Դաս 109․ Վարդապետություն և Ուխտեր 93

Գնահատեք ձեր գիտելիքները 7

Վարդապետություն և Ուխտեր 84–93

Խորհրդածելով մեր հոգևոր ուսման շուրջ և գնահատելով այն՝ կօգնենք մեզ ավելի մոտենալ Հիսուս Քրիստոսին: Այս դասը կօգնի ուսանողներին հիշել և գնահատել այն հոգևոր աճը, որ նրանք ունեցել են Վարդապետություն և Ուխտեր սուրբ գրության ուսումնասիրության միջոցով:

Հնարավոր ուսումնական վարժություններ

Առաջընթաց

Կարող եք գրատախտակին գրել առաջընթաց բառը։

Կարող եք նաև ցուցադրել առաջընթացի գծապատկերը, ինչպես հետևյալը․

• Ի՞նչ օրինակներ գիտեք, որոնց առաջընթացին մենք կարող ենք հետևել:

  Օրինակները կարող են ներառել՝ մեր կրթությունը, մեր սահմանած նպատակները, ուղղությունները, ուր մենք ճամփորդում ենք, կամ այն, ինչ մենք կարող ենք գնել ու ներբեռնել համացանցից:

• Ինչո՞ւ է օգտակար տեղյակ լինել այս բաների առաջընթացի մասին։

Այս դասում դուք կգնահատեք այն հոգևոր առաջընթացը, որը դուք ունենում եք Վարդապետություն և Ուխտեր սուրբ գրության ուսումնասիրության միջոցով: Դա ձեզ հնարավորություն կտա նշել ձեր հաջողությունները և կատարել անհրաժեշտ ճշգրտումները:

• Ի՞նչ եղանակներով եք դուք հոգևոր առաջընթաց ունեցել Վարդապետություն և Ուխտեր սուրբ գրությունն ուսումնասիրելիս:

Հնարավոր է, Վարդապետություն և Ուխտեր 84–93 բաժինների ուսումնասիրության դասերն ուսուցանելիս դուք ընդգծել եք այլ ճշմարտություններ՝ ոչ հետևյալ վարժություններում գնահատվածները։ Անհրաժեշտության դեպքում հարմարեցրեք հետևյալ վարժությունները, որպեսզի օգնեք ուսանողներին գնահատել իրենց այն ճշմարտությունների վերաբերյալ, որոնք դասարանում ավելի շատ են ընդգծվել։

Բացատրեք Հիսուս Քրիստոսի դերերը, տիտղոսներն ու հատկանիշները

Կարող եք ցուցադրել Հիսուս Քրիստոսի նկարը՝ հետևյալով կիսվելուց առաջ։

Վարդապետություն և Ուխտեր սուրբ գրությունում Փրկչի հրավերներից մեկն է՝ «սովորել [Նրանից] և լսել [Նրա] խոսքերը» (Վարդապետություն և Ուխտեր 19․23):

• Ի՞նչ սովորեցիք Հիսուս Քրիստոսի մասին Վարդապետություն և Ուխտեր սուրբ գրության ձեր վերջին ուսումնասիրության ընթացքում:

  Դասի այս հատվածը նախատեսված է օգնելու ուսանողներին բացատրել Հիսուս Քրիստոսի որոշ հատուկ դերեր, կոչումներ կամ հատկություններ։ Կարող եք հետևյալ տարբերակներից մեկը կամ մի քանիսը ցուցադրել և ուսանողներին ժամանակ տրամադրել՝ դրանցից մեկը կատարելու համար: Ուսանողները կարող են աշխատել այս վարժության վրա անհատապես կամ զույգերով

  Օգտակար կլինի ցուցադրել սուրբ գրությունների մի քանի հղում, որոնք ուսանողները վերջերս ուսումնասիրել են, և որոնք նկարագրում են Հիսուս Քրիստոսի դերերը կամ տիտղոսները։ Ուսանողները կարող են կրկնել դրանք՝ որպես վարժության մաս: Օրինակները կարող են ներառել․ Վարդապետություն և Ուխտեր 76.1–7, 22–24, 88.1–13, 41, 93.1–10։

• Կազմեք Հիսուս Քրիստոսի այն անունների կամ տիտղոսների ցանկը, որոնք դուք վերջերս ուսումնասիրել եք: Այնուհետև ընտրեք դրանցից մեկը կամ մի քանիսը և պատասխանեք հետևյալ հարցերին. (1) Այս անունը կամ տիտղոսը ի՞նչ է ձեզ ուսուցանում Հիսուս Քրիստոսի մասին: (2) Այս անունը կամ տիտղոսը ի՞նչ է օգնում ձեզ հասկանալ այն մասին, թե Նա ինչպես կարող է օգնել ձեզ:

• Ստեղծեք Հիսուս Քրիստոսի ձեր սիրած որոշ դերերի կամ տիտղոսների պատկեր՝ տեսողական եղանակով դրանք ներկայացնելու համար։ Դա կարող է լինել բառերի ամպ կամ նկար, որը ներկայացնում է ձեր ընտրած դերերից կամ տիտղոսներից մեկը կամ մի քանիսը: Ներառեք կիրառելի սուրբ գրությունների հղումները՝ որպես ձեր ստեղծագործության մաս:

• Գրեք բանաստեղծություն կամ երգի բառեր, որոնք ներառում են Հիսուս Քրիստոսի ձեր սիրելի դերերից կամ տիտղոսներից մի քանիսը:

• Պատկերացրեք, որ դուք հնարավորություն ունեիք որևէ մեկին ուսուցանելու, թե ով է Հիսուս Քրիստոսը և Նա ինչ կարող է անել մեզ համար: Գրեք առնվազն մեկ պարբերության ծավալով նկարագրություն, որը ներառում է Քրիստոսի դերերից կամ տիտղոսներից առնվազն երեքը:

Ուսանողներին բավարար ժամանակ տվեք՝ իրենց ընտրած վարժությունը կատարելու համար, այնուհետև նրանց հնարավորություն տվեք կիսվել իրենց կատարածով: Եթե նրանք աշխատել են անհատապես, կարող են կիսվել դասընկերոջ կամ փոքր խմբի հետ: Եթե նրանք աշխատել են այլ ուսանողների հետ, կարող են կիսվել մեկ այլ խմբի հետ: Կարող եք նաև մի քանի պատրաստակամ ուսանողի առաջարկել կիսվել իրենց կատարածով ամբողջ դասարանի հետ:

Ավելի մեծ ցանկություն զգացեք Հիսուս Քրիստոսին ավելի մոտենալու համար

Գնահատման հետևյալ վարժությունը վերաբերում է Վարդապետություն և Ուխտեր 88․63 հատվածում Փրկչի հրավերին՝ ավելի մոտենալ Իրեն: Եթե կիրառելի է, կարող եք ուսանողներին հիշեցնել «Վարդապետություն և Ուխտեր 88:51–95» դասի որոշ ուսումնական վարժություններ, որպեսզի օգնեք նրանց հիշել, թե ինչ են սովորել և զգացել:

Օրինակ, եթե օգտագործել եք մագնիսները որպես առարկայական դաս, կարող եք վերցնել երկու մագնիս և առաջարկել ուսանողներին կիսվել, թե ինչ են հիշում այդ դասից: Եթե ուսանողներն իրենց ուսումնասիրության օրագրերում ստեղծել էին նկարներ, որոնք ներկայացնում էին, թե որքան մոտ էին իրենք իրենց զգում այդ ժամանակ Երկնային Հորը և Հիսուս Քրիստոսին, կարող եք առաջարկել նրանց գտնել այդ նկարները, որպեսզի համեմատեն, թե ինչ են զգում հիմա և ինչ էին զգում այն ժամանակ:

Հնարավոր է, դուք հիշում եք Վարդապետություն և Ուխտեր 88.63 հատվածում Փրկիչի մի կարևոր հրավերի ուսումնասիրությունը։ Կարդացեք այդ հատվածը՝ Փրկչի հրավերը կրկնելու համար:

Ուսանողներին հնարավորություն տվեք գնահատել Հիսուս Քրիստոսին ավելի մոտենալու իրենց ցանկությունը՝ իրենց ուսումնասիրության օրագրերում պատասխանելով հետևյալ հարցերին:

• Հիսուս Քրիստոսին մոտենալու այսօրվա ձեր ցանկությունը ինչպե՞ս է համեմատվում այդ ցանկության հետ մի քանի շաբաթ կամ ամիս առաջ (ավելի քիչ, համարյա նույնը կամ ավելի շատ):

• Ի՞նչ եք սովորել կամ զգացել, որն ազդել է ձեր ցանկությունների վրա:

• Ի՞նչ գործողություններ եք ձեռնարկել՝ Քրիստոսին ավելի մոտենալու համար: Ի՞նչ գործողություններ եք ցանկանում ձեռնարկել՝ Քրիստոսին ավելի մոտենալու համար:

Իրենց պատասխանները գրելու համար ուսանողներին բավարար ժամանակ տալուց հետո մի քանի կամավորի առաջարկեք դասարանի հետ կիսվել իրենց պատասխաններից մի քանիսով։

Կիրառելու առաջարկներ

Որպես սեմինարիայում ձեր ուսումնասիրության մաս, ձեզ կարող է առաջարկվել սուրբ գրություններից որոշակի հրավերներ կիրառել ձեր կյանքում:

Հիշեք մի քանի նպատակ, որ դրել եք ինքներդ ձեր առջև, կամ այն հոգևոր տպավորությունները, որոնք ունեցել եք ուսումնասիրության ընթացքում: Դուք կարող եք դա անել՝ նայելով ձեր ուսումնասիրության օրագիրը կամ գտնելով սուրբ գրություններ, որոնք վերջերս նշել եք։

Եթե հնարավոր է, կիսվեք որոշակի առաջարկներով, որոնք դուք արել եք ուսանողներին վերջին դասերի ժամանակ։ Օրինակ՝ դուք կարող եք հրավիրել առաջարկել ուսանողներին իրենց առջև դնել հետևյալ նպատակները․

• Հետևել Հիսուս Քրիստոսի հետևյալ հրավերին․ «ուսում փնտրեք, այսինքն՝ ուսումնասիրելով և նաև հավատքով» (Վարդապետություն և Ուխտեր 88.118):

• Հնազանդվել Իմաստության Խոսքում պարունակվող Փրկչի ուսմունքներին (տես Վարդապետություն և Ուխտեր 89)։

• Ստանալ ավելի շատ Քրիստոսի լույսն ու ճշմարտությունը իրենց կյանքում (տես Վարդապետություն և Ուխտեր 93․19–20, 27–28)։

Երբ ուսանողները բավարար ժամանակ ունենան վերանայելու իրենց առջև դրված նպատակը, նրանց ժամանակ տվեք գնահատելու իրենց առաջընթացը՝ տալով նրանց հետևյալ հարցերը.

• Ի՞նչ ջանքեր եք գործադրել Հիսուս Քրիստոսի այս ուսմունքները ձեր կյանքում կիրառելու համար:

• Ի՞նչ փոփոխությունների են առաջացրել այս ջանքերը ձեր կյանքում և Աստծո հետ ձեր հարաբերություններում:

• Ձեր կարծիքով, որո՞նք պետք է լինեն ձեր հաջորդ քայլերն այս ուղղություններով: