Leksyon 106: Doktrina ug mga Pakigsaad 89–92

Doktrina ug mga Pakigsaad 90

Ang Unang Kapangulohan

Sa Marso 1833, gisugo sa Ginoo si Joseph Smith nga himoon si Sidney Rigdon ug Frederick G. Williams nga iyang mga magtatambag sa Unang Kapangulohan. Isip kapangulohan, kining tulo ka lalaki naghupot og mga yawe sa pagkapari nga nagtugot nilang dumalaon ang gingharian sa Ginoo sa yuta. Kini nga leksiyon makatabang sa mga estudyante nga mabati ang kaimportante sa direksiyon nga gihatag ni Jesukristo sa Ang Simbahan ni Jesukristo sa mga Santos sa Ulahing mga Adlaw pinaagi sa Iyang Unang Kapangulohan.

Mga Posibleng Kalihokan sa Pagkat-on

Ang mga yawe makahatag og akses

Usa ka paagi sa pagsugod sa klase mao ang pagpakita nga makatabang ang yawe aron ma-access nato ang espesyal nga mga butang kon gikinahanglan. Pwede nimong dapiton ang mga estudyante nga isulat sa gagmayng papel ang mga butang nga para nila kinahanglang ampingan. Pagdapit og mga boluntaryo sa pagpakigbahin kon unsay ilang gisulat ug ngano. Kolektaha ang mga papel ug isulod ni sa usa ka lugar diin pwede lang maakses gamit ang usa ka yawe. Kon dili nimo ma-lock ang mga papel sa usa ka butang nga pwedeng mayawehan, pwede nimo ning isulod sa kahon ug dapita ang mga estudyante sa paghanduraw nga naka-lock ang mga papel. Ipakita sa mga estudyante ang yawe ug dapita sila sa paghunahuna sa kaimportante sa maong yawe. Pwede kang mangutana:

• Unsa ang pipila ka importanteng butang sa inyong kinabuhi ang nanginahanglan og mga yawe aron inyong maakses?

• Kinsay saligan nimo sa yawe ug patagoon niini? Ngano?

Ikonsiderar ang pagpasabot nga gihoptan sa Ginoo ang mga yawe sa pagkapari nga gigamit sa Ang Simbahan ni Jesukristo sa mga Santos sa Ulahing mga Adlaw. Dapita ang mga estudyante samtang nagtuon sila karong adlawa nga hunahunaon kon si kinsa dinhi sa yuta ang Iyang saligan sa maong mga yawe ug kon unsay ikatabang niini nga maakses nato.

Giorganisar ni Jesukristo ang Unang Kapangulohan

Aron maandam ang mga estudyante sa pagtuon sa tudling sa ubos, pwede nimong ipakita ang larawan sa Unang Kapangulohan sa 1833 (tan-awa ang nag-unang imahe niini nga leksiyon) ug ihatag ang pipila sa mosunod nga konteksto:

Ang nailhan karon nga Unang Kapangulohan unang nailhan nga Kapangulohan sa Halangdon nga Pagkapari. Si Sidney Rigdon ug Frederick G. Williams gitawag ug gi-set apart nga mga magtatambag ni Propeta Joseph Smith sa Marso 1833 aron mamugna kini nga kapangulohan. Sa Doktrina ug mga Pakigsaad 90, gipadayag sa Ginoo ang mga instruksiyon ngadto ni kang Joseph Smith bahin sa mga responsibilidad sa Unang Kapangulohan.

Basaha ang Doktrina ug mga Pakigsaad 90:1–3, 6, nga mangita kon unsay gisalig sa Dios kang Joseph Smith, Sidney Rigdon, ug Frederick G. Williams.

• Unsang responsibilidad ang gihatag sa Ginoo niining mga tawhana?

  Tugoti ang mga estudyante nga ipakigbahin ang ilang nasabtan bahin sa mga yawe sa pagkapari. Hatagi usab og panahon ang mga estudyante nga isukna ang ilang mga panguta bahin sa mga yawe sa pagkapari ug sa organisasyon sa Simbahan sa Ginoo. Kon kinahanglan, pwede nimong dapiton ang mga estudyante nga tan-awon ang “Mga yawe sa Pagkapari” sa Giya ngadto sa mga Kasulatan (scriptures.ChurchofJesusChrist.org) aron makakat-on og dugang ug ipakigbahin ang ilang nakaplagan.

• Unsay atong makat-onan niini nga mga bersikulo bahin sa kon giunsa pagdumala sa Ginoo ang Iyang Simbahan?

Pwedeng maghisgotan sa mga estudyante ang daghang kamatuoran nga atong makat-onan. Ang usa ka kamatuoran nga pwede nimong hatagan og gibug-aton mao nga gidumala ni Jesukristo ang Iyang Simbahan dinhi sa yuta gamit ang mga yawe sa pagkapari nga Iyang gihatag sa Iyang Unang Kapangulohan.

Aron matabangan ang mga estudyante nga masabtan ug mabati ang kaimportante niini nga kamatuoran, pwede nimong ipasalida ang bidyo nga “Where Are the Keys?” (2:51), nga anaa sa ChurchofJesusChrist.org.

Mahimo usab nimong ipakita ug hisgotan ang mosunod nga pahayag.

Gipasabot ni Elder D. Todd Christofferson sa Korum sa Napulog Duha ka Apostoles ang mga paagi kon giunsa paggamit sa Manluluwas ang mga yawe aron panalanginan ang atong kinabuhi:

Sa awtoridad niini nga mga yawe, ang mga opisyal sa pagkapari sa Simbahan nagpreserbar sa kaputli sa doktrina ug integridad sa Iyang makaluwas nga mga ordinansa. Sila nagtabang niadtong gusto nga makadawat niini, hukman ang kwalipikasyon ug katakos niadtong mogamit, ug dayon mobuhat niini.

Uban sa mga yawe sa gingharian, ang mga sulugoon sa Ginoo makaila sa kamatuoran ug sa bakak ug sa makausa pa kusganong mamahayag, “Sa ingon miingon ang Ginoo.” (D. Todd Christofferson, “Nganong Anaa ang Simbahan,” Liahona, Nob. 2015, 110)

• Unsay atong makat-onan kang Jesukristo sa Iyang paagi sa paggamit sa mga yawe sa pagkapari sa Iyang Simbahan?

Aron matabangan ang mga estudyante nga mas masabtan ang mga responsibilidad sa Unang Kapangulohan, pwede nimo silang dapiton nga maghimo ug kompletohon ang usa ka talaan diha sa ilang mga journal sa pagtuon sama sa mosunod. Tugoti ang mga estudyante nga makakat-on uban sa usa ka kauban o gamayng grupo pinaagi sa pagbasa, paghisgot, ug pagpakigbahin og mga punto.

Mga Kasulatan	Kon giunsa kita pagpanalangin sa Ginoo pinaagi sa Unang Kapangulohan
Doktrina ug mga Pakigsaad 90:9
Doktrina ug mga Pakigsaad 90:14–16
Doktrina ug mga Pakigsaad 107:8–9
Doktrina ug mga Pakigsaad 107:33
Doktrina ug mga Pakigsaad 120, ulohan sa seksiyon ug bersikulo 1
Doktrina ug mga Pakigsaad 124:125–126

Ang Unang Kapangulohan ug ang mga orakulo sa Dios

Kini nga seksiyon makatabang sa mga estudyante nga makasabot nga gidumala sa Ginoo ang Iyang Simbahan pinaagi sa pagpadayag sa Unang Kapangulohan. Ipasabot nga niini nga mga tudling, ang Ginoo nagpasabot nga ang mga pagpadayag sa Iyang piniling mga lider isip “ang mga orakulo sa Dios” (Doktrina ug mga Pakigsaad 90:4–5).

Basaha ang Doktrina ug mga Pakigsaad 90:4–5, nga mangita kon unsay gibati sa Ginoo bahin sa mga orakulo (o mga pagpadayag) nga Iyang gihatag pinaagi sa Iyang Unang Kapangulohan.

• Unsay imong nakat-onan gikan niini nga mga bersikulo?

• Kanus-a ka mibati nga ang mga pagpadayag sa Dios mipanalipod kanimo gikan sa mga unos sa kinabuhi?

Gipasabot ni Elder Neil L. Andersen sa Korum sa Napulog Duha ka Apostoles ang kinadak-ang responsibilidad sa propeta sa Ginoo:

Ang propeta dili tigpataliwala ninyo ug sa Manluluwas. Hinoon, mobarog siya tupad kaninyo ug motudlo sa dalan paingon sa Manluluwas. Ang labing mahinungdanon nga responsibilidad ug labing bililhon nga gasa sa propeta ngari kanato mao ang iyang tinuod nga pagsaksi, ang iyang sigurado nga kahibalo, nga si Jesus mao ang Kristo. Sama ni Pedro sa karaan, ang atong propeta namahayag, “[Siya] mao ang Kristo, ang Anak sa Dios nga buhi” [Mateo 16:16]. (Neil L. Andersen, “Ang Propeta sa Dios,” LiahonaMayo 2018, 27)

• Unsa ang pipila ka paagi nga ang propeta ug ang iyang mga magtatambag nagtudlo kanato ngadto kang Jesukristo?

  Gamita ang mga pulong sa mga propeta sa paghatag og gibug-aton sa doktrina ug mga baroganan. Ang mosunod nga kalihokan mohatag og higayon sa mga estudyante nga tun-an ang mga pulong sa mga propeta. Para sa dugang pagpraktis kon unsaon paggamit ang mga pulong sa mga propeta, tan-awa ang pagbansay nga nag-ulohang, “Pagtudlo gikan sa mga kasulatan ug sa mga pulong sa mga propeta sa ulahing mga adlaw” diha sa Pagpalambo sa mga Kahanas sa Magtutudlo: Itudlo ang Doktrina. Ikonsiderar ang pagpraktis sa kahanas nga “Pag-andam og mga pagdapit nga motabang sa mga estudyante nga makonektar ang mga kamatuoran nga makaplagan diha sa kasulatan sa kon unsay giingon sa buhing mga propeta.”

  Hatagig higayon ang mga estudyante nga tun-an ang pipila sa bag-o lang nga mga mensahe gikan sa propeta o sa iyang mga magtatambag. Pwede pilion sa estudyante ang usa sa mga sakop sa Unang Kapangulohan ug pangitaon ang usa sa iyang kinabag-ohang pakigpulong sa kinatibuk-ang komperensiya sa ChurchofJesusChrist.org. Pwede tingali nimong bahinon ang klase sa tulo ka grupo, diin ang kada grupo magtuon sa mga pulong gikan sa usa ka sakop sa Unang Kapangulohan, nga mangita sa mga pagtulun-an nga para nila importanteng masabtan sa mga batan-on. Dayon, pwedeng ireport sa mga estudyante ang ilang nakat-onan. Sa kada pagtulun-an nga gipakigbahin, dasiga ang mga estudyante nga pamalandongon ug ipahayag kon sa unsang paagi nagpunting kini kanato ngadto sa Manluluwas nga si Jesukristo.

  Pwede nimong taposon ang leksiyon pinaagi sa pagdapit sa pipila ka estudyante nga ipakigbahin ang ilang nakat-onan ug gibati karon nga importante para nila. Ikonsiderar ang pagpangutana og parehas sa mosunod:

• Unsay imong nakat-onan karon nga gusto nimong hinumdoman?

• Kon adunay tawo nga mangutana kon nganong naminaw ka sa mga direksiyon gikan sa Unang Kapangulohan, unsa ang usa ka butang nga gusto nimong ipasabot kanila?

Dugang nga mga Kapanguhaan

Unsa ang mga ehemplo sa mga yawe sa pagkapari nga gigamit sa Simbahan sa Ginoo?

Si Presidente Dallin H. Oaks sa Unang Kapangulohan mipasabot:

Ang mga naghupot sa lain-laing katungdanan sa Aaronic nga Pagkapari mopahigayon sa ordinansa sa sakramento ubos sa mga yawe ug direksyon sa bishop, kinsa naghupot sa mga yawe sa Aaronic nga Pagkapari. Ang samang baroganan magamit ngadto sa mga ordinansa sa pagkapari diin ang mga babaye ang mopahigayon diha sa templo. Bisan kon ang mga babaye wala maghupot og katungdanan sa pagkapari, mopahigayon sila og sagrado nga mga ordinansa ubos sa pagtugot sa presidente sa templo, kinsa naghupot sa mga yawe alang sa mga ordinansa sa templo.

Ang laing ehemplo sa awtoridad sa pagkapari ubos sa direksyon sa tawo nga naghupot sa mga yawe mao ang mga pagtulun-an sa mga lalaki ug babaye nga gitawag sa pagtudlo sa ebanghelyo, sa mga klase man diha sa ilang mga home ward o sa natad sa mission. Ang ubang mga ehemplo mao kadtong naghupot og mga posisyon sa pagpangulo diha sa ward ug migamit og awtoridad sa pagkapari sa ilang pagpangulo tungod sa ilang mga calling ug ubos sa pag-set apart ug direksyon sa lider sa pagkapari nga naghupot sa mga yawe diha sa ward o sa stake. Sa ingon niini nga paagi gigamit ug gipahimuslan ang awtoridad ug gahom sa pagkapari diha sa Ang Simbahan ni Jesukristo sa mga Santos sa Ulahing mga Adlaw. (Dallin H. Oaks, “Ang Melchizedek nga Pagkapari ug ang mga Yawe,” Liahona, Mayo 2020, 70)

Doktrina ug mga Pakigsaad 90:28–31. Kinsa si Vienna Jaques?

Si Vienna Jaques usa ka miyembro sa Simbahan nga nagpakitag dakong pagkamatinuoron sa Ginoo ug sa Iyang gipahiuli nga Simbahan. Gitabangan niya ang uban sa pagdala ngadto kang Kristo ug gipahinungod ang iyang kabtangan ngadto sa Ginoo. Midonar usab siyag dakong kantidad sa kwarta dihang gikinahanglan kaayo kini.

Si Properta Joseph Smith (1805–44) misulat kang Vienna Jaques ug giingnan siya nga ang Espiritu mihunghong sa iyang kasingkasing:

Joseph, utangan ka sa imong Dios tungod sa halad ni Sister Vienna nga napamatud-ang [manluluwas] og kinabuhi … , busa ayaw gyod siyag kalimti. (Joseph Smith, in History, 1838–1856, volume A-1 addenda, josephsmithpapers.org)

Pagkat-on og dugang bahin niya diha sa mosunod nga mga kapanguhaan:

• Makasaysayanong mga Kapanguhaan sa Doktrina ug mga Pakigsaad, “Vienna Jaques,” ChurchofJesusChrist.org

• “Jaques, Vienna,” josephsmithpapers.org

Dugang nga mga Kalihokan sa Pagkat-on

Pag-ila sa Unang Kapangulohan

Sa dili pa maghisgot sa pipila sa mga responsibilidad sa Unang Kapangulohan, pwede nimong pangutan-on ang mga estudyante nga ipakigbahin sa daklit kon unsay ilang nahibaloan sa mga magtatambag ni Joseph Smith. Ikonsiderar ang pagpakigbahin og usa o duha ka kamatuoran bahin sa matag magtatambag. Alang sa tabang, tan-awa ang mosunod:

• Mga Hisgotanan sa Kasaysayan sa Simbahan, “Sidney Rigdon,” ChurchofJesusChrist.org/study/history/topics

• Makasaysayanong mga Kapanguhaan sa Doktrina ug mga Pakigsaad, “Frederick G. Williams,” ChurchofJesusChrist.org

Pwede usab nga mailhan sa mga estudyante ang Unang Kapangulohan karon pinaagi sa ilang tagsa-tagsang pagtuon bahin sa kinabuhi sa usa ka sakop sa Kapangulohan. Pananglitan, pwede nilang tan-awon ang ilang mga biyograpiya sa ChurchofJesusChrist.org ug pangitaon ang mga detalye bahin sa ilang mga pamilya, ilang propesyonal nga kinabuhi, ilang adlawng natawhan, o kon unsay ganahan nila niadtong tin-edyer pa sila.

Pwede tun-an sa mga estudyante nga sila-sila ra ug dayon ipakigbahin ang ilang nakat-onan sa mga estudyante kinsa nagtuon bahin sa laing sakop sa Unang Kapangulohan.

Pwede nimong itudlo ang mga estudyante ngadto sa “Unang Kapangulohan” nga pahina sa ChurchofJesusChrist.org o hatagan og giimprinta nga kopya sa impormasyon.

Ang Ginoo naghatag og suporta

Ang organisasyon sa Unang Kapangulohan ang usa ka paagi diin gihatag sa Ginoo kang Joseph Smith ang gikinahanglang suporta sa iyang mga responsibilidad. Aron matabangan ang mga estudyante nga mahanduraw kini, pwede nimong dapiton ang usa ka boluntaryo nga bitbiton ang usa ka dili kaayo bug-at nga butang samtang nagtul-id ang bukton hangtod kaya niya nga walay tabang. Dihang mosugod nag hawoy ang bukton sa estudyante, dapita ang duha ka estudyante nga motindog tupad niya aron motabang og alsa. Dayon, pwede nimong ipakita ang mosunod nga imahe og tugoti ang mga estudyante nga ipakigbahin ang ilang nahibaloan bahin sa asoy sa Exodo 17:8–13.

Dayon pwede ninyong hisgotan ang mga pangutana nga sama niini:

• Kanus-a ang higayon diin gitabangan ka sa uban sa paghimo sa usa ka butang nga lisod himoon nga ikaw-ikaw ra?

• Unsa ang pipila ka paagi nga si Jesukristo nagsuporta sa mga indibidwal sa Iyang Simbahan nga gikinahanglan tingali nila gikan sa uban?

Doktrina ug mga Pakigsaad 91. Masabtan nga kamatuoran

Pagpili og piho nga hilisgotan ug dapita ang mga estudyante nga ilista ang lainlaing tinubdan diin pwedeng makita sa usa ka tawo ang impormasyon bahin niini. Hangyoa ang mga estuyante nga hisgotan kon unsaon nimo pagkahibalo kon tinuod ba ang imong nabasa bahin sa usa ka butang.

Ipasabot nga ang pinadayag nga narekord diha sa Doktrina ug mga Pakigsaad 91 nagtudlo ni Joseph Smith kon unsaon sa pag-ila kon ang usa ka butang nga iyang gibasa tinuod. Dihang nadawat niya kini nga pagpadayag, gihubad pa ni Joseph Smith ang Biblia ug naabot sa usa ka bahin nga gitawag og Apokripa.

Kon interesado ang mga estudyante, pwede nimong ipakigbahin nga ang Apocrypha maoy koleksiyon sa balaang mga basahon nga sa sinugdanan wala giapil sa Hebreohanong Biblia (Daang Tugon) apan giapil sa Greyegong mga hubad sa Daang Tugon nga gigamit sa panahon ni Jesus. Ang kopya sa Biblia nga gigamit ni Joseph Smith sa paghimo sa iyang dinasig nga hubad naglangkob sa Apocrypha. Giingnan sa Ginoo si Joseph nga dili na kinahanglang hubaron kini nga bahin sa Biblia (tan-awa ang Doktrina ug mga Pakigsaad 91:1–3).

Dapita ang mga estudyante nga basahon ang Doktrina ug mga Pakigsaad 91:4–6, nga mangita sa tambag sa Ginoo kon unsaon pag-ila sa kamatuoran gikan sa sayop diha sa atong mga gibasa, gitan-aw, o gipaminaw. Makatabang sab tingali ang tudling sa doktrinal nga kahanas sa Doktrina ug mga Pakigsaad 8:2–3 sa paghisgot niini nga hilisgotan. Awhaga ang mga estudyante nga magbantay dihang dili sila segurado kon tinuod ba ang impormasyong ilang nadiskobrehan.