Lesson 106: Doktrina at mga Tipan 89–92

Doktrina at mga Tipan 90

Ang Unang Panguluhan

Noong Marso 1833, iniutos ng Panginoon kay Joseph Smith na italaga sina Sidney Rigdon at Frederick G. Williams na maging kanyang mga tagapayo sa Unang Panguluhan. Bilang panguluhan, nasa kamay ng tatlong lalaking ito ang mga susi ng priesthood na nagbigay-daan sa kanila na mamuno sa kaharian ng Panginoon sa lupa. Ang lesson na ito ay makatutulong sa mga estudyante na madama ang kahalagahan ng patnubay at tagubilin na ibinibigay ni Jesucristo sa Ang Simbahan ni Jesucristo ng mga Banal sa mga Huling Araw sa pamamagitan ng Kanyang Unang Panguluhan.

Mga Posibleng Aktibidad sa Pag-aaral

Makapagbibigay ng access ang mga susi

Ang isang paraan para simulan ang klase ay ipakita na ang mga susi ay nagbibigay-daan sa atin na ma-access ang mga espesyal na bagay kapag kinakailangan. Maaari mong anyayahan ang mga estudyante na isulat sa maliliit na piraso ng papel ang mga bagay na sa palagay nila ay mahalagang panatilihing ligtas. Anyayahan ang mga boluntaryo na ibahagi ang isinulat nila at kung bakit. Kolektahin ang mga papel at ikandado ang mga ito sa isang lugar na maaari lamang mabuksan gamit ang isang susi. Kung hindi mo maitago ang mga papel sa isang bagay na maaaring ikandado gamit ang isang susi, maaari mong ilagay ang mga ito sa isang kahon at sabihin sa mga estudyante na isipin na kunwari ay nakakandado ang kanilang mga papel. Magpakita sa mga estudyante ng susi at sabihin sa kanila na pag-isipan ang kahalagahan ng susing iyon. Maaari mong itanong:

• Ano ang ilang mahahalagang bagay sa inyong buhay na nangangailangan ng mga susi upang magamit ninyo ang mga ito?

• Sino ang mapagkakatiwalaan ninyong gumamit at magprotekta sa susi? Bakit?

Maaari mong ipaliwanag na taglay ng Tagapagligtas ang mga susi ng priesthood na ginagamit sa Ang Simbahan ni Jesucristo ng mga Banal sa mga Huling Araw. Sabihin sa mga estudyante na habang nag-aaral sila ngayon ay pag-isipan nila kung kanino Niya ipinagkatiwala ang mga susing iyon sa lupa at kung ano ang matatamo natin sa tulong nila.

Inorganisa ni Jesucristo ang Unang Panguluhan

Upang maihanda ang mga estudyante na pag-aralan ang passage sa ibaba, maaari mong ipakita ang larawan ng Unang Panguluhan noong 1833 (tingnan ang malaking larawan sa lesson na ito) at ibigay ang ilan sa mga sumusunod na konteksto:

Ang kilala ngayon bilang Unang Panguluhan ay unang tinawag na Panguluhan ng Mataas na Pagkasaserdote. Sina Sidney Rigdon at Frederick G. Williams ay tinawag at itinalaga bilang mga tagapayo kay Propetang Joseph Smith noong Marso 1833 upang mabuo ang panguluhang ito. Sa Doktrina at mga Tipan 90, inihayag ng Panginoon ang mga tagubilin kay Joseph Smith tungkol sa mga responsibilidad ng Unang Panguluhan.

Basahin ang Doktrina at mga Tipan 90:1–3, 6, at alamin ang ipinagkatiwala ng Diyos kina Joseph Smith, Sidney Rigdon, at Frederick G. Williams.

• Anong responsibilidad ang ibinigay ng Panginoon sa mga kalalakihang ito?

  Hayaan ang mga estudyante na ibahagi ang nauunawaan nila tungkol sa mga susi ng priesthood. Maglaan din ng oras para makapagtanong ang mga estudyante tungkol sa mga susi ng priesthood at sa pagtatatag ng Simbahan ng Panginoon. Kung kinakailangan, maaari mong ipabasa sa mga estudyante ang “Susi ng Pagkasaserdote, Mga” sa Gabay sa mga Banal na Kasulatan (scriptures.ChurchofJesusChrist.org) upang mas matuto sila at maibahagi nila ang kanilang nalaman.

• Ano ang matututuhan natin mula sa mga talatang ito tungkol sa paraan kung paano pinamamahalaan ng Panginoon ang Kanyang Simbahan?

Maaaring magbanggit ang mga estudyante ng maraming katotohanan na matututuhan natin. Ang isang katotohanan na maaari mong bigyang-diin ay pinamumunuan ni Jesucristo ang Kanyang Simbahan sa lupa sa pamamagitan ng mga susi ng priesthood na ibinigay Niya sa Kanyang Unang Panguluhan.

Upang matulungan ang mga estudyante na maunawaan at madama ang kahalagahan ng katotohanang ito, maaari mong ipanood ang video na “Where Are the Keys?” (2:51), na mapapanood sa ChurchofJesusChrist.org.

Where Are the Keys?

Priesthood authority and keys start the engine, open the gates of heaven, facilitate heavenly power, and pave the covenant pathway back to our Heavenly Father.

Maaari mo ring ipakita at talakayin ang sumusunod na pahayag.

Ipinaliwanag ni Elder D. Todd Christofferson ng Korum ng Labindalawang Apostol ang mga paraan kung paano ginagamit ng Tagapagligtas ang mga susi sa Kanyang Simbahan upang pagpalain ang ating mga buhay:

Sa awtoridad ng mga susing ito, iniingatan ng mga priesthood leader ng Simbahan ang kadalisayan ng doktrina ng Tagapagligtas at ang integridad ng Kanyang nakapagliligtas na mga ordenansa. Tumutulong sila sa paghahanda sa mga taong nais na makatanggap nito, inaalam kung karapat-dapat ang mga nagnanais nito, at pagkatapos ay isinasagawa ang mga ito.

Sa hawak na mga susi ng kaharian, matutukoy ng mga lingkod ng Panginoon ang katotohanan at kabulaanan at muling masasabi nang may awtoridad, “Ganito ang sabi ng Panginoon.” (D. Todd Christofferson, “Bakit Kailangan ang Simbahan,” Liahona, Nob. 2015, 110)

• Ano ang matututuhan natin tungkol kay Jesucristo mula sa paraan ng paggamit Niya ng mga susi ng priesthood sa Kanyang Simbahan?

Upang matulungan ang mga estudyante na mas maunawaan ang mga tungkulin ng Unang Panguluhan, maaari mo silang anyayahang gumawa at kumumpleto ng isang chart tulad ng sumusunod sa kanilang study journal. Bigyan ng pagkakataon na matuto ang mga estudyante nang may kasamang kapartner o maliit na grupo sa pamamagitan ng pagbabasa, pagtalakay, at pagbabahagi ng mga ideya.

Mga Banal na Kasulatan	Paano tayo pinagpapala ng Panginoon sa pamamagitan ng Unang Panguluhan
Doktrina at mga Tipan 90:9
Doktrina at mga Tipan 90:14–16
Doktrina at mga Tipan 107:8–9
Doktrina at mga Tipan 107:33
Doktrina at mga Tipan 120, section heading at talata 1
Doktrina at mga Tipan 124:125–126

Ang Unang Panguluhan at ang mga orakulo ng Diyos

Ang bahaging ito ay makatutulong sa mga estudyante na maunawaan na pinamumunuan ng Panginoon ang Kanyang Simbahan sa pamamagitan ng paghahayag sa Unang Panguluhan. Ipaliwanag na sa mga passage na ito, tinutukoy ng Panginoon ang mga paghahayag sa Kanyang mga piniling lider bilang “mga orakulo ng Diyos” (Doktrina at mga Tipan 90:4–5).

Basahin ang Doktrina at mga Tipan 90:4–5, at alamin ang nadarama ng Panginoon tungkol sa mga orakulo (o mga paghahayag) na ibinibigay Niya sa atin sa pamamagitan ng Kanyang Unang Panguluhan.

• Ano ang natutuhan ninyo mula sa mga talatang ito?

• Kailan ninyo nadama na naprotektahan kayo ng mga paghahayag ng Diyos mula sa mga unos ng buhay?

Ipinaliwanag ni Elder Neil L. Andersen ng Korum ng Labindalawang Apostol ang pinakamalaking responsibilidad ng mga propeta ng Diyos:

Ang Propeta ng Diyos

Itinuro ni Elder Andersen na may kaligtasan at kapayapaan sa pagsunod sa propeta, na ang pinakamahalagang tungkulin ay ang ituro ang daan patungo sa Tagapagligtas.

Ang propeta ay hindi tumatayo sa pagitan natin at ng Tagapagligtas. Sa halip, tumatayo siya sa ating tabi at itinuturo ang daan patungo sa Tagapagligtas. Ang pinakamalaking responsibilidad at ang pinakamahalagang kaloob sa atin ng propeta ay ang kanyang tapat na patotoo, ang kanyang tiyak na kaalaman, na si Jesus ang Cristo. Tulad ni Pedro noong unang panahon, ipinahahayag ng ating propeta, “[Siya] ang Cristo, ang Anak ng Dios na buhay” [Mateo 16:16]. (Neil L. Andersen, “Ang Propeta ng Diyos,” Liahona, Mayo 2018, 27)

• Ano ang ilang paraan na itinutuon tayo kay Jesucristo ng propeta at ng kanyang mga tagapayo?

  Gamitin ang mga salita ng mga propeta upang mabigyang-diin ang doktrina at mga alituntunin. Ang sumusunod na aktibidad ay nagbibigay sa mga estudyante ng pagkakataong pag-aralan ang mga salita ng mga propeta. Para sa karagdagang pagsasanay kung paano gamitin ang mga salita ng mga propeta, tingnan ang training na may pamagat na “Magturo mula sa mga banal na kasulatan at sa mga salita ng mga propeta sa mga huling araw” sa Mga Kasanayan para sa Pag-unlad ng Guro: Ituro ang Doktrina. Maaari mong praktisin ang kasanayan na “Maghanda ng mga paanyaya na tutulong sa mga estudyante na maiugnay ang mga katotohanang matatagpuan sa mga banal na kasulatan sa sinasabi ng mga buhay na propeta.”

  Bigyan ang mga estudyante ng pagkakataong pag-aralan ang ilang mensahe kamakailan mula sa propeta o sa kanyang mga tagapayo. Maaaring pumili ang mga estudyante ng isang miyembro ng Unang Panguluhan at maghanap ng isa sa kanyang mga pinakahuling mensahe sa pangkalahatang kumperensya sa ChurchofJesusChrist.org. Maaari mong hatiin ang klase sa tatlong grupo, kung saan pag-aaralan ng bawat grupo ang mga salita mula sa isang miyembro ng Unang Panguluhan, at maghahanap sila ng mga turo na sa palagay nila ay mahalagang maunawaan ng mga kabataan. Pagkatapos ay maaaring ibahagi ng mga estudyante ang mga natutuhan nila. Sa bawat turo na ibinahagi, hikayatin ang mga estudyante na pagnilayan at ipahayag kung paano tayo itinutuon nito sa Tagapagligtas na si Jesucristo.

  Maaari mong tapusin ang lesson sa pag-anyaya sa ilang estudyante na ibahagi ang natutuhan at nadama nila ngayon na pinakanauugnay sa kanila. Maaari mong itanong ang tulad ng mga sumusunod:

• Ano ang natutuhan ninyo ngayon na gusto ninyong maalala?

• Kung may magtatanong kung bakit kayo nakikinig sa mga tagubilin ng Unang Panguluhan, ano ang isang bagay na gusto ninyong ipaliwanag sa kanya?

Karagdagang Resources

Ano ang mga halimbawa ng mga susi ng priesthood na ginagamit sa Simbahan ng Panginoon?

Ang Melchizedek Priesthood at ang mga Susi

Nagbahagi si Pangulong Oaks ng mga alituntunin tungkol sa paggamit ng Melchizedek Priesthood sa Simbahan at sa tahanan.

Ipinaliwanag ni Pangulong Dallin H. Oaks ng Unang Panguluhan:

Ang mga mayhawak ng iba-ibang katungkulan sa Aaronic Priesthood ang nangangasiwa sa ordenansa ng sakramento sa ilalim ng mga susi at pamamahala ng bishop, na mayhawak ng mga susi ng Aaronic Priesthood. Ang alituntunin ding ito ang ginagamit sa mga ordenansa ng priesthood na pinangangasiwaan ng mga kababaihan sa templo. Bagama’t ang mga kababaihan ay walang hawak na katungkulan sa priesthood, ginagawa nila ang mga sagradong ordenansa ng templo nang may awtorisasyon ng temple president, na mayhawak ng mga susi para sa mga ordenansa ng templo.

Isa pang halimbawa ng awtoridad ng priesthood sa ilalim ng pamamahala ng isang mayhawak ng mga susi ay ang pagtuturo ng kalalakihan at kababaihan na tinawag na magturo ng ebanghelyo, ito man ay sa mga klase sa ward o sa mission field. Ang iba pang mga halimbawa ay ang mga taong may katungkulan sa ward at ginagamit ang awtoridad ng priesthood sa kanilang pamumuno dahil sa kanilang mga calling at dahil sa pag-set-apart at pamamahala sa kanila ng priesthood leader na mayhawak ng mga susi sa ward o stake. Sa ganitong paraan ginagamit at natatamasa ang awtoridad at kapangyarihan ng priesthood sa Ang Simbahan ni Jesucristo ng mga Banal sa mga Huling Araw. (Dallin H. Oaks, “Ang Melchizedek Priesthood at ang mga Susi,” Liahona, Mayo 2020, 70)

Doktrina at mga Tipan 90:28–31. Sino si Vienna Jaques?

Si Vienna Jaques ay isang miyembro ng Simbahan na nagpakita ng matinding katapatan sa Panginoon at sa Kanyang ipinanumbalik na Simbahan. Tumulong siya na dalhin ang iba kay Cristo at inilaan niya ang kanyang mga ari-arian sa Panginoon. Nagbigay rin siya ng malaking halaga ng pera sa panahong kailangang-kailangan ito.

Si Propetang Joseph Smith (1805–44) ay sumulat kay Vienna Jaques at sinabi rito na ibinulong ito ng Espiritu sa kanyang puso:

Joseph ikaw ay may pagkakautang sa iyong Diyos dahil sa paghahandog ng iyong Kapatid na si Vienna na napatunayang isang [tagapagligtas] ng buhay … , samakatwid hindi mo siya dapat malimutan. (Joseph Smith, in History, 1838–1856, tomo A-1 addenda, josephsmithpapers.org)

Kilalanin pa siya sa sumusunod na resources:

• Doctrine and Covenants Historical Resources, “Vienna Jaques,” ChurchofJesusChrist.org

• “Jaques, Vienna,” josephsmithpapers.org

Mga Karagdagang Aktibidad sa Pag-aaral

Kilalanin ang Unang Panguluhan

Bago talakayin ang ilan sa mga responsibilidad ng Unang Panguluhan, maaari mong sabihin sa mga estudyante na maikling ibahagi ang nalalaman nila tungkol sa mga tagapayo ni Joseph Smith. Maaaring magbahagi ng isa o dalawang katotohanan tungkol sa bawat tagapayo. Para sa tulong, tingnan ang sumusunod:

• Mga Paksa sa Kasaysayan ng Simbahan, “Sidney Rigdon,” ChurchofJesusChrist.org/study/history/topics

• Doctrine and Covenants Historical Resources, “Frederick G. Williams,” ChurchofJesusChrist.org

Maaari ding makilala ng mga estudyante ang kasalukuyang Unang Panguluhan sa pamamagitan ng pag-alam tungkol sa buhay ng bawat miyembro ng Panguluhan. Halimbawa, maaari nilang hanapin ang mga talambuhay ng Unang Panguluhan sa ChurchofJesusChrist.org at tuklasin ang mga detalye tungkol sa kanilang mga pamilya, propesyon, petsa ng kapanganakan, o kung ano ang interes nila noong tinedyer sila.

Maaaring gumawa nang mag-isa ang mga estudyante at pagkatapos ay ibahagi nila ang kanilang natutuhan tungkol sa iba’t ibang miyembro ng Unang Panguluhan.

Maaari mong ituon ang pansin ng mga estudyante sa pahinang “First Presidency” sa ChurchofJesusChrist.org o magbigay ng mga kopya ng impormasyon sa papel.

Ang Panginoon ay nagbibigay ng suporta

Ang pagtatatag ng Unang Panguluhan ay isang paraan para maibigay ng Panginoon kay Joseph Smith ang mga kinakailangang suporta sa kanyang mga responsibilidad. Upang matulungan ang mga estudyante na mailarawan ito sa isipan, maaari mong anyayahan ang isang boluntaryo na bumuhat ng isang magaan na bagay nang nakaderetso ang mga braso sa kanyang harapan hanggang sa makakaya niya nang walang tulong. Kapag nagsimulang mangalay ang mga braso ng estudyante, mag-anyaya ng dalawang estudyante na tumayo sa tabi niya para umalalay o sumuporta. Pagkatapos ay maaari mong ipakita ang sumusunod na larawan at hayaan ang mga estudyante na ibahagi ang nalalaman nila tungkol sa salaysay sa Exodo 17:8–13.

Pagkatapos ay maaari ninyong talakayin ang mga tanong na tulad ng mga ito:

• Kailan kayo natulungan ng iba sa isang bagay na mahirap gawin nang mag-isa?

• Ano ang ilang paraan kung paano binibigyan ni Jesucristo ang mga indibiduwal sa Kanyang Simbahan ng tulong na maaaring kailanganin nila mula sa iba?

Doktrina at mga Tipan 91. Paghiwatig sa katotohanan

Pumili ng isang partikular na paksa at sabihin sa mga estudyante na maglista ng iba’t ibang sources kung saan maaaring makahanap ang isang tao ng impormasyon tungkol dito. Sabihin sa mga estudyante na talakayin kung paano nila malalaman kung totoo ang isang bagay na nabasa nila tungkol sa paksang ito.

Ipaliwanag na ang mga paghahayag na nakatala sa Doktrina at mga Tipan 91 ang nagsabi kay Joseph Smith kung paano niya malalaman kung totoo ang kanyang binabasa. Nang matanggap niya ang paghahayag na ito, nagsasalin si Joseph Smith ng Biblia at napunta siya sa isang bahagi na tinatawag na Apocripa.

Kung interesado ang mga estudyante, maaari mong ibahagi na ang Apocripa ay koleksyon ng mga sagradong aklat na hindi orihinal na kasama sa Biblia ng mga Hebreo (Lumang Tipan) ngunit kabilang sa mga pagsasalin sa Griyego ng Lumang Tipan na ginamit noong panahon ni Jesus. Ang kopya ng Biblia na ginamit ni Joseph Smith sa paggawa ng kanyang inspiradong pagsasalin ay naglalaman ng Apocripa. Sinabi ng Panginoon kay Joseph na hindi niya kinakailangang isalin ang bahaging ito ng Biblia (tingnan sa Doktrina at mga Tipan 91:1–3).

Sabihin sa mga estudyante na basahin ang Doktrina at mga Tipan 91:4–6, at alamin ang ipinayo ng Panginoon kung paano mahihiwatigan ang katotohanan at kamalian sa mga bagay na binabasa, pinanonood, o pinakikinggan natin. Ang doctrinal mastery passage na Doktrina at mga Tipan 8:2–3 ay maaari ding makatulong sa pagtalakay sa paksang ito. Hikayatin ang mga estudyante na maging maingat kapag hindi sila sigurado kung totoo ang impormasyong natuklasan nila.