“Lesona 120—Fotopampianarana sy Fanekempihavanana 107:21–100: Vavolombelona manokan’i Jesoa Kristy,” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Fotopampianarana sy Fanekempihavanana 107:21–100,” Fotopampianarana sy Fanekempihavanana: Boky torolalana ho an’ny mpampianatra seminera
Lesona 120: Fotopampianarana sy Fanekempihavanana 106–108
Fotopampianarana sy Fanekempihavanana 107:21–100
Vavolombelona manokan’i Jesoa Kristy
Tahaka ny nataony tamin’ny andron’ny Testamenta Vaovao, dia niantso mpaminany sy apôstôly ary olon-kafa i Jesoa Kristy mba hitarika ny Fiangonany ankehitriny sy hijoro ho vavolombelona momba Azy manerana an’izao tontolo izao. Ao amin’ny Fotopampianarana sy Fanekempihavanana 107 dia nanazava ny anjara asan’ireo mpitarika voafidy ireo i Jesoa. Ity lesona ity dia afaka manampy ireo mpianatra hahatsapa fitokisana bebe kokoa fa ireo Apôstôly dia vavolombelona manokan’i Jesoa Kristy.
Sahanasa fianarana azo atao
Ny Fiangonan’i Jesoa Kristy
Hevero ny hitondra kaopy enina ao an-dakilasy ary hanangana piramida kely amin’ny alalan’izy ireo. Asio kaopy telo eo ambany, roa eo afovoany ary iray eo an-tampony. Omeo anarana hoe Olomasina ny kaopy farany ambony ary lazao amin’ny mpianatra fa maneho ny mpikamban’ny Fiangonan’ny Mpamonjy izany. Hazavao fa tao amin’ny Testamenta Vaovao dia nanorina ny Fiangonany tamin’ny fomba izay hitahiana ny mpikambana ao aminy i Jesoa.
Vakio ireto andininy manaraka ireto. Tadiavo ireo antso nampiasain’ny Mpamonjy mba hitantanana ny Fiangonany sy hanohanana ny Olomasina tamin’ny androny.
-
Inona no hitanao?
Rehefa mizara ny mpianatra, dia azonao atao ny manome anarana ny kaopy roa eo afovoany hoe Fitopololahy sy Eveka ary ny kaopy telo ambany hoe Jesoa Kristy, Mpaminany, ary Apôstôly. Hazavao fa na dia heverina ho mpaminany sy mpahita ary mpanambara aza ny Apôstôly rehetra, dia matetika no antsoina hoe mpaminany ny Apôstôly ela niasana indrindra.
-
Nahoana no zava-dehibe ho antsika ny mahatakatra fa i Jesoa Kristy sy ny mpaminany ary ny apôstôly no fototra iorenan’ny Fiangonana? (jereo ny Efesiana 2:20).
Ampio ny mpianatra hahatakatra fa tamin’ny andro fahiny, ny “vato fehizoro” iray (Efesiana 2:20) dia vato lehibe napetraka teo amin’ny zoron’ny fototra iray. Ny zorony sy ny fametrahana ny vato hafa rehetra dia norefesina avy amin’ilay vato fehizoro.
-
Inona no fantatrao momba an’i Jesoa Kristy izay azo ampitahaina amin’ny vato fehizoro?
Asao ny mpianatra hieritreritra ireo fitahiana avy amin’ny fananana ireo mpitarika ireo ao amin’ny Fiangonan’ny Mpamonjy. Mety hanontany tena ny mpianatra hoe inona no ataony mba handraisana ireo fitahiana azo avy amin’ireo izay napetraky ny Mpamonjy amin’ireo toerana ireo.
Amporisiho ireo mpianatra hikatsaka ny fitarihan’ny Fanahy Masina rehefa miezaka ny hahatakatra ny anjara asan’ireo mpitarika ao amin’ny Fiangonana amin’ny fanamafisana orina ny fijoroany ho vavolombelona momba an’i Jesoa Kristy izy ireo.
Azonao atao ny mamintina na mamaky ity sahan-kevitra ho an’ny Fotopampianarana sy Fanekempihavanana 107 manaraka ity.
Teo ambany fitarihan’ny Rainy no nanorina ny Fiangonany naverina tamin’ny laoniny i Jesoa Kristy amin’izao androntsika izao, teo ambonin’ilay fototra nanonerany ihany nandritra ny asa fanompoany teto an-tany (jereo ny Fanekem-pinoana 1:6). Nanomboka nanambara ny firafitry ny Fiangonany tamin’ny Mpaminany Joseph Smith ny Tompo ary mbola manambara izany Izy ankehitriny. Tamin’ny taona 1835 dia niantso Fiadidiana Voalohany, Kôlejin’ny Apôstôly Roambinifolo, Fitopololahy, eveka ary mpiandraikitra hafa ao amin’ny fisoronana ny Mpamonjy mba hanompo ny Olomasina sy hitantana ny Fiangonany eto an-tany. Ny Fotopampianarana sy Fanekempihavanana 107 dia mamaritra ny andraikitra sasany nomen’ny Mpamonjy ho an’ireo izay nantsoina amin’ireo toerana ireo.
Ny andraikitry ny mpitarika nofidin’ny Tompo
Hevero ny hanoratra amin’ny taratasy misaraka ny tsirairay amin’ireto antso manaraka ireto ary apetaho manerana ny efitrano izany. Azonao atao ny manendry mpianatra hivory ao anatina vondrona mba handalina antso manokana, na azonao atao ny mamela azy ireo hifindra any amin’izay antso tiany hianarana.
Alaivo antoka fa ampy tsara ny fotoana ho an’ny tapany farany amin’ny lesona.
Halalino ireto andalan-tsoratra masina manaraka ireto ka tadiavo ny fomba nampiasan’i Jesoa Kristy ireo izay apetrany eo amin’ireo antso ireo mba hanohanana ny Olomasina ao amin’ny Fiangonany:
-
Mpaminany na Filohan’ny Fiangonana: Fotopampianarana sy Fanekempihavanana 107:65–67, 91–92
-
Fiadidiana Voalohany: Fotopampianarana sy Fanekempihavanana 107:9, 22
-
Apôstôly Roambinifolo: Fotopampianarana sy Fanekempihavanana 107:23–24, 33, 35, 58
-
Fitopololahy: Fotopampianarana sy Fanekempihavanana 107:25, 34, 38
-
Eveka: Fotopampianarana sy Fanekempihavanana 107:13–15, 71–74
Aorian’ny fandalinana ataon’ireo vondrona, dia asao izy ireo hizara amin’ny iray kilasy ny zavatra nianaran’izy ireo.
-
Tamin’ny fomba ahoana no nitahian’ny Mpamonjy anao tamin’ny alalan’ireo izay mihazona ireo antso ireo?
-
Inona avy ireo zavatra sasantsasany azontsika atao mba hanohanana ireo izay mihazona ireo antso masina ireo? (jereo ny Fotopampianarana sy Fanekempihavanana 107:22).
Vavolombelona manokan’i Jesoa Kristy
Rehefa avy nizara zavatra ireo vondrona dia amporisiho ireo mpianatra hanasongadina ireo teny na andian-teny ao amin’ny andininy 23 izay mampianatra fa miantso Apôstôly i Jesoa Kristy mba hijoro ho vavolombelona manokana momba Azy manerana an’izao tontolo izao.
-
Amin’ny fomba ahoana no hizaran’ireo Apôstôly fijoroana ho vavolombelona momba an’i Kristy manerana an’izao tontolo izao amin’izao androntsika izao?
Ny Loholona David A. Bednar ao amin’ny Kôlejin’ny Apôstôly Roambinifolo dia nanazava ny hoe midika inona ho an’ny Apôstôly izany hoe “vavolombelona manokan’ny anaran’i Kristy” izany (andininy 23).
Mitovy tamin’ny taloha ny anjara asan’ny Apôstôly ankehitriny (jereo ny Asan’ny Apostoly 1:22; 4:33). Ny iraka nampanaovina anay dia ny handeha amin’izao tontolo izao ka hitory momba an’i “Jesoa Kristy, ary Izy voahombo tamin’ny hazo fijaliana” (jereo ny Marka 16:15; 1 Korintiana 2:2). Ny Apôstôly dia misiônera sy vavolombelona manokan’ny anaran’i Kristy. Ny “anaran’i Kristy” dia milaza ny fitambaran’ny asa nanirahana ny Mpamonjy sy ny fahafatesany ary ny fitsanganany tamin’ny maty—ny fahefany sy ny fotopampianarany ary ireo toetrany miavaka amin’ny maha-Zanak’ Andriamanitra Azy mba ho Mpanavotra sy Mpamonjy antsika. Amin’ny maha-vavolombelona manokan’ny anaran’i Kristy anay dia mijoro ho vavolombelona ny amin’ny tena fisian’i Jesoa Kristy sy ny maha-Andriamanitra Azy ary ny fitsanganany tamin’ny maty, ny Sorompanavotany tsy manam-petra sy mandrakizay ary ny filazantsarany, izahay. (David A. Bednar, “Special Witnesses of the Name of Christ,” Religious Educator: Perspectives on the Restored Gospel, boky 12, lah. 2 [2011], 1)
-
Araka ny hevitrao, nahoana i Jesoa Kristy no nanome Apôstôly velona ho vavolombelony manokana ankoatra ireo vavolombelony ao amin’ny soratra masina?
Raha ilaina amin’ity sahanasa manaraka ity izany, dia hevero ny hanome an’ireo mpianatra lahateny tamin’ny fihaonamben’ny Fiangonana maneran-tany farany indrindra na teny nambara hafa nataon’ny Apôstôly vao haingana.
Mitadiava ohatra ao amin’ireo lahatenin’ny fihaonambe farany na ireo teny nambara hafa vao haingana momba ny Apôstôly mijoro ho vavolombelona manokana momba an’i Jesoa Kristy. Rehefa manao izany ianao dia valio ao anatin’ny diary fandalinanao ny iray na ny maromaro amin’ireto fanontaniana manaraka ireto:
-
Inona no fiantraikan’ny fijoroana ho vavolombelona manokan’ireo Apôstôly ireo eo amin’ny fahatsapanao momba an’i Jesoa Kristy?
-
Inona no zavatra nozarain’ny Apôstôly iray momba an’i Jesoa Kristy izay inoanao ihany koa fa marina? Ahoana no nianaranao ho an’ny tenanao manokana izany fahamarinana izany?
-
Inona avy ireo zavatra azontsika atao mandritra ny androm-piainantsika mba hanohizana ny fianarana avy amin’ireo fijoroana ho vavolombelona manokan’ireo Apôstôly momba an’i Jesoa Kristy?
Asao ny mpianatra vitsivitsy hizara ny zavatra nianarany miaraka amin’ireo hevi-baovao izay mety ho nosoratany.
Amporisiho ireo mpianatra hanohy hampiasa ireo fijoroana ho vavolombelona manokan’ny Apôstôly momba an’i Jesoa Kristy mba hanamafisana ny finoan’izy ireo Azy. Ohatra, azonao atao ny manoro hevitra ny mpianatra handalina lahateny iray amin’ny fihaonamben’ny Fiangonana maneran-tany isan-kerinandro, na hanaraka ny Apôstôly ao amin’ny tambajotran-tserasera, na hifantoka manokana amin’ny fijoroana ho vavolombelona sy ny fampianaran’ny Apôstôly momba an’i Jesoa Kristy mandritra ny fihaonamben’ny Fiangonana maneran-tany manaraka.