Lesson 111: Doktrina at mga Tipan 94–97

Doktrina at mga Tipan 97

Sion—Ang May Dalisay na Puso

Habang dumaranas ng matinding pang-uusig, nais malaman ng mga Banal sa lupain ng Sion (Jackson County, Missouri) ang kalooban ng Panginoon para sa kanila. Itinuro sa kanila ng Panginoon ang mga pagpapala ng pagkakaroon ng dalisay na puso. Ang lesson na ito ay makatutulong sa mga estudyante na magkaroon ng dalisay na puso.

Mga Posibleng Aktibidad sa Pag-aaral

Purong tubig

Maaari mong simulan ang klase sa isang object lesson gamit ang tubig. Ipakita sa klase ang purong tubig, at talakayin ang mga pagpapala ng purong tubig at ang mga epekto ng paggamit ng maruming tubig. Matutulungan mo ang mga estudyante na paghambingin ang mga pagpapala ng purong tubig at ang mga pagpapala ng pagkakaroon ng dalisay na puso.

• Ano ang ilang pakinabang ng pagkakaroon ng malinis at purong tubig?

• Kapag marumi ang tubig, ano ang ilang paraan para linisin ito?

• Paano maihahambing ang purong tubig sa dalisay na puso?

Sa Doktrina at mga Tipan 97, ipinahayag ng Panginoon ang Kanyang mga hangarin na magkaroon ang Kanyang mga tao ng dalisay na puso. Habang nag-aaral ka ngayon, isipin ang kalagayan ng iyong puso. Maghangad ng inspirasyon na maunawaan ang mga pagpapala ng pagtutulot sa Panginoon na dalisayin ang iyong puso.

Ang Sion ay ang may dalisay na puso

Isang grupo ng mga elder sa “Sion,” na isang pangalan na ginagamit noong panahong iyon kapag tinutukoy ang Jackson County, Missouri, ang nagnais na malaman ang kalooban ng Panginoon para sa kanila, kaya sumulat sila ng liham kay Joseph Smith para humingi ng mga sagot. Bilang tugon, inilarawan ng Panginoon ang magagandang plano para sa paaralan, Simbahan, at maging sa templo sa lupain ng Sion. Upang mahikayat ang mga Banal na maging dalisay at tanggapin Siya, inihambing sila ng Panginoon sa dalawang punungkahoy: ang isa ay puputulin at ang isa ay mabunga (tingnan sa Doktrina at mga Tipan 97:1–10). Tulad ng pagtawag ng Panginoon sa mga tao ni Enoc na Sion (tingnan sa Moises 7:18), gustong tawagin ng Panginoon ang Kanyang mga Banal sa mga huling araw na Sion. Nais Niya na sila ay maging katulad Niya, hindi lamang basta manirahan sa isang lugar na tinatawag na Sion.

Basahin ang Doktrina at mga Tipan 97:21, at alamin kung paano inilarawan ng Panginoon ang Sion.

Maaari mong isulat sa pisara ang Ang Sion ay ang may dalisay na puso. Maaari mong sabihin sa mga estudyante na markahan ang mga salita sa kanilang banal na kasulatan na nagtuturo ng katotohanang ito.

Kung kailangan ng mga estudyante ng tulong sa pagsagot sa sumusunod na tanong, maaari mo silang ituon sa Mosias 5:2 o Alma 13:12.

• Ano sa palagay ninyo ang ibig sabihin ng maging dalisay ang puso?

Itinuro ni Pangulong Russell M. Nelson ang magagawa natin para maging dalisay:

Hindi inaasahan ng Panginoon na magiging perpekto tayo sa bahaging ito ng ating walang hanggang pag-unlad. Ngunit ang inaasahan Niya sa atin ay maging mas dalisay tayo. Ang araw-araw na pagsisisi ay landas patungo sa kadalisayan, at ang kadalisayan ay nagdadala ng kapangyarihan. (Russell M. Nelson, “Maaari Tayong Gumawa nang Mas Mahusay at Maging Mas Mahusay,” Liahona, Mayo 2019, 68)

• Ano ang ipinapaunawa sa inyo ng pahayag na ito tungkol sa kadalisayan?

Ang mga pagpapala ng Panginoon na matatamo sa mga templo

Sa Doktrina at mga Tipan 97:10–21, nagbigay ang Panginoon ng mga tagubilin sa Kanyang mga tao na tutulong sa kanila na magkaroon ng dalisay na puso. Basahin ang Doktrina at mga Tipan 97:10–12, at hanapin ang mga tagubiling ibinigay ng Panginoon sa Kanyang mga tao.

• Ano ang alam ninyo tungkol sa mga templo ng Panginoon na tumutulong sa inyo na maunawaan kung bakit matutulungan ng mga ito ang Kanyang mga tao na magkaroon ng dalisay na puso?

Maaaring magandang pagkakataon ito para matulungan ang mga estudyante na mapraktis ang paghahanap ng mga listahan sa mga banal na kasulatan na isang kasanayan sa pag-aaral ng mga banal na kasulatan. Maaaring ilista ng mga estudyante ang mga pagpapalang magmumula sa pagtatayo ng templo.

Maaari ka ring magdrowing ng outline ng isang templo sa pisara. Sabihin sa mga estudyante na punuin ito ng mga salita at parirala na naglalarawan sa mga pagpapala ng Panginoon.

Basahin ang Doktrina at mga Tipan 97:13–21, at hanapin ang mga pagpapalang inilarawan ng Panginoon na may kaugnayan sa pagsamba sa Kanyang mga templo.

• Paano tayo mahihikayat ng mga pagpapalang ito na magkaroon ng dalisay na puso?

Maaaring napansin ng mga estudyante na isa sa mga pagpapalang ipinangako ng Panginoon ay “makikita ang Diyos” (talata 16) ng mga may dalisay na puso. Maaari mong sabihin sa mga estudyante na iugnay ang talatang ito sa Mga Awit 24:3–5 at Mateo 5:8 at tanungin ang mga estudyante kung anong mga koneksyon ang napansin nila sa mga talatang ito sa pagiging may dalisay na puso at pagkakita sa Diyos.

Binanggit ni Pangulong Henry B. Eyring ng Unang Panguluhan ang Doktrina at mga Tipan 97:15–17 at itinuro ang ibig sabihin ng makikita ang Diyos sa templo:

Nilinaw sa atin ni Pangulong Russell M. Nelson na “makikita” natin ang Tagapagligtas sa templo dahil makikilala natin Siya. Ito ang sinabi ni Pangulong Nelson: “Nauunawaan natin Siya. Naiintindihan natin ang Kanyang gawain at ang Kanyang kaluwalhatian. At unti-unti nating nadarama ang walang hanggang epekto ng Kanyang hindi mapapantayang buhay” [Teachings of Russell M. Nelson (2018), 369].

Kung kayo o ako ay pupunta sa templo nang hindi sapat ang kadalisayan, hindi natin makikita, sa pamamagitan ng kapangyarihan ng Espiritu Santo, ang mga espirituwal na turo tungkol sa Tagapagligtas na matatanggap natin sa templo. (Henry B. Eyring, “Templo’y Ibig Makita,” Liahona, Mayo 2021, 30)

• Paano mahihikayat ng pangakong ito ang isang tao na magkaroon ng dalisay na puso?

• Sa palagay ninyo, bakit hinihingi ng Panginoon ang pagiging dalisay ng puso para makapasok sa templo?

Pagiging dalisay ng puso

Maaari mong tulungan ang mga estudyante na talakayin kung paano makatutulong ang interbyu para sa temple recommend para masuri natin ang sarili kung mayroon tayong dalisay na puso. Maaaring ibahagi ng ilang estudyante na nainterbyu kamakailan para tumanggap ng temple recommend kung ano ang pakiramdam nila noong sinasagot ang mga tanong na iyon. Maaari mo ring ibigay ang sumusunod na paanyaya:

Ang mga tanong sa temple recommend ay matatagpuan sa Para sa Lakas ng mga Kabataan: Isang Gabay sa Paggawa ng mga Pagpili. Mag-ukol ng oras para pagnilayan ang bawat isa sa mga tanong sa temple recommend. Isipin kung paanong ipinapahiwatig ng mga sagot ninyo ang kalagayan ng inyong puso.

Bigyan ng oras ang mga estudyante para pag-isipan ang mga tanong na ito sa klase. Kapag napag-isipan na ng mga estudyante ang bawat tanong, maaari mo silang hikayatin na pumili ng isa o dalawang bagay na magagawa nila na makatutulong para dalisayin ang kanilang puso. Maaari mong sabihin sa mga estudyante na sagutin ang mga sumusunod na tanong sa kanilang journal:

• Ano ang gagawin mo upang tulutan ang Panginoon na dalisayin ang iyong puso?

• Sa iyong palagay, bakit kapwa napakahalaga sa Ama sa Langit at kay Jesucristo na dalisay ang iyong puso?

Karagdagang Resources

Doktrina at mga Tipan 97:11–12. Ano ang ibig sabihin ng Panginoon nang humingi Siya ng ikapu para maitayo ang templo?

Tulad ng ginamit sa bahagi 97, ang ikapu ay tumutukoy sa anumang kusang-loob na handog o donasyon (tingnan sa The Joseph Smith Papers, Documents, Volume 3: February 1833–March 1834, 201, note 241).

Anong mga pagpapala ang ibinibigay ng Panginoon sa pamamagitan ng pagtatayo ng mga templo?

Itinuro ni Pangulong Russell M. Nelson:

Huwag nating kalimutan ang ginagawa ng Panginoon para sa atin ngayon. Pinadadali Niya ang pagpunta sa Kanyang mga templo. Pinabibilis Niya ang pagtatayo natin ng mga templo. Dinaragdagan Niya ang ating abilidad na tumulong sa pagtipon ng Israel. Ginagawa rin Niyang mas madali para sa bawat isa sa atin na maging dalisay sa espirituwal. Ipinapangako ko na ang mas madalas na pagpunta sa templo ay magpapala sa inyong buhay na hindi matatamo sa ibang paraan. (Russell M. Nelson, “Magtuon sa Templo,” Liahona, Nob. 2022, 121)

Paano ako inihahanda para sa templo ng pagiging karapat-dapat para sa temple recommend?

Ipinaliwanag ni Pangulong Russell M. Nelson:

Ang indibiduwal na pagkamarapat upang makapasok sa tahanan ng Panginoon ay nangangailangan ng maraming indibiduwal na espirituwal na paghahanda. Subalit sa tulong ng Panginoon, walang imposible. Sa ilang aspeto, mas madaling magtayo ng templo kaysa maghanda ng mga tao para sa templo. Ang indibiduwal na pagkamarapat ay humihiling ng lubos na pagbabago ng isip at puso upang maging mas katulad ng Panginoon, maging matapat na mamamayan, maging mas mabuting halimbawa, at maging mas banal na tao. (Russell M. Nelson, “Pangwakas na Mensahe,” Liahona, Nob. 2019, 121–122)

Itinuro ni Elder Quentin L. Cook ng Korum ng Labindalawang Apostol:

Lubos naming hinahangad na mamuhay ang mga miyembro ng Simbahan sa paraan na sila ay magiging marapat na magkaroon ng temple recommend. Huwag nating isipin na napakahirap o imposibleng makapasok sa templo. Katulong ang kanilang bishop, magagawa ng karamihan sa mga miyembro ang lahat ng kabutihang kailangang gawin sa loob ng maikling panahon kung determinado silang maging karapat-dapat at lubos silang magsisisi sa kanilang mga kasalanan. (Quentin L. Cook, “Tingnan ang Inyong Sarili sa Templo,” Liahona, Mayo 2016, 98)

Mga Karagdagang Aktibidad sa Pag-aaral

Doktrina at mga Tipan 97:1–2. Masigasig na naghahangad na matuto ng karunungan

Maaaring makatulong sa mga estudyante na matutuhan ang tungkol sa pagpapaibayo ng kanilang kakayahang matuto ng karunungan at katotohanan. Sabihin sa mga estudyante na magbahagi ng ilang katangian at pag-uugali ng isang tao na may matinding hangaring matuto.

Maaari mong ipaliwanag na si Parley P. Pratt ay tinawag para mamuno sa isang paaralan ng mga elder sa Sion na katulad ng Paaralan ng mga Propeta na itinatag ni Joseph Smith sa Ohio. Nagpalitan ng mga sulat sina Parley at Joseph, at dumating ang Doktrina at mga Tipan 97 bilang tugon sa isa sa mga liham na iyon. Sabihin sa mga estudyante na basahin ang talata 1–2, at alamin ang sinabi ng Panginoon para maging mabuting mag-aaral ang mga elder sa Sion. Tulungan ang mga estudyante na matukoy ang isang katotohanan mula sa mga talatang ito, tulad ng ang Panginoon ay maawain at pagpapalain tayo ng karunungan at katotohanan kapag nagpapakumbaba tayo at masigasig na naghahangad na matuto.

Maaari mong sabihin sa mga estudyante na talakayin at tuklasin kung bakit handa ang Panginoon na biyayaan tayo ng karunungan at katotohanan kapag natututo tayo sa ganitong paraan.

Doktrina at mga Tipan 97:7–9. Dalawang punungkahoy

Ang Doktrina at mga Tipan 97:7–9 ay makatutulong sa mga estudyante na malaman kung ano ang magagawa nila para maging katanggap-tanggap sa Panginoon. Sabihin sa mga estudyante na pagnilayan kung bakit gusto nilang maging katanggap-tanggap sa Panginoon. Maaari mong anyayahan ang mga estudyante na ilarawan ang dalawang punungkahoy sa mga talata o gumawa ng simpleng drowing ng bawat punungkahoy. Maaari nilang isulat sa bunga ng mabuting punungkahoy ang mga katangiang inilarawan sa talata 8. Talakayin kung ano ang ibig sabihin ng pagkakaroon ng bagbag na puso at nagsisising espiritu, at ng pagtupad sa ating mga tipan sa pamamagitan ng pagsasakripisyo. Sabihin sa mga estudyante na ibahagi kung paano makatutulong sa atin ang paggawa ng mga bagay na ito para maging katanggap-tanggap tayo sa Panginoon.

Doktrina at mga Tipan 97:18–28. “Sion—Ang May Dalisay na Puso”

Maaaring makabubuti sa mga estudyante na maunawaan kung ano ang Sion at kung paano ito nauugnay sa kanila. Isulat ang salitang Sion sa pisara at sabihin sa mga estudyante na ibahagi ang kanilang nalalaman tungkol sa Sion. Tulungan ang mga estudyante na maunawaan na tinatawag na Sion ng mga taong naninirahan sa Jackson County, Missouri ang tinitirhan nila. Nais ng mga Banal na nakatira sa Missouri na itatag ang Sion nang mabasa nila ang tungkol dito sa mga banal na kasulatan (tingnan sa Gabay sa mga Banal na Kasulatan “Sion”). Tulungan ang mga estudyante na matuklasan kung ano ang ibig sabihin ng Sion ayon sa Panginoon sa pagbabasa nila ng Doktrina at mga Tipan 97:21 (tingnan din sa Moises 7:18). Pagkatapos ay maaari mong sabihin sa mga estudyante na pag-aralan ang Doktrina at mga Tipan 97:18–28, at hanapin ang mga pagpapalang nais ibigay ng Panginoon sa mga Banal sa Missouri, kung pipiliin nila na magkaroon ng “dalisay na puso” (Doktrina at mga Tipan 97:21).