Leksiyon 104: Doktrina ug mga Pakigsaad 89–92

Doktrina ug mga Pakigsaad 89:1–17

Usa ka Pulong sa Kaalam Gikan sa Ginoo

Sama sa naandan niadtong 1833, daghang miyembro sa Simbahan ang manabako, moinom og makahubog nga ilimnon, tsaa, ug kape. Ingon og tubag sa mga pag-ampo ni Joseph Smith kabahin sa maong butang, maluluy-ong gipadayag sa Ginoo ang Pulong sa Kaalam. Kini nga leksiyon makatabang sa mga estudyante nga mahimong mapasalamaton sa mahigugmaong instruksiyon sa Ginoo nga nailhan nga Pulong sa Kaalam.

Mga Posibleng Kalihokan sa Pagkat-on

Timan-i: Ang gisaad nga espirituwal nga mga panalangin sa Doktrina ug mga Pakigsaad 89:18–21 sa pagtuman sa Pulong sa Kaalam mao ang tutokan sa sunod nga leksiyon. Mas maayo tingaling itudlo kining duha ka leksiyon aron matabangan ang mga estudyante nga makita ang mga panalangin sa Pulong sa Kaalam nga mas espirituhanon ang kinaiyahan kay sa pisikal nga panalangin.

Mga taktika ni Satanas

Ikonsiderar ang pagdapit sa mga estudyante aron hisgotan ang mga paon nga gigamit ni Satanas aron mabitik ang mga anak sa Dios. Pwede kang magdala o magpakitag larawan sa mga paon sa pagpangisda. Pwede usab nimong pangutan-on ang mga estudyante sa kasinatian sa pagpangisda aron ihulagway ang labing maayo nga mga paon nga gamiton diha sa inyong dapit. Lain usab nga opsiyon mao ang pagpasalida sa unang bahin sa bidyo nga “You Will Be Freed,” nga anaa sa ChurchofJesusChrist.org, gikan sa time code nga 0:00 hangtod 1:29.

• Sa unsang paagi ang mga paon sa pagpangisda makompara sa mga taktika ni Satanas?

• Unsang tambag ang gihatag sa Manluluwas aron mailhan ug malikayan ang mga paon ni Satanas?

  Daghang saktong tubag sa ikaduhang pangutana, apil ang pag-ampo (tan-awa sa Doktrina ug mga Pakigsaad 10:5), kada adlaw nga pagtuon sa kasulatan (tan-awa sa Helaman 3:29–30), pagpangita sa pagpadayag sa espiritu (tan-awa sa Doktrina ug mga Pakigsaad 8:2–4), ug pagsunod sa tambag gikan sa mga propeta ug mga lider sa Simbahan (tan-awa sa Doktrina ug mga Pakigsaad 21:5).

  Aron matabangan ang mga estudyante nga masabtan kon nganong makasalig kita sa tambag sa Manluluwas, pwede nimong ipabasa nila ang 2 Nephi 26:24 ug Jacob 4:10 ug ipakigbahin ang ilang nakat-onan bahin Kaniya.

  Pwede usab nimong hangyoon ang mga estudyante sa pagpamalandong o ipakigbahin sa klase ang ilang mga tubag sa mosunod nga pangutana:

• Sa unsang paagi ang piho nga mga tambag o pasidaan gikan sa Manluluwas ug sa Iyang awtorisadong mga sulugoon nagpanalangin ug nagprotektar sa imong kinabuhi?

Ang Pulong sa Kaalam

Ikonsiderar ang pagpakita sa mosunod nga larawan sa gamayng kwarto ibabaw sa tindahan ni Newel K. Whitney sa Kirtland, Ohio. Dapita ang imong mga estudyante nga maghanduraw nga ang kwarto puno sa mga lalaki, nga ang kadaghanan nanabako ug nag-usap ug tabako, samtang imong ipasabot ang impormasyon sa mosunod nga parapo.

Sa tingtugnaw sa 1833, mga 20 ka naghupot sa pagkapari ang kanunayng magtigom niini nga kwarto aron motambong sa Tunghaan sa mga Propeta (tan-awa sa Doktrina ug mga Pakigsaad 88:127). Sama sa naandan niadtong mga panahona, daghan nila ang manabako ug mousap og tabako panahon sa mga miting. Nahinumdom si Brigham Young nga “daghang higayon nga ang propeta mosulod sa kwarto nga mohatag og panudlo sa klase, iyang nakita ang iyang kaugalingon nga naputos sa bagang aso sa tabako” (Mga Pagtulun-an sa mga Presidente sa Simbahan: Joseph Smith [2007], 316). Kini nga mga kahimtang, ug ang mga reklamo ni Emma Smith, nga maoy tiglimpyo sa linuwa nga mga tabako sa salog, nakaaghat ni Joseph Smith nga mag-ampo mahitungod sa paggamit niadtong mga butanga. Agig tubag, gipadayag sa Ginoo ang Doktrina ug mga Pakigsaad 89 (tan-awa sa Mga Santos: Ang Istorya sa Simbahan ni Jesukristo sa Ulahing mga Adlawvol. 1, Ang Sumbanan sa Kamatuoran, 1815–1846 [2018], 167–68).

Basaha ang Doktrina ug mga Pakigsaad 89:1–4, nga mangita sa mga rason kon nganong gihatag sa Manluluwas kini nga pagpadayag.

• Unsay imong makat-onan sa mga motibo ni Jesukristo sa pagpadayag niini nga seksiyon?

  Samtang tubagon sa mga estudyante ang nag-unang pangutana, seguradoang nasabtan nila nga gihatag kanato sa Ginoo ang Pulong sa Kaalam aron protektahan kita gikan sa mga daotan sa atong panahon.

• Sa unsang paagi ang pagsabot nganong gipadayag sa Manluluwas ang Pulong sa Kaalam makaapektar sa atong pagbati bahin niini?

• Unsa ang pipila ka disenyo sa dautan sa atong panahon diin gikinahanglan nato ang Iyang proteksyon?

Samtang tubagon sa mga estudyante ang unang pangutana, matabangan tingali nimo silang mailhan kon giunsa pagdisenyo o pagmaniobra ang pipila ka dautan nga ilang gipakigbahin aron mabitik ta.

Makatabang tingali sa mga estudyante ang paghunahuna kabahin o pagpakigbahin sa ilang mga pangutana bahin sa Pulong sa Kaalam. Makatabang tingali nila ang mosunod nga seksiyon aron makita ang mga tubag.

Usa ka manwal sa tiggamit gikan sa Nagbuhat

Aron ipaila ang mosunod nga kalihokan, mahimo kang magdala o hisgotan ang bahin sa manwal sa tag-iya sa produkto nga pamilyar sa mga estudyante. Hisgoti kadiyot ang kaimportante sa pagkahibalo kon unsaon pagmentinar sa produkto ug bahin sa sayop nga paggamit niini. Tabangi ang mga estudyante nga masabtan nga ang Dios, isip Tiglalang, (tan-awa sa Genesis 1:27), hingpit nga nakasabot sa atong mga lawas ug naghatag siyag instruksiyon ug pahimangno bahin sa paggamit ug pag-atiman niini.

Kon naay mga pangutana ang mga estudyante bahin sa mga detalye sa Pulong sa Kaalam nga dili klarong gitudlo sa Simbahan, dasiga silang makig-istorya sa ilang mga ginikanan, bishop, o presidente sa branch.

Paghimog manwal para sa hustong paggamit sa atong lawas. Pagmamugnaon ug ipahaom kini sa unsay imong gusto. Usa lang ang mosunod nga mga lakang sa daghang paagi sa pwede ning himoon:

1. Pil-a og katunga ang usa ka papel aron nga mahimo ning morag mubong pamphlet. Paghimo og atubangan nga hapin para sa ulohan nga sama sa “Ang Pulong sa Kaalam: Usa ka Manwal sa Tag-iya gikan sa Nagbuhat.” Pwede kang magdugang og mga drowing o mga larawan sa atubangan nga hapin.

2. Sulod sa pamphlet, butangig ulohan ang wala nga pahina nga sama sa “Ang Tambag sa Nagbuhat sa Kon Unsay Angay Natong Buhaton.” Butangig ulohan ang tuo nga pahina nga sama sa “Ang Tambag sa Tiglalang Kon Unsay Angay Natong Likayan.” Pwede pod kang magdugang og mga larawan o disenyo sa sulod nga mga pahina.

3. Tun-i ang Doktrina ug mga Pakigsaad 89:5-17 ug butangig unod ang imong pamphlet pinaagi sa pagsulat o pagbutang og mga larawan sa imong nakat-onan.

   Agi og dugang sa mosunod nga mga sugyot, ikonsiderar ang paghatag sa mga estudyante og makatabang nga mga materyal gikan sa seksiyon sa “Dugang nga mga Kapanguhaan” niini nga leksiyon.

4. Pangitag dugang nga balaanong gitudlo nga mga kapanguhaan sama sa Alang sa Kalig-on sa mga Kabatan-onan (booklet, 2022), Giya ngadto sa mga Kasulatan, ug mga pamahayag sa mga lider sa Simbahan. Idugang sa imong pamphlet ang unsay imong nakat-onan.

Hatagig higayon ang mga estudyante nga ikapakigbahin o ikapakita ang ilang nahimo.

Timan-i: Sa seksiyong nga “Dugang nga mga Kalihokan sa Pagkat-on” sa sunod sa leksiyon, adunay sugyot alang sa mga estudyante nga magdugang og luyo nga pahina sa ilang mga pamphlet. Sa luyo nga pahina mao ang lista sa mga panalangin nga ihatag sa Dios diha sa Doktrina ug mga Pakigsaad 18-21 tungod sa pagtuman sa Pulong sa Kaalam. Kon nindot na nga kasinatian para sa imong mga estudyante, pwede tingali nimo silang dasigon nga ipasa karon ang ilang mga pamphlet o seguroon nga ilang dad-on kini sa klase alang sa sunod nga leksiyon.

Atong maluluy-on ug mapailobong Manluluwas

Aron tabangan ang mga estudyante nga makakita kon unsa ka mapailobon ang Manluluwas sa Iyang mga Santos human mapadayag kini nga sugo, mahimo nimong ipakigbahin ang pipila sa mosunod nga sulod diha sa imong kaugalingong mga pulong ngadto sa imong mga estudyante:

Gipadayag ni Jesus ang Pulong sa Kaalam niadtong 1833, pero wala pa ni gihatag ingon og sugo niadtong panahona (tan-awa sa bersikulo 2). Human kini madawat, daghang Santos ang nagsugod nga maningkamot sa pagbuntog sa mga tradisyon nga nadawat na sa kultura ug para sa uban, ang mga adiksyon nga naa sila. Paglabay sa panahon, gigiyahan sa Ginoo ang mga lider sa Simbahan, lakip na si Brigham Young ug John Taylor, nga mas magdahom pa gikan sa mga Santos diha sa ilang pagtuman sa gitudlong mga baroganan diha sa Doktrina ug mga Pakigsaad 89. Human magsugod ang ika-baynteng siglo, si Presidente Heber J. Grant “mihagit nila sa hingpit nga pagtuman sa Pulong sa Kaalam, nga maglikay sa makahubog nga ilimnon, kape, tsaa, tabako, ug uban pang makadaot nga substansiya nga gigamit usahay sa nag-unang ma henerasyon sa mga Santos,” nga naghimo “sa Pulong sa Kaalam ingon og kinahanglanon para sa pagtambong sa templo ug misyonaryo nga serbisyo” (Mga Santos, 3:291–92). “Sa 1921, gidasig sa Ginoo si Presidente Heber J. Grant nga hangyoon ang tanang Santos nga likayan ang makahubog nga ilimnon, tabako, kape, ug tsaa aron makakuhag rekomend sa templo” (Mga Hisgotanan sa Kasaysayan sa Simbahan, “Pulong sa Kaalam [D&P 89],” Librarya sa Ebanghelyo).

• Unsang mga tabang ang gihatag sa Manluluwas sa atong panahon karon alang niadtong nakigbisog sa adiksyon?

Ang konklusyon sa bidyo nga gisugyot sa sinugdanan sa leksiyon makahatag og paglaom pinaagi kang Kristo niadtong nakigbisog sa adiksyon. Pwede nimong ikonsiderar ang pagpakita sa “You Will Be Freed” gikan sa time code 1:29 hangtod 2:55.

Ang mga estudyante nga gustog dugang nga mga kapanguhaan alang sa tabang sa adiksyon pwedeng giyahan sa ilang mga lider sa ward ug sa “Tabang sa Kinabuhi” nga pahina diha sa ChurchofJesusChrist.org.

Sa dili pa isukna ang mosunod nga pangutana, ikonsiderar ang pagtabang sa mga estudyante nga mailhan ang kaayo ni Jesukristo sa paghatag nato sa Pulong sa Kaalam. Makatabang tingali ang pagdapit nila nga ihanduraw unsa ka lahi ang kalibotan kon walay pag-abuso sa substansiya. Pwede usab nimo silang hatagag panahon nga isulat sa unsang paagi nakapanalangin ug nakaprotektar ang Pulong sa Kaalam ngadto kanila ug sa ilang mga mahal sa kinabuhi.

• Sa unsang paagi ang pagpadayag sa Pulong sa Kaalam nagpakita sa kaluoy ug gugma ni Jesukristo?

Ikonsiderar ang pagtapos sa leksiyon pinaagi sa pagpakigbahin kon giunsa pagpanalangin sa Pulong sa Kaalam ang imong kinabuhi ug ipahayag ang pagpasalamat sa Manluluwas sa paghatag niini nga pagpadayag kanato.

Dugang nga mga Kapanguhaan

Naa ba sa Doktrina ug mga Pakigsaad 89 ang tanang gipadayag sa Ginoo bahin sa Pulong sa Kaalam?

Ang opisyal nga pamahayag sa Simbahan sa newsroom.ChurchofJesusChrist.org miingon:

Paglabay sa panahon, mihatag ang mga lider sa Simbahan og dugang mga instruksiyon niadto nga mga butang nga gidasig o gidili sa Pulong sa Kaalam, ug mitudlo nga angayng likayan ang mga substansiya nga makadaot, puwedeng mabatasan o makaadik.

Sa bag-ong mga publikasyon para sa mga miyembro sa Simbahan, giklaro sa mga lider sa Simbahan nga gidili sa Pulong sa Kaalam ang daghang substansiya, lakip na ang vape o mga e-cigarette, green tea, ug mga produkto nga nakabase sa kape. Mipasidaan usab sila nga pwede lang gamiton ang mga substansiyang sama sa marijuana ug opioid alang sa panambal nga katuyoan lamang base sa gireseta sa may katakos nga doktor. (“Statement on the Word of Wisdom”” [opisyal nga pamahayag sa Simbahan, Agosto 15, 2019], newsroom.ChurchofJesusChrist.org)

Si Presidente Boyd K. Packer (1924–2015) sa Korum sa Napulog Duha ka Apostoles miingon:

Misulat ang mga miyembro aron mangutana kon supak ba kini o kadto sa Pulong sa Kaalam. Nahibaloan na sa kadaghanan nga ang tsaa, kape, bino, ug tabako supak niini. Wala pa kini mas detalyadong gipatin-aw sukad. Hinoon, dungan natong gitudlo ang baroganan uban sa gisaad nga mga panalangin. Adunay daghang naandan, makaadik nga mga butang nga mahimong mainom o mausap o mahingus o ma-inject sa usa ka tawo nga makadaot sa lawas ug espiritu nga wala hisguti diha sa pinadayag.

Ang tanang butang nga makadaot wala malista sa piho; ang makahilo, pananglit—siguradong dili maayo, apan dili makaadik! Siya nga kinahanglan pang sugoon sa tanan nga mga butang, ang Ginoo miingon, “usa ka tapulan ug dili maalamon nga sulugoon” (Doktrina ug mga Pakigsaad 58:26). (Boyd K. Packer, “The Word of Wisdom: The Principle and the Promises,” Ensign, May 1996, 17)

Tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 38.7.14, ChurchofJesusChrist.org.

Tan-awa ang Agosto 2019 Liahona nga magasin, nga gipahinungod sa mga kamatuoran bahin sa atong mga lawas.

Doktrina ug mga Pakigsaad 89:9. Unsay gitumong sa hugpong sa mga pulong nga “init nga mga ilimnon”?

Si Propeta Joseph Smithug si Hyrum Smith giingon nga pihong miila sa kape ug tsaa isip ang “mainit nga mga ilimnon” nga gihisgotan sa Pulong sa Kaalam, us si Presidente Brigham Young sa kaulahian mikompirmar niini nga pagpasabot (tan-awa sa The Joseph Smith Papers, Documents, Volume 3: February 1833–March 1834, ed. Gerrit J. Dirkmaat and others [2014], 14).

Naa bay dugang tambag kon unsang mga ilimnon ang gikonsiderar nga kape ug tsaa?

Ang pulong kape wala kanunay sa ngalan sa mga ilimnon nga naay kape. … Ang mga ilimnon adunay ngalan nga café o caffé, mocha, latte, espresso, o bisan unsang nagtapos sa pulong -ccino maoy kape ug maoy supak sa Pulong sa Kaalam. …

Ang green tea ug black tea maoy … parehong tsaa ug supak sa Pulong sa Kaalam. … Dugang pa, tsaa gihapon ang iced tea. (“Pag-vape, Kape, tsaa, ug Marijuana,” Bag-ong Era, Aug. 2019, 28)

Nganong wala man dayon gikonsiderar sa Ginoo nga ingon og sugo ang Pulong sa Kaalam?

Si Presidente Joseph F. Smith (1838–1918) mitudlo:

Niadtong panahona, … Kon gihatag pa [ang Pulong sa Kaalam] isip usa ka sugo mapaubos unta sa panghimaraut ang matag tawo, nga nag-umon sa paggamit sa makadaut nga mga butang; busa ang Ginoo maloloy-on ug mihatag kanila og kahigayunan sa pagbuntog, sa dili pa Niya ipaubos sila sa balaod. (Joseph F. Smith, sa Conference Report, Okt. 1913, 14)

Dugang nga mga Kalihokan sa Pagkat-on

Alternatibo nga pagsugod sa leksiyon

Ikonsiderar ang pagdala og guwantes sa klase. Hangyoa mga estudyante nga maghanduraw nga ang imong kamot nagrepresentar sa espiritu sa anak sa Dios, samtang ang guwantes nagrepresentar sa pisikal nga lawas sa maong tawo. Isul-ob ang gwantes aron irepresentar ang kinabuhi sa usa ka tawo sa yuta. Dapita ang mga estudyante sa paglista sa tambag sa Dios nga direktang nagtudlo nga sa kon unsay angay ug dili angay natong buhaton sa atong pisikal nga mga lawas.

Dapita ang mga estudyante nga pangitaon ang mga rason kon nganong importante sa Dios kon giunsa nato pagtratar ang atong mga lawas. Pwede nila ning himoon pinaagi sa pagtuon sa mga tudling sa kasulatan sama sa mosunod:

• Genesis 1:27

• 1 Mga Taga-Corinto 6:19–20

• Doktrina ug mga Pakigsaad 88:15–16

Katibuk-ang Pagpasabot sa Pulong sa Kaalam

Pwedeng gamiton ang video nga “Word of Wisdom: What Is It?” (5:09) aron mohatag og katibuk-ang pagpasabot sa Pulong sa Kaalam ug aron tabangan ang mga estudyante nga masabtan ang mga kahimtang nga migiya ni Joseph Smith nga mangayog tambag sa Ginoo bahin niini.

Paglaom alang sa nagsagubang og adiksyon

Ikonsidera ang pagpasalida sa bidyo nga “Step 2: Hope—Preston’s Story about Drug Addiction Recovery” (3:42) isip ehemplo sa pagtabang sa Dios sa usa ka tawo nga mabuntog ang adiksyon.

Human mapasalida ang bidyo, pwede nimong hatagag panahon ang mga estudyante nga mohimo og mubo nga sulat kabahin ni Jesukristo ngadto sa usa ka minahal kinsa nagkinahanglan og paglaom.