Lēsoni 102: Tokāteline mo e Ngaahi Fuakava 88

Tokāteline mo e Ngaahi Fuakava 88:51–95

“Unuʻunu Mai Kiate Au pea Te u ʻUnuʻunu Atu Kiate Kimoutolu”

ʻI he konga ko ʻeni ʻo e Tokāteline mo e Ngaahi Fuakava 88, naʻe fakahā ai ʻe Sīsū Kalaisi ʻa e founga ʻokú Ne puleʻi ʻaki ʻEne ngaahi fakatupú pea fakaafeʻi kitautolu ke tau ʻunuʻunu ofi ange kiate Ia. ʻE lava ke tokoni ʻa e lēsoni ko ʻení ke maʻu ʻe he kau akó ʻa e ngaahi tāpuaki ʻo e ʻunuʻunu ofi ki he Tamai Hēvaní mo Sīsū Kalaisí.

Ngaahi ʻEkitivitī Ako ʻOku Ala Fakahokó

Ngaahi Vā Fetuʻutaki Vāofí

Fakakaukau ke kamata e kalasí ʻaki hano faʻu ha fealēleaʻaki fekauʻaki mo hono fakatupulaki ha vā fetuʻutaki vāofí. Te ke lava ʻo fakaafeʻi ʻa e tokotaha ako takitaha ke ne hiki ʻi he palakipoé ʻa e hingoa ʻo ha taha ʻoku nau ongoʻi ofi ki ai. Kole ki ha kau ako ʻe niʻihi ke vahevahe ʻa e ʻuhinga ne nau fili ai e tokotaha ko iá.

ʻE lava ke ke ʻeke ha ngaahi fehuʻi vakaiʻi hangē ko ʻení:

• Ko e hā ʻokú ne ʻai ha vā fetuʻutaki ʻi he vahaʻa ʻo ha ongomeʻa ke vāofí? Ko e hā ʻokú ne fakatupu ʻa e vāmamaʻó?

• Ko e hā te ke lava ʻo fai ke toe faʻu ha vā fetuʻutaki vāofi mo ha taha kuó ke fakamamaʻo mei ai?

Naʻe fakamatalaʻi ʻe he Fakamoʻuí ʻi he Tokāteline mo e Ngaahi Fuakava 88, ʻa Hono mālohi ʻokú ne puleʻi ʻEne ngaahi fakatupú (vakai, veesi 41–45). Naʻá ne akoʻi ko e taimi ʻoku tau mamata ai ki he ngaahi fetuʻú mo e ngaahi palānite ʻi he langí, kuo tau “mamata ki he ʻOtuá ʻoku hāʻele ʻi hono ngeiá mo e māfimafí” (Tokāteline mo e Ngaahi Fuakava 88:47). Naʻe fai leva ʻe Sīsū Kalaisi ha talanoa fakatātā ke akoʻi fekauʻaki mo e vā fetuʻutaki ʻo e ʻOtuá mo ʻEne ngaahi fakatupú. ʻOkú ne akoʻi kuo fakatupu ʻe he ʻOtuá ha ngaahi māmani lahi ʻo nofoʻi ʻe Heʻene fānaú pea ʻokú Ne ʻaʻahi kiate kinautolu takitaha. Naʻe fekauʻi ʻe he ʻEikí Hono ngaahi kaungāmeʻá ke nau ui kiate Ia lolotonga ʻEne ofi kiate kinautolú (vakai, veesi 51–62).

“ʻUnuʻunu mai kiate au”

Lau ʻa e Tokāteline mo e Ngaahi Fuakava 88:63, ʻo kumi ʻa e ngaahi meʻa ʻoku fakaafeʻi kitautolu ʻe Sīsū Kalaisi ke tau fakahokó.

• Ko e hā ha ngaahi fakaafe ʻokú ke pehē ʻoku ʻuhingamālie fakataautaha?

• Ko e hā ha ngaahi tefitoʻi moʻoni te ke lava ʻo maʻu mei he ngaahi fakaafe ko ʻení?

  ʻE lava ke ʻiloʻi ʻe he kau akó ha ngaahi tefitoʻi moʻoni kehekehe—hangē ko ʻení, ʻi heʻeku ʻunu ʻo ofi kia Sīsū Kalaisí, te Ne ʻunuʻunu ofi mai kiate au. Mahalo te ke fie fakamahinoʻi ange ko e taimi ʻoku tau ʻunuʻunu ofi ai kia Sīsū Kalaisí, ʻoku tau ʻunuʻunu foki ai ke ofi ki he Tamai Hēvaní.

  Ke tokoni ke mahino ki he kau akó ʻa e tefitoʻi moʻoni ko ʻení, te mou lava ʻo aleaʻi ʻa e founga ʻoku fakatātaaʻi ai ia ʻi he talanoa fakatātaá. ʻE lava foki ke tokoni ha niʻihi ʻo e ngaahi fehuʻi ko ʻení:

• Te ke fakamatalaʻi fēfē ʻa e ʻuhinga ʻo e ʻunu ke ofi ange ki he Tamai Hēvaní mo Sīsū Kalaisí?

• ʻOkú ke pehē ko e hā ha ngaahi founga ʻokú Na ʻunuʻunu ofi mai ai kiate kitautolu?

• Ko e hā ha ngaahi ʻuhinga ʻe ala fiemaʻu ai ʻe ha taha ke ne ongoʻi ofi ange ki he Tamai Hēvaní mo Sīsū Kalaisi?

ʻOange ha faingamālie ki he kau akó ke nau fakakaukau ki he tuʻunga vāofi ʻoku nau ongoʻi ki he Tamai Hēvaní mo Sīsū Kalaisí. Te ke lava ʻo fakaafeʻi kinautolu ke tohi ʻa e “Tamai Hēvaní mo Sīsū Kalaisi” ʻi ha peesi ʻi heʻenau tohinoa akó. Hili iá pea kole ki he kau akó ke tā ha fakatātā ʻokú ne fakafofongaʻi kinautolu. ʻE lava ke fakakaukauloto ʻa e kau akó ki he ngaahi taimi kuo nau ongoʻi ofi ai ki he ʻOtuá mo Hono ʻAló pea mo e meʻa naʻe tokoni ke nau ongoʻi peheni aí. ʻE lava foki ke fakakaukau ʻa e kau akó ki he tuʻunga vāofi lolotonga ʻoku nau ongoʻi ki he Tamai Hēvaní mo Sīsū Kalaisí.

Fakamanatu ki he kau akó kapau ʻoku tau ongoʻi mamaʻo mei he ʻEikí, te tau lava ʻo ngāue ke liliu hotau tūkungá. Fakaafeʻi e kau akó ke nau fakakaukau ki he ngaahi fiemaʻu ʻoku nau maʻú pea mo e founga ʻe tāpuekina ai kinautolu kapau naʻa nau ofi ange ki he Tamai Hēvaní mo Sīsū Kalaisi. Poupouʻi e kau akó ke nau fekumi ki ha fakahā fakatāutaha ke ʻiloʻi ʻa e meʻa te nau lava ʻo fai ke nau ofi ange ai kiate Kinauá.

Ngaahi fakaafé mo e ngaahi tāpuakí

ʻE lava ke fakakakato ʻe he kau akó ʻa e saati ko ʻení ʻi he palakipoé pe ʻi heʻenau tohinoa akó. ʻO ka fiemaʻu, tokoni ke mahino ki he kau akó ha ngaahi kupuʻi lea kehekehe ʻi he Tokāteline mo e Ngaahi Fuakava 88:63–69. Hangē ko ʻení, te ke lava ʻo fakamahinoʻi ʻa e veesi 65 ʻaki hono fakamatalaʻi ange ʻoku ʻikai totonu ke tau maʻu ha ngaahi taumuʻa taʻetotonu pe feinga ke fakafiemālieʻi e ngaahi holi fakamāmaní ʻi he taimi ʻoku tau lotu aí. Te ke lava ʻo tokoni ke mahino ki he kau akó ʻoku ʻuhinga ʻa e foʻi lea ʻaonga ʻi he veesi 64–65 ki he taau pe mahuʻinga.

Lau ʻa e Tokāteline mo e Ngaahi Fuakava 88:63–69, pea fakakakato ʻa e saati ko ʻení:

Ngaahi Founga ke ʻUnuʻunu Ofi Ai ki he Tamai Hēvaní mo Sīsū Kalaisí	Ngaahi Tāpuaki mei he ʻUnuʻunu Ofi ki he Tamai Hēvaní mo Sīsū Kalaisí

Ko e founga ʻe taha ke tokoni ke mahino ki he kau akó ʻa e ngaahi veesi ko ʻení ko hono fakaafeʻi ha tokotaha ako ke ne pukepuke ha fakatātā ʻo e Fakamoʻuí ʻi muʻa ʻi he kalasí. Kole ki ha tokotaha ako ʻe taha ke tuʻu ʻi mui ʻi he loki akó.

ʻI hono vahevahe ʻe he kau akó ʻa e meʻa naʻa nau maʻú, ʻe lava ke manga mai ʻa e tokotaha ako ʻi mui ʻi he kalasí ke ofi ange ki he tokotaha ako ʻokú ne pukepuke ʻa e fakatātā ʻo e Fakamoʻuí. ʻE lava foki ke manga atu mo e tokotaha ako ʻokú ne pukepuke ʻa e fakatātā ʻo e Fakamoʻuí ke ofi ange mo ia.

Te ke lava ʻo fakaʻaongaʻi ha niʻihi ʻo e ngaahi fakamatala ʻi he “Ngaahi Maʻuʻanga Tokoni Kehé” ke tokoni ke mahino ki he kau akó ʻa e ngaahi founga ke ʻunuʻunu ofi ange ai ki he Tamai Hēvaní mo Sīsū Kalaisi.

ʻE lava ke tokoni ʻa e ngaahi fehuʻi ko ʻení ke mou aleaʻi ʻa e meʻa naʻe maʻu ʻe he kau akó ʻi he ngaahi veesi ne nau laú:

• ʻOkú ke pehē ʻe tokoni fēfē hoʻo fai e ngaahi ngāue ko ʻení ke ke ofi ange ai ki he Tamai Hēvaní mo Sīsū Kalaisi?

• ʻE takiekina fēfē nai ʻe he ngaahi tāpuaki ko ʻení ho vā fetuʻutaki mo Kinauá?

Ko ʻeku palaní

Fakakaukau ke huluʻi ʻa e foʻi vitiō “Founga ‘Eku #FanongoKiateIá: ʻEletā Teili G. Lenilani” (3:00). Kole ki he kau akó ke kumi ʻa e meʻa ʻoku akoʻi ʻe ʻEletā Lenilani fekauʻaki mo e ʻunu ke ofi ange kia Sīsū Kalaisí. Aleaʻi ʻa e meʻa naʻe ako ʻe he kau akó mei heʻene aʻusiá.

ʻI hono fakaafeʻi ʻo e kau akó ke tali ʻa e ongo fehuʻi ko ʻení ʻi heʻenau tohinoa akó, ʻe lava ke teuteu ai kinautolu ke vahevahe mo e kalasí. Te ke lava foki ʻo vahevahe ha aʻusia fakataautaha fekauʻaki mo e meʻa kuó ke fai ke ʻunuʻunu ofi ai kia Sīsū Kalaisí mo e founga kuó ke ongoʻi ai ʻEne ʻunuʻunu ofi atu kiate koé.

• ʻOkú ke feinga fēfē ke ʻunuʻunu ofi ange ki he Tamai Hēvaní mo Sīsū Kalaisí?

• Kuo tāpuekina fēfē nai koe pe ko ha taha ʻokú ke ʻiloʻi ʻi hoʻo feinga faivelenga ke ʻunuʻunu ofi ange kiate Kinauá?

Fakaafeʻi e kau akó ke nau fekumi ki he Laumālie Māʻoniʻoní ke tataki kinautolu ke ʻiloʻi ʻa e meʻa te nau lava ʻo fai ke ʻunuʻunu ofi ange ai ki he Tamai Hēvaní mo Sīsū Kalaisí. Fakamanatu ki he kau akó mahalo kuo nau ʻosi maʻu ha ngaahi ueʻi fakalaumālie lolotonga ʻa e lēsoní.

ʻE lava ke hiki ʻe he kau akó ʻa e founga te nau feinga ai ke ʻunuʻunu ofi ki he Tamai Hēvaní mo Sīsū Kalaisí, founga ʻe lava ke tokoniʻi ai kinautolu ʻi he ngaahi faingataʻa ʻoku nau fehangahangai mo iá, pea mo ha faʻahinga faingataʻa pē ʻe fiemaʻu ke nau ikunaʻi. ʻE lava ke tohi e kau akó ʻi heʻenau ngaahi fakatātaá pe hiki ha kiʻi fakamatala te nau ʻalu mo ia ki ʻapi.

Poupouʻi e kau akó ke vahevahe mo e Tamai Hēvaní ʻi heʻenau ngaahi lotú ʻa e meʻa ʻoku nau palani ke faí pea mo kolea ʻEne tokoní.

Ngaahi Maʻuʻanga Tokoni Kehé

Ko e hā ha ngaahi founga te tau lava ai ʻo ʻunuʻunu ofi kia Sīsū Kalaisí?

Naʻe vahevahe ʻe Palesiteni Henelī B. ʻAealingi ʻo e Kau Palesitenisī ʻUluakí ʻo pehē:

Ko e taimi lahi ne u faʻa aʻusia ʻa e fiefia ʻo e ofi ki he Fakamoʻuí mo ʻEne hāʻele mai ʻo ʻofi kiate aú, ʻi he fanga kiʻi ngāue faingofua ʻo e talangofua ki he ngaahi fekaú. (Henry B. Eyring, “Haʻu Kiate Au,” Liahona, Mē 2013, 22)

Naʻe pehē ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá:

Kole, pea te mou maʻu. Tukituki, pea ʻe toʻo ia kiate kimoutolu [vakai, Tokāteline mo e Ngaahi Fuakava 88:63]. Falala ki he ʻEikí [vakai, Lea Fakatātā 3:5].

ʻI heʻetau moʻui fakaʻahó, ko hotau ngafa mahuʻinga ia mo e faingamālie mohu tāpuekina ke fehangahangai mo e ʻOtuá.

ʻI heʻetau tuku ʻa e loto-hīkisiá pea hū ki Hono nofoʻa fakaʻeiʻeikí ʻaki ha loto-mafesifesi mo ha laumālie fakatomalá [vakai, 3 Nīfai 9:20; Tokāteline mo e Ngaahi Fuakava 20:37], te Ne ʻunuʻunu mai kiate kitautolu [vakai, Tokāteline mo e Ngaahi Fuakava 88:63].

ʻI heʻetau feinga ke muimui kia Sīsū Kalaisi mo ʻaʻeva ʻi he hala ʻo e tuʻunga fakaākongá, ʻi he ʻotu lea ki he ʻotu lea, ʻe hokosia ʻa e ʻaho te tau aʻusia ai e meʻaʻofa fakaofo ko ia ʻo hono maʻu ha kakato ʻo e fiefiá. (Dieter F. Uchtdorf, “ʻOku ‘Iate Kitautolu ʻa e ʻOtuá,” Liahona, Mē 2021, 11)

Naʻe akonaki ʻa Sisitā Nila F. Malioti, ko e Tokoni ʻua mālōlō ʻi he Kau Palesitenisī Lahi ʻo e Kau Finemuí ʻo pehē:

ʻOku fiemaʻu ia ke feilaulauʻi ʻetau ngaahi holi fakatāutahá kae lava ke fakaʻataʻatā ʻetau moʻuí ki he ngaahi palani taʻengata ʻa e ʻOtuá. ʻOku folofola ʻa e Fakamoʻuí ʻo fakafofongaʻi e Tamaí, ʻi Heʻene kōlenga mai, “ʻUnuʻunu mai kiate au pea te u ʻunuʻunu atu kiate kimoutolu” [Tokāteline mo e Ngaahi Fuakava 88:63]. ʻE lava ke ʻuhinga ʻa e ʻunuʻunu ki he Tamaí ke tau ako ki Heʻene moʻoní ʻi he ngaahi tohi folofolá, muimui ki he ngaahi akonaki fakaepalōfitá pea feinga ke tau fakahoko kakato ange Hono finangaló. (Neill F. Marriott, “Nofo Maʻu ʻi he ʻOtuá pea Fakaleleiʻi ʻa e Maumaú,” Liahona, Nōvema 2017, 11)

Lau ʻa e fakamatala ko ʻeni meia Palesiteni Lāsolo M. Nalesoní pe mamata ʻi he foʻivitiō “Ko Hono Tohoakiʻi mai e Mālohi ʻo Sīsū Kalaisí ki Heʻetau Moʻuí” mei he taimi 12:25 ki he 13:06, ʻo kumi e meʻa naʻá ne akoʻi fekauʻaki mo e ʻunuʻunu ofi ki he ʻOtuá.

Ko e taimi ʻokú ke kakapa hake ai ki he mālohi ʻo e ʻEikí, ʻi hoʻo moʻuí ʻaki e mālohi tatau ʻoku maʻu ʻe ha taha ʻoku melemo, ʻi he taimi ʻoku taufā mo feinga ai ke mānavá, te ke maʻu e mālohi meia Sīsū Kalaisi. Ko e taimi ʻoku ʻafioʻi moʻoni ai ʻe he Fakamoʻuí ʻokú ke fie maʻu moʻoni ke ala hake kiate Iá—ʻi he taimi te Ne lava ai ʻo ongoʻi ko e holi taupotu taha ho lotó ke ʻomi Hono mālohí ki hoʻo moʻuí—ʻe taki koe ʻe he Laumālie Māʻoniʻoní ke ke ʻiloʻi pau ʻa e meʻa ʻoku totonu ke ke faí [Tokāteline mo e Ngaahi Fuakava 88:63]. (Russell M. Nelson “Ko Hono Tohoakiʻi mai e Mālohi ʻo Sīsū Kalaisí ki Heʻetau Moʻuí,” Liahona, Mē 2017, 42)

Ki ha ngaahi fakakaukau lahi ange, vakai, Russell M. Nelson, “Ko Hono Tohoakiʻi mai e Mālohi ʻo Sīsū Kalaisí ki Heʻetau Moʻuí,” Liahona, Mē 2017, 39–42.

Fēfē kapau te u ongoʻi mamaʻo mei he ʻOtuá?

Naʻe akoʻi ʻe Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí ʻo pehē:

ʻOku mahinongofua pē [e] fakaafe [ʻa e ʻOtuá]:

“Tafoki … kiate” [Sioeli 2:12].

“Haʻu kiate au” [Mātiu 11:28].

“ʻUnuʻunu mai kiate au pea te u ʻunuʻunu atu kiate kimoutolu” [Tokāteline mo e Ngaahi Fuakava 88:63].

Ko e founga ʻeni ʻoku tau fakahā ai kiate Ia ʻetau loto ke fakahaofi kitautolú.

ʻOku fiemaʻu ai ha kiʻi tui. Kae ʻoua naʻa siva hoʻo ʻamanakí. Kapau he ʻikai ke ke lava ʻo maʻu ha tui he taimí ni, kamata ʻaki e ʻamanaki leleí.

Kapau ʻoku ʻikai ke ke lava ʻo pehē ʻokú ke ʻilo ʻoku ʻi ai ha ʻOtuá, te ke lava pē ʻo ʻamanaki ʻokú Ne ʻi ai. Te ke lava ʻo fakaʻamu ke ke tui. ʻOku feʻunga ia ke kamata ʻaki.

Hili ia, ngāueʻi ʻa e ʻamanakí, fetuʻutaki ki he Tamai Hēvaní. ʻE fakahoko mai ʻe he ʻOtuá ʻEne ʻofá kiate koe, pea ʻe kamata leva ʻEne ngāue ʻo e fakahaofí mo e liliú.

ʻI he fakalau atu e taimí, te ke fakatokangaʻi Hono toʻukupú ʻi hoʻo moʻuí. Te ke ongoʻi ʻEne ʻofá. Pea ʻe tupulekina ʻa e holi ke ʻaʻeva ʻi Heʻene māmá mo muimui ʻi Hono halá ʻi he foʻi laka kotoa ʻo e tuí te ke fakahoko. (Dieter F. Uchtdorf, “Te Ne Hili Koe ki Hono Umá ʻo Fua Koe ki ʻApi,” Liahona, Mē 2016, 103)

Ngaahi ʻEkitivitī Fakalahi ki he Akó

Tokāteline mo e Ngaahi Fuakava 88:51–62. Ko ha talanoa fakatātaá

Naʻe akoʻi ʻe he Fakamoʻuí ha talanoa fakatātā ke tokoni ke mahino kiate kitautolu ʻa e founga ʻoku fengāueʻaki ai ʻa e ʻOtuá mo e ngaahi puleʻangá, pe ngaahi māmani naʻá Ne fakatupú.

Ko e founga ʻe taha ke fakakau ai e kau akó mo tokoni ke mahino kiate kinautolu ʻa e talanoa fakatātaá ko hano fakaafeʻi hanau niʻihi ke nau fakatātaaʻi ʻa e veesi 51–60. ʻE lava ke lau ʻe ha tokotaha ako ʻe taha ʻa e ngaahi vēsí ko ha tokotaha fakamatala. ʻE lava ke hoko ha tokotaha ako ʻe taha ko e tangata ʻoku ʻaʻahi ki he kau ako kehé, ʻa ia ʻokú ne fakafofongaʻi ʻa e kau tamaioʻeikí. Hili iá, ʻe lava ke lau ʻe he kau akó ʻa e veesi 61–62, ʻo kumi e ʻuhinga ʻo e talanoa fakatātaá. ʻE lava ke takiekina ʻe he ongo fehuʻi ko ʻení ha fealēleaʻaki:

• Ko e hā ʻoku akoʻi atu ʻe he talanoa fakatātā ko ʻení fekauʻaki mo e ʻOtuá mo e ngaahi puleʻangá, pe ngaahi māmani, ʻokú Ne fakatupu?

• Ko e hā ha ngaahi founga ʻe lava ke tokoniʻi ai kitautolu ʻe he talanoa fakatātā ko ʻení ke mahino lelei ange Hono vā fetuʻutaki mo kitautolú?

Te ke lava ʻo fakaʻaongaʻi ʻa e foʻi vitiō “ʻOkú ke Mahuʻingá” (0:48) ke tokoni ke ʻilo ʻe he kau akó ʻi he kotoa ʻo e ngaahi fakatupu lahi ʻa e ʻOtuá, ʻokú Ne ʻafioʻi kinautolu.

Tokāteline mo e Ngaahi Fuakava 88:73. “Te u fakavavevaveʻi ʻa ʻeku ngāué ʻi hono taimí”

Ke tokoni ke mahino ki he kau akó ʻa e ʻuhinga ʻo e folofola ʻa e ʻEikí te Ne fakavaveʻi ʻEne ngāué, te ke lava ʻo tokoniʻi kinautolu ke nau fakaʻuhingaʻi ʻa e foʻi lea fakavaveʻí. Fakakaukau ke vahevahe ʻa e lea ko ʻení meia Palesiteni Lāsolo M. Nalesoní pea aleaʻi e ngaahi founga ʻoku fakavaveʻi ai ʻe he ʻEikí ʻa ʻEne ngāué. Te mou lava foki ʻo aleaʻi e ngaahi founga ʻoku tau kau ai ʻi he ngāué ni mo e ʻuhinga ʻoku hoko ai ko ha tāpuaki ke fakahoko iá.

Ko e Siasi ʻeni ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ko Hono kakai ʻo e fuakavá kitautolu. Naʻe folofola ʻa e ʻEikí te Ne fakavaveʻi ʻEne ngāué ʻi hono taimi, [vakai, Tokāteline mo e Ngaahi Fuakava 88:73], pea ʻokú Ne fakahoko ia ʻi ha founga vave fau. ʻOku tau monūʻia ke kau ʻi Heʻene ngāue māʻoniʻoní. (Russell M. Nelson, “Moʻoni Haohaoa, Tokāteline Haohaoa, mo e Fakahā Haohaoa,” Liahona, Nōvema 2021, 7)

Tokāteline mo e Ngaahi Fuakava 88:81. “ʻOku taau mo e tangata kotoa pē kuo fai ki ai ʻa e fakatokangá ke ne fakatokanga ki hono kaungāʻapí foki”

Fakakaukau ke aleaʻi e taumuʻa ʻo e ngaahi fakatokangá mo e ngaahi founga kehekehe ʻoku fakatokanga mai aí.

Lau ʻa e Tokāteline mo e Ngaahi Fuakava 88:81 pea mo e lea ko ʻeni ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá. Aleaʻi pe ko hai hotau kaungāʻapí mo e ngaahi founga ʻe lava ke tau fakatokanga ai kiate kinautolú.

Neongo ʻoku tautefito hono ongoʻi e fatongia ke fakatokangá ʻe he kau palōfitá, ka ko ha fatongia ia ke kau ai e taha kotoa foki. Ko hono moʻoní, “ʻoku taau mo e tangata kotoa pē kuo fai ki ai ʻa e fakatokangá ke ne fakatokanga ki hono kaungāʻapí” [Tokāteline mo e Ngaahi Fuakava 88:81]. Ko kitautolu kuo maʻu ha ʻilo ki he palani lahi ʻo e fiefiá—mo e ngaahi fekau fekauʻaki mo iá—ʻoku totonu ke tau ongoʻi ha holi ke vahevahe ʻa e ʻilo ko iá, he ʻoku ʻaonga kakato ia ʻi he moʻuí ni pea mo ʻitāniti. (D. Todd Christofferson, “Ko e Leʻo ʻo e Fakatokangá,” Liahona, Mē 2017, 108)

Tokāteline mo e Ngaahi Fuakava 88:88–95. Ngaahi fakaʻilonga ʻoku nau fakamoʻoni ki he hāʻele mai ʻa e Fakamoʻuí

ʻE lava ke tokoni ʻa e ngaahi veesi ko ʻení ki he kau akó ke nau fakatokangaʻi ʻa e ngaahi founga ʻoku folofola mai ai ʻa e ʻEikí kiate kitautolu ke teuteuʻi kitautolu ki Heʻene liuaki maí. ʻE lava ke lau ʻe he kau akó ʻa e ngaahi veesi ko ʻení pea hiki ha lisi ʻo e ngaahi meʻa ʻe hokó pe ngaahi meʻa fakamamahi ʻe tuku mai ʻe he ʻEikí kimuʻa ʻi Heʻene Hāʻele ʻAnga Ua Maí. Aleaʻi ʻa e founga ʻe lava ke folofola mai ai ʻa e Fakamoʻuí kiate kitautolu ʻi he ngaahi meʻa ko ʻení ke tokoni ke tau teuteu ki Heʻene liuaki maí. Tokoni ke mahino ki he kau akó ko e konga lahi ʻo e ngaahi faingataʻa ʻi he ngaahi ʻaho fakaʻosí ko ha fakaafe ia ke fakatomala mo teuteu ke feʻiloaki mo e ʻEikí. Mahalo te ke fie fakamanatu ange foki ki he kau akó ʻoku ʻikai fiemaʻu ke tau puputuʻu ʻi he ngaahi fakaʻilonga ko ʻení, he ʻoku nau fakamanatu mai ʻa e ngaahi talaʻofa ʻa e ʻEikí (vakai, Tokāteline mo e Ngaahi Fuakava 45:35).