“Lesson 105—Doktrina at mga Tipan 89:18–21: ‘Ako, ang Panginoon, ay Nagbibigay sa Kanila ng Pangako,’” Manwal ng Titser ng Seminary para sa Doktrina at mga Tipan (2025)
“Doktrina at mga Tipan 89:18–21,” Manwal ng Titser ng Seminary para sa Doktrina at mga Tipan
Lesson 105: Doktrina at mga Tipan 89–92
Doktrina at mga Tipan 89:18–21
“Ako, ang Panginoon, ay Nagbibigay sa Kanila ng Pangako”
Matapos ihayag ang Salita ng Karunungan o Word of Wisdom kay Joseph Smith (tingnan ang lesson na “Doktrina at mga Tipan 89:1–17”), ipinaliwanag ni Jesucristo ang ilan sa mga pagpapalang ibinibigay Niya sa mga tapat na sumusunod sa mga alituntuning itinuro sa paghahayag na ito. Layunin ng lesson na ito na tulungan ang mga estudyante na piliing ipamuhay ang Salita ng Karunungan o Word of Wisdom at tanggapin ang mga ipinangakong pagpapala ng Tagapagligtas.
Mga Posibleng Aktibidad sa Pag-aaral
Ang harang
Simulan ang klase sa pamamagitan ng pagtulong sa mga estudyante na maunawaan na ibinigay sa atin ng Tagapagligtas ang Salita ng Karunungan o Word of Wisdom bilang proteksyon dahil mahal Niya tayo. Ang isang paraan upang magawa ito ay magdrowing sa pisara ng isang look na may harang na gawa ng tao na inihihiwalay ito sa karagatan, tulad ng sumusunod na halimbawa.
Ipaliwanag na natutuhan ni Elder Von G. Keetch (1960–2018) ng Pitumpu ang isang mahalagang aral sa isang dalampasigan na katulad nito. Ibahagi ang kanyang karanasan gamit ang sumusunod na talata at ang kanyang pahayag sa ibaba.
Isang araw, masayang naglalakad si Elder Von G. Keetch sa dalampasigan nang isang grupo ng mga bumibisitang surfer ang nainis dahil may inilagay na harang sa pagitan ng look at ng bukana ng karagatan. Galit na nagreklamo ang mga surfer at sinabi nilang nasayang ang pagpunta nila dahil sa harang na humahadlang sa kanilang mag-surf sa mas malalaking alon na nabubuo sa labas ng look.
Sa wakas ay tumayo [ang isang mas matandang lokal na surfer] at lumapit sa grupo. Walang imik na kinuha niya ang largabista sa backpack niya at iniabot ito sa isa sa mga surfer, at itinuro ang harang. Isa-isang nagtinginan sa largabista ang mga surfer. Nang ako na ang titingin, nakita ko, sa pinalaking imahe ng largabista, ang isang bagay na hindi ko pa nakita noon: mga palikpik—malalaking pating na nagsisikain malapit sa bahura [reef] sa kabilang panig ng harang. …
Habang nakatayo kami sa magandang dalampasigang iyon, biglang nabago ang aming pananaw. Ang harang na dating tila mahigpit at mapagbawal—na dating tila pumipigil sa saya at tuwang masakyan ang naglalakihang alon—ay naging kakaiba na sa tingin namin. Dahil alam na namin na may nakaambang panganib sa di kalayuan, ang harang ay isa na ngayong tagapagbigay ng proteksyon, seguridad, at kapanatagan. (Von G. Keetch, “Pinagpala at Maligaya ang mga Taong Sumusunod sa mga Kautusan ng Diyos,” Liahona, Nob. 2015, 116)
-
Ano ang maituturo sa atin ng karanasan ni Elder Keetch tungkol sa Diyos at sa Kanyang mga kautusan?
-
Aling mga kautusan ang pinakamalinaw na nagpapakita sa inyo ng hangarin ng Diyos na protektahan tayo? Bakit?
Maaari mong lagyan ng label na “Salita ng Karunungan o Word of Wisdom” ang drowing na harang sa pagitan ng look at ng karagatan sa pisara. Hilingin sa mga boluntaryo na ibahagi ang naaalala nila tungkol sa Salita ng Karunungan o Word of Wisdom. (Kung gumawa ang mga estudyante ng mga polyeto na nagsasaad ng tungkol sa Salita ng Karunungan o Word of Wisdom sa nakaraang lesson, maaari nilang tingnan ang mga ito para matulungan sila.)
Bilang paalala, maaari ding magbasa at magbahagi ang mga estudyante ng mga parirala mula sa Doktrina at mga Tipan 89:1–4 na naglalarawan sa mga hangarin ng Panginoon sa paghahayag ng Salita ng Karunungan o Word of Wisdom.
Pagkatapos ay maaari mong ipakita ang mga sumusunod na tanong at sabihin sa mga estudyante na isulat ang kanilang mga sagot sa kanilang study journal.
-
Nakikita mo ba ang Salita ng Karunungan o Word of Wisdom bilang pagpapala mula sa Ama sa Langit o bilang paghihigpit sa iyong buhay?
-
Ano ang nalalaman mo tungkol sa mga pagpapalang ibinibigay ng Ama sa Langit sa mga sumusunod sa Salita ng Karunungan o Word of Wisdom?
-
Gaano kahalaga sa iyo na sundin ang Salita ng Karunungan o Word of Wisdom? Bakit?
Mga pagpapalang nais ibigay sa atin ng Tagapagligtas
Matapos ihayag ang Salita ng Karunungan o Word of Wisdom kay Joseph Smith, ipinaliwanag ni Jesucristo ang mga pagpapalang ibibigay Niya at ng Ama sa Langit sa mga tapat na sumusunod sa paghahayag na ito.
Basahin ang Doktrina at mga Tipan 89:18–21, at markahan ang bawat isa sa mga ipinapangako Nila sa mga masunurin.
Ang Doktrina at mga Tipan 89:18–21 ay isang doctrinal mastery passage. Maaari mong sabihin sa mga estudyante na markahan ang mga doctrinal mastery passage sa natatanging paraan para madali nilang mahanap ang mga ito.
Sa look sa drowing sa pisara, maaaring isulat ng mga estudyante ang mga pagpapalang nahanap nila. Tiyaking nauunawaan ng mga estudyante na bibiyayaan tayo ng Panginoon ng dagdag na kalusugan, karunungan, pagtitiis, at proteksyon kung susundin natin ang Kanyang Salita ng Karunungan o Word of Wisdom.
-
Ano sa inyong palagay ang mga tanong ng ilang tao habang binabasa nila ang mga pangakong ito mula sa Panginoon?
Batay sa mga tanong na ibinahagi ng mga estudyante at sa magagamit na oras, alamin kung alin sa sumusunod na tatlong bahagi ng lesson ang pinakamakatutulong sa mga estudyante. Maaari mong hayaang pumili ang klase kung aling mga bahagi ang gusto nilang pag-aralan.
Mga pagpapala ng kalusugan at pagiging matibay (talata 18, 20)
Ang bahaging ito ay makatutulong sa mga estudyante na maunawaan na hindi nangangako ang Panginoon ng perpektong kalusugan sa mga sumusunod sa Salita ng Karunungan o Word of Wisdom, ngunit bibiyayaan Niya ang mga masunurin ng mas mabuting kalusugan kaysa sa mga hindi sumunod sa Kanyang payo.
Basahin ang talata 7–8 sa bahaging “Pagtatamo ng Espirituwal na Kaalaman” ng Doctrinal Mastery Core Document (2023). Basahin din ang mga sumusunod na turo mula kay Pangulong Dieter F. Uchtdorf, na noon ay kabilang sa Unang Panguluhan. Binanggit niya ang isa niyang karanasan sa military noong binata siya kung saan napansin niya na nalampasan siya ng ilang kawal na hindi sumusunod sa Word of Wisdom sa kanilang pisikal na pagsasanay. Maghanap ng mga katotohanan na makatutulong sa isang tao na sagutin ang mga tanong niya tungkol sa mga ipinangako ng Panginoon sa Doktrina at mga Tipan 89:18, 20.
Kalaunan nalaman ko na ang mga pangako ng Diyos ay hindi laging natutupad nang kasimbilis ng o sa paraang inaasahan natin; dumarating ang mga ito ayon sa Kanyang panahon at paraan. Ilang taon pagkaraan nakikita ko na ang malinaw na katunayan ng mga temporal na pagpapalang dumarating sa mga yaong sumusunod sa Word of Wisdom—bukod pa sa mga espirituwal na pagpapalang dumarating kaagad mula sa pagsunod sa anumang batas ng Diyos. Sa pagbabalik-tanaw, natitiyak ko na ang mga pangako ng Panginoon, kung hindi man laging mabilis marahil, ay laging tiyak. (Dieter F. Uchtdorf, “Patuloy na Magtiyaga,” Liahona, Mayo 2010, 58)
-
Ano ang natutuhan ninyo tungkol sa Panginoon at sa Kanyang mga pangako na makatutulong sa isang tao na tapat na sumusunod sa Salita ng Karunungan o Word of Wisdom ngunit nakakaranas pa rin ng mga problema sa kalusugan?
Mga pagpapala ng karunungan at kaalaman (talata 19 )
Basahin ang Doktrina at mga Tipan 29:34, at pag-isipan kung paano maiaangkop sa Salita ng Karunungan o Word of Wisdom ang doktrinang itinuro ng Tagapagligtas sa talatang ito.
-
Bukod sa pagpapala sa pisikal, paano naging espirituwal na pagpapala una sa lahat ang Salita ng Karunungan o Word of Wisdom?
-
Sa anong mga paraan nagtutulot ang pagsunod natin sa Salita ng Karunungan o Word of Wisdom na biyayaan tayo ng Tagapagligtas ng karagdagang sekular na karunungan at kaalaman? ng dagdag na espirituwal na karunungan at kaalaman?
-
Paano nakatutulong sa atin ang pagsunod sa Salita ng Karunungan o Word of Wisdom para mas lubos na makatanggap ng paghahayag mula sa Diyos sa pamamagitan ng Espiritu Santo?
Upang matulungan ang mga estudyante na masagot ang nakaraang tanong, maaari mong ibahagi ang unang pahayag ni Pangulong Boyd K. Packer sa bahaging “Karagdagang Resources.”
Bilang katibayan na pinagpapala ng Diyos ang mga taong sumusunod sa Kanyang mga batas ng kalusugan, maaari mong ipakita ang paglalarawang ito kung saan tinatanggihan ni Daniel na kainin ang “pagkaing mula sa hari” (Daniel 1:8). Sabihin sa mga estudyante na ibahagi ang kanilang naaalala tungkol sa salaysay. Kung kinakailangan, maaari mong ibahagi ang ilan sa mga sumusunod na talata upang maipaalala sa kanila.
Si Daniel at ang iba pang kabataang nakatira sa Babilonia ay pinag-aral at sinanay upang maging pantas para sa hari. Noong inalok sila ng karne mula sa hari, tumanggi si Daniel na kainin ito dahil sa mga batas ng Panginoon sa kalusugan sa panahong iyon. Pinayagan ng tagapagsilbi ng hari si Daniel at ang iba na subukang kumain ng iba’t ibang pagkain sa loob ng 10 araw upang malaman kung magiging kasinlusog at kasintalino nila ang iba pang kabataan na sinasanay.
Basahin ang Daniel 1:17–20, at maghanap ng katibayan ng mga sekular at espirituwal na pagpapala ng karunungan na ibinigay ng Diyos kay Daniel at sa kanyang mga kasama.
-
Anong katibayan ng mga pagpapala ng Diyos ang nahanap ninyo?
Mga pagpapala ng proteksyon (talata 21)
Maaari mong ipakita ang larawang ito ng Paskua at ituon ang atensyon ng mga estudyante sa dugo sa mga haligi ng pintuan. Ipaliwanag na ang proteksyon mula sa “mapangwasak na anghel” ay makapagpapaalala sa atin noong pinrotektahan ang mga Israelita mula sa salot ng pagkamatay ng mga panganay na anak na lumaganap sa sinaunang Egipto. Nailigtas ang mga masunurin na nagpahid ng dugo ng kordero sa mga haligi ng kanilang mga pintuan (na sumasagisag sa dugo ng Kordero ng Diyos). Ang pangakong ito ng proteksyon ay maaaring tumukoy sa pisikal at espirituwal na kaligtasan.
Sa bukana ng karagatan na nakadrowing sa pisara, maaaring ilista ng mga estudyante ang mga panganib na hinahadlangan ng Tagapagligas upang protektahan tayo sa pamamagitan ng Salita ng Karunungan o Word of Wisdom. (Maaari nilang ilista ang mga bagay na tulad ng adiksiyon, sakit, hindi pagkamarapat, mga nasirang ugnayan, at iba pa.)
Upang matulungan ang mga estudyante na matalakay ang espirituwal na proteksyon na ibinibigay sa atin ng Tagapagligtas, maaari mong ibahagi ang pangalawang pahayag ni Pangulong Packer sa bahaging “Karagdagang Resources.”
-
Anong mga halimbawa ng proteksyon ng Tagapagligtas ang nakita ninyo sa inyong buhay nang sundin ninyo ang Salita ng Karunungan o Word of Wisdom?
Pagsunod sa Salita ng Karunungan o Word of Wisdom
Maaari mong patotohanan kung paano ka pinagpala ng Panginoon sa pagsunod sa Salita ng Karunungan o Word of Wisdom. Hikayatin ang mga estudyante na isulat ang kanilang mga sagot sa sumusunod na tanong sa kanilang study journal:
-
Batay sa natutuhan mo tungkol sa Salita ng Karunungan o Word of Wisdom, bakit mahalaga sa iyo na sundin ang paghahayag na ito mula kay Cristo?
Gumawa ng plano na tutulong sa iyo na sundin ang Salita ng Karunungan o Word of Wisdom. Isipin ang mga sitwasyon o tukso na maaari mong maranasan, at pagpasiyahan ang pinakamainam na paraan para mapaglabanan mo ang mga ito. Maaari mong ibahagi sa Ama sa Langit ang iyong mga hangarin at ang iyong plano sa pamamagitan ng panalangin at paghingi ng Kanyang lakas upang magtagumpay.
Isaulo
Maaari mong tulungan ang mga estudyante na isaulo ang doctrinal mastery reference at mahalagang parirala ng banal na kasulatan sa lesson na ito at pagkatapos ay rebyuhin ang mga ito sa mga susunod na lesson. Ang mahalagang parirala ng banal na kasulatan ay “Ang mga pagpapala ng Salita ng Karunungan [Word of Wisdom].” Ang mga ideya para sa mga aktibidad sa pagsasaulo ay nasa mga materyal sa appendix sa ilalim ng “Mga Aktibidad sa Pagrerebyu ng Doctrinal Mastery.”