Toetuʻú

Ko e Toetuʻú ko hono fakatahaʻi ia ʻo e laumālié mo e sinó ʻi ha tuʻunga taʻe-faʻa-mate, ʻo ʻikai toe moʻulaloa ki he mahakí pe maté. Koeʻuhi ko e Hinga ʻa ʻĀtama mo ʻIví, ʻoku tau moʻulaloa ai ki he mate fakatuʻasinó, ʻa ia ko e mavahe ʻa e laumālié mei he sinó. ʻE toetuʻu pea fakahaofi ʻa e kakai kotoa pē mei he mate fakatuʻasinó makatuʻunga ʻia Sīsū Kalaisi mo ʻEne Fakaleleí.

Vakai Fakalūkufuá

Koeʻuhi ko e Hinga ʻa ʻĀtama mo ʻIví, ʻoku tau moʻulaloa ai ki he mate fakatuʻasinó, ʻa ia ko e mavahe ʻa e laumālié mei he sinó. Koeʻuhi ko e Fakalelei ʻa Sīsū Kalaisí, ʻe toetuʻu ʻa e kakai kotoa pē mo fakahaofi mei he mate fakatuʻasinó (vakai, 1 Kolinitō 15:22). Ko e Toetuʻú ko hono fakatahaʻi ia ʻo e laumālié mo e sinó ʻi ha tuʻunga taʻe-faʻa-mate, ʻo ʻikai toe moʻulaloa ki he mahakí pe maté.

Ko e Fakamoʻuí ʻa e fuofua tokotaha ʻi he māmaní ke toetuʻú. ʻOku ʻi he Fuakava Foʻoú ha ngaahi fakamatala ʻo fakamoʻoniʻi ai naʻá Ne toe tuʻu mei he fonualotó (vakai, Mātiu 28:1–8; Maʻake 16:1–14; Luke 24:1–48; Sione 20:1–29; 1 Kolinitō 15:1–8; 2 Pita 1:16–17).

ʻI he taimi naʻe hā mai ai ʻa e ʻEiki kuo toetuʻú ki Heʻene Kau ʻAposetoló, naʻá Ne tokoni ke mahino kiate kinautolu ʻokú Ne maʻu ha sino ʻo e kakano mo e hui. Naʻá Ne folofola ʻo pehē, “Vakai ki hoku nimá mo hoku vaʻé, ko au pē ia: ala mai kiate au, pea mou vakai; he ʻikai kakano mo hui ha laumālie, ʻo hangē ko ia ʻoku mou ʻiló ni ʻiate aú” (Luke 24:39). Naʻá Ne hā foki ki he kau Nīfaí hili ʻEne Toetuʻú (vakai, 3 Nīfai 11:10–17).

ʻI he taimi ʻo e toetuʻú, ʻe “fakamāuʻi ʻa [kitautolu] ʻo fakatatau ki [heʻetau] ngaahi ngāué. … ʻE taki mai ʻa kitautolu ke tutuʻu ʻi he ʻao ʻo e ʻOtuá, ʻo ʻiloʻi ʻo hangē foki ʻoku tau ʻiloʻi ʻi he taimi ní, pea manatuʻi lelei ʻa ʻetau angahala kotoa pē” (ʻAlamā 11:41, 43). ʻE makatuʻunga ʻa e nāunau taʻengata te tau maʻú ʻi heʻetau faivelengá. Neongo ʻe toetuʻu ʻa e kakai kotoa pē, ka ko kinautolu pē kuo nau haʻu kia Kalaisi pea maʻu ʻa e kakato ʻo ʻEne ongoongoleleí, te nau maʻu ʻa e hakeakiʻí ʻi he puleʻanga fakasilesitialé.

ʻE lava ha mahino pea mo ha fakamoʻoni ki he toetuʻú ke ne ʻoatu ha ʻamanaki pea mo ha ʻilo ʻi hoʻo fekuki mo e ngaahi faingataʻá, ngaahi ʻahiʻahí, pea mo e ngaahi lavameʻa ʻo e moʻuí. Te tau lava ʻo maʻu ha nonga ʻi heʻetau ʻilo pau ʻoku moʻui ʻa e Fakamoʻuí pea ʻi Heʻene Fakaleleí ʻokú Ne “motuhi ʻa e ngaahi haʻi ʻo e maté, koeʻuhi ke ʻoua naʻa ikuna ʻa e faʻitoká, pea ke folo hifo ʻa e mamahi ʻo e maté ʻi he ngaahi ʻamanaki ki he nāunaú” (ʻAlamā 22:14).

Lekooti e Ngaahi Ongo ʻOkú ke Maʻú