“105-р хичээл—Сургаал ба Гэрээ 89:18–21: ‘Амлалтыг Их Эзэн бибээр тэдэнд өгч байна,’” Сургаал ба Гэрээний семинарын багшийн гарын авлага (2025)
“Сургаал ба Гэрээ 89:18–21,” Сургаал ба Гэрээний семинарын багшийн гарын авлага
105-р хичээл: Сургаал ба Гэрээ 89–92
Сургаал ба Гэрээ 89:18–21
“Амлалтыг Их Эзэн бибээр тэдэнд өгч байна”
Есүс Христ Мэргэн ухааны үгийг Иосеф Смитэд илчилснийхээ дараа (“Сургаал ба Гэрээ 89:1–17” гэсэн хичээлийг үзнэ үү) энэ илчлэлтэд заасан зарчмуудыг итгэлтэйгээр сахидаг хүмүүст өгдөг зарим адислалыг тайлбарласан. Энэ хичээл Мэргэн ухааны үгээр амьдрахыг сонгох, Аврагчийн амласан адислалуудыг хүлээн авахад суралцагчдад туслах зорилготой.
Боломжит суралцах үйл ажиллагаа
Хаалт
Аврагч бидэнд хайртай учраас хамгаалалт болгон Мэргэн ухааны үгийг өгсөн гэдгийг ойлгоход нь суралцагчдад тусалснаар хичээлээ эхлүүл. Ингэж эхлүүлэх нэг арга зам бол самбарт дараах жишээтэй адилаар, хүний гараар задгай далайгаас тусгаарлан хаалт хийсэн далайн тохойг зурж болох юм.
Далын ахлагч Вон Г.Кийч (1960–2018) далайн эрэг дээр байхдаа үүнтэй төстэй чухал сургамж авсан гэдгийг тайлбарла. Дараах догол мөр, мэдэгдлийг ашиглан түүний туршлагыг хуваалцана уу.
Ахлагч Вон Г.Кийч далайн эргээр алхаж байхдаа, өөр газраас ирсэн бүлэг серфер залуус далайн тохойд болон задгай далайн дунд байрлуулсан хүний барьсан хаалтад дургүйцэж байхтай таарчээ. Серферүүд тохойн гадна замхарч буй том давлагаанд серфинг хийхэд саад болж байгаа хаалт аяллыг нь сүйрүүлж байгаад бухимдангуй гомдоллож байлаа.
Эцэст нь [нутгийн ахимаг насны нэг серфер] босоод, уг бүлэг хүн рүү дөхөн ирсэн юм. Тэр юу ч хэлэлгүй, үүргэвчнээсээ дуран гаргаж ирээд, серферүүдийн нэгэнд өгөн, далайд тавигдсан хаалтын зүг заав. Серфер бүр дурангаар ээлжлэн харлаа. Тэгээд миний ээлж ирж, би томруулах дурангийн тусламжтайгаар, өмнө нь харж чадахгүй байсан нэг зүйлийг харсан юм. Хаалтын нөгөө талд, усан доторх хадны ойролцоо хооллож буй аварга загаснуудын нурууны сэрвээг олж харав. …
Бид тэр үзэсгэлэнт далайн эрэг дээр зогсох үед бидний бодол гэнэт өөрчлөгдсөн байв. Том давлагаанууд дээр гулгах баяр хөөр, таашаалыг үгүй болгосон уг хориг нь хязгаарлалт, саад мэт санагдаж байсан бол одоо огт өөр санагдаж байв. Усны мандлын доохно нүүрлэсэн аюулыг ойлгосон болохоор уг хориг одоо аюулгүй байдал, хамгаалалт, амар амгаланг өгч байгаа мэт санагдаж байлаа. (Вон Г.Кийч, “Бурханы зарлигуудыг сахидаг хүмүүс адислагдаж, аз жаргалтай байдаг,” 2015 оны 10-р сарын Ерөнхий чуулган, 110–111)
-
Ахлагч Кийчийн туршлага бидэнд Бурханы тухай, Түүний зарлигуудын талаар юу зааж болох вэ?
-
Ямар ямар зарлиг биднийг хамгаалах Бурханы хүслийг танд хамгийн сайн харуулж байна вэ? Яагаад?
Та задгай далай, далайн тохой хоёрын хооронд тавьсан хаалтыг “Мэргэн ухааны үг” гэж тэмдэглэж болно. Тэднээс Мэргэн ухааны үгийн талаар санаж байгаа зүйлээ сайн дураараа хуваалцахыг хүс. (Суралцагчид өмнөх хичээл дээр Мэргэн ухааны үгийг тоймлосон товхимол хийсэн бол дэмжлэг авахаар харж болно.)
Сануулга болгон, суралцагчид Мэргэн ухааны үгийг илчлэх Их Эзэний сэдлийг дүрсэлсэн үг хэллэгийг Сургаал ба Гэрээ 89:1–4-өөс уншаад, хуваалцаж болох юм.
Дараа нь дараах асуултуудыг харуулаад, хариултаа судлах тэмдэглэлдээ хариулж бичихэд суралцагчдыг урь.
-
Та Мэргэн ухааны үгийг Тэнгэрлэг Эцэгээс ирсэн адислал гэж хардаг уу эсвэл амьдрал дахь хориг гэж хардаг уу?
-
Мэргэн ухааны үгийг дагадаг хүмүүст Тэнгэрлэг Эцэгийн өгдөг адислалуудын талаар та юу мэдэх вэ?
-
Мэргэн ухааны үгийг сахих нь танд хэр чухал вэ? Яагаад?
Аврагчийн бидэнд өгөхийг хүсдэг адислал
Есүс Христ Мэргэн ухааны үгийг Иосеф Смитэд илчилснийхээ дараа энэ илчлэлтийг итгэлтэйгээр сахидаг хүмүүст Түүний болон Тэнгэрлэг Эцэгийн өгдөг адислалуудыг тайлбарласан.
Сургаал ба Гэрээ 89:18–21-ийг уншаад, Тэдний дуулгавартай хүмүүст өгдөг амлалт бүрийг тэмдэглэ.
Сургаал ба Гэрээ 89:18–21 бол төгс эзэмших сургаалын судрын хэсэг юм. Суралцагчдыг төгс эзэмших сургаалын судрын хэсгийг амархан олохын тулд онцгойлон тэмдэглэхэд урьж болно.
Самбар дээрх далайн тохойн зураг дээр суралцагчид олж мэдсэн адислалуудаа бичиж болно. Хэрэв бид Түүний Мэргэн ухааны үгийг дагавал Их Эзэн биднийг илүү их эрүүл мэнд, мэргэн ухаан, тэсвэр тэвчээр, хамгаалалтаар адислах болно гэдгийг суралцагчид ойлгоход анхаар.
-
Зарим хүнд Их Эзэний өгсөн эдгээр амлалтыг унших үед ямар ямар асуулт төрнө гэж та бодож байна вэ?
Суралцагчдын хуваалцсан асуултууд болон боломжит цаг хугацаанд үндэслэн хичээлийн дараах гурван хэсгээс аль нь суралцагчдад илүү тустай болохыг тодорхойл. Та аль хэсгийг судлахыг хүсэж байгаагаа сонгох боломжийг ангийнханд олгож болно.
Эрүүл мэнд, тэсвэр тэвчээрийн адислал (18, 20-р шүлэг)
Энэ хэсэг нь Их Эзэн Мэргэн ухааны үгийг сахидаг хүмүүст төгс эрүүл мэндийг амлаагүй, харин зөвлөгөөг нь дагаагүй байсан үеийнхээс илүү сайн эрүүл мэндээр адислах болно гэдгийг ойлгоход нь суралцагчдад туслах болно.
Төгс эзэмших сургаалыг судлах үндсэн материал (2023)-ын “Сүнслэг мэдлэг олж авах” хэсгийн 7–8-р догол мөр-ийг унш. Мөн Тэргүүн зөвлөлийн ерөнхийлөгч асан Дийтр Ф.Угдорфын хэлсэн дараах сургаалыг уншина уу. Тэр залуу цэрэг байхад нь Мэргэн ухааны үгийг дагадаггүй зарим цэрэг бие бялдрын бэлтгэлээрээ түүнээс илүү байгааг анзаарч байсан туршлагаа дурсав. Сургаал ба Гэрээ 89:18, 20-д Их Эзэний амласан амлалтуудын талаарх асуултуудад хариулахад нь хэн нэгэнд тус болох үнэнийг олж мэд.
Гэхдээ яваандаа би Бурханы амлалтууд үргэлж хурдан, бидний хүсэн хүлээсэн замаар ирдэггүйг, тэдгээр нь Түүний цагт, Түүний арга замаар ирдэг болохыг ухаарсан юм. Олон жилийн дараа би Бурханы аливаа хуулийг дуулгавартай дагаснаар тэр даруйд ирдэг сүнслэг адислал дээр Мэргэн Ухааны Үгийг дагадаг хүмүүст ирдэг материаллаг адислалыг би олон жилийн тодорхой, бодитоор харсан байх юм. Эргэн санахад, Их Эзэний амлалтууд тэр даруйд ирэхгүй байж болох ч нэгэн цагт заавал ирдгийг би баттай мэднэ. (Дийтр Ф.Угдорф, “Тэвчээрээр үргэлжлүүл,” 2010 оны 4-р сарын Ерөнхий чуулган, 69)
-
Та Мэргэн ухааны үгийг итгэлтэй сахидаг хэдий ч эрүүл мэндийн асуудалтайгаа тэмцэж буй хүнд тус болох Их Эзэн, Түүний амлалтуудын талаар юу олж мэдсэн бэ?
Мэргэн ухаан хийгээд мэдлэгийн адислал (19-р шүлэг)
Сургаал ба Гэрээ 29:34-ийг уншаад, энэ шүлэгт Аврагчийн заасан сургаал Мэргэн ухааны үгтэй хэрхэн холбогдож болохыг бод.
-
Мэргэн ухааны үг нь хэрхэн бие махбодын адислалаас гадна ихэвчлэн сүнслэг адислал болдог вэ?
-
Мэргэн ухааны үгэнд дуулгавартай байх нь Аврагчид биднийг илүү дэлхийн мэргэн ухаан, мэдлэгээр болон илүү сүнслэг мэргэн ухаан, мэдлэгээр адислах боломжийг ямархуу байдлаар олгодог вэ?
-
Мэргэн ухааны үгэнд дуулгавартай байх нь Ариун Сүнсээр дамжуулан Бурханаас илүү бүрэн дүүрэн илчлэлт хүлээн авахад хэрхэн тусалдаг вэ?
Өмнөх асуултад хариулахад нь суралцагчдад туслахын тулд та “Нэмэлт эх сурвалж” хэсгийн ерөнхийлөгч Боид К.Пакэрын эхний үгийг хуваалцахыг хүсэж болно.
Бурхан Өөрийнх нь эрүүл мэндийн хуулийг дагадаг хүмүүсийг адисалдаг гэдгийг нотлохын тулд Даниел “хааны идээг” (Даниел 1:8) хүртэхээс татгалзаж буй энэхүү дүрслэлийг үзүүлж болно. Суралцагчдаас уг түүхийн талаар санаж байгаа зүйлээ хуваалцахыг хүс. Шаардлагатай бол та тэдэнд сануулахын тулд дараах догол мөрөөс заримыг нь хуваалцаж болно.
Даниел болон Вавилонд амьдарч байсан залуучууд хааны мэргэн хүмүүс байхаар сургагдаж, бэлтгэгдсэн байв. Тэдэнд хааны идээнээс өгөхөд тухайн үеийн Их Эзэний эрүүл мэндийн хуулийн улмаас Даниел үүнээс идэхийг татгалзжээ. Хааны зарц Даниел болон бусад залууд уг хөтөлбөрт хамрагдаж буй бусад хөвгүүн шиг эрүүл, ухаалаг байх эсэхийг нь шалгахын тулд 10 хоногийн турш өөр өөр хоол идэх сорилт явуулахыг зөвшөөрөв.
Даниел 1:17–20-ийг уншаад, Бурхан Даниелд болон түүний хамтрагчдад өгсөн мэргэн ухааны мэдлэгийн хийгээд сүнслэг адислалуудын нотолгоог олж мэд.
-
Та Бурханы адислалуудын ямар нотолгоог олсон бэ?
Хамгаалалтын адислал (21-р шүлэг)
Алгасал баярын зургийг үзүүлж, суралцагчдын анхаарлыг хаалганы тотгон дээрх цусанд хандуул. Эртний Египетийг хамарсан ууган хүүхдүүдийн үхлийн тахлаас израилчуудын хамгаалагдсан үе нь “устгагч тэнгэр элчийн” хамгаалалтыг бидэнд сануулж байна гэдгийг тайлбарла. Хурганы цусыг дуулгавартайгаар хаалганыхаа тотгон дээр түрхсэн (Бурханы хурганы цусыг бэлгэдсэн) хүмүүс аврагдсан. Энэхүү хамгаалалтын амлалт нь бие махбодын болон сүнслэг байдлын аюулгүй байдал байж болно.
Самбар дээрх задгай далайн зураг дээр суралцагчид Мэргэн ухааны үгээр дамжуулан Аврагч биднийг ямар ямар аюулаас хамгаалдгийг жагсаан бичиж болно. (Тэд донтолт, өвчин эмгэг, зохисгүй байдал, сэвтсэн харилцаа гэх мэт зүйлсийг жагсааж болох юм.)
Аврагчийн бидэнд санал болгодог сүнслэг хамгаалалтын тухай ярилцахад нь суралцагчдад туслахдаа та “Нэмэлт эх сурвалж” хэсгийн ерөнхийлөгч Пакэрын хоёр дахь үгийг хуваалцаж болно.
-
Мэргэн ухааны үгийг сахиснаараа та амьдралдаа Аврагчийн хамгаалалтын ямар ямар жишээг харж байсан бэ?
Мэргэн ухааны үгэнд дуулгавартай байх нь
Их Эзэн Мэргэн ухааны үгийг сахисны төлөө таныг хэрхэн адисалж байсан тухай гэрчлэхийг бод. Судлах тэмдэглэлдээ дараах асуултад өгсөн хариултаа бичиж тэмдэглэхэд суралцагчдыг урамшуулан дэмж.
-
Мэргэн ухааны үгийн талаар олж мэдсэн зүйл дээрээ үндэслэн, Христээс ирсэн энэ илчлэлтэд дуулгавартай байх нь яагаад танд үнэ цэнтэй вэ?
Мэргэн ухааны үгийг сахихад тань туслах төлөвлөгөө гарга. Танд тулгарах уруу таталт, нөхцөл байдлуудыг эргэцүүлж, тэдгээрийг даван туулах хамгийн сайн арга замыг шийдэж ол. Залбирлаар дамжуулан Тэнгэрлэг Эцэгтэй өөрийн хүсэл, төлөвлөгөөг хуваалцаж мөн амжилтад хүрэхийн тулд Түүний хүч чадлыг хүс.
Цээжил
Та энэ хичээлийн туршид төгс эзэмших сургаалын эшлэл, судрын түлхүүр үг хэллэгүүдийг цээжлэхэд нь суралцагчдад тусалж, дараа дараагийн хичээлүүд дээр давтаж болно. Судрын түлхүүр үг хэллэг нь “Мэргэн ухааны үгийн адислалууд” юм. “Төгс эзэмших сургаалыг давтах үйл ажиллагаа” хэсгийн хавсралт материалуудад цээжлэх үйл ажиллагаанд зориулсан санаанууд бий.