությունների [տես Վ&Ու 137․9]։ Ձեզանից չի պահանջվի վճարել ուրիշի պարտքերը: Սելեստիալ, թերեստրիալ կամ թելեստիալ արքայությունում ձեր վերջնական տեղավորումը չի որոշվելու պատահականորեն: Տերը հաստատված, անփոփոխ պահանջներ ունի յուրաքանչյուրիս համար: Դուք կարող եք իմանալ, թե ինչ են ուսուցանում սուրբ գրությունները, և ըստ այդմ կառուցել ձեր կյանքը [տես Հովհաննես 14.2, Ա Կորնթացիս 15.40–41, Վարդապետություն և Ուխտեր 76.50–119, 98․18]։ (Ռասսել Մ. Նելսոն, «Կայունություն փոփոխությունների մեջ», Ensign, նոյեմբեր 1993 թ․, 35)

Վարդապետություն և Ուխտեր 88․35 Ի՞նչ է տեղի ունենում նրանց հետ, ովքեր խախտում են Աստծո օրենքները։

Տասներկու Առաքյալների Քվորումից երեց Դեյլ Գ. Ռենլանդը բացատրել է.

Մահից հետո մենք կստանանք այն, ինչին արժանացել ենք, և «կվայելենք [միայն] այն, ինչը [մենք] կամենում ենք ստանալ» [Վարդապետություն և Ուխտեր 88.32]։ Մեր հավերժական ճակատագրի գիտակցումը կախված է մեր ընտրությունից: Դրա համար պետք է սուրբ ուխտեր կապել և պահել դրանք։ Այս ուխտի ուղին այն ճանապարհն է, որով մենք գալիս ենք դեպի Քրիստոսը և հիմնված է բացարձակ ճշմարտության և հավերժական, անփոփոխ օրենքի վրա: Մենք չենք կարող ստեղծել մեր սեփական ուղին և ակնկալել Աստծո խոստացած արդյունքները: Սխալ է ակնկալել Նրա օրհնությունները՝ չհետևելով հավերժական օրենքներին, որոնց վրա դրանք հիմնված են [տես Վարդապետություն և Ուխտեր 130.20–21], ինչը նման է նրան, որ կարող ենք դիպչել տաք վառարանին և «որոշել» չվառվել: …

… Մենք ազատ ենք մեր ընտրության մեջ, սակայն չենք կարող ընտրել հայտնությամբ տրված ճանապարհով չգնալու հետևանքները [տես 2 Նեփի 2.5, 16, 26–27]: Տերն ասել է․ «Նա, ով խախտում է օրենքը և չի հնազանդվում օրենքին, այլ ցանկանում է ինքն իր օրենքը դառնալ, … չի կարող սրբագործվել ոչ օրենքով, ոչ ողորմածությամբ, ոչ արդարադատությամբ, ոչ էլ դատաստանով» [Վարդապետություն և Ուխտեր 88.35]։ Մենք չենք կարող շեղվել Երկնային Հոր ուղուց և հետո մեղադրել Նրան վատ արդյունքների համար: (Դեյլ Գ. Ռենլանդ, «Ձեր աստվածային էությունը և հավերժական ճակատագիրը», Լիահոնա, մայիս 2022 թ․, 75)։

Օժանդակ ուսումնական վարժություններ

Առարկայական դաս

Որպես դասի «Մեր մահկանացու մարմինները» հատվածը սկսելու այլընտրանքային եղանակ, կարող եք օգնել ուսանողներին համառոտ կրկնել Հարության վարդապետությունը: Ցուցադրեք մի ձեռնոց և բացատրեք, որ այն խորհրդանշում է ֆիզիկական մարմինը: Հանձնարարեք որևէ ուսանողի հագնել ձեռնոցը և շարժել մատները: Կարող եք տալ հետևյալ հարցերը.

• Եթե ձեռնոցը խորհրդանշում է ֆիզիկական մարմինը, ապա ի՞նչ է խորհրդանշում ձեռքը:

• Ի՞նչ կլինի, եթե «մարմինը» բաժանվի «հոգուց»։

Աստծո օրենքները պաշտպանում են մեզ

Որպեսզի օգնեք ուսանողներին խորհել այն պաշտպանության մասին, որը մեզ տալիս են Աստծո օրենքները, կարող եք ցուցադրել հետևյալ տեսանյութերից մեկը.

• «Ապահով խարիսխ» (3։36)

  A Secure Anchor

  Just like rock climbing alone can be dangerous, living your life without the help of the Savior can have disastrous consequences.

• «Ինչո՞ւ է Աստված մեզ պատվիրաններ տալիս» (0:39)

  Why Does God Give us Commandments?

  Have you ever wondered why God gives us commandments? It can feel restricting, but is that the reality?

• «Օրհնված ու երջանիկ են նրանք, ովքեր պահում են Աստծո պատվիրանները» (5:41)

  Blessed and Happy Are Those Who Keep the Commandments of God

  Read Elder Keetch's full conference talk here: https://www.lds.org/general-conference/2015/10/blessed-and-happy-are-those-who-keep-the-commandments-of-god?lang=eng&_r=1

Սանդուղք

Երբ ուսանողները դասի վերջում գնահատեն իրենց պատկերած սանդուղքը, կարող եք կիսվել Մարգարե Ջոզեֆ Սմիթի (1805–44) հետևյալ խոսքերով և քննարկել դրանք:

Երբ բարձրանում եք աստիճանով, պետք է սկսեք ցածրից և բարձրանաք քայլ առ քայլ, մինչև որ հասնեք վերև. այդպես է նաև ավետարանի սկզբունքների հետ՝ պետք է սկսեք առաջինից և առաջ գնաք, մինչև որ սովորեք վեհացման բոլոր սկզբունքները: Սակայն դրանք սովորելու համար շատ ժամանակ կպահանջվի, նույնիսկ՝ վարագույրից այն կողմ եղած ժամանակը: Հնարավոր է, որ բոլոր բաները չըմբռնենք այս աշխարհում. մեծ աշխատանք է մեր փրկության և վեհացման մասին սովորելը՝ նույնիսկ գերեզմանից այն կողմ: (Եկեղեցու Նախագահների Ուսմունքները. Ջոզեֆ Սմիթ [2007], 268)։

Հարության կարգը

Կարող եք առաջարկել ուսանողներին կարդալ Վարդապետություն և Ուխտեր 88․96–102 հատվածները՝ փնտրելով, թե ինչ է տեղի ունենալու Հարության ժամանակ: Կարող եք ընթերցանությունը բաժանել մի քանի հարության մասին հատվածների (հատվածներ 96–98, 99, 100–101, 102): Այս հատվածներն ավելի մանրամասն բացատրելու համար կարող եք կիսվել հետևյալով.

Արդարները, որոնք ողջ կմնան Տիրոջ Երկրորդ Գալուստի ժամանակ, «կկենդանացվեն և կհափշտակվեն վեր, որ դիմավորեն նրան» (Վ&Ու 88.96): Նրանք, ովքեր կժառանգեն սելեստիալ արքայությունը, առաջինը հարություն կառնեն (տես Վ&Ու 88․96–98): Սելեստիալ արքայությունը ժառանգողների հարությունից հետո հարություն կառնեն նաև նրանք, ովքեր կժառանգեն թերեստրիալ արքայությունը (տես Վ&Ու 88.99, տես նաև Վ&Ու 76.71–79): Սրանք այն մարդիկ են, որոնք չընդունեցին Հիսուս Քրիստոսին իրենց կենդանության ժամանակ, այլ ընդունեցին Նրան հոգևոր աշխարհում (տես Վ&Ու 88.99): Հազարամյակից հետո տեղի կունենա «վերջին հարությունը» (Վ&Ու 76.85), կամ անարդարների հարությունը: Սրանք այն մարդիկ են, որոնք կժառանգեն թելեստիալ արքայությունը և, վերջապես, նզովքի որդիները, «որոնք անմաքուր էլ կմնան» (տես Վ&Ու 88.100–102): (Վարդապետություն և Ուխտեր․ Ուսանողի ձեռնարկ [2018], 488)