Lesona 115: Mataupu Faavae ma Feagaiga 98–101

Mataupu Faavae ma Feagaiga 101:43–101

Faataoto e uiga ia Siona

Ina ua faalogo le Perofeta o Iosefa Samita i sauaga matuia na mafatia ai le Au Paia i Misuri, sa ia aioi atu i le Alii mo i latou. O se vaega o Lana tali, sa faaaoga ai e le Faaola ia faataoto e tuuina atu ai i le Au Paia le fautuaga ma le faamafanafanaga. O lenei lesona o le a tuu atu ai i tagata aoga le avanoa e suesue ai se faataoto ma iloa ai lona uiga faaleagaga.

Gaoioiga E Ono Mafai Ona Aoao Ai

E masani ona faaaoga e Iesu Keriso faataoto e aoao atu ai

Mafaufau e faaali atu ni aitema masani e pei o sapalai o aoga, tulaga tau lavalava, po o masini faaeletonika. Pe valaaulia tagata aoga e vaavaai i aitema o loo siomia ai le potuaoga po o mea latou te maua. Valaaulia tagata aoga e filifili se aitema ma mafaufau i se auala fatufatua’i e faatusatusa ai i se vaega o le fuafuaga a le Tama Faalelagi po o Iesu Keriso ma Lana talalelei. Mo se faataitaiga, atonu latou te faatusatusaina se telefoni feaveai i le tatalo, aua o le tatalo o le meafaigaluega lea tatou te faaaogaina e fesootai ai ma le Tama Faalelagi. Valaaulia tagata aoga e faasoa atu a latou aitema ma faatusatusaga faaleagaga i se paga po o le vasega atoa.

Sa tele ona aoao atu Iesu Keriso e ala i le faaaogaina o ni tala pupuu ua ta’ua o faataoto. I nei faataoto, na faatusaina ai e Iesu mea faitino taatele po o tulaga masani i upumoni faaleagaga (tagai i le Taiala i Tusitusiga Paia, “Faataoto,” scriptures.ChurchofJesusChrist.org).

• O a nisi faataitaiga o faataoto na aoao mai e le Faaola?

• O a nisi o upumoni faaleagaga e mafai ona tatou aoao mai aoaoga a le Faaola i na faataoto?

Mo se faataitaiga, atonu e faasoa mai e tagata aoga le faataoto i le Samaria agalelei (tagai Luka 10:25–37), lea o loo aoao mai ai e uiga i le alofa ma le auauna atu i isi e pei ona faia e le Faaola. Pe atonu foi latou te faasoa maia le faataoto i taupou e toasefulu (tagai i le Mataio 25:1–13), lea o loo aoao mai ai i tatou e saunia mo le Afio Mai Faalua o le Faaola.

Ina ia saunia tagata aoga e suesue se faataoto e uiga i le laveaiina o Siona, mafaufau e fai atu i tagata aoga e faasoa mai mea latou te manatua mai lesona talu ai nei e uiga i tofotofoga sa onosaia e le Au Paia i Misuri. E pei ona manaomia, e mafai ona e faasoa atu le aotelega lenei:

I se taimi o sauaga matuia, sa faaaoga ai e le Faaola ia faataoto e aoao atu ai Iosefa Samita ma le Au Paia e uiga i le laveaiina o Siona (tagai i le Mataupu Faavae ma Feagaiga 101:43). I le faaiuga o le 1833, o sauaga a le au faatupu faalavelave na taitai atu ai i le silia ma le 1,000 le Au Paia na tutuliese mai le Itumalo o Siakisone, Misuri, ma na silia ma le 200 o o latou fale na susunuina. Sa fesili le Perofeta o Iosefa Samita i le Alii pe aisea na tutuliese ai le Au Paia mai Siona ma po o le a le mea e tatau ona fai ina ia mafai ai ona latou toe foi mai. Sa tali mai le Alii i se faataoto.

Suesueina o faataoto

Sa aoao mai e Elder David A. Bednar mea nei e uiga i le aoao mai i faataoto a le Faaola:

O le uiga faamoemoeina po o se savali o se faataoto e masani lava e le faamaninoa lona faamatalatalaina. Ae, o le tala e na ona avatu ai o se upumoni paia i se tagata e tuu atu i ai e tusa ma lona faatuatua i le Atua, tapenaga patino faaleagaga, ma le loto ia aoao. O lea la, e tatau i se tagata ona faaaoga le filifiliga tatau ma “ole atu, saili, ma tu’itu’i atu” ma le loto i ai [tagai i le Mataio 7:7–8; Luka 11:9–10] ia iloa ai upumoni o loo tanu i se faataoto. (David A. Bednar, “Ofu Lou Malosi, E, Siona e,” Liahona, Nov. 2022, 92)

• E faapefea e lo tatou faatuatua ia Iesu Keriso ona tosina ai lo tatou tomai e malamalama i Ana aoaoga?

• O le a se mea o fesootai atu ia te Ia e a tatou taumafaiga i le suesueina o afioga a le Faaola e uiga i o tatou lagona mo Ia?

Mafaufau e tuu atu i tagata aoga le pepa e tufa atu ua faaautuina “Auala e Suesue ai Faataoto a le Faaola” e fesoasoani e taiala ai i latou i lenei lesona atoa.

Auala e Suesue ai Faataoto a le Faaola

1. Saili mo auiliiliga taua. E mafai ona aofia i nei auiliiliga ia tagata, nofoaga, meafaitino, faatinoga, po o mea e tutupu.

2. Fai ni faatusatusaga. Fuafua po o a faamatalaga taitasi o i le faataoto e mafai ona fai ma sui pe faatusa i ai. O faaataataga faaletalaaga, fesoasoaniga mo le suesueina o tusitusiga paia, ma le mafaufau loloto e mafai ona fesoasoani.

3. Saili lesona aoga. A uma ona faia faatusatusaga, saili le fesoasoani mai le Agaga Paia ia iloa ai lesona taua sa aoao atu e le Faaola i le faataoto.

4. Filimaoti le faaaogaina patino. Saili le fesoasoani mai le Tama Faalelagi ma le Agaga Paia ia iloa ai mea e mafai ona e faia e faaaoga patino ai lesona e te mauaina.

O le faataoto i le tamalii

O le gaoioiga lenei e mafai ona fesoasoani i tagata aoga e faataitai laasaga e fa mo le suesueina o faataoto. Mafaufau e faaali atu le siata pe kopi i luga o le laupapa. Fai ni vaega se ono, ma tofi vaega taitasi e faatumu se sikuea ese i luga o le siata. Pe valaaulia tagata aoga e kopi le siata ia latou api faamaumau mo suesuega ma faatumu taitoatasi.

Saili auiliiliga taua

Faitau le Mataupu Faavae ma Feagaiga 101:43–62. Mo vaega taitasi o fuaiupu, fatu se ata faigofie pe tusi se aotelega e faapupula ai fuaiupu.

Mataupu Faavae ma Feagaiga 101:43–45. O faatonuga a le tamalii	Mataupu Faavae ma Feagaiga 101:46–50. O faatinoga a auauna
Mataupu Faavae ma Feagaiga 101:51. O le taunuuga o galuega a auauna	Mataupu Faavae ma Feagaiga 101:52–54. O le tali a le tamalii
Mataupu Faavae ma Feagaiga 101:55–58. O isi faatonuga a le tamalii	Mataupu Faavae ma Feagaiga 101:59–62. O le tali a le auauna

A uma ona faia e tagata aoga, valaaulia i latou e faasoa mai mea na latou maua. Ia mautinoa ua latou malamalama i auiliiliga o le faataoto.

Mafaufau e faauma o se vasega laasaga mulimuli e tolu o le suesueina o faataoto.

Fai ni faatusatusaga

• O a ni faaataataga e mafai ona fesoasoani ia i tatou e iloa ai o le tamalii e faatusa ia Iesu Keriso?

• O a mea e ono faatusa i ai le tovine po o le olo?

• E faapefea ona pei a tatou amioga i nisi taimi o i latou o auauna?

Mafaufau e valaaulia tagata aoga e iloilo le fuaitau o le atamai i aoaoga faavae Esekielu 3:16–17 e vaavaai mo se faatusatusaga talafeagai mo tagatavaai. O le matalalaga lenei e mafai ona fesoasoani i tagata aoga e fai ai faatusatusaga faaopoopo:

E pei o auauna i le faataoto na mumusu e fau se olo, sa lei ano le Au Paia i Misuri e fausia se malumalu e pei ona faatonuina ai i latou e le Alii (tagai i le Mataupu Faavae ma Feagaiga 57:3; 84:3–4; 97:10–12).

Mo le Au Paia i le Itumalo o Siakisone, o le auauna o loo ta’ua i le fuaiupu 55 na faatusa ia Iosefa Samita (tagai i le Mataupu Faavae ma Feagaiga 103:21). Sa mulimuli Iosefa Samita i le poloaiga a le Alii ma faatulaga se vaega na taua o le Tolauapiga a Siona e laveai mai le laueleele o Siona. O le Tolauapiga a Siona o le a talanoaina i lesona i le Mataupu Faavae ma Feagaiga 103 ma le 105 .

Saili mo lesona taua

• O a nisi o lesona taua e mafai ona aoao mai e le Alii e ala i lenei faataoto?

• O le a le mea ua aoao mai e lenei faataoto ia te oe e faatatau i uiga o Iesu Keriso?

  Afai e faigata i tagata aoga ona faailoa mai ni lesona taua, mafaufau e tuuina atu se tasi pe sili atu foi o mataupu faavae nei. Valaaulia tagata aoga e faasoa mai pe faapefea ona faapupula mai e le faataoto nei upumoni. Pe a tatou usiusitai i poloaiga a le Alii, Na te faamalosia i tatou e tetee atu i fili faaleagaga ma faaletino. O perofeta e avea o ni leoleo i le olo, e aumai ai lapataiga i ai tatou e le Alii e faasaga i mea matautia e oo mai. E ala i galuega o le malumalu, ua saunia i tatou e le Faaola ia mafai ona tetee atu i le fili.

• Aisea na ono fesoasoani ai nei lesona mo le Au Paia i le 1833?

• O faapefea ona e vaaia se faamaoniga o se tasi pe sili atu o nei upumoni i lou olaga?

Filimaoti le faaaogaaga patino

• O a ni auala e mafai ona e faaaoga ai lenei faataoto i o tatou aso?

Saili le fesoasoani mai le Agaga Paia e faailoa mai se auala se tasi pe lua e mafai ona e faaaogaina ai se upumoni e lagona le taua ia te oe mai lenei faataoto. Tusi ou lagona i totonu o lau api faamaumau mo suesuega.

Valaaulia tagata aoga e faasoa mai mea sa latou aoaoina e uiga i le suesueina o faataoto e mafai ona latou faaaogaina e faaleleia ai a latou suesuega faaletagata lava ia o tusitusiga paia. Uunaia tagata aoga i a latou taumafaiga e faaaoga le faatuatua ia Iesu Keriso a o latou suesue patino, mafaufau loloto, ma faaaoga Ana aoaoga.

Punaoa Faaopoopo

Mataupu Faavae ma Feagaiga 101:77–79. O le a le faamoemoega o le Atua i le faatuina o le Faavae o le Iunaite Setete?

Sa aoao mai Peresitene Dallin H. Oaks o le Au Peresitene Sili:

O le a le faamoemoega o le Atua i le faatuina o le Faavae o le Iunaite Setete? Ua tatou vaaia i le aoaoga faavae o le faitalia tatau. I le uluai sefulu tausaga o le Ekalesia toefuataiina, sa puapuagatia ona tagata i sisifo i sauaga ma’oti ma i nofoaga faitele. I se isi itu na mafua ona o lo latou tetee i le faia o tagata ma pologa, lea sa i ai i totonu o le Iunaite Setete i lena taimi. I nei tulaga le manuia, na faaali mai ai e le Atua e ala mai i le Perofeta o Iosefa Samita ia upumoni e faavavau e uiga i Lana aoaoga faavae.

Na tuuina mai e le Atua i Ana fanau le faitalia tatau---o le mana e filifili ai ma faatino. O le tulaga aupito manaomia mo le faaaogaina o lena faitalia o le saolotoga aupito maualuga mo alii ma tamaitai e faatino e tusa ai ma a latou lava filifiliga patino. Ona, faamalamalama mai lea e le faaaliga, “ina ia mafai e tagata taitoatasi ona tali mo ana lava agasala i le aso o le faamasinoga” (Mataupu Faavae ma Feagaiga 101:78). “O le mea lea,” na faaalia mai ai e le Alii, “e le o se mea sa’o le nofopologa o soo se tagata i se tasi” (Mataupu Faavae ma Feagaiga 101:79). (Dallin H. Oaks, “Puipuiga o Lo Tatou Faavae na Musuia mai le Lagi,” Liahona, Me 2021, 106)

Mataupu Faavae ma Feagaiga 101:76, 86–88. O le a le mea na tupu ina ua sailia e le Au Paia le fesoasoani mai taitai o le malo?

Na mulimuli le Au Paia i Misuri i faatonuga a le Alii ma talosagaina taitai o malo “mo se totogi”(Mataupu Faavae ma Feagaiga 101:76), pe toe taui mai meatotino ua leiloloa. O nei taitai sa aofia ai faamasino i le lotoifale, o le kovana o Misuri o Daniel Dunklin, ma Andrew Jackson, o lē sa auauna atu o se peresitene o le Iunaite Setete. E ui i taumafaiga faifai pea, sa le mafai e le Au Paia i Misuri ona maua le puipuiga ma taui mai le pulega faalemalo mo faamasinoga le tonu sa latou pagatia ai.

Mo nisi faamatalaga, tagai i le “Mataupu 39:Mataupu Faavae ma Feagaiga 101” i le Tusi Lesona a le Tagata Aoga o le Mataupu Faavae ma Feagaiga mo le inisitituti.

Mataupu Faavae ma Feagaiga 101:53. E mafai faapefea e le malumalu ona tuuina mai ia te au le puipuiga?

O se tasi o faatatauga o le faataoto i le tamalii e faapea afai na fausia e le Au Paia se malumalu i Misuri e pei ona faatonuina ai e le Alii, semanu e puipuia i latou (tagai i le Mataupu Faavae ma Feagaiga 101:53).

Ua aoao mai taitai o le Ekalesia e faapea tatou te maua le puipuiga e ala i le tausia o feagaiga tatou te osia i totonu o le malumalu.

Na aoao mai Sister Jean B. Bingham, sa avea ma Peresitene Aoao o le Aualofa:

Sa faaauau pea ona ou mautinoa o le tausia o feagaiga tatou te osia ma le Atua e mafai ai ona tatou utuvai mai i le mana o le Faaola, lea e faamalolosia ai i tatou i o tatou tofotofoga e le maalofia, e maua ai le puipuiga mai faatosinaga a le fili, ma saunia ai i tatou mo se mamalu e faavavau. (Jean B. Bingham, “O Feagaiga ma le Atua e Faamalosia, Puipuia, ma Saunia ai i Tatou mo le Mamalu e Faavavau,” Liahona, Me 2022, 67)

Gaoioiga Faaopoopo e Aoao Ai

O isi faataoto i le Mataupu Faavae ma Feagaiga 101

O le faataoto i le saito ma le titania

Mafaufau e faataitai o se vasega laasaga e fa mo le suesueina o faataoto e faaaoga ai le Mataupu Faavae ma Feagaiga 101:63–67.

Saili mo auiliiliga taua.

Valaaulia tagata aoga e faitau le Mataupu Faavae ma Feagaiga 101:63–67 ma vaavaai mo faamatalaga taua.

Atonu na matauina e tagata aoga le saito o loo faaputuputu ma le saogalemu i falesaito, a o saisaitia ma susunuina le titania. Manatua o falesaito o nofoaga ia e teu ai saito pe a uma ona seleseleina.

Fai ni faatusatusaga.

• O a nisi o “nofoaga paia” (fuaiupu 64) e mafai ona faatusa i ai falesaito?

• O a ni malamalamaaga o tuuina mai e uiga i le mea e mafai ona faatusa i ai le saito po o le titania?

O se tasi o faatusa talafeagai o falesaito e mafai ona avea ma malumalu paia. (Tagai i le David A. Bednar, “Taofia ma le Mamalu o se Igoa ma Tulaga,” Liahona, Me 2009, 97)

Saili lesona aoga.

• Afai tatou te iloa e mafai ona faatusa falesaito i nofoaga paia e pei o le malumalu, o a ni lesona atonu e finagalo le Faaola tatou te malamalama i ai mai lenei faataoto?

O se tasi o lesona talafeagai e ono iloa e tagata aoga e faapea, ua valaaulia i tatou e le Faaola e faapotopoto i Lona malumalu ina ia maua Lana puipuiga ma saunia i tatou lava mo le ola e faavavau.

Filimaoti le faaaogaina patino.

• E mafai faapefea ona e faaaogaina le lesona ua e maua i lou olaga?

O le faataoto i le faamasino amioletonu

E mafai foi e tagata aoga ona faataitai laasaga e ala i le faitauina o le faataoto i le faamasino amioletonu i le Mataupu Faavae ma Feagaiga 101:81–84. A uma ona faasoa mai e tagata aoga mea na latou mauaina, faamalamalama atu i le Mataupu Faavae ma Feagaiga 101, sa faaaoga e le Faaola le faataoto i le faamasino amioletonu e faatonu ai le Au Paia sa sauaina e saili le fesoasoani mai taitai o le malo (tagai i fuaiupu 85–92). Sa Ia aoao atu foi lenei faataoto i le taimi o Lana galuega i le olaga nei e aoao atu ai Ona soo e uiga i le tatalo (tagai i le Luka 18:1–8; Mataupu Faavae ma Feagaiga 101:81).

Mataupu Faavae ma Feagaiga 101:76–80. O Le Faavae o le Iunaite Setete

Ina ia fesoasoani i tagata aoga e aoao atili e uiga i le Faavae o le Iunaite Setete ma le auala e mafai ona faaaoga ai ona mataupu faavae i le lalolagi atoa, mafaufau e suesue le saunoaga “Puipuia o La Tatou Faavae na Musuia Faalelagi,” na tuuina mai e Peresitene Dallin H. Oaks i le konafesi aoao ia Aperila 2021. Mafaufau e faaaoga se tasi o manatu i le lesona “Mamanu: Aoaoga a Taitai o le Ekalesia.”

Filifiliga Saolotoga

Valaaulia tagata aoga e talanoaina pe faapefea ona latou tali atu i se tasi e le o filifili e mulimuli i aoaoga a le Faaola ma faapea atu, “Ua ia te a’u la’u faitalia. E mafai ona ou faia soo se mea ou te manao ai”

Faitau le Mataupu Faavae ma Feagaiga 101:78. Vaavaai mo ni malamalamaaga i lenei fuaiupu e mafai ona e faaaofia i lau tali.

• E mafai faapefea e le iloaina tatou te tali atu i le Alii ona aafia ai le ala tatou te vaai ma faaaoga ai lo tatou faitalia?

Mafaufau e valaaulia tagata aoga e faitau le fuaitau o le atamai i aoaoga faavae 2 Nifae 2:27, ma vaavaai mo malamalamaaga faaopoopo e uiga i le faitalia. Ona mafai lea ona latou faafesootaia nei fuaiupu ma le Mataupu Faavae ma Feagaiga 101:78.

Na faasoa mai e Peresitene Ezra Taft Benson (1899–1994) le mea lenei e uiga i lo tatou faaaogaina o le faitalia:

E saoloto i tatou e filifili, ae tatou te le saoloto e sui taunuuga o na filifiliga. (Aoaoga o le Peresitene o le Ekalesia: Ezra Taft Benson [2014],63)

Ina ia faapupula atili le aoaoga faavae o le faitalia, mafaufau e matamata i le “Faitalia” (6:20), o loo ChurchofJesusChrist.org.