“Lēsoni 100—Tokāteline mo e Ngaahi Fuakava 88:1–13, 41–50: Ko e Maama … ʻo Kalaisí,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 88:1–13, 41–50,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 100: Tokāteline mo e Ngaahi Fuakava 88
Tokāteline mo e Ngaahi Fuakava 88:1–13, 41–50
Ko e Maama … ʻo Kalaisí
Naʻe lotu ʻa Siosefa Sāmita mo ha kau taulaʻeiki lahi tokolahi lolotonga ʻenau ʻi Ketilani, ʻOhaioó, ki he Tamai Hēvaní ki ha fakahā fekauʻaki mo hono langa ʻo Saioné. Naʻe akoʻi ange ʻe he fakahaá ha ngaahi moʻoni fekauʻaki mo e mālohi mo e mafatukituki ʻo e Maama ʻo Sīsū Kalaisí. ʻOku fakataumuʻa ʻa e lēsoni ko ʻení ke tokoni ki he kau akó ke nau ongoʻi houngaʻia lahi ange ʻi he ivi tākiekina ʻo e Maama ʻo Kalaisí ʻi heʻenau moʻuí.
Ngaahi ʻEkitivitī Ako ʻOku Ala Fakahokó
Ngaahi meʻa ʻoku tau ongoʻí
Fakakaukau ke ʻeke ʻa e fehuʻi ko ʻení ki he kau akó pea hiki ʻenau ngaahi talí. Te ke lava foki ʻo ʻai ke nau aleaʻi ʻa e fehuʻí ʻi ha fanga kiʻi kulupu iiki pea hiki ʻenau talí ʻi he palakipoé.
-
Ko e hā ha ngaahi sīpinga ʻo e ngaahi meʻa te ke lava ʻo ongoʻi kae ʻikai mamata ki aí?
ʻE lava ke hiki ʻe he kau akó ha ngaahi meʻa hangē ko e ʻea velá, matangí, ʻofá, houngaʻiá, tuí, mo e ngaahi meʻa peheé.
-
Ko e hā ka mahuʻinga ai ke ʻiloʻi ʻoku ʻi ai ha ngaahi meʻa te ke lava ʻo ongoʻi ka ʻoku ʻikai ke ke mamata ki ai?
Te ke lava ʻo fakaafeʻi e kau akó ke nau fekumi ki ha ueʻi fakalaumālie ke ʻiloʻi ai ʻa e ivi tākiekina ʻo e ʻOtuá ʻi heʻenau moʻuí.
Ngaahi Fatongia ʻo e Maama ʻo Kalaisí
Naʻe fakataha ʻa Siosefa Sāmita mo ha kaumātuʻa ʻe toko hiva ʻo e Siasí ʻi he konga ki ʻolunga ʻo e Falekoloa Niueli K. Uitenií ʻi Ketilani, ʻOhaiō. Naʻa nau fiemaʻu ha mahino lahi ange fekauʻaki mo honau ngaahi fatongia ke langa ʻa Saioné. Naʻe fakaafeʻi ʻe Siosefa ʻa e tokotaha takitaha ke lotu ke nau ʻilo e finangalo ʻo e ʻEikí. Hili e lotú, naʻe maʻu ʻe he Palōfitá ʻa e meʻa ʻoku hoko ʻi he taimí ni ko e Tokāteline mo e Ngaahi Fuakava 88.
ʻI hono kamata ʻe he kau akó ʻa e laukonga ko ʻení, fakapapauʻi ʻoku mahino kiate kinautolu ʻoku ʻuhinga ʻa e veesi 6 kia Sīsū Kalaisi.
Lau ʻa e Tokāteline mo e Ngaahi Fuakava 88:6–13, ʻo kumi e meʻa ʻe lava ke akoʻi atu ʻe he ngaahi veesi ko ʻení fekauʻaki mo Sīsū Kalaisi mo ʻEne māmá.
-
Ko e hā ʻokú ke ako fekauʻaki mo e Maama ʻo Kalaisí mei he ngaahi veesi ko ʻení?
ʻI he ngaahi ʻilo kehekehe ʻe ala vahevahe ʻe he kau akó, tokoni ke nau ʻiloʻi ʻa e foʻi moʻoni, ʻoku ʻomi ʻe he Maama ʻo Kalaisí ha maama mo ha moʻui ki Heʻene ngaahi fakatupu kotoa pē.
Tokoni ke ʻilo ʻe he kau akó ʻa e founga ʻe lava ke ne tokoniʻi ai ʻenau moʻui fakaʻahó ke mahino kiate kinautolu ʻa e ivi tākiekina ʻo e ʻOtuá ʻo fakafou ʻi he Maama ʻo Kalaisí. Ko e fehuʻi ko ʻení ko ha founga ia ʻe taha ke fakahoko ai ʻeni.
-
Ko e hā ha ngaahi tūkunga ʻoku fehangahangai mo e toʻu tupú ʻa ia ʻe ʻaonga ai kiate kinautolu ke nau ʻiloʻi ʻa e ivi tākiekina ʻo e ʻOtuá? Ko e hā hono ʻuhingá?
ʻOku fakataumuʻa ʻa e ʻekitivitī ko ʻení ke tokoni ki he kau akó ke nau fakahoungaʻi lelei ange ʻa e Maama ʻo Kalaisí pea mo e founga te ne lava ai ʻo tākiekina ʻenau moʻuí.
Te ke lava ʻo fokotuʻu ha feituʻu ʻe fā ʻi he lokí ʻe lava ke ʻaʻahi mo fakakakato ʻe he tokotaha ako takitaha. ʻE lava ke fakaafeʻi ʻa e kau akó ke ʻave ʻenau tohinoá, ko ha meʻa ke tohi ʻaki, pea mo ʻenau folofolá ki he feituʻu takitaha. Ka ʻikai, te ke lava ʻo fakakulupu tautau toko fā ʻa e kau akó pea vahe ki he kulupu takitaha ha konga ʻo e laʻipepa tufá ke nau fakakakato. Hili iá, ʻe lava ke vahevahe ʻe he kau akó ʻa e meʻa ne nau akó mo e kau mēmipa ʻenau kulupú.
Ko e Maama … ʻo Kalaisí
Fakaʻuhingaʻi ʻa e Maama ʻo Kalaisí
Lau ʻa e Tokāteline mo e Ngaahi Fuakava 88:12–13, ʻo kumi ha ngaahi fakamatala ki he Maama ʻo Kalaisí.
Lau ʻa e fakaʻuhinga ko ʻeni ʻo e Maama ʻo Kalaisí:
“[Ko e Maama ʻo Kalaisí] ko e ivi, mālohi, pe ko e tataki ia ʻoku haʻu mei he ʻOtuá ʻo fou mai ʻia Kalaisi pea ʻokú ne foaki moʻui mo e maama ki he ngaahi meʻa kotoa pē. Ko e fono ia ʻoku puleʻi ʻaki ʻa e ngaahi meʻa kotoa pē ʻi he langí mo e māmaní (T&F 88:6–13). ʻOkú ne toe tokoniʻi foki ʻa e kakaí ke mahino kiate kinautolu ʻa e ngaahi moʻoni ʻo e ongoongoleleí pea tokoni ki hono fokotuʻu ʻa kinautolu ʻi he hala ʻo e ongoongoleleí ʻa ia ʻoku fakatau atu ki he fakamoʻuí.” (Fakahinohino ki he Ngaahi Folofolá, “Maama ʻo Kalaisí,” scriptures.ChurchofJesusChrist.org)
-
Te ke fakamatalaʻi fakanounou fēfē hoʻo mahino fekauʻaki mo e Maama ʻo Kalaisí?
-
ʻOkú ke pehē ʻoku tākiekina fakatāutaha fēfē koe ʻe he Maama ʻo Kalaisí?
Ko e Maama ʻo Kalaisí hotau konisēnisí
Ko hano fakahaaʻi ʻe taha ʻo e Maama ʻo Kalaisí ʻa hotau konisēnisí. Hiki ha fakaʻuhinga ʻe mahino ki ha kiʻi tamasiʻi Palaimeli ʻo hoʻo mahino fekauʻaki mo e konisēnisí.
Lau ʻa e fakaʻuhinga ko ʻení pea vakai ki he meʻa te ke ala tānaki atu ki hoʻo fakaʻuhingá:
“[Ko e konisēnisí] ko e ongoʻi ia ʻi loto ʻa e meʻa ʻoku totonú mo e meʻa ʻoku halá, pea ʻoku haʻu ia mei he Maama ʻo Kalaisí ʻa ia ʻoku ʻi he tangata kotoa pē (Molonai 7:16). ʻOku fanauʻi kitautolu mo ha ivi fakanatula ke fakafaikehekeheʻi ʻa e totonú mei he halá koeʻuhí ko e Maama ʻo Kalaisi ʻa ia ʻoku foaki ki he tokotaha kotoa peé (T&F 84:46). ʻOku ui ʻeni ʻa e ivi ko ʻení ko e konisēnisí. ʻOku hanga ʻe heʻetau maʻu iá ʻo ngaohi kitautolu ke tau hoko ko e kakai mateakiʻi fatongia. ʻOku hangē pē ʻa hotau konisēnisí ko e ngaahi ivi pe ngaahi poto kehé, ʻoku tāmateʻi ia tuʻunga ʻi he fai angahalá pe ko hono fakaʻaongaʻi halá.” (Fakahinohino ki he Ngaahi Folofolá, “Konisēnisí,” scriptures.ChurchofJesusChrist.org)
Lau ʻa e Tokāteline mo e Ngaahi Fuakava 84:45–46 mo e Molonai 7:16, ʻo kumi e ngaahi foʻi lea pe kupuʻi lea ʻoku nau fakamatalaʻi e founga ʻoku hoko ai ʻa e Maama ʻa Kalaisí ko hotau konisēnisí. Fakakaukau ke faʻu ha potufolofola fakafekauʻaki ki he ongo vēsí.
-
Ko e hā ha kupuʻi lea mei he ngaahi veesi ko ʻení ʻoku tokoni ke mahino kiate koe ʻa e konisēnisí?
-
ʻOkú ke pehē ko e hā naʻe foaki atu ai ʻe he Tamai Hēvaní mo Sīsū Kalaisi ha konisēnisi kiate koé?
ʻE tākiekina fēfē ʻe hoʻo fakafanongo pe taʻetokanga ki ho konisēnisí ʻa e ngaahi fili ʻokú ke faí pea mo ho ikuʻanga taʻengatá?
ʻOku ʻi he tokotaha kotoa pē ʻa e Maama ʻo Kalaisí
Fakakaukauloto ʻoku kole atu ke ke vahevahe ha kiʻi fakakaukau nounou ʻi he Lautohi Faka-Sāpaté fekauʻaki mo e founga ke ke vakai mo fakafeangai lelei ange ai ki he kakai kotoa pē, tautautefito kiate kinautolu ʻoku kehe meiate koé. Te ke lava ʻo fakaʻaongaʻi e ngaahi maʻuʻanga tokoni ko ʻení mo ha ngaahi maʻuʻanga tokoni kehe pē ʻokú ke pehē ʻoku ʻaonga.
Naʻe akonaki ʻa Palesiteni Poiti K. Peeka (1924–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
Ko e lahi ange ‘etau ‘ilo ki he Maama ‘o Kalaisí, ko e lahi ange ia ‘o e mahino kiate kitautolu ‘a e moʻuí pea lahi ange ‘etau maʻu ha ‘ofa lahi ki he faʻahinga kotoa ‘o e tangatá. Te tau hoko ko ha kau faiako mo ha kau faifekau mo ha mātuʻa lelei ange, pea mo ha kau tangata, fafine mo e fānau lelei ange. Te tau fakaʻapaʻapaʻi lahi ange hotau kāinga ʻi he Siasí pea mo kinautolu ʻoku ʻikai tuí. …
ʻOku fakamāmani lahi e Maama ʻo Kalaisí ʻo hangē pē ko e ulo ʻo e laʻaá. Ko e fē pē ha feituʻu ʻoku ʻi ai ha tangata moʻui, ʻoku ʻi ai e Laumālie ʻo Kalaisí. ʻOku maʻu ia ʻe he kakai moʻui kotoa pē. …
Kapau ʻe mahino kiate kitautolu ʻa e tuʻunga moʻoni ʻo e Maama ʻo Kalaisí ʻi he tokotaha kotoa pē ʻoku tau sio ki aí … pea ʻi loto ʻiate kitautolú, … te tau maʻu ha loto-toʻa mo ha ueʻi fakalaumālie ʻo mahulu hake ʻi he meʻa kuo tau ʻiló. Pea kuo pau pē ke pehē! Pea ʻe hoko pē ʻo pehē! Ko e ngaahi meʻá ni kotoa ko ha tafaʻaki ia ʻo e moʻoni ʻo e ongoongoleleí ʻoku fuʻu tokosiʻi ha niʻihi ʻoku mahino ki ai. (Boyd K. Packer, “The Light of Christ,” Ensign, Apr. 2005, 8, 13–14)
Hiki ha foʻi sētesi ʻe ua ki he tolu fekauʻaki mo e founga ʻe lava ke tākiekina ai ʻe he mahino ʻo e Maama ʻo Kalaisí ʻa e anga hoʻo vakai ki he niʻihi kehé.
Ko e Maama ʻo Kalaisí ʻi he ʻunivēsí
Kuo ueʻi nai koe ʻe he fakaʻofoʻofa pe fakaʻeiʻeiki ʻo e māmani ko ʻení mo e ʻunivēsí? Ko e hā ha ngaahi ongo ʻoku ʻomi ʻe he ngaahi meʻá ni kiate koe?
Lau ʻa e Tokāteline mo e Ngaahi Fuakava 88:7–10, 45–47 pea kumi ʻa e meʻa ʻokú ke ako fekauʻaki mo e Maama ʻo Kalaisí, māmaní, mo e ʻunivēsí.
-
Ko e hā te tau lava ʻo ako fekauʻaki mo e ʻEikí mei Heʻene ngaahi fakatupú?
-
ʻE tokoni fēfē nai ʻetau mamata ki he ivi tākiekina ʻo e ʻOtuá ʻi he ʻunivēsí ke tau fakatokangaʻi Hono ivi tākiekiná ʻi heʻetau moʻuí?
Hili hono maʻu ʻe he kau akó ha taimi feʻunga ke ngāueʻi ai e ngaahi feituʻú, fakakaukau ke ʻoange ha faingamālie ke nau vahevahe ʻa e meʻa ne nau ako mo ongoʻí. ʻE ala tokoni ʻa e ngaahi fehuʻi ko ʻení.
-
Ko e hā naʻá ke ako fekauʻaki mo e Maama ʻo Kalaisí naʻe tokoni atu?
-
Kuó ke vakai fēfē ki he takiekina ʻo e Maama ʻo Kalaisí ʻi hoʻo moʻuí?
-
ʻOkú ke pehē ʻe lava fēfē ʻe hono ʻiloʻi e Maama ʻo Kalaisí ʻi hoʻo moʻuí ʻo tākiekina ho vā fetuʻutaki mo e Tamai Hēvaní mo Sīsū Kalaisí?
Te ke lava ʻo vahevahe ʻa e founga kuo tākiekina ai koe ʻe ha mahino lelei ange ki he Maama ʻo Kalaisí.