Lesona 114: Mataupu Faavae ma Feagaiga 98–101

Mataupu Faavae ma Feagaiga 101:1–42

“E Ui ia Latou Agasala, Ua Tumu O’u Lagona i le Agaalofa”

Sa tauivi le Au Paia i Misuri e ola amiotonu e pei ona poloaiina ai e le Alii. O le mea lea, na latou le maua ai le tele o le mana ma le puipuiga a le Alii ma sa tutuliese mai o latou aiga e o latou fili. E ui lava i lenei mea, sa faamautinoa atu e le Alii ia i latou Lona alofa ma le agaalofa ia i latou. O lenei lesona ua faamoemoe e fesoasoani i tagata aoga ia lagonaina le agaalofa ma le alofa mutimutivale o le Faaola mo i latou.

Gaoioiga E Ono Mafai Ona Aoao Ai

Mafuaaga mo puapuaga

Mafaufau e faaali atu le ata lenei ma fesili atu i tagata aoga i ni mafuaaga eseese pe aisea e ono lagona ai e le tamaitai talavou le lē fiafia. Atonu e te lisiina tali o le vasega i luga o le laupapa.

A uma ua lava se taimi, faasoa atu i tagata aoga o tofotofoga tatou te oo i ai e mafai ona oo mai mo ni mafuaaga eseese. O nisi o i latou e aofia ai a tatou lava filifiliga, o se vaega masani o le olaga, po o filifiliga le lelei a isi. Mafaufau e lisi nei vaega e tolu i se isi vaega o le laupapa ma tuu atu i tagata aoga e faavasega ia mafuaaga na latou lisiina i vaega taitasi.

Atonu e te manao e tagai i le faamatalaga o i le vaega “Punaoa Faaopoopo” mai le faamatalaga o Autu ma Fesili “Faigata” mo nisi faamatalaga i nei mafuaaga e tolu mo puapuaga.

O le tali a le Alii i mafatiaga o le Au Paia

E mafai ona e faitauina pe otooto i au lava upu ia faamatalaga nei o le talaaga.

I le 1833, na oo ai ina saua le tetee i Misuri a o amata ona faaaoga e le au faatupu faalavelave le malosi e aveese ai le Au Paia mai Initipene. Sa le mautinoa e le Au Paia pe tutu i o latou eleele pe sosola ese a o faasolo ina faateteleina le malulu ma le vevesi. Sa i ai le Perofeta o Iosefa Samita i Katelani, Ohaio, i le taimi lea ae sa toe logoina i le tulaga o le Au Paia. I le iloa ai o o latou tiga ma faanoanoaga, sa tatalo ai le Perofeta e ole atu i le Tama Faalelagi pe mafai ona toefuatai i latou i o latou fale i Misuri. Na ia maua se faaaliga lea ua iloa nei o le Mataupu Faavae ma Feagaiga 101. (Mo nisi faamatalaga e uiga i tofotofoga o le Au Paia, tagai i le Au Paia, vol. 1, O Le Tagavai o le Upumoni, mataupu 17.)

Faitau le Mataupu Faavae ma Feagaiga 101:1–2, ma vaavaai mo mea na mafua ai ona faataga e le Alii le Au Paia e puapuaga e pei ona latou i ai.

• O le a se mea sa e mauaina?

• O a nisi mafuaaga o o latou puapuaga?

Fesoasoani i tagata aoga ia malamalama e le gata i puapuaga ona o a latou solitulafono, ae sa puapuagatia foi le Au Paia mai filifiliga le lelei a isi (au faatupu faalavelave) ma o se vaega masani o le olaga (o le malulu o le taumalulu).

Mo le gaoioiga lenei, e mafai ona e vaevaeina tagata aoga i ni paga. E mafai ona e valaaulia i latou e faitau ia fuaiupu, o le tasi paga e vaavaai mo mea atonu na faigata ona faalogo i ai ae o le isi e vaavaai mo mea atonu na faamafanafanaina ai le faalogo.

Faitau le Mataupu Faavae ma Feagaiga 101:3–9, ma vaavaai mo mea semanu e mafana i le faalogo i ai ma pe o le a le mea semanu e faigata ona faalogo i ai.

• O le a se mea sa e mauaina?

• E tusa ai ma fuaiupu 3 ma le 9, e faapefea ona vaai le Alii i ai latou o e ua agasala?

  E mafai e tagata aoga ona faailoa mai upumoni, e aofia ai e tusa lava pe ua tatou agasala, e tuuina mai e le Alii le agaalofa ma le alofa mutimutivale ia i tatou.

  Fesoasoani i tagata aoga e talanoaina pe mafai faapefea e lenei mataupu faavae ona fesoasoani ia i tatou e vaai atu ai i le Alii i o tatou aso. E mafai foi ona fesoasoani fesili nei.

• O le a se mea ua e aoaoina e uiga i le Alii a o Ia faalautele mai le agaalofa ma le alofa mutimutivale ia i tatou pe a tatou agasala nai lo le lē amanaiaina o a tatou agasala?

• Aisea e te manatu ai e mafai e Iesu Keriso ona agaalofa ma alofa mutimutivale e tali atu ai i a tatou agasala?

Faaosofia e uiga o Keriso

Valaaulia tagata aoga e mafaufau loloto pe aisea latou te manaomia patino ai le agaalofa ma le alofa mutimutivale o le Faaola. Fai atu ia i latou e mafaufau pe mafai faapefea e le mauaina o Lona agaalofa ma le alofa mutimutivale ona faamanuiaina o latou olaga.

Tuu atu i tagata aoga ni avanoa e talanoaina ai upumoni o le talalelei. O le gaoioiga lenei e uunaia ai tagata aoga e suesue ona talanoaina lea o upumoni o le talalelei o loo latou aoaoina. Mo nisi aoaoga i le auala e faia ai lenei mea, tagai i le aoaoga ua faaautūina “Uunaia tagata aoao e faasoa mai upumoni o loo latou aoaoina,” o loo maua i Tomai o le Atinaega o Faiaoga. Mafaufau e faataitai le tomai i le valaauliaina o tagata aoga e fefaasoaai ma isi ia mea ua latou aoaoina.

E mafai ona e vaevaeina tagata aoga i ni paga ma valaaulia i latou e faitau le faamatalaga ma le fuaitau o le tusitusiga paia o loo i lalo. Ona mafai lea ona latou talanoaina faatasi fesili.

Faitau le faamatalaga lenei ma le fuaitau o le mau, ma vaavaai mo mea ua e aoaoina e faatatau i le uiga o Iesu Keriso lea e mafai ona fesoasoani i se tasi ua agasala.

Na aoao mai Elder Ulisses Soares o le Korama a Aposetolo e Toasefululua:

E lē pei o oe ma a’u, e mafai e Keriso ona silasila manino i itu uma o se tulaga e tulai mai. E ui foi ina Ia silafiaina o tatou vaivaiga uma, ae e lē soona ta’usalaina i tatou e le Faaola ae faaauau pea ona galue faatasi ma i tatou i le mutimuti alofa mo se taimi umi. (Ulisses Soares, “O le Mutimuti Alofa Tumau o le Faaola,” Liahona, Nov. 2021, 15)

Eperu 4:14–16

• O le a se mea sa e mauaina? E faapefea ona fesoasoani i se tasi ua agasala?

Mafaufau e faasoa atu se aafiaga patino i le ala na faamanuiaina ai oe i le agaalofa ma le alofa mutimutivale o le Faaola. Valaaulia tagata aoga naunau e faasoa foi o latou aafiaga. Manatua e le tatau ia te oe po o tagata aoga ona faasoa mai ni aafiaga e patino tele pe ta’uta’u atu agasala ua mavae.

Ae a Siona?

Mafaufau e faasoa atu i tagata aoga e faapea, sa faamoemoe le Au Paia i Misuri e fausia Siona i Initipene ae sa faamalosia e o ese. E ui atonu e le fesootai tagata aoga i le aveesea o Siona, ae atonu latou te lagona ua leiloa se isi mea taua pe paia ia i latou, e pei o uo po o avanoa e tuputupu ae ai faaleagaga. Valaaulia i latou e faitau fuaiupu nei ma mafaufau e uiga i mea o loo latou aoao mai e uiga i le Faaola.

Faitau le Mataupu Faavae ma Feagaiga 101:16–19, ma vaavaai mo le faamafanafanaga ma le vaaiga o ofo mai e le Alii.

• O a ni mea ua fesoasoani nei fuaiupu e te malamalama ai e uiga i le vaaiga a le Faaola?

• O le a le mea na aoao mai e le Alii e uiga ia Siona e mafai ona fesootai i o tatou olaga i le taimi nei?

  E mafai ona e valaaulia tagata aoga e tomanatu i o latou lava luitau ma filifiliga. E mafai ona latou tali i fesili nei ia latou api faamaumau mo suesuega.

• O le a le fuaiupu mai le Mataupu Faavae ma Feagaiga 101:1–19 e te manao e manatua?

• O le a sou lagona e uiga i le agaalofa po o le alofa mutimutivale o le Faaola e mafai ona avea ma se faamanuiaga i lou olaga?

• O le a se laasaga e mafai ona e faia e faatino ai mea ua e lagonaina?

Punaoa Faaopoopo

O a ni punavai eseese o o tatou mafatiaga?

“O puapuaga e eseese mafuaaga e oo mai ai. O tofotofoga e mafai ona oo mai o se taunuuga o le faamaualuga ma le le usiusitai o le tagata lava ia. O nei tofotofoga e mafai ona aloese mai ai e ala i le ola amiotonu. O isi tofotofoga o ni vaega faanatura o le olaga ma e ono oo mai i taimi o loo ola amiotonu ai tagata. Mo se faataitaiga, e mafai ona oo tagata i tofotofoga i taimi o ma’i, po o le le mautonu, po o le oti foi o e pele. E mafai ona oo mai faigata i nisi o taimi ona o filifiliga le lelei ma upu ma gaoioiga faatiga a isi” (Autu ma Fesili, “Puapuaga,” topics.ChurchofJesusChrist.org).

Pe mafai ea ona sili atu au mea sese nai lo le gafatia e le Faaola ona laveai au?

Na aoao mai Elder Jeffrey R. Holland o le Korama a Aposetolo e Toasefululua:

Pe o le a lava le tuai ua e mafaufau i ai, pe o le a foi le tele o avanoa e te manatu ua e misia, pe o le a foi le tele o mea sese e te lagona sa e faia, po o ni taleni e te manatu e te le o mauaina, po o le a foi le mamao ese mai le fale ma le aiga ma le Atua e te lagona ua oo i ai lau malaga, ou te molimau atu e te lei malaga lava i se mamao e le mafai ona aapa atu i ai le alofa faalelagi. E le mafai ona e magoto ia maualalo ifo nai lo le malamalama le gata o le Togiola a Keriso. (Jeffrey R. Holland, “O Le Au Faigaluega i le Tovine,” Liahona, Me 2012, 33)

Sa faapea mai Elder C. Scott Grow o le Au Fitugafulu:

O Iesu Keriso o le Fomai Sili o o tatou agaga. Vagana ai agasala o le malaia e faavavau, e leai se agasala po o se solitulafono, tiga po o le faanoanoa, e le mafai ona faamagaloina i le mana faamalolo o Lana Togiola.

A tatou agasala, e ta’u mai e Satani ua tatou leiloloa. I se eseesega, ua ofo mai e lo tatou Togiola le faaolataga mo tagata uma—e tusa lava po o le a le mea sese ua tatou faia—o lena ofo e mo oe ma au. (C. Scott Grow, “O Le Vavega o le Togiola,” Liahona, Me 2011, 109)

I se faasalalauga a le autalavou, sa faasoa mai ai e Elder Gerrit W. Gong o le Korama a Aposetolo e Toasefululua le faataitaiga lenei a se talavou e lei lagonaina sa agavaa o ia mo le alofa o le Atua:

Mataupu Faavae ma Feagaiga 101:5. Aisea e aoai ai tatou e le Alii?

E tolu faamoemoega o aoaiga faalelagi: (1) ia faaoleole i tatou ia salamo, (2) ina ia faamamaina ma faapaiaina i tatou, ma le lona (3) i taimi e toe faatonutonu ai o tatou ala o le olaga i le mea ua silafia e le Atua o se ala e sili atu ona lelei. (D. Todd Christofferson, “Ou Te Aoai Atu ma Sasa ia i Latou Uma Ou te Alofa I Ai,” Liahona, Me 2011, 98)

Mataupu Faavae ma Feagaiga 101:2. O a nisi o solitulafono a le Au Paia?

A o lei tutuli ese le Au Paia mai le Itumalo o Jackson, Misuri, sa latou mauaina ni lapataiga e faapea, o le a latou tigaina i puapuaga pe afai latou te le salamo. Mo se faataitaiga, ia Ianuari 1833, sa aoai ai e Iosefa Samita ia Viliamu W. Phelps ma Sini Gilbert mo ni tusi sa la tusia sa faitio ai ma e le lelei. Sa tusia e Orson Hyde ma Ailama Samita se tusi i taitai o le Ekalesia i Misuri e lapataia ai i laua e uiga i le “maualalo, pogisa, & tauaso” ia na faia e uiga i le Perofeta o Iosefa Samita. Ona o nei solitulafono ma isi, sa lapataia ai e Orson Hyde ma Ailama Samita e faapea o le a feagai le Au Paia i Misuri ma “se faasalaga & i le faamasinoga” (The Joseph Smith Papers, Documents, Volume 2: Iulai 1831–Ianuari 1833, ed. Matthew C. Godfrey ma isi [2013], 367, 373–74).

Gaoioiga Faaopoopo e Aoao Ai

O se tulaga faataitai

Afai e te lagona o le a fesoasoani se tulaga faataitai i tagata aoga ia malamalama ai i le upumoni sa latou faailoa mai le Mataupu Faavae ma Feagaiga 101:3, 9, e mafai ona e faaaogaina se tulaga faataitai e pei o lenei:

O Grace o se tamaitai talavou e lei aafia i le Ekalesia po o le talalelei mo ni nai tausaga. I lea taimi, sa ia faia ai le tele o filifiliga e le ogatusa ma aoaoga a le Faaola. O nei filifiliga ua maua ai se lona lagona vavamamao mai le Ekalesia ma le autalavou o lana tupulaga i lana uarota. O lana vaaiga ia Iesu Keriso o Ia o se tagata atoatoa e le faamaonia ana filifiliga. Ua ia lagonaina le toafimalie atili i le lē amanaiaina o mafaufauga faalelotu po o fesili i lona olaga. Ua ia lagonaina foi ua ia misia ni avanoa e aoao ai ma atiina ae e pei o isi talavou o lana tupulaga i le mavae ai o le umi o lona aluese.

• O le a se mea e mafai ona fesoasoani ia Grace e malamalama ai mai mea sa e aoaoina pe lagonaina i le asō?

• E mafai faapefea e le malamalama i le agaalofa ma le alofa mutimutivale o Iesu Keriso ona aafia ai lo tatou faaosofia e salamo?

• O le a se molimau po o se aafiaga mai lou lava olaga e mafai ona e faasoa atu ia Grace e uiga i le agaalofa ma le alofa mutimutivale o le Faaola?

Mataupu Faavae ma Feagaiga 101:27–35. Tulaga i le taimi o le Meleniuma

E mafai ona musuia tagata aoga e aoao e uiga i tulaga i le taimi o le Meleniuma.

Atonu e te manao e faamalamalama atu, i le avea ai ma se vaega o Lana faamafanafanaga i le Au Paia, sa faasoa atu ai e le Alii ia i latou se vaaiga lautele o Siona ma le faapotopotoina ma faamanuiaga o le Au Paia (tagai i le Mataupu Faavae ma Feagaiga 101:16–19). Na faalauteleina e le Alii lena vaaiga i le aoaoina o le Au Paia e uiga i le Meleniuma a sau, lea o le a mulimuli i le fausiaina o Siona ma le Afio Mai Faalua (tagai i le Mataupu Faavae ma Feagaiga 101:20–23).

Mafaufau e valaaulia tagata aoga e faitau le Mataupu Faavae ma Feagaiga 101:27–35, ma vaavaai mo mea na faaali mai e le Alii o le a tupu i le taimi o le Meleniuma. E mafai ona e fesili i tagata aoga po o a mea na latou aoaoina e fiafia ia i latou. E mafai ona e valaaulia tagata aoga e fai mai soo se latou fesili o i ai e uiga i fuaiupu. E mafai ona faailoga e tagata aoga i a latou tusitusiga paia o nei fuaiupu e faasino i le Meleniuma. Mafaufau e tilotilo i le Tusi Lesona a le Tagata Aoga o le Mataupu Faavae ma Feagaiga (2025) mo faamatalaga i nei fuaiupu.

Ona mafai lea ona e valaaulia tagata aoga e faitau le Mataupu Faavae ma Feagaiga 101:36–38 ma faasoa mai pe faapefea ona fesoasoani nei fuaiupu ia i latou e tali ia fesili nei:

• O le a le finagalo o le Faaola ia e lagonaina le iloa e uiga i le mea o le a oo mai?

• E mafai faapefea e le iloaina o le mea o le a oo mai ona suia ai la tatou vaaiga i luitau o i ai nei?

Mataupu Faavae ma Feagaiga 101:39–41. “Masima o le lalolagi”

Ina ia fesoasoani i tagata aoga ia malamalama atili i le Mataupu Faavae ma Feagaiga 101:39–41 (tagai foi i le Mataio 5:13), e mafai ona e fesili atu ia i latou po o le a le mea e lelei ai le masima. Fesoasoani ia i latou ia malamalama o le masima e faaleleia ai le tofo o meaai, faasaoina meaai, ma e i ai foi meatotino faamalolo. Valaaulia i latou e faitau fuaiupu 39–40, ma vaavaai mo mea na aoao mai e le Faaola e uiga i tagata ma le masima.

Mafaufau e faasoa atu le saunoaga lenei mai ia Elder Carlos E. Asay (1926–1999): “Sa faamatala mai e se kemisi atamai i le lalolagi ia te au o le a le aveesea le tofo o le masima i le matua. Ua leiloa le tofo i le fefiloi ma le faatamaiaga” (Carlos E. Asay, ”Salt of the Earth: Savor of Men and Saviors of Men,” Ensign, Me 1980, 42). Atonu e te fai atu fesili nei:

• E mafai faapefea ona pei alii ma tamaitai o le masima i tagata o le lalolagi?

• E mafai faapefea ona faatusatusa lenei talafaatusa i le Au Paia i Misuri?

• E mafai faapefea e le nuu o le Alii ona faasaoina lo latou tofo i aso nei?

Faitau le Mataupu Faavae ma Feagaiga 101:41–42, ma vaavaai mo mea na aoao mai e le Faaola e manaomia ona tupu mo le Au Paia e amata ai ona toe maua lo latou tofo. Tuu atu i tagata aoga se avanoa e faasoa mai ai ma fesoasoani ia i latou ia malamalama na finagalo le Alii i lana Au Paia ia faamamaina e ala i le aoaiga ma faamaualaloina i latou lava i Ona luma.

• E mafai faapefea ona vaaia le alofa o le Alii i nei fuaiupu?