“Lēsoni 101—Tokāteline mo e Ngaahi Fuakava 88:14–41: ‘Fāifeinga ke Talangofua ki he Fono Fakasilesitialé,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 88:14–41,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 101: Tokāteline mo e Ngaahi Fuakava 88
Tokāteline mo e Ngaahi Fuakava 88:14–41
Fāifeinga ke Talangofua ki he Fono Fakasilesitialé
Naʻe fakahā ʻe he ʻEikí ʻi he Tokāteline mo e Ngaahi Fuakava 88, ha ngaahi moʻoni fekauʻaki mo e Toetuʻú mo e ngaahi puleʻanga ʻo e nāunaú kau ai ʻa e nāunau fakasilesitialé. ʻE lava ke fakatahaʻi mo tāpuekina ʻe he ngaahi moʻoni ko ʻení ʻa e kāingalotu ʻo e Siasí ʻi heʻenau muimui faivelenga kia Sīsū Kalaisí. ʻE lava ke tokoni ʻa e lēsoni ko ʻení ki he kau akó ke fakatupulaki ʻenau loto-falala te nau lava ʻo maʻu ʻa e nāunau fakasilesitialé.
Ngaahi ʻEkitivitī Ako ʻOku Ala Fakahokó
Ko ha taumuʻa ʻo e nāunau fakasilesitialé
Fakaafeʻi ʻa e kau akó ke nau tā ha sitepu ʻi heʻenau tohinoa akó pea fakahingoa e konga ki ʻolunga ʻo e sitepú “Ko e Puleʻanga Fakasilesitialé.” Kole ki he kau akó ke tā kinautolu ʻi he feituʻu ʻoku nau sio ai kiate kinautolu ʻi he sitepú. Poupouʻi kinautolu ke lekooti ʻenau ngaahi tali ki he ngaahi fehuʻi ko ʻení:
-
ʻOkú ke ongoʻi nai ʻoku tokoniʻi koe ʻe hoʻo ngaahi fili lolotongá ke ke fakalakalaka ki he puleʻanga fakasilesitialé? Ko e hā hono ʻuhinga ki hoʻo tali ʻio pe ʻikaí?
-
Ko e hā hoʻo tuʻunga loto-falala te ke lava ʻo maʻu ʻa e nāunau fakasilesitialé ʻi he tokoni ʻa Sīsū Kalaisí?
Fakamanatu ki he kau akó koeʻuhí ko Sīsū Kalaisi ʻa hotau Fakamoʻuí, te tau lava ʻo falala kiate Ia ke tokoniʻi kitautolu ke tau liliu, fakatomala, mo ʻomi ha mālohi ʻi heʻetau feinga ke maʻu ʻa e nāunau fakasilesitialé.
ʻOku ʻomi ʻi he fakahā ʻa e ʻEikí ʻoku lekooti ʻi he Tokāteline mo e Ngaahi Fuakava 88 ha maama fakalangi ke tokoni ke mahino kiate kitautolu ʻa e ngaahi moʻoni taʻengatá. ʻOku tau ako ʻi he vahe 88, ha ngaahi fakaikiiki fekauʻaki mo e palani ʻa ʻetau Tamai Hēvaní, ngaahi moʻoni fekauʻaki mo Sīsū Kalaisí, mo e founga te tau lava ai ʻo foki ki Hona ʻaó.
Mahalo te ke fie vahevahe ʻa e ongo ʻokú ke maʻu fekauʻaki mo e fakaʻofoʻofa mo e ngeia ʻo e palani ʻa e Tamai Hēvaní. Poupouʻi e kau akó ʻi heʻenau ako he ʻaho ní ke fekumi ki ha ueʻi fakalaumālie ke ʻiloʻi e ngaahi founga te nau lava ai ʻo ngāue ʻi he tuí pea mo maʻu e tokoni ʻa e Fakamoʻuí ʻi heʻenau fakalakalaka ki he puleʻanga fakasilesitialé.
Ko hotau sino fakamatelié
Fakamatalaʻi ange ko ha konga mahuʻinga ʻo e palani ʻa e ʻOtuá ke tau hoko ʻo hangē ko Iá, fakalaumālie mo fakatuʻasino fakatouʻosi. ʻOku tau maʻu ha sino fakamatelie ʻi hono fāʻeleʻi mai kitautolú. ʻE mate ʻa e sinó ni ʻi ha ʻaho pea te ne toetuʻu.
Fakakaukau ke lekooti e ngaahi tali ʻa e kau akó ki he fehuʻi ko ʻeni ʻi he palakipoé:
-
Ko e hā ʻokú ke ‘osi ʻiloʻi fekauʻaki mo e Toetuʻú?
Kapau ʻe fiemaʻu, ʻe lava ke fakaʻaongaʻi ʻe he kau akó ʻa e Ngaahi Tefito ʻo e Ongoongoleleí, “Toetuʻu,” topics.ChurchofJesusChrist.org ke poupouʻi ʻenau ngaahi talí.
ʻE lava ke fakakakato ʻe he kau akó ʻa e ʻekitivitī ko ʻení pe mo hanau hoa. Te ke lava ʻo fakaʻaliʻali e ngaahi fehuʻí ke toutou vakai ki ai ʻa e kau akó, pea fatongia ʻaki ʻe he hoa takitaha hono tali ha taha ʻo e ngaahi fehuʻí. ʻE ala tokoni ki he kau akó ke nau ʻiloʻi ʻe lava ke ʻuhinga ʻa e foʻi lea fakaakeʻí ke moʻui pe toe moʻui.
Lau ʻa e Tokāteline mo e Ngaahi Fuakava 88:14–17, 27–31. Fakalaulauloto ki he ngaahi meʻá ni ʻi hoʻo laukongá:
-
Ko e hā ʻokú ke ako fekauʻaki mo e Toetuʻú?
-
Ko e hā ʻokú ke ako fekauʻaki mo e ngaahi nāunau ʻe tolú?
Fakaafeʻi e kau akó ke lipooti ʻa e meʻa ne nau akó. Fakafanongo fakalelei pea fai ha ngaahi fehuʻi vakaiʻi ke tokoni ki hono fakamāʻalaʻala ʻenau mahinó ʻo ka fiemaʻu. Kapau ʻoku toe ʻi ai ha ngaahi fehuʻi kehe ʻa e kau akó, te mou lava ʻo aleaʻi kinautolu ko ha kalasi.
Ko hono siviʻi ʻo e ʻilo ʻa e kau akó: Ki ha akoako lahi ange hení, vakai ki he ako “Mateuteu maʻu pē ke ke tali e ngaahi ueʻi fakalaumālie fekauʻaki mo e ngaahi fiemaʻu ʻa e kau akó” ʻoku maʻu ʻi he Fakatupulaki Ngaahi Taukei ʻa e Faiakó: Faiako ʻaki e Laumālié. Fakakaukau ke akoako ʻa e taukei “ʻEke ha fehuʻi ke siviʻi ʻa e akó kimuʻa pea hoko atu ʻa e lēsoní.”
ʻOku fakaiku ʻa e talangofua ki he ngaahi fono ʻa e ʻOtuá ki he lāngilangi
Fakakaukau ke fakaafeʻi e kau akó ke vahevahe ʻa e meʻa ʻoku nau fakakaukauloto ʻo hangē ko hano maʻu ha sino fakasilesitialé pe ko e ʻuhinga ʻoku nau fiemaʻu ai ke maʻu ha sino fakasilesitiale ʻi he Toetuʻú.
Kapau naʻe ngāue ʻa e kau akó kimuʻa mo hanau hoa, te nau lava ʻo ngāue mo ha hoa kehe ki he ʻekitivitī ako ko ʻení.
Lau ʻa e Tokāteline mo e Ngaahi Fuakava 88:21–24, 34–36, 38–39, ʻo kumi e founga ʻe lava ke tau toetuʻu ai mo ha sino fakasilesitialé. Fakakaukau ke fakaʻilongaʻi ʻa e ngaahi lea pe kupuʻi lea ʻoku makehe kiate koé.
-
ʻOkú ke pehē ko e hā ʻoku mahuʻinga ke mahino mei he ngaahi veesi ko ʻení?
-
Ko e hā ʻokú ne fakapapauʻi ʻa e nāunau te tau lava ʻo maʻu hili ʻa e Fakamaau Fakaʻosí? Ko e hā hono ʻuhingá?
ʻOange ha taimi ki he kau akó ke aleaʻi ʻa e meʻa kuo nau akó. ʻE lava ke fakahaaʻi ʻe he kau akó ha ngaahi moʻoni kehekehe, kau ai ha meʻa hangē ko ʻení kapau te tau talangofua ki he ngaahi fono fakasilesitialé, te tau maʻu ʻa e nāunau fakasilesitialé pe ʻi he Toetuʻú, te tau maʻu ha nāunau ʻo fakatatau mo e fono ne tau talangofua ki aí. Mahalo te ke fie tohi e ngaahi moʻoni ko ʻení ʻi he palakipoé.
Ke tokoni ke mahino mo ongoʻi ʻe he kau akó ʻa e mahuʻinga ʻo e ngaahi fono fakalangí, vahevahe ange ʻa e fakamatalá ni:
Naʻe akonaki ʻa ʻEletā D. Toti Kulisitofāsoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
Ko e moʻoni ko e fono ʻo e puleʻanga fakasilesitialé foki ko e fono mo e ngaahi fuakava ia ʻo e ongoongoleleí, ʻa ia ʻoku kau ki ai ʻetau toutou manatuʻi ʻa e Fakamoʻuí mo ʻetau fakapapau ke talangofua, feilaulau, fakatapuí pea mo e faitōnungá. (D. Todd Christofferson, “Haʻu ki Saione,” Liahona, Nōvema 2008, 38)
-
Ko e hā ʻokú ke ako fekauʻaki mo e ʻofa, fakamaau totonu, mo e ʻaloʻofa ʻa e Tamai Hēvaní?
-
Ko e hā hoʻo ngaahi ongo fekauʻaki mo e founga ʻo ʻEne ngāue fakafoʻituitui mo ʻEne fānaú?
Tokoni ʻi he halá
Fakaafeʻi e kau akó ke nau fakalaulauloto ki he founga te nau fakahoko ai ha tali ki ha kaungāmeʻa ʻoku loto-foʻi mo ongoʻi ʻoku ʻikai ke ne lelei feʻunga ke maʻu e nāunau fakasilesitialé. Te ke lava ʻo fakaafeʻi ʻa e kau akó ke lau e ngaahi veesi ko ʻení, pea hiki ha tali nounou ki he meʻa naʻe hohaʻa ki ai honau kaungāmeʻá.
Lau ʻa e 3 Nīfai 27:19–20, ʻo kumi ʻa e founga kuo fakafaingamālieʻi ai ʻe he Tamai Hēvaní ʻEne fānaú ke nau maʻu ʻa e nāunau fakasilesitialé. Mahalo te ke fie fakafekauʻaki e ngaahi veesi ko ʻení mo e Tokāteline mo e Ngaahi Fuakava 88:21, 34.
Fakakaukau ke fakaafeʻi e kau akó ke nau fakaʻilongaʻi ʻa e ongo foʻi lea ka ko ʻi he 3 Nīfai 27:19. Fakamahinoʻi ange ʻe lava ke ʻuhinga ʻa e ongo foʻi lea ko ʻení ki he “tuku kehe” pe “kae ʻoua.” Mahalo te ke fehuʻi ki he kau akó pe ʻoku tokoni fēfē ʻeni ke mahino kiate kinautolu ʻa e folofola ʻa Sīsū ki he kau Nīfaí.
Ke tokoni ke ʻiloʻi ʻe he kau akó ʻa e ʻamanaki lelei mo e liliu ʻoku lava ke nau maʻu ʻo fakafou ʻia Sīsū Kalaisí, te ke lava ʻo vahevahe ʻa e fakamatala ko ʻení:
Naʻe akonaki ʻa ʻEletā D. Toti Kulisitofāsoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
Ko e Meʻaʻofa Fakalangi ʻo e Fakatomalá
Ko e fakatomalá pē ʻe lava ai ke tau maʻu ʻa e fakalelei mo e ʻaloʻofa ʻa Sīsū Kalaisí.
Pea hangē ko ʻetau lotua ke maʻu ʻa e ʻaloʻofá, mahalo ʻoku totonu ke tau lotu ke maʻu ha taimi mo ha faingamālie ke tau ngāue mo feinga ai ke ikuna. Ko e moʻoni ʻoku fiefia ʻa e ʻEikí ʻi he tokotaha ʻoku holi ke haʻu ki he fakamāú ʻokú ne moʻui taau, ʻokú ne ngāue faivelenga he ʻaho kotoa pē ke fetongi e vaivaí ʻaki ʻa e mālohí. Mahalo naʻa fiemaʻu ʻe he fakatomala mo e liliu moʻoní ha toutou feinga pe ngāue ki ai he ʻoku ʻi ai ʻa e meʻa ʻoku maʻa mo māʻoniʻoni ʻi he faʻahinga feinga pehení. ʻOku hoko fakanatula pē ʻa e fakamolemole fakalangi ʻa e ʻOtuá mo e fakamoʻuí ki ha taha pehē, he ko e moʻoni, “ʻoku ʻofa ʻa e angamaʻá ki he angamaʻá; ʻoku pīkitai ʻa e māmá ki he māmá; [pea] ʻoku ʻofa mamahi ʻa e ʻaloʻofá ki he ʻaloʻofá ʻo ʻekeʻi ʻene meʻa ʻaʻaná” (T&F 88:40).
ʻE lava ʻi he fakatomalá ke tau fakalakalaka māmālie ai ʻi he meʻa ʻoku tau malavá ke moʻui ʻaki ʻa e fono fakasilesitialé, he ʻoku tau ʻiloʻi “ko iaʻoku ʻikai te ne lava ʻo tauhi ʻa e fono ʻo ha puleʻanga fakasilesitialé ʻe ʻikai te ne lava ʻo kātakiʻi ha nāunau fakasilesitiale” (T&F 88:22). (D. Todd Christofferson, “Ko e Meʻaʻofa Fakalangi ʻo e Fakatomalá,” Liahona, Nōvema 2011, 39)
-
ʻE takiekina fēfē ʻe he mahino ki he Fakalelei ʻa e Fakamoʻuí hoʻo tui ki hono maʻu ʻo e nāunau fakasilesitialé?
-
Mei he meʻa kuó ke ako ʻi he ʻaho ní, ko e hā te ke lava ʻo lea ʻaki ki ha taha ʻoku manavasiʻi he ʻikai ke ne lava ʻo maʻu ʻa e nāunau fakasilesitialé?
Fakaafeʻi e kau akó ke toe vakaiʻi e sitepu ne nau tā ʻi he kamataʻanga ʻo e kalasí. Poupouʻi kinautolu ke nau tohi ʻi he sitepú pe takatakai ʻi he sitepú ʻa e meʻa kuo nau ako ʻe lava ʻo tokoni kiate kinautolu ke nau ʻunu ke ofi ange ki he puleʻanga fakasilesitialé. ʻE lava ke lekooti ʻe he kau akó ʻenau ngaahi fakakaukau pe ngaahi ongo fekauʻaki mo e Tamai Hēvaní mo Sīsuú. ʻE lava foki ke nau fakakau ai e founga kuo fakamālohia ʻenau loto-vilitakí mo e ʻamanaki lelei ke maʻu ʻa e nāunau fakasilesitialé pe ko e founga ʻe lava ke tākiekina ai ʻe he ngaahi moʻoni ne nau akó ʻenau ngaahi filí ʻi he taimí ni pea ʻi he kahaʻú.
Ka toe lahi ʻa e taimí, ʻe lava ke ke fakaafeʻi ha toko taha pe toko ua ʻi he kau akó ke vahevahe ʻena ngaahi fakakaukaú mo e kalasí.