106-р хичээл: Сургаал ба Гэрээ 89–92

Сургаал ба Гэрээ 90

Тэргүүн зөвлөл

Тэргүүн зөвлөл

1833 оны 3-р сард Их Эзэн Иосеф Смитэд Сидней Ригдон, Фредерик Г.Виллямс хоёрыг Тэргүүн зөвлөлийн зөвлөхүүдээр онцгойлон адислахыг зааварлав. Ерөнхийлөгчийн зөвлөлийн хувьд эдгээр гурван эр дэлхий дээр Их Эзэний хаант улсыг тэргүүлэх боломжийг олгосон санваарын түлхүүрүүдийг атгаж байсан. Энэ хичээл Есүс Христийн Тэргүүн зөвлөлөөрөө дамжуулан Есүс Христийн Хожмын Үеийн Гэгээнтнүүдийн Сүмд өгдөг удирдамжийн ач холбогдлыг мэдрэхэд суралцагчдад тусална.

Боломжит суралцах үйл ажиллагаа

Түлхүүрүүдийг атгаснаар ашиглах боломжтой болдог

Хичээлээ эхлүүлэх нэг арга бол шаардлагатай үед түлхүүрүүд нь онцгой зүйлсийг ашиглах боломжийг бидэнд олгодог гэдгийг харуулах явдал юм. Та суралцагчдыг аюулгүй байлгахад чухал гэж бодож буй зүйлсээ жижиг цаасан дээр бичихэд урьж болно. Тэднийг бичсэн зүйлээ мөн яагаад бичсэнээ сайн дураараа хуваалцахад урь. Цааснуудыг цуглуулж, зөвхөн түлхүүрээр онгойлгож авах боломжтой газарт цоожил. Цааснуудыг түлхүүрээр цоожилдог хайрцагт хадгалах боломжгүй бол цааснуудаа хайрцагт хийж, цоожлогдсон байгаагаар төсөөлөхөд суралцагчдыг урь. Суралцагчдад түлхүүр үзүүлээд, уг түлхүүрийн үнэ цэнийн тухай бодоход тэднийг урь. Доорх асуултуудыг тавьж болно.

• Таны амьдралд түлхүүрээр онгойлгож авах боломжтой ямар ямар чухал зүйл байдаг вэ?

• Та хэнд итгэж уг түлхүүрийг ашиглаж, хамгаалуулах вэ? Яагаад?

Аврагч Есүс Христийн Хожмын Үеийн Гэгээнтнүүдийн Сүмд ашигладаг санваарын түлхүүрүүдийг атгадгийг тайлбарлаж болно. Суралцагчдыг өнөөдөр судлах явцдаа, Тэрээр эдгээр түлхүүрийг дэлхий дээр хэнд даатгадаг, тэдгээр нь бидэнд юуг олж авахад тусалдаг талаар бодоход урь.

Есүс Христ Тэргүүн зөвлөлийг зохион байгуулав

Суралцагчдаар доорх хэсгийг судлуулахаар бэлтгэхдээ та 1833 оны Тэргүүн зөвлөлийн зургийг (энэ хичээлийн үндсэн зургийг үзнэ үү) үзүүлж, дараах мэдээллийн заримыг өгч болно. Үүнд:

Өнөөдрийн Тэргүүн зөвлөлийг анх Дээд санваарын ерөнхийлөгчийн зөвлөл гэж нэрлэдэг байв. 1833 оны 3-р сард Сидней Ригдон, Фредерик Г.Виллямс хоёр бошиглогч Иосеф Смитийн зөвлөхүүдээр дуудагдаж, онцгойлон адислагдсанаар энэхүү ерөнхийлөгчийн зөвлөлийг байгуулсан. Сургаал ба Гэрээ 90-д Их Эзэн Тэргүүн зөвлөлийн үүрэг хариуцлагын талаарх зааврыг Иосеф Смитэд илчилжээ.

Сургаал ба Гэрээ 90:1–3, 6-г уншаад, Бурхан Иосеф Смит, Сидней Ригдон, Фредерик Г.Виллямс нарт юуг даатгасныг олж мэд.

• Их Эзэн энэ хүмүүст ямар үүрэг хариуцлага өгсөн бэ?

  Санваарын түлхүүрүүдийн талаар ойлгосон зүйлээ хуваалцах боломжийг суралцагчдад олго. Мөн суралцагчдад санваарын түлхүүрүүд, Их Эзэний Сүмийн зохион байгуулалтын талаар асуумаар байгаа зүйлсээ асуух цагийг гаргаж өг. Шаардлагатай бол та суралцагчдыг Судруудын удирдамж дээрээс “Санваарын түлхүүрүүд” (scriptures.ChurchofJesusChrist.org) гэж хайгаад, илүү ихийг олж мэдэж, мэдсэн зүйлээ хуваалцахад урьж болно.

• Их Эзэн Өөрийн Сүмийг хэрхэн удирддаг талаар бид эдгээр шүлгээс юу сурч мэдэж болох вэ?

Суралцагчид бидний сурч болох хэд хэдэн үнэнийг дурдаж магадгүй. Есүс Христ Тэргүүн зөвлөлдөө өгсөн санваарын түлхүүрүүдээр дамжуулан дэлхий дээрх Өөрийн Сүмийг удирддаг гэх үнэнийг та онцолж болох юм.

Суралцагчдад энэ үнэний ач холбогдлыг ойлгож, мэдрэхэд нь туслахын тулд ChurchofJesusChrist.org дээрх “Where Are the Keys?” (2:51) видеог үзүүлж болно.

Мөн та дараах мэдэгдлийг үзүүлж бас ярилцаж болно.

Арван хоёр төлөөлөгчийн чуулгын ахлагч Д.Тодд Кристоффэрсон Аврагчийн бидний амьдралыг адислахын тулд Өөрийн Сүм дэх түлхүүрүүдийг ашигладаг арга замуудыг тайлбарласан.

Ахлагч Д.Тодд Кристоффэрсон

Эдгээр түлхүүрийн эрх мэдлээр Сүмийн санваарын удирдагчид Аврагчийн сургаалын цэвэр ариун байдал, авралын ёслолуудын үнэнч шударга байдлыг хадгалдаг. Тэд уг сургаал болон ёслолуудыг хүлээн авах хүсэлтэй хүмүүсийг бэлтгэгдэхэд нь туслан, хүртэхийг хүссэн хүмүүс шаардлага хангасан, зохистой эсэхийг нь тодорхойлж, ёслолуудыг хийдэг.

Их Эзэний үйлчлэгчид хаант улсын түлхүүрээр үнэн, худлын аль алиныг олж тогтоон, “Их Эзэн ийн хэлэв” хэмээн эрх мэдэлтэйгээр дахин хэлэх боломжтой. (Д.Тодд Кристоффэрсон, “Сүм яагаад хэрэгтэй вэ?,” 2015 оны 10-р сарын Ерөнхий чуулган, 103–104)

• Есүс Христ Өөрийн сүм дэх санваарын түлхүүрүүдийг хэрхэн ашигладаг арга замаас нь бид Түүний тухай юу сурч болох вэ?

Тэргүүн зөвлөлийн үүргийг илүү сайн ойлгоход нь суралцагчдад туслахын тулд та тэднийг судлах тэмдэглэлдээ дараах хүснэгтийг зурж, бөглөхөд урьж болно. Суралцагчдад хамтрагчтайгаа эсвэл жижиг бүлгээрээ унших, ярилцах, ойлгосон зүйлээ хуваалцах замаар суралцах боломж олго.

Судрууд	Их Эзэн Тэргүүн зөвлөлөөр дамжуулан биднийг хэрхэн адисалдаг вэ?
Сургаал ба Гэрээ 90:9 (Энэ шүлэгт “чиний” гэж Тэргүүн зөвлөлийг, “тэд” гэж Сүмийн ахлагчдыг хэлж байна.)
Сургаал ба Гэрээ 90:14–16
Сургаал ба Гэрээ 107:8–9
Сургаал ба Гэрээ 107:33
Сургаал ба Гэрээ 120-р хэсгийн гарчиг ба 1-р шүлэг
Сургаал ба Гэрээ 124:125–126

Тэргүүн зөвлөл ба Бурханы зөгнөлүүд

Энэ хэсэг Их Эзэн Тэргүүн зөвлөлд өгдөг илчлэлтээрээ дамжуулан Өөрийн Сүмийг удирддаг гэдгийг ойлгоход суралцагчдад тусална. Эдгээр хэсэг дэх “Бурханы зөгнөлүүд” (Сургаал ба Гэрээ 90:4–5) гэдэг нь Их Эзэний сонгосон удирдагчдадаа өгсөн илчлэлтүүдийг хэлж буйг тайлбарлана уу.

Сургаал ба Гэрээ 90:4–5-ыг уншаад, Их Эзэн Тэргүүн зөвлөлөөрөө дамжуулан бидэнд өгдөг зөгнөлүүдийн (эсвэл илчлэлтүүдийн) талаар ямар сэтгэгдэлтэй байдгийг олж мэд.

• Та эдгээр шүлгээс юу сурч байна вэ?

• Та хэзээ Бурханы илчлэлтүүд таныг амьдралын шуурганаас хамгаалдаг гэдгийг мэдэрч байсан бэ?

Арван хоёр төлөөлөгчийн чуулгын ахлагч Нийл Л.Андэрсэн Их Эзэний бошиглогчийн хамгийн агуу үүрэг хариуцлагыг тайлбарласан.

Ахлагч Нийл Л.Андэрсэн

Бошиглогч Аврагч болон бидний хооронд зогсдоггүй. Харин тэр бидний хажууд зогсон, Аврагч руу очих замыг заадаг. Бошиглогчийн хамгийн агуу үүрэг хариуцлага, бидэнд өгдөг хамгийн үнэ цэнтэй бэлэг нь Есүс бол Христ гэсэн түүний баттай гэрч, тодорхой мэдлэг юм. Эртний Петрийн адил бошиглогч маань “[Тэр бол] Христ, амьд Бурханы Хүү” [Maтай 16:16] хэмээн тунхагладаг. (Ахлагч Нийл Л.Андэрсэн, “Бурханы бошиглогч,” 2018 оны 4-р сарын Ерөнхий чуулган, 32)

• Бошиглогч болон түүний зөвлөхүүд ямар арга замаар биднийг Есүс Христ рүү чиглүүлдэг вэ?

  Сургаал, зарчмуудыг онцлохдоо бошиглогчдын үгсийг ашиглана уу. Дараах үйл ажиллагаа нь суралцагчдад бошиглогчдын үгсийг судлах боломжийг олгодог. Бошиглогчдын үгсийг хэрхэн ашиглах тал дээр илүү их дадлага хийхийн тулд Багшийн хөгжүүлбэл зохих ур чадвар: Сургаалыг заа гарын авлагын “Судруудаас болон хожмын үеийн бошиглогчдын үгсээс заа” гэсэн гарчигтай сургалтыг үзнэ үү. “Судруудад байгаа үнэнийг амьд бошиглогчдын хэлж буй зүйлтэй холбоход суралцагчдад туслах урилга бэлтгэх” ур чадвараар дадлага хийх талаар бодож үз.

  Бошиглогч, түүний зөвлөхүүдийн сүүлд хэлсэн зарим захиасыг судлах боломжийг суралцагчдад олго. Суралцагчид Тэргүүн зөвлөлийн нэг гишүүнийг сонгоод, ChurchofJesusChrist.org дээрх хамгийн сүүлийн Ерөнхий чуулган дээр түүний хэлсэн нэг үгийг хайж болно. Та ангиа гурван бүлэгт хувааж болох ба бүлэг бүр Тэргүүн зөвлөлийн нэг гишүүний үгсийг судалж, өсвөр үеийнхэнд ойлгоход чухал гэж мэдэрч буй сургаалыг хайж олно. Дараа нь суралцагчид олж мэдсэн зүйлсээ тайлагнах болно. Суралцагчдыг сургаал тус бүрээ хуваалцахдаа энэ нь хэрхэн биднийг Аврагч Есүс Христ рүү чиглүүлж буйг тунгаан бодож, илэрхийлэхэд урамшуулан дэмж.

  Та цөөн суралцагчийг өнөөдөр тэдэнд хамгийн их хамааралтай юуг сурч мэдэрснээ хуваалцахад урьснаар хичээлээ дуусгаж болох юм. Дараахтай адил асуултуудыг тавих талаар бодож үз.

• Та өнөөдөр санаж явмаар юу сурсан бэ?

• Хэрэв хэн нэгэн танаас яагаад Тэргүүн зөвлөлийн удирдамжийг сонсдогийг асуувал таны тэдэнд тайлбарлахыг хүсэх байсан нэг зүйл юу вэ?

Нэмэлт эх сурвалж

Их Эзэний Сүмд санваарын түлхүүрүүдийг ашигладаг ямар ямар жишээ байдаг вэ?

Тэргүүн зөвлөлийн ерөнхийлөгч Даллин Х.Өүкс ийн тайлбарласан.

Ерөнхийлөгч Даллин Х.Өүкс

Аароны санваарын янз бүрийн албанд томилогдсон хүмүүс Аароны санваарын түлхүүрүүдийг атгадаг бишопын түлхүүр, удирдлаган доор ариун ёслолын цуглаан дээр ариун ёслолыг гүйцэтгэдэг. Яг энэ зарчмыг ариун сүмд эмэгтэйчүүдийн гүйцэтгэдэг санваарын ёслолуудад баримталдаг. Хэдийгээр эмэгтэйчүүдийг санваарын албанд томилдоггүй ч тэд ариун сүмийн ёслолын түлхүүрүүдийг атгадаг ариун сүмийн ерөнхийлөгчийн удирдлаган доор ариун сүмийн ариун нандин ёслолуудыг гүйцэтгэдэг.

Түлхүүрүүдийг атгадаг хүмүүсийн удирдлаган доор байдаг санваарын эрх мэдлийн өөр нэгэн жишээ бол анги, гэр орон, номлолын талбарт хаа байхаас үл хамааран сайн мэдээг заахаар дуудагдсан эрэгтэй, эмэгтэй хүмүүсийн заах эрх юм. Өөр жишээнүүд бол тойрогтоо удирдах албанд томилогдсон, дуудлагынхаа хүрээнд мөн тойрог, гадасны түлхүүрүүдийг атгадаг санваарын удирдагчдаар онцгойлон адислагдаж, тэдний удирдлаган доор ашигладаг санваарын эрх мэдэлтэй хүмүүс билээ. Ийм маягаар Есүс Христийн Хожмын Үеийн Гэгээнтнүүдийн Сүмд санваарын эрх мэдэл, хүчийг ашиглаж, эрхийг нь эдэлдэг. (Даллин Х.Өүкс, “Мелкизедек санваар ба түлхүүрүүд,” 2020 оны 4-р сарын Ерөнхий чуулган, 83)

Сургаал ба Гэрээ 90:28–31. Виенна Жак гэж хэн бэ?

Виенна Жак битүү тэрэгний хажууд алхаж байгаа нь

Виенна Жак бол Их Эзэнд болон Түүний сэргээгдсэн Сүмд агуу итгэлтэй байдлыг харуулсан Сүмийн нэгэн гишүүн байсан. Тэр бусдыг Христэд авчирч, Их Эзэнд эд хөрөнгөө зориулсан юм. Мөн тэрээр мөнгө хамгийн их хэрэгтэй байсан тухайн үед их хэмжээний мөнгө хандивлажээ.

Бошиглогч Иосеф Смит (1805–1844) Виенна Жакт захидал бичиж, Сүнс түүний зүрх сэтгэлд ийн шивнэсэн хэмээн хэлсэн.

Бошиглогч Иосеф Смит

Иосеф та амьдралын [аврагч] болсон Виенна эгчийн өргөлийн улмаас Бурхандаа өртэй бөлгөө … , мөн түүнчлэн та түүнийг мартах ёсгүй. (Joseph Smith, in History, 1838–1856, volume A-1 addenda, josephsmithpapers.org)

Дараах эх сурвалжаас түүний талаар илүү ихийг олж мэд. Үүнд:

• Doctrine and Covenants Historical Resources, “Vienna Jaques,” ChurchofJesusChrist.org

• “Jaques, Vienna,” josephsmithpapers.org

Нэмэлт суралцах үйл ажиллагаа

Тэргүүн зөвлөлийг таньж мэдэх

Тэргүүн зөвлөлийн зарим үүрэг хариуцлагын талаар ярихын өмнө та Иосеф Смитийн зөвлөхүүдийн талаар мэддэг зүйлээ товч хуваалцахыг суралцагчдаас хүсэж болно. Зөвлөх тус бүрийн тухай нэг юм уу хоёр баримт хуваалцахыг бод. Тусламж хэрэгтэй бол дараахыг үзнэ үү. Үүнд:

• Church History Topics, “Sidney Rigdon,” ChurchofJesusChrist.org/study/history/topics

• Doctrine and Covenants Historical Resources, “Frederick G. Williams,” ChurchofJesusChrist.org

Суралцагчид мөн тус бүрдээ Тэргүүн зөвлөлийн нэг гишүүний амьдралыг судлах замаар одоогийн Тэргүүн зөвлөлтэй танилцаж болно. Тухайлбал: Тэд ChurchofJesusChrist.org дээрээс тэдний намтрыг хайж олж, тэдний гэр бүл, ажил мэргэжлийн амьдрал, төрсөн огноо, өсвөр насандаа юу сонирхдог байсан талаар дэлгэрэнгүй мэдээллийг олж болно.

Суралцагчид бие даан ажиллаад, дараа нь Тэргүүн зөвлөлийн өөр гишүүдийн талаар судалсан суралцагчидтай олж мэдсэн зүйлээ хуваалцаж болно.

Та суралцагчдыг ChurchofJesusChrist.org дээрх “First Presidency” гэсэн хуудас руу чиглүүлэх юм уу уг мэдээллийн цаасан хуулбарыг тэдэнд өгч болно.

Их Эзэн дэмжлэг үзүүлдэг

Тэргүүн зөвлөлийг байгуулсан нь Их Эзэн Иосеф Смитийг үүрэг хариуцлагаа биелүүлэхэд нь шаардлагатай дэмжлэгээр хангасан нэг арга зам байсан. Суралцагчдад үүнийг төсөөлөхөд нь туслахын тулд та сайн дураараа нэг суралцагчийг ямар ч тусламжгүйгээр бага хэмжээтэй жинг гартаа барьж, урагш сунгаад аль болох удаан байхад урьж болно. Тухайн суралцагчийн гар цуцаж эхлэх үед хоёр суралцагчийг түүний хажууд зогсоод, жинг өргөхөд нь дэмжлэг үзүүлэхэд урь. Дараа нь та доорх зургийг үзүүлээд, суралцагчдад Гэтлэл 17:8–13 дээрх түүхийн талаар юу мэддэгээ хуваалцах боломжийг олго.

Мосег Аарон, Хур хоёр дэмжиж байгаа нь

Дараа нь та дараахтай адил асуултуудыг авч үзэн ярилцаж болно. Үүнд:

• Бусад хүн хэзээ танд ганцаараа хийхэд хэцүү зүйлд тусалж байсан бэ?

• Есүс Христ Сүм дэх хувь хүмүүст бусдаас хэрэгтэй дэмжлэгийг ямар арга замаар өгдөг вэ?

Сургаал ба Гэрээ 91. Үнэнийг ялган таних

Тодорхой нэг сэдвийг сонгоод, хэн нэгний уг сэдвээр мэдээлэл олж болох өөр өөр эх сурвалжийг жагсаан бичихэд суралцагчдыг урь. Энэ сэдвээр уншсан зүйл нь үнэн эсэхийг хэрхэн мэдэх талаар ярилцахыг суралцагчдаас хүс.

Сургаал ба Гэрээ 91-д цэдэглэгдсэн илчлэлт нь Иосеф Смитийн уншиж буй зүйл үнэн эсэхийг хэрхэн ялган таних талаар түүнд хэлсэн зүйл гэдгийг тайлбарла. Иосеф Смит энэ илчлэлтийг хүлээн авах үедээ Библийг орчуулж байсан ба Апокриф хэмээх хэсэг дээр ирсэн байсан.

Хэрэв суралцагчид сонирхвол Апокриф нь анх еврей Библи (Хуучин Гэрээ)-д ороогүй байсан ч Христийн үеийн Хуучин Гэрээний грек хэлээр орчуулагдсан хувилбарт орсон ариун номуудын цуглуулга гэдгийг та хуваалцаж болно. Иосеф Смитийн сүнсээр удирдуулан орчуулж байхдаа ашигласан Библийн хувилбарт Апокрифыг багтаасан байдаг. Их Эзэн Библийн энэ хэсгийг орчуулах шаардлагагүй хэмээн Иосефт хэлжээ Сургаал ба Гэрээ 91:1–3-ыг үзнэ үү).

Бидний уншиж, үзэж, сонсож байгаа зүйл доторх буруу зүйлээс үнэнийг хэрхэн ялган таних талаарх Их Эзэний зөвлөгөөг Сургаал ба Гэрээ 91:4–6-г уншаад олж мэдэхэд суралцагчдыг урь. Төгс эзэмших сургаал болох Сургаал ба Гэрээ 8:2–3 нь энэ сэдвээр ярилцахад мөн тустай байж болно. Суралцагчдыг олж мэдсэн мэдээллийнхээ үнэн эсэхэд эргэлзэх үедээ болгоомжтой байхад урамшуул.