“Lesson 104—Doktrina at mga Tipan 89:1–17: Isang Salita ng Karunungan mula sa Panginoon,” Manwal ng Titser ng Seminary para sa Doktrina at mga Tipan (2025)
“Doktrina at mga Tipan 89:1–17,” Manwal ng Titser ng Seminary para sa Doktrina at mga Tipan
Lesson 104: Doktrina at mga Tipan 89–92
Doktrina at mga Tipan 89:1–17
Isang Salita ng Karunungan mula sa Panginoon
Gaya ng nakaugalian noong 1833, maraming miyembro ng Simbahan ang gumagamit ng tabako at umiinom ng alak, tsaa, at kape. Bilang sagot sa mga panalangin ni Joseph Smith tungkol sa bagay na ito, maawaing inihayag ng Panginoon ang Salita ng Karunungan o Word of Wisdom. Ang lesson na ito ay makatutulong sa mga estudyante na makadama ng pasasalamat sa mapagmahal na tagubilin ng Panginoon na kilala bilang Salita ng Karunungan o Word of Wisdom.
Mga Posibleng Aktibidad sa Pag-aaral
Paalala: Ang mga ipinangakong espirituwal na pagpapala sa Doktrina at mga Tipan 89:18–21 sa pagsunod sa Salita ng Karunungan o Word of Wisdom ang pagtutuunan sa susunod na lesson. Makabubuting ituro ang dalawang lesson na ito upang matulungan ang mga estudyante na maunawaan na ang mga pagpapala ng Salita ng Karunungan o Word of Wisdom ay higit na espirituwal kaysa pisikal.
Mga taktika ni Satanas
Maaari mong anyayahan ang mga estudyante na talakayin ang mga pain na ginagamit ni Satanas para mabitag ang mga anak ng Diyos. Maaari kang magdala o magpakita ng larawan ng mga artipisyal na pain sa pangingisda. Maaari mo ring sabihin sa mga estudyanteng may karanasan sa pangingisda na ilarawan ang mga pain na pinakamainam gamitin sa inyong lugar. Ang isa pang opsiyon ay ipanood ang unang bahagi ng video na “You Will Be Freed,” na mapapanood sa ChurchofJesusChrist.org, mula sa time code na 0:00 hanggang 1:29.
-
Paano maihahambing ang mga pain sa pangingisda sa mga taktika ni Satanas?
-
Anong payo ang ibinigay ng Tagapagligtas upang tulungan tayong matukoy at maiwasan ang mga pain ni Satanas?
Maraming tamang sagot sa pangalawang tanong, kabilang ang panalangin (tingnan sa Doktrina at mga Tipan 10:5), araw-araw na pag-aaral ng mga banal na kasulatan (tingnan sa Helaman 3:29–30), paghahangad ng diwa ng paghahayag (tingnan sa Doktrina at mga Tipan 8:2–4), at pagsunod sa mga payo ng mga propeta at lider ng Simbahan (tingnan sa Doktrina at mga Tipan 21:5).
Upang matulungan ang mga estudyante na maunawaan kung bakit mapagkakatiwalaan natin ang payo ng Tagapagligtas, maaari mong ipabasa sa kanila ang 2 Nephi 26:24 at Jacob 4:10 at ipabahagi ang natutuhan nila tungkol sa Kanya.
Maaari mo ring sabihin sa mga estudyante na pag-isipan o ibahagi sa klase ang kanilang mga sagot sa sumusunod na tanong:
-
Paano napagpala at pinrotektahan ng mga partikular na payo o babala mula sa Tagapagligtas at sa Kanyang mga awtorisadong tagapaglingkod ang inyong buhay?
Ang Salita ng Karunungan o Word of Wisdom
Maaari mong ipakita ang sumusunod na larawan ng isang maliit na silid sa itaas ng tindahan ni Newel K. Whitney sa Kirtland, Ohio. Sabihin sa iyong mga estudyante na ilarawan sa isipan na puno ng kalalakihan ang silid, kung saan ang karamihan ay naninigarilyo at ngumunguya ng tabako, habang ipinaliliwanag mo ang impormasyon sa sumusunod na talata.
Noong taglamig ng 1833, mga 20 maytaglay ng priesthood ang madalas magpulong sa silid na ito upang dumalo sa Paaralan ng mga Propeta (tingnan sa Doktrina at mga Tipan 88:127). Gaya ng nakaugalian noong panahong iyon, marami sa mga kalalakihang ito ang naninigarilyo at ngumunguya ng tabako habang nagpupulong. Naalala ni Brigham Young na “madalas na kapag pumapasok ang Propeta sa silid upang magbigay ng mga tagubilin ay makikita niya ang kanyang sarili sa gitna ng makapal na usok ng tabako” (Mga Turo ng mga Pangulo ng Simbahan: Joseph Smith [2007], 306). Ang mga sitwasyong ito at ang mga reklamo ni Emma Smith, na naglilinis ng mga nginuyang tabako na inilura sa sahig, ang naghikayat kay Joseph Smith na manalangin tungkol sa paggamit ng mga sangkap na iyon. Bilang tugon, inihayag ng Panginoon ang Doktrina at mga Tipan 89 (tingnan sa Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 [2018], 191–93).
Basahin ang Doktrina at mga Tipan 89:1–4, at alamin ang mga dahilan kung bakit ibinigay ng Tagapagligtas ang paghahayag na ito.
-
Ano ang natutuhan ninyo tungkol sa mga hangarin ni Jesucristo sa paghahayag ng bahaging ito?
Sa pagbabahagi ng mga estudyante ng mga sagot sa naunang tanong, tiyaking nauunawaan nila na ibinigay sa atin ng Panginoon ang Salita ng Karunungan o Word of Wisdom upang protektahan tayo mula sa mga kasamaan sa panahon natin.
-
Paano makakaapekto ang pag-unawa natin kung bakit inihayag ng Tagapagligtas ang Salita ng Karunungan o Word of Wisdom sa nadarama natin tungkol dito?
-
Ano ang ilan sa masasamang pakana sa ating panahon kung saan kailangan natin ang Kanyang proteksyon?
Sa pagsagot ng mga estudyante sa naunang tanong, maaari mo silang tulungan na matukoy kung paano binubuo o pinaplano ang mga kasamaang ibinahagi nila upang linlangin tayo.
Maaaring makatulong sa mga estudyante na pag-isipan o ibahagi ang mga tanong nila tungkol sa Salita ng Karunungan o Word of Wisdom. Ang sumusunod na bahagi ay makatutulong sa kanila na makahanap ng mga sagot.
Isang manwal ng user mula sa Tagapaglikha
Para masimulan ang sumusunod na aktibidad, maaari kang magdala ng isang manwal ng may-ari o magsalita tungkol dito para sa isang produkto na pamilyar sa mga estudyante. Maikling ipaliwanag na mahalagang alam nila kung paano pangalagaan ang produkto at ang ilang babala tungkol sa maling paggamit nito. Tulungan ang mga estudyante na maunawaan na ang Diyos, bilang Tagapaglikha (tingnan sa Genesis 1:27), ay lubos na nauunawaan ang ating katawan at nagbigay ng mga tagubilin at babala tungkol sa paggamit at pangangalaga ng mga ito.
Kung may mga tanong ang mga estudyante tungkol sa mga detalye ng Salita ng Karunungan o Word of Wisdom na hindi malinaw na itinuro ng Simbahan, hikayatin silang sumangguni sa kanilang mga magulang, bishop, o branch president.
Gumawa ng manwal para sa wastong paggamit ng ating katawan. Maging malikhain at iakma ito sa sarili sa anumang paraang pipiliin ninyo. Ang mga sumusunod na hakbang ay isa lamang sa maraming paraan para magawa ito:
-
Itupi sa kalahati ang isang papel para magmukha itong maikling polyeto. Gumawa ng pahina ng pabalat na may pamagat na tulad ng “Ang Salita ng Karunungan o Word of Wisdom: Isang Manwal ng May-ari mula sa Tagapaglikha.” Maaari kang magdagdag ng mga drowing o larawan sa pahina ng pabalat.
-
Sa loob ng polyeto, lagyan ng pamagat ang kaliwang pahina na tulad ng “Ang Payo ng Tagapaglikha tungkol sa Dapat Nating Gawin.“ Lagyan ng pamagat ang kanang pahina na tulad ng “Ang Payo ng Tagapaglikha tungkol sa Dapat Nating Iwasan.“ Huwag mag-atubiling magdagdag din ng mga larawan o disenyo sa mga pahina sa loob.
-
Pag-aralan ang Doktrina at mga Tipan 89:5–17 at punan ng impormasyon ang inyong polyeto sa pamamagitan ng pagsusulat o pagdaragdag ng mga larawan ng natutuhan ninyo.
Dagdag pa sa mga sumusunod na mungkahi, maaari mong bigyan ang mga estudyante ng mga makatutulong na materyal mula sa bahaging “Karagdagang Resources” ng lesson na ito.
-
Maghanap ng mga karagdagang sources na itinalaga ng Diyos tulad ng Para sa Lakas ng mga Kabataan (buklet, 2022), Gabay sa mga Banal na Kasulatan, at mga pahayag ng mga lider ng Simbahan. Idagdag ang natutuhan ninyo sa inyong polyeto.
Bigyan ang mga estudyante ng pagkakataong ibahagi o ipakita ang kanilang ginawa.
Paalala: Sa bahaging “Mga Karagdagang Aktibidad sa Pag-aaral“ ng susunod na lesson, may mungkahi para sa mga estudyante na magdagdag ng pahina sa likod sa kanilang polyeto. Isasaad sa pahina sa likod ang mga pagpapalang ibinibigay ng Diyos sa Doktrina at mga Tipan 18-21 kung susundin ang Salita ng Karunungan o Word of Wisdom. Kung magiging magandang karanasan iyan para sa iyong mga estudyante, maaari mo silang hikayatin na ipasa ang kanilang mga polyeto ngayon o tiyaking muli nilang dadalhin ito sa klase para sa susunod na lesson.
Ang ating maawain at matiyagang Tagapagligtas
Upang matulungan ang mga estudyante na malaman kung paano naging matiyaga ang Tagapagligtas sa Kanyang mga Banal matapos ihayag ang kautusang ito, maaari mong ibahagi sa mga estudyante ang ilan sa mga sumusunod na nilalaman gamit ang sarili mong mga salita:
Inihayag ni Jesus ang Salita ng Karunungan o Word of Wisdom noong 1833, ngunit hindi ito ibinigay bilang kautusan sa panahong iyon (tingnan sa talata 2). Matapos itong matanggap, maraming Banal ang nagsimulang magsikap na daigin ang mga nakagawian at kultura at para sa ilan, ang mga adiksiyon nila. Sa paglipas ng panahon, sinabihan ng Panginoon ang mga lider ng Simbahan, kabilang na sina Brigham Young at John Taylor, na higitan ang inaasahan sa mga Banal sa pagsunod nila sa mga alituntuning itinuro sa Doktrina at mga Tipan 89. Sa pagsisimula ng ikadalawampung siglo, “hinikayat sila,” ni Pangulong Heber J. Grant, “na sundin ang Word of Wisdom nang may kahustuhan, umiwas sa alak, kape, tsaa, tabako, at iba pang nakapipinsalang sangkap na ginagamit kung minsan ng mga naunang henerasyon ng mga Banal,” at iniutos na “nararapat sundin ang Word of Wisdom bago makapasok sa templo at maglingkod bilang misyonero” (Mga Banal, 3:359). “Noong 1921, binigyang-inspirasyon ng Panginoon si Pangulong Heber J. Grant na hilingin sa lahat ng mga Banal na umiwas mula sa alak, tabako, kape, at tsaa upang makakuha ng temple recommend” (Mga Paksa sa Kasaysayan ng Simbahan, “Word of Wisdom [D&T 89],“ Gospel Library).
-
Anong mga tulong ang ibinigay ng Tagapagligtas sa ating panahon para sa mga may problema sa adiksiyon?
Ang pagtatapos ng video na iminungkahi sa simula ng lesson ay makapagbibigay ng pag-asa sa pamamagitan ni Cristo para sa mga may problema sa adiksiyon. Maaari mong ipanood ang video na “You Will Be Freed” mula sa time code na 1:29 hanggang 2:55.
Ang mga estudyanteng gusto ng karagdagang resources para sa tulong sa adiksiyon ay maaaring idulog sa mga lider ng ward nila at sa pahinang ”Tulong sa Buhay” sa ChurchofJesusChrist.org.
Bago itanong ang sumusunod, maaari mong tulungan ang mga estudyante na makita ang kabutihan ni Jesucristo sa pagbibigay sa atin ng Salita ng Karunungan o Word of Wisdom. Maaaring makatulong na anyayahan silang pag-isipan kung paano maiiba ang mundo kung walang paggamit ng ipinagbabawal na gamot o paggamit ng mga sangkap sa maling paraan. Maaari mo rin silang bigyan ng oras para isulat kung paano sila at ang kanilang mga mahal sa buhay ay pinagpala at pinrotektahan ng Salita ng Karunungan o Word of Wisdom.
-
Paano ipinapakita ng paghahayag ng Salita ng Karunungan o Word of Wisdom ang awa at pagmamahal ni Jesucristo?
Maaari mong tapusin ang lesson sa pamamagitan ng pagbabahagi ng kung paano napagpala ng Salita ng Karunungan o Word of Wisdom ang iyong buhay at ng pagpapasalamat sa pagbibigay sa atin ng Tagapagligtas ng paghahayag na ito.