“Leksiyon 105—Doktrina ug mga Pakigsaad 89:18-21: ‘Ako, ang Ginoo, Mohatag ngadto Kanila ug Usa ka Saad,’” Manwal sa Magtutudlo sa Seminary sa Doktrina ug mga Pakigsaad (2025)
“Doktrina ug mga Pakigsaad 89:18–21,” Manwal sa Magtutudlo sa Seminary sa Doktrina ug mga Pakigsaad
Leksiyon 105: Doktrina ug mga Pakigsaad 89–92
Doktrina ug mga Pakigsaad 89:18–21
“Ako, ang Ginoo, Mohatag ngadto Kanila og Usa ka Saad”
Human mapadayag ang Pulong sa Kaalam kang Joseph Smith (tan-awa ang leksiyon “Doktrina ug mga Pakigsaad 89:1–17”), gipasabot ni Jesukristo ang pipila sa mga panalangin nga Iyang gitanyag niadtong matinud-anon nga motuman sa mga baroganan nga gitudlo niini nga pagpadayag. Kini nga leksiyon gituyo aron tabangan ang mga estudyante nga mosunod sa Pulong sa Kaalam ug dawaton ang gisaad nga mga panalangin sa Manluluwas.
Mga Posibleng Kalihokan sa Pagkat-on
Ang ali
Sugdi ang klase pinaagi sa pagtabang sa mga estudyante nga makasabot sa gihatag kanato sa Manluluwas nga ang Pulong sa Kaalam isip proteksyon tungod kay gimahal kita Niya. Usa ka paagi sa paghimo niini mao ang pagdrowing sa pisara og usa ka baybayon nga naay hinimo sa tawo nga babag nga nagbulag niini sa kadagatan, sama sa mosunod nga ehemplo.
Ipasabot nga si Elder Von G. Keetch (1960–2018) sa Seventy nakakat-on ug importanteng leksiyon sa baybayon nga parehas niini. Ipakigbahin ang iyang kasinatian gamit ang mosunod nga parapo ug ang iyang pamahayag sa ubos.
Si Elder Von G. Keetch nalingaw diha sa dagat usa niana ka adlaw sa dihang nasuko ang usa ka grupo sa mibisita nga mga surfer kay naay hinimo sa tawo nga ali tali sa bahiya ug sa kadagatan. Suko nga mireklamo ang mga surfer nga nadaot sa ali ang ilang bakasyon kay dili na man sila maka-surf sa mas dagkong balod nga naa sa gawas sa bahiya tungod sa ali.
Sa kataposan mibarog [ang mas magulang nga lokal nga surfer] ug miduol sa grupo. Walay bisan unsa nga gisulti, gikuha niya ang teleskopyo gikan sa iyang backpack ug gitunol kini sa usa sa mga surfer, nagtudlo ngadto sa ali. Ang matag usa sa mga surfer mitan-aw sa teleskopyo. Sa dihang miabot na ang akong turno, pinaagi sa pagpadako sa view, nakita nako ang wala pa nako makita sa una: mga dorsal fin—dagkong mga iho nga nangaon duol sa kapansilan [reef] sa pikas bahin sa ali. …
Samtang nagbarog mi nianang nindot nga baybayon, ang among panglantaw kalit nga nausab. Ang ali nga daw gahi ug higpit—nga daw mipugong sa kalingawan ug kadasig sa pagsakay sa dagko gayod nga balod—nahimong lahi na kaayo. Uban sa among bag-ong panabot bahin sa kapeligro nga naghulat sa tago diha sa tubig, ang ali nagtanyag na karon og proteksiyon, kasiguroan, ug kalinaw. (Von G. Keetch, “Bulahan ug Malipayon ang Kadtong Nagtuman sa mga Sugo sa Dios,” Liahona, Nob. 2015, 116)
-
Unsay gitudlo kanato sa kasinatian ni Elder Keetch bahin sa Dios ug sa Iyang mga sugo?
-
Hain nga mga sugo ang mas nagpakita alang nimo nga nagtinguha ang Dios nga panalipdan kita? Ngano?
Pwede nimong butangan og marka ang ali tali sa bahiya ug sa kadagatan diha sa pisara isip “Pulong sa Kaalam.” Pangitag moboluntaryo sa pagpakigbahin sa ilang nahinumdoman bahin sa Pulong sa Kaalam. (Kon mihimog pamphlet ang mga estudyante nga naglatid sa Pulong sa Kaalam sa miaging leksiyon, pwede silang motan-aw didto alang sa tabang.)
Isip pahinumdom, pwede usab nga basahon ug ipakigbahin sa mga estudyante ang mga hugpong sa mga pulong gikan sa Doktrina ug mga Pakigsaad 89:1–4 nga naghulagway sa mga motibo sa Ginoo sa pagpadayag sa Pulong sa Kaalam.
Dayon ikonsiderar ang pagpakita sa mosunod nga mga pangutana ug pagdapit sa mga estudyante nga isulat ang ilang mga tubag sa ilang mga journal sa pagtuon.
-
Gilantaw ba nimo isip panalangin ang Pulong sa Kaalam nga gikan sa Langitnong Amahan o babag sa imong kinabuhi?
-
Unsay imong nahibaloan bahin sa mga panalangin nga gitanyag sa Langitnong Amahan niadtong misunod sa Pulong sa Kaalam?
-
Para nimo, unsa ka importante ang pagsunod sa Pulong sa Kaalam? Ngano?
Mga panalangin nga gustong ihatag kanato sa Manluluwas
Human mapadayag ang Pulong sa Kaalam kang Joseph Smith, gipasabot ni Jesukristo ang mga panalangin nga gitanyag Niya ug sa Langitnong Amahan niadtong matinuoron nga mosunod niini nga pagpadayag.
Basaha ang Doktrina ug mga Pakigsaad 89:18-21, ug markahi ang matag saad nga Ilang gihatag niadtong magmatinumanon.
Ang Doktrina ug mga Pakigsaad 89:18–21 maoy usa ka tudling sa doktrinal nga kahanas. Ikonsiderar ang pagdapit sa mga estudyante nga markahan sa lahi nga paagi ang mga tudling sa doktrinal nga kahanas aron dali ra kini nilang makit-an.
Sa drowing nga bahiya diha sa pisara, pwedeng isulat sa mga estudyante ang mga panalangin nga ilang makita. Seguroha nga mailhan sa mga estudyante nga ang Ginoo mopanalangin kanato og mas maayong panglawas, kaalam, paglahutay, ug proteksyon kon sundon nato ang Iyang Pulong sa Kaalam.
-
Unsa kaha alang kanimo ang posibleng ipangutana sa ubang mga tawo samtang ilang basahon kini nga mga saad gikan sa Ginoo?
Base sa mga pangutanang gipakigbahin sa mga estudyante ug sa nahabiling oras, ilha kon hain sa mosunod nga tulo ka seksiyon sa leksiyon ang labing makatabang sa mga estudyante. Pwede usab nimong papilion ang klase kon hain nga seksiyon ang gusto nilang tun-an.
Mga panalangin sa maayong panglawas ug paglahutay (mga bersikulo 18, 20)
Kini nga seksiyon makatabang sa mga estudyante nga masabtan nga wala magsaad ang Ginoo og hingpit nga panglawas niadtong mosunod sa Pulong sa Kaalam, apan panalanginan Niya ang masulondon og mas maayong panglawas kompara kon dili nila sundon ang Iyang tambag.
Basaha ang mga parapo 7–8 diha sa seksiyon nga “Pagkuhag Espirituwal nga Kahibalo” sa Mahinungdanon nga Dokumento sa Doktrinal nga Kahanas (2023). Basaha usab ang mosunod nga pagtulun-an ni Presidente Dieter F. Uchtdorf, nga niadto naa sa Unang Kapangulohan. Gihisgotan niya ang iyang kasinatian niadtong batan-on pa siya diha sa militar diin nabantayan niya nga mas maayo pa ang pipila ka sundalo nga wala magsunod sa Pulong sa Kaalam kay kaniya diha sa ilang pisikal nga pagbansay. Pangitaa ang mga kamatuoran nga makatabang aron matubag ang pangutana sa usa ka tawo bahin sa mga saad sa Ginoo nga naa sa Doktrina ug mga Pakigsaad 89:18, 20.
Sa kaulahian akong nakat-onan nga ang mga saad sa Dios dili kanunay nga matuman dayon o sa paagi nga atong gilaoman; kini moabot sa Iyang panahon ug sa Iyang mga pamaagi. Paglabay sa mga tuig akong nakita ang klaro nga ebidensiya sa temporal nga mga panalangin nga madawat niadtong kinsa nagsunod sa Pulong sa Kaalam—agig dugang sa espirituhanon nga mga panalangin nga moabot dayon tungod sa pagkamasulundon sa bisan unsang mga balaod sa Dios. Sa paghinumdom, ako nakasiguro nga ang mga saad sa Ginoo, kon tingali dili kanunay nga dali, sa kanunay sigurado. (Dieter F. Uchtdorf, “Ipadayon ang Pagpailob,” Liahona, Mayo 2010, 58)
-
Unsay imong nakat-onan bahin sa Ginoo ug sa Iyang mga saad nga makatabang tingali sa usa ka tawo nga bug-os nga nagtuman sa Pulong sa Kaalam pero naa gihapoy gipamati sa panglawas?
Mga panalangin sa kaalam ug kahibalo (bersikulo 19)
Basaha ang Doktrina ug mga Pakigsaad 29:34, ug hunahunaa kon unsaon paggamit sa doktrina nga gitudlo sa Manluluwas niini nga bersikulo diha sa Pulong sa Kaalam.
-
Sa unsang paagi ang Pulong sa Kaalamnahimong espirituwal nga panalangin, agig dugang sa pisikal nga panalangin?
-
Sa unsang mga paagi ang atong pagkamasulondon sa Pulong sa Kaalam nagtugot sa Manluluwas nga panalanginan ta og mas dakong sekular nga kaalam ug kahibalo? og mas dakong espirituwal nga kaalam ug kahibalo?
-
Sa unsang paagi makatabang nato ang pagkamasulondon sa Pulong sa Kaalam aron mas bug-os nga madawat ang pagpadayag gikan sa Dios pinaagi sa Espiritu Santo?
Aron matabangan ang mga estudyante nga matubag ang unang pangutana, gusto tingali nimong ipakigbahin ang unang pamahayag ni Presidente Boyd K. Packer sa seksiyong “Dugang nga mga Kapanguhaan.”
Isip ebidensiya sa panalangin sa Dios niadtong nagatuman sa Iyang mga balaod sa kahimsog, ikonsiderar ang pagpakita niini nga larawan sa pagbalibad ni Daniel nga mokaon sa “karne sa hari” (Daniel 1:8). Dasiga ang mga estudyante nga ipakigbahin kon unsay ilang nahinumdoman sa estorya. Kon gikinahanglan, pwede kang magpakigbahin og pipila sa mosunod nga parapo aron pahinumdoman sila.
Edukado si Daniel ug ang ubang batan-on nga nagpuyo sa Babilonya ug gibansay sila aron mahimong maalamong mga tawo sa hari. Dihang gitanyagan sila sa karne sa hari, mibalibad si Daniel sa pagkaon tungod sa mga balaod sa Dios sa kahimsog niadtong panahona. Gitugotan sa alagad sa hari nga lahi nga pagkaon ang kaonon ni Daniel ug sa uban pa sulod sa 10 ka adlaw nga pagsulay og kaon og lahi nga pakaon aron mahibaloan kon maparehas ba sila ka himsog ug ka utokan niadtong ubang batan-on nga anaa sa programa.
Basaha ang Daniel 1:17–20, nga mangita sa mga ebidensiya sa sekular ug espirituwal nga mga panalangin sa kaalam nga gihatag sa Dios kang Daniel ug sa iyang mga kauban.
-
Unsang mga ebidensiya sa mga panalangin sa Dios ang imong nakita?
Mga panalangin sa proteksiyon (bersikulo 21)
Ikonsiderar ang pagpakita niini nga larawan sa Pagpalabay ug itutok ang atensiyon sa mga estudyante ngadto sa dugo sa mga poste sa pultahan. Ipasabot nga ang proteksiyon gikan sa “tiglaglag nga anghel” magpahinumdom nato sa panahon dihang giprotektahan ang mga Israelites gikan sa hampak nga kamatayon sa kamagulangang mga anak sa tibuok karaang Ehipto. Naluwas kadtong natinumanon nga nagbutang sa dugo sa karnero diha sa ilang mga poste sa pultahan (nagsimbolo sa dugo sa Kordero sa Dios). Kini nga saad sa proteksiyon mahimong magpasabot sa pisikal ug espirituwal nga kaluwasan.
Sa drowing nga kadagatan nga anaa sa pisara, ang mga estudyante mahimong maglista sa mga piligro diin gipanalipdan kita sa Manluluwas pinaagi sa Pulong sa Kaalam. (Pwede nilang malista ang mga butang nga sama sa adiksyon, sakit, pagkadili takos, nadaot nga mga relasyon, ug uban pa.)
Aron matabangan ang mga estudyante nga hisgotan ang espirituwal nga proteksiyon nga gitanyag kanato sa Manluluwas,pwede imong ipakigbahin ang ikaduhang pahayag ni Presidente Packer diha seksiyon nga “Dugang nga mga Kapanguhaan.”
-
Unsang mga ehemplo sa pagpanalipod sa Manluluwas ang nakita nimo sa imong kinabuhi samtang gituman nimo ang Pulong sa Kaalam?
Pagsunod sa Pulong sa Kaalam
Ikonsiderar ang pagpamatuod kon giunsa ka pagpanalangin sa Ginoo tungod sa pagtuman sa Pulong sa Kaalam. Dasiga ang mga estudyante nga isulat sa ilang mga tubag sa mosunod nga mga pangutana diha sa ilang mga journal sa pagtuon:
-
Base sa imong nakat-onan bahin Pulong sa Kaalam, nganong importanteng sundon nimo kini nga pagpadayag nga gikan kang Kristo?
Paghimog plano nga motabang nimo sa pagtuman sa Pulong sa Kaalam. Hunahunaa ang mga sitwasyon o mga tentasyon nga posible nimong masugatan, ug pagdesisyon kon unsa ang labing maayong paagi nga mabuntog nimo kini. Ikonsiderar ang pagpakigbahin sa imong mga tinguha ug plano ngadto sa Langitnong Amahan pinaagig pag-ampo ug ang pagpangayo sa Iyang kusog aron molampos.
Isag-ulo
Pwede nimong tabangan ang mga estudyante sa pagsag-ulo sa pakisayran sa doktrinal nga kahanas ug sa importanteng hugpong sa mga pulong sa kasulatan atol niini nga leksiyon ug dayon irebyo kini sa umaabot nga mga leksiyon. Ang importanteng hugpong sa mga pulong sa kasulatan mao “Ang mga panalangin sa Pulong sa Kaalam.” Ang mga ideya para sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”