Lesona 113: Mataupu Faavae ma Feagaiga 98–101

Mataupu Faavae ma Feagaiga 98

O Le a Galulue Faatasi Mea Uma mo lo Outou Lelei

I le taumafanafana o le 1833, o feeseeseaiga i le va o tagata Misuri ma le Au Paia i le Itumalo o Siakisone na iu ai ina osofaia e le au faatupu faalavelave saua ia fale, faatamaia pisinisi, ma poloaiina le aveesea o tagata uma o le Ekalesia mai le eria. I le Mataupu Faavae ma Feagaiga 98, na tuuina mai ai e le Faaola le faamafanafanaga ma fautuaga i le Au Paia puapuagatia ma faatonuina taitai o le Ekalesia i le ala e taulima ai o latou togafitiga le talafeagai. O lenei lesona e mafai ona fesoasoani i tagata aoga e faatalitali ai ma le onosai i le Alii i taimi o puapuaga.

Gaoioiga E Ono Mafai Ona Aoao Ai

Onosai

Mafaufau e amata le lesona e ala i le fesoasoani i tagata aoga e mafaufau e uiga i le onosai. O lenei mea e mafai ona saunia ai i latou e aoao e uiga i le faatalitali ma le onosai i le Alii i taimi o puapuaga. E mafai ona e tusia le upu “onosai” i luga o le laupapa ma fai atu nisi o fesili nei.

• O le a le taimi e faigata ai ona onosai?

• O a nisi o tulaga sa tatau ona e onosai ai?

• I se fuafaatatau o le 1–10, ma o le 10 o le onosai tele, o le a sou manatu i le onosai o ia te oe?

• O a ni tulaga atonu e finagalo le Alii e te onosa’ia? Aisea?

O le tutulieseina o le Au Paia mai Ie Itumalo o Siakisone, Misuri

O le parakalafa lenei e mafai ona faitauina pe aoteleina i au lava upu e fesoasoani ai i tagata aoga ia malamalama i le talaaga faasolopito o le vaega 98.

Ina ua taunuu le Au Paia i Misuri e fausia Siona, sa tulai mai ni feeseeseaiga ma tagata o le Itumalo o Siakisone. O feteenaiga faaupufai, feeseeseaiga faalelotu, ma faaiuga le atamai (e aofia ai le lē fausiaina o le malumalu e pei ona poloaiina ai e le Faaola) na faateleina ai faafitauli. I le taimi o le taumafanafana o le 1833, sa potopoto ai ni vaega mataala e tutuliese faamalosi le Au Paia mai le Itumalo o Siakisone. Sa sasaina, valitāina, ma faafulufuluina ia Epikopo Eteuati Paterika ma Charles Allen. Sa faaleagaina le lomiga lomitusi o W. W. Phelps, ma sa faataapeapeina itulau o le Tusi o Poloaiga. O Vienna Jaques, faatasi ai ma tuafafine o Mary ma Caroline Rollins, sa fetagofi atu ma le lototoa i lo latou mafai ai i le tele o itulau o faaaliga a o lei faaleagaina. Sa latou taufetuli ma lalafi ma faaaliga mai le au faatupu faalavelave. I le osofaiga, e toatele le Au Paia na faamalosia le tuua o latou aiga i le faalala ai lea o le fana (tagai i le Au Paia: O Le Tala o le Ekalesia a Iesu Keriso i Aso e Gata Ai, vol. 1, O Le Tagavai o le Upumoni, 1815–1846 [2018], 172–181).

Valaaulia tagata aoga e mafaufau e uiga i ni tofotofoga po o puapuaga atonu o loo latou feagai. Fautuaina i latou e saili faaaliga faaletagata lava ia a o latou suesueina le Mataupu Faavae ma Feagaiga 98 ma faalogo mo mea e finagalo le Alii latou te faia.

Faitau le Mataupu Faavae ma Feagaiga 98:1–3, ma vaavaai pe na faapefea ona tali le Faaola i talosaga a le Au Paia i le Itumalo o Siakisone.

• Mata na fesoasoani faapefea lenei fautuaga i le Au Paia i Misuri?

• E mafai faapefea ona fesoasoani ia te oe po o se tasi e te iloa ona taulimaina se mea faigata?

• O a nisi mataupu faavae e mafai ona tatou maua mai nei fuaiupu?

E mafai e tagata aoga ona faasoa mai ni mataupu faavae eseese. O se tasi auala e fesoasoani ai i tagata aoga e faailoa mai mataupu faavae o le tusi lea o le faamatalaga le uma lenei i luga o le laupapa ma valaaulia tagata aoga e faauma.

A o tatou faatalitali ma le onosai i le Alii, ua Ia osifeagaiga

E mafai e tagata aoga ona faauma le faamatalaga i mataupu faavae e pei o nei:

• o le a tali mai a tatou tatalo.

• o le a oo mai le lelei mai o tatou puapuaga.

Faatalitali ma le onosai i le Alii

Saili musumusuga ia iloa ai po o fea mataupu faavae e taulai i ai. Mafaufau i manaoga o au tagata aoga, ma filifili anomea e te lagona o le a sili ona aoga. Filifili po o fea o anomea nei e faasoa atu i au tagata aoga. E le manaomia ona outou talanoaina uma.

O le isi filifiliga o le vaevae lea o tagata aoga i ni vaega ma tofi vaega taitasi e suesue se tasi o faamatalaga po o le fuaitau o le Tusi a Mamona. Ona valaaulia lea o tagata aoga e faasoa mai ni mea na latou aoaoina ma le vasega.

Na a’oa’o mai Peresitene M. Russell Ballard o le Korama a Aposetolo e Toasefululua e uiga i le faatalitali i le Alii. Faitau le faamatalaga lenei pe matamata le vitiō “Hope in Christ” mai le faailo taimi 9:13 i le 10:06, o loo maua i le ChurchofJesusChrist.org.

O le faatalitali atu i le Alii e aofia ai le usiusitai faifaipea ma le agaigai i luma faaleagaga ia te Ia. O le faatalitali i le Alii e le aofia ai le faatalitali e aunoa ma se mea e fai. E le tatau lava ona e lagona faapei o la e te i totonu o se potu faatalitali .

O le faatalitali i le Alii e aofia ai ni faatinoga. Ua ou aoaoina i le aluga o tausaga e faateleina lo tatou faamoemoe ia Keriso pe a tatou auauna atu i isi. O le auauna atu e pei ona sa auauna atu Iesu, tatou faateleina masani ai lo tatou faamoemoe ia te Ia.

O le tuputupu ae patino e mafai e se tagata ona ausia i le taimi nei a o faatalitali ai i le Alii ma Ana folafolaga, o se elemene taua tele, ma le paia o Lana fuafuaga mo i tatou taitoatasi. (M. Russell Ballard, “Faamoemoe ia Keriso,” Liahona, Me 2021, 55)

• O a nisi o auala e mafai ona tatou faatalitali ai ma le onosai i le Alii i taimi o puapuaga?

Sa faaaoga e Russell M. Nelson le Mataupu Faavae ma Feagaiga 98:1–3 e aoao atu ai e uiga i tali i a tatou tatalo.

Afai tatou te tatalo ma se vaaiga e faavavau, tatou te le tau mafaufau pe o faafofogaina mai a tatou aioiga aupito sili ona faanoanoa ma loloto. …

Na filifilia e le Alii Ana fetalaiga aupito malolosi e faatoafilemu ai i tatou! Faamaufaailoga! Feagaiga! Tauto! Faatonu! Feagaiga le maliliuina! Uso e ma tuafafine, talitonu ia te Ia! O le a faafofogaina e le Atua au tatalo faamaoni ma faatauanau, ma o le a faamalosia ai lou faatuatua. (Russell M. Nelson, “Fetaiai ma le Lumanai i le Faatuatua,” Liahona, Me 2011, 35)

• O le a se mea ua aoao atu e lenei faamatalaga ia te oe e uiga i le Alii?

• E mafai faapefea e le malamalama i nei aoaoga ona fesoasoani i se tasi e faatalitali ma le onosai ia te Ia?

Faitau le 2 Nifae 2:1–2, ma vaavaai mo mea na aoao atu e le perofeta o Liae i lona atalii o Iakopo e uiga i ona puapuaga.

• O a nisi o auala e mafai ai e le Alii ona “faapaiaina [o tatou] puapuaga mo [o tatou] manuia”?

O le fautuaga a le Faaola

Ina ia suesue le Mataupu Faavae ma Feagaiga 98:11–22, e mafai e tagata aoga ona galulue faatasi ma se paga po o se vaega toalaiti. E mafai e tagata aoga ona filifili se mataupu faavae e taulai atu i ai ona vaavaai lea mo le fautuaga a le Faaola o le a fesoasoani i se tasi e faaaoga lena mataupu faavae.

Mo se faataitaiga, “o le a ia tuu atu i e faamaoni lea fasifuaitau ma lea fasifuaitau” (fuaiupu 12) e mafai ona fesoasoani i se tasi e faatalitali ma le onosai i le Alii a o Ia tali teisi atu i a latou tatalo i lea taimi ma lea taimi. O le fasifuaitau “lafoai mea leaga uma ma pipii atu i mea lelei uma” (fuaiupu 11) e mafai ona fesoasoani i se tasi ia ola i se ala ina ia mafai ai e le Atua ona faia o latou puapuaga e “galulue faatasi mo lo [latou] lelei” (fuaiupu 3).

Faitau le Mataupu Faavae ma Feagaiga 98:11–22, ma vaavaai mo le fautuaga a le Faaola e mafai ona fesoasoani ia te oe po o se isi tagata e faatalitali ma le onosai i le Alii.

• O le a se mea na e maua i nei fuaiupu e mafai ona fesoasoani i se tasi e faatalitali ai ma le onosai i le Alii?

• O a upu po o fasifuaitau o le a e faasoa atu i se tasi o feagai ma se tofotofoga? Aisea?

E mafai ona e valaaulia tagata aoga e mafaufau loloto i se taimi na fesoasoani ai le Faaola ia i latou ia iloa le lelei e mafai ona oo mai i taimi o tofotofoga. E mafai ona e faaalia le vitiō “God Will Lift Us Up” (4:59) po o le vitio “Mountains to Climb” (5:05), o loo maua i le ChurchofJesusChrist.org.

Tuu atu se avanoa mo tagata aoga naunautai e faasoa mai pe na faapefea ona fesoasoani le Faaola ia i latou e faatalitali ma le onosai ia te Ia i le taimi o se tofotofoga. Pe a talafeagai ai, e mafai e tagata aoga ona faasoa mai se aafiaga na latou vaaia ai le lelei na oo mai ona o se tofotofoga.

Faaaoga aoaoga a le Faaola

I lau api talaaga mo suesuega, tali ma le agaga tatalo ia fesili nei mai mea ua e aoaoina i le asō:

• O le a se mea ua e aoaoina e mafai ona faateleina ai lou tomai e faatalitali ai ma le onosai i le Alii?

• O le a se mea ua uunaia oe e fai e mafai ona fesoasoani ia te oe e faatalitali ai ma le onosai i le Faaola pe a e feagai ma luitau faigata?

Ina ia faaiuina le vasega, e mafai ona e faasoa atu se aafiaga i se taimi na e faatalitali ai ma le onosai i le Alii pe ina ua Ia faia se tofotofoga e galulue faatasi mo lou lelei ma Lona mamalu. E mafai ona e tuuina atu lau molimau i le naunautaiga o le Tama Faalelagi e faamanuia i tatou i faigata a o tatou faatalitali atu ia te Ia.

Punaoa Faaopoopo

Ae a pe a ou lagona e pei e le o taliina mai a’u tatalo?

Na molimau mai Elder Jeffrey R. Holland o le Korama a Aposetolo e Toasefululua:

O le a i ai taimi i o tatou olaga ia e oo lava i a tatou taumafaiga sili faaleagaga ma naunautai, ua le maua ai mai tatalo faatauanau ni manumalō mo mea na tatou naunau i ai, pe faatatau i ni faafitauli tetele faalelalolagi po o ni faafitauli iti faaletagata lava ia. O lea la, a o tatou galulue ma faatalitali faatasi ai mo ni tali i nisi o a tatou tatalo, ou te ofo atu ia te outou la’u folafolaga faaaposetolo o loo faafofogaina ma taliina, e ui atonu e le o le taimi tonu po o le ala tonu na tatou mananao i ai. Ae e tali mai lava tatalo e le aunoa i le taimi ma i le ala e tatau ai i se mātua ua silafia aoao mea uma ma le agaalofa e faavavau ona tali mai ai na tatalo. O’u uso e ma tuafafine pele, faamolemole ia malamalama o Ia e le moe pe e lē tautulemoe lava e popole mo le fiafia ma le faaeaga mulimuli o Lana fanau e sili atu i lo mea uma e ao ona faia e se tagata paia. O Ia o le alofa lē pona, o le tagata ua faamamaluina, ma o Lona suafa o Tamā Alofa Mutimutivale. (Jeffrey R. Holland, “Faatalitali i le Alii,” Liahona, Nov. 2020, 115–116)

O le a se mea e mafai ona ou faia pe a ou feagai ma taimi faigata?

Na faamatalaina mai e Sister Michelle D. Craig o le Au Peresitene Aoao o Tamaitai Talavou:

Pe a oo mai aso faigata, ou te taumafai e manatua sa ou filifili e mulimuli ia Keriso ae ou te le’i sau i le lalolagi ma o luitau i lo’u faatuatua, lo’u ola maloloina, ma lo’u onosai o vaega uma o le mafuaaga ua ou i ai iinei. Ma e le tatau lava ona ou mafaufau faapea o tofotofoga o le asō e fesiligia ai le alofa o le Atua ia te a’u pe faaliliu ai lo’u faatuatua ia te Ia i le masalosalo. O tofotofoga e le faapea ua le aoga le fuafuaga; o ni vaega ia o le fuafuaga e fesoasoani ia te a’u e saili le Atua. Ou te avea atili faapei o Ia pe a ou tumau ma le onosai, ma le faamoemoe, faapei foi o Ia, pe a puapuagatia, ou te tatalo ma le faatauanau atili. (Michelle D. Craig, “Lotoatoa,” Liahona, Nov. 2022, 61– 62)

O fea e mafai ona ou aoao atili ai e uiga i le tutulieseina o le Au Paia mai le Itumalo o Siakisone?

• Au Paia, 1:172–193

• David W. Grua, “Waiting for the Word of the Lord,” i le Revelations in Context [2016]

• Autu o le Talafaasolopito a le Ekalesia: “Jackson County Violence,” ChurchofJesusChrist.org/study/history/topics

Gaoioiga Faaopoopo e Aoao Ai

O le agamalu o Epikopo Eteuati Paterika

Toe faamanatu le tala i le valitaina ma le faafulufuluina o Epikopo Paterika i le Au Paia,, 1:179–180. Valaaulia tagata aoga e suesue manatu o Epikopo Paterika e uiga i le mea na tupu (o loo maua i lalo), ma vaavaai pe na faapefea ona ia faaalia aoaoga a le Faaola i le Mataupu Faavae ma Feagaiga 98:1–3. Valaaulia tagata aoga e mafaufau i auala e mafai ai ona latou tali atu i lenei tulaga.

Na faamatalaina e Epikopo Eteuati Paterika:

A o le’i valitaina ma faafulumanuina a’u, sa faataga a’u ou te tautala. Sa ou ta’u atu ia i latou, sa tigaina le Au Paia i sauaga i augatupulaga uma o le lalolagi; ma e leai se mea na ou faia e tatau ai ona faatiga se tagata; ma afai latou te sauaina a’u, o le a latou sauaina se tagata e le sala; ma sa ou naunau e tigaina mo Keriso; ae o le tuua o le itumalo, sa ou le manao i le taimi lea e ioe i ai. …

… Sa ou onosaia o’u sauaga ma le onosai tele ma le agamalu o lea sa foliga na ofo ai le motu o tagata, o e na faatagaina a’u ou te alu ma le filemu, e toatele sa foliga faamaoni, ou te manatu, sa lāgā o latou misi alofa; ae mo a’u lava, sa faatumulia a’u i le Agaga ma le alofa o le Atua, o lea sa leai ai so’u ita e faasaga ia i latou na sauaina a’u po o se isi lava tagata. (Eteuati Paterika, i le Talafaasolopito, 1838–1856 [Manuscript History of the Church], voluma A-1, 327–28, josephsmithpapers.org; ua faalaugatasia le sipelga, faamataitusi lapopoa, ma le faasaoga)

Sefeina o le Tusi o Poloaiga

Ina ia fesoasoani i tagata aoga ia iloa se faataitaiga o tamaitai talavou o faaalia le malosi ma le lototele i taimi o tofotofoga, e mafai ona e faasoa atu le tala ia Maria ma Karoline Rollins mai le Au Paia, 1:178–79. E mafai ona outou talanoaina pe mafai faapefea e faataitaiga a nei tuafafine ona musuia le autalavou i aso nei.

Mataupu Faavae ma Feagaiga 98:23–48. O tulafono a le Alii o le tauimasui, taua, ma le faamagaloga

Afai o le a manuia tagata aoga mai le aoao atili e uiga i le ala a le Faaola e tali atu ai i sauaga, valaaulia i latou e faamatala ni nai auala e ono tali atu ai tagata pe a faatiga pe faamanualia se tasi ia i latou. Faamalamalama atu i le faaaliga ua faamaumauina i le Mataupu Faavae ma Feagaiga 98:23–48, ua aoao mai e le Alii mataupu faavae e mafai ona fesoasoani ia i tatou e iloa ai le ala e tali atu ai pe a faatiga i tatou e upu ma faatinoga a isi tagata. E mafai ona e faatulagaina le vasega i ni paga po o ni vaega toalaiti. E mafai e vaega taitasi ona filifili se tasi o autu nei e suesue ai ma e mafai ona saunia e faasoa mai mea ua latou aoaoina i le vasega.

1. Mataupu Faavae ma Feagaiga 98:23–32—O le tulafono a le Faaola i le tali atu i sauaga

2. Mataupu Faavae ma Feagaiga 98:33–38—O le tulafono a le Faaola i taua

3. Mataupu Faavae ma Feagaiga 98:39–48—O le tulafono a le Faaola i le faamagaloga

E mafai ona e valaaulia tagata aoga e talanoaina fesili nei e faaaoga ai ata faataitai o i lalo, pe e mafai foi e tagata aoga ona fatuina ni tulaga talitutusa e talafeagai ia i latou.

• O le a se mea e te manao e fai pe a tupu lenei mea?

• E faapefea ona fetalai mai le Faaola ia i tatou e tali atu e tusa ai ma le Mataupu Faavae ma Feagaiga 98?

• Ua nonoa e uso o Nifae o ia ma tuua o ia i le toafa, toeitiiti lava a oo ai ina maliu i luga o le vaa i le nuu folafolaina, ma taupulepule e fasioti o ia ina ua mavae le maliu o Liae.

• A e tuuina i luga ata o le Faaola ma le malumalu i luga o le initoneti, e tuua e se tasi mai lau aoga ni faamatalaga faalealofa i luga o ala o faasalalauga faaagafesootai.

• O se faifeautalai o loo auauna atu mai lau uarota po o le paranesi e tusi atu ia te oe se tusi, ma faatoese atu mo le faasaua ia te oe i le taimi o le aoga maualuga.

E mafai foi ona e faaalia le vitiō “That We Might Be One: The Story of the Dutch Patato Project” (11:57) mai le ChurchofJesusChrist.org. Ua faasoa mai e lenei vitiō le tala i le Au Paia i Netherlands o e sa naunau e ositaulagaina a latou meaai mo i latou na avea muamua ma o latou fili ina ua mavae le Taua Lona II a le Lalolagi. E mafai ona e valaaulia tagata aoga e vaavaai pe na faapefea ona faamanuiaina e le Faaola le Au Paia Siamani mo a latou taumafaiga faaKeriso.