Lesona 119: Fotopampianarana sy Fanekempihavanana 106–108

Fotopampianarana sy Fanekempihavanana 107:1–20

“Ny fisoronana masina”

Tamin’ny lohataona 1835 dia niomana handeha hanao ny asa fitoriana voalohany nataony ireo mpikambana tao amin’ny Kôlejin’ny Apôstôly Roambinifolo izay vao natsangana. Nanome antsipirian-javatra hanampiana azy ireo sy ny hafa hanatanteraka ny andraikitr’izy ireo tao amin’ny fisoronana io fanambarana avy amin’ny Tompo io. Ity lesona ity dia afaka manampy ny mpianatra hahatakatra ny maha-zava-dehibe ny fanovozana amin’ny herin’ny Mpamonjy sy ny fahefan’ny fisoronany rehefa manompo ao amin’ny Fiangonany izy ireo.

Sahanasa fianarana azo atao

Rantsana na tovana

Atombohy amin’ny fanasana ny mpianatra hanao sarina hazo izay ahitana rantsana maro eny amin’ny solaitrabe ny fotoam-pianarana. Asao ny iray kilasy hamantatra hoe ampahany inona amin’ilay hazo no tovana (ireo rantsana sy ravinkazo). Asao ilay mpianatra izay nanao ilay sarina hazo mba hanapaka ny iray amin’ireo rantsana amin’ny alalan’ny famafana ny faritra mampifandray ilay rantsana amin’ilay vatan-kazo. Asao ny iray kilasy hifanakalo hevitra momba ireto fanontaniana manaraka ireto mba hanomanana azy ireo hahatakatra ny antony tokony hifandraisantsika foana amin’ny Mpamonjy sy ny fisoronany:

• Inona no mitranga amin’ny rantsana iray raha tsy ampifandraisina amin’ilay hazo izany? Nahoana?

Vakio ny Jaona 15:5, ka tadiavo ny zavatra nampianarin’ny Mpamonjy ka mifandray amin’ity lesona ampiasana ohatra azo tsapain-tanana ity.

• Inona no nianaranao?

• Nahoana no ilaina amin’ny ezaka ataontsika hanompoana ao amin’ny Fiangonany ny fifandraisana foana amin’ny Mpamonjy?

Omeo fotoana ny mpianatra hisaintsainana momba ny fifandraisan’izy ireo amin’i Jesoa Kristy. Asao izy ireo hikatsaka fitaomam-panahy eo am-pieritreretan’izy ireo fa tsy vitan’ny hoe hitahy azy ireo manokana fotsiny ihany io fifandraisana io fa hanome hery azy ireo ihany koa mba hitahy ny hafa amin’ny alalan’ny antso ao amin’ny Fiangonana sy ireo andraikitra amin’ny fanompoana.

Tovana amin’ny fisoronana

Mba hanampiana ny mpianatra hahatakatra ny sahan-kevitry ny fizarana 107 dia zarao amin’ny teninao manokana ity fampahalalana manaraka ity:

Tamin’ny 28 martsa 1835 dia niomana handeha hanao asa fitoriana tany amin’ny faritra atsinanan’i Etazonia ireo mpikambana tao amin’ny Kôlejin’ny Apôstôly Roambinifolo vao niforona. Ny Apôstôly sasany dia mbola tsy tena nahazo antoka ny amin’ny fomba tokony hanompoan’izy ireo tamin’ny antson’izy ireo vaovao. Nanambara ny Fotopampianarana sy Fanekempihavanana 107 ny Tompo mba hampianarana azy ireo momba ny fisoronana sy hamporisihana azy ireo amin’ny andraikitr’izy ireo.

Vakio ny Fotopampianarana sy Fanekempihavanana 107:1–4, ka tadiavo ny zavatra nampianarin’ny Tompo momba ny fisoronana.

• Inona no zavatra nianaranao momba ny Fisoronana Melkizedeka?

Ampitahao amin’ny zavatra nampianarin’ny Filoha Dieter F. Uchtdorf tao amin’ny Fiadidiana Voalohany ny anaran’ny fisoronana hita ao amin’ny andininy 3:

I Kristy no loharanon’ny tena fahefana sy herin’ny fisoronana marina eto an-tany. Asany ity, izay hananantsika tombontsoa ny fahafahana hanampy amin’izany. (Dieter F. Uchtdorf, “Ny fifaliana avy amin’ny fisoronana,” Liahona, nôv. 2012, 59)

• Nahoana ianao no mahatsapa fa manan-danja ny fahatakarana fa ny herin’ny fisoronana rehetra dia tonga mivantana avy amin’i Jesoa Kristy?

Alohan’ny hamakiana ireto andininy manaraka ireto dia asao ny mpianatra hitadidy ilay fifanakalozan-kevitra nataon’izy ireo momba ny rantsana na tovana. Manaova sarina hazo hafa eny amin’ny solaitrabe dia asio anarana hoe Ny Fiangonan’i Jesoa Kristy. Avy eo dia tanisao eny amin’ny solaitrabe ireto manaraka ireto: Fisoronana Melkizedeka, Fisoronana Aharôna, Fikambanana Ifanampiana, Zatovovavy, Sekoly Alahady, Kilonga.

Iaraho mamaky amin’ny mpiara-mianatra iray ny Fotopampianarana sy Fanekempihavanana 107:5, 13–14, ka tadiavo izay teny eny amin’ny solaitrabe azonao ampitahaina amin’ilay vatan-kazo ary izay azo ampitahaina amin’ireo rantsana.

• Inona no azo ampitahaina amin’ilay vatan-kazo, araka ny zavatra novakinao? Inona ireo rantsana?

  Rehefa mamaly ireo fanontaniana teo aloha ny mpianatra dia asio anarana hoe Fisoronana Melkizedeka ilay vatan-kazo ary ireo tovana (na rantsan-kazo) kosa hoe Fisoronana Aharôna sy ireo rafitra ao amin’ny Fiangonana izay notanisaina eny amin’ny solaitrabe.

  Asao ny mpianatra hanisy marika ilay fahamarinana ao amin’ny andininy 5 izay milaza hoe ny fahefana sy anjara fanompoana rehetra ao amin’ny Fiangonan’ny Mpamonjy dia tovana amin’ny Fisoronana Melkizedeka avokoa.

• Inona no azontsika ianarana avy amin’ny fampitahan’ny Tompo ny Fisoronana Aharôna sy ireo rafitra ao amin’ny Fiangonana amin’ireo “tovana” ao amin’ny Fisoronana Melkizedeka?

Ampiasao ny tenin’ireo mpaminany mba hanamafisana fotopampianarana sy fitsipika: Ity manaraka ity dia ohatra amin’ny fampiasana ny tenin’ireo mpaminany mba hampiorim-paka ny fahatakaran’ireo mpianatra ny fotopampianarana. Mba hanaovana fampiharana misimisy kokoa momba izany dia jereo ilay fampiofanana mitondra ny lohateny hoe “Mampianara avy amin’ny soratra masina sy avy amin’ny tenin’ireo mpaminanin’ny andro farany” izay hita ao amin’ny Fahaiza-manao ho fampivoarana ny mpampianatra. Manaova fanazaran-tena amin’ny fampiasana ilay fahaiza-manao “Manomàna fanasana izay manampy ny mpianatra hampifandray ireo fahamarinana hita ao amin’ny soratra masina amin’ny zavatra lazain’ireo mpaminany velona.”

Ny Filoha Dallin H. Oaks ao amin’ny Fiadidiana Voalohany dia nizara izao manaraka izao mikasika ny fahefan’ny fisoronana ao amin’ireo antso ao amin’ny Fiangonana:

Amin’ny farany, dia i Jesoa Kristy Tompo no mihazona ny fanalahidy rehetra an’ny fisoronana, fisoronana izay Azy. Izy no mamaritra hoe fanalahidy inona no zaraina amin’ny olombelona ary ahoana no fomba ampiasana azy. …

… Koa satria milaza ny soratra masina fa “ireo fahefana hafa rehetra [sy] anjara fanompoana ao amin’ny fiangonana dia tovan’io fisoronana [Melkizedeka] io” (F&F 107:5), dia atao amin’ny fahefan’ny fisoronana ny zavatra rehetra izay atao eo ambanin’ny fitarihan’ireo fanalahidin’ny fisoronana ireo. (Dallin H. Oaks, “Ny fanalahidy sy ny fahefan’ny fisoronana,” Liahona, mey 2014, 50)

Ampahatsiahivo ny mpianatra fa i Jesoa Kristy no loharanon’ny herin’ny fisoronana rehetra (jereo ny Fotopampianarana sy Fanekempihavanana 107:3). Manoràta hoe Ny herin’ny Mpamonjy eo akaikin’ny hoe Ny Fisoronana Melkizedeka eo amin’ilay vatan-kazo.

• Manampy anao amin’ny fomba ahoana mba hanompo amin’ny fomba tsaratsara kokoa ny olona manodidina anao ny fahatakarana fa ny antso rehetra ao amin’ny Fiangonana dia mifandray amin’ny herin’ny Mpamonjy?

• Oviana no nahatsapanao ny herin’ny Mpamonjy nanampy anao tamin’ny asa fanompoanao tao am-piangonana?

Miaina ny herin’ny fisoronana

Asao ny mpianatra hamaky ireto andinin-tsoratra masina manaraka ireto sy hifanakalo hevitra momba ireo fanontaniana telo hita etsy ambany miaraka amin’ny mpiara-mianatra iray. Azonao atao ny mampiseho ireo fanontaniana mba ho hitan’ny mpianatra.

Vakio ny Fotopampianarana sy Fanekempihavanana 107:8, 18–20, ka tadiavo ireo fomba anomezan’ny Mpamonjy hery an’ireo izay manompo ao amin’ny Fiangonana amin’ny alalan’ny fisoronany.

Ny Fotopampianarana sy Fanekempihavanana 107:8 dia andinin-tsoratra masina fifehezana fotopampianarana. Asao ny mpianatra hanisy marika amin’ny fomba miavaka ireo andinin-tsoratra masina fifehezana fotopampianarana mba ho mora aminy ny mahita ny toerana misy azy.

• Inona avy ireo “zavatra ara-panahy” (andininy 8) izay itahian’ny Tompo antsika amin’ny alalan’ny Fisoronana Melkizedeka?

  Ampio ny mpianatra hahatakatra fa ny fitantanana ny “zavatra ara-panahy” dia ahitana ny fanatanterahana ireo tsodrano sy ôrdônansy ary fanekempihavanana.

• Amin’ny fomba ahoana no anampian’ireo “ôrdônansy ivelany” ao amin’ny Fisoronana Aharôna (toy ny batisa sy ny fanasan’ny Tompo) izay resahina ao amin’ny andininy 20 anao hifandray amin’i Jesoa Kristy?

• Oviana no fitahiana teo amin’ny fiainanao ny fifandraisan’ny olona iray hafa amin’ny Mpamonjy rehefa nanompo izy ireo?

Mizarà ohatra ana olona iray izay voatahy rehefa nisy olon-kafa nanompo tamin’ny fomba izay nampifandray azy ireo tamin’ny herin’ny Mpamonjy. ChurchofJesusChrist.org Ao amin’io lahateny io ny Loholona David A. Bednar ao amin’ny Kôlejin’ny Apôstôly Roambinifolo dia mizara tantara iray mombana mpitarika iray ao amin’ny fisoronana izay notarihin’ Andriamanitra tamin’ny fanompoana ireo zatovo tao amin’ny tsatòka misy azy.

Fampiharana ataon’ny tena manokana

Ny Rahavavy Bonnie L. Oscarson izay Filohan’ny Zatovovavy maneran-tany teo aloha dia nampianatra ny fomba hanomezan’ny fahefan’ny fisoronana hery ireo zatovovavy amin’ny antson’izy ireo. Tadiavo ny fomba azo ampiharana io teny nambara io amin’ireo zatovo rehetra rehefa manompo izy ireo.

Mila mahita ny tenany ho toy ny mpandray anjara manan-danja ao amin’ny asa famonjena tarihin’ny fisoronana ny zatovovavin’ny Fiangonana fa tsy ho toy ny mpitazana sy mpijery fotsiny ihany. Manana antso ianareo ary atokan’ireo izay mihazona ny fanalahidin’ny fisoronana mba ho mpitarika manana hery sy fahefana ato amin’ity asa ity. Rehefa milofo amin’ny antsonareo ao amin’ny fiadidian’ny kilasy sy miomana ara-panahy ianareo, rehefa miara-mikaon-doha, manolo-tanana mba hanompo ireo olona ao amin’ny kilasinareo, ary mifampianatra ny filazantsara, dia mandray ny toeranareo ato amin’ity asa ity, ary samy hotahiana ianareo sy ireo namanareo. (Bonnie L. Oscarson, “Mitsangàna amin-kery ry rahavavy ao Ziona,” Liahona, nôv. 2016, 14)

• Inona no manan-danja aminao ao amin’io teny nambara io? Nahoana?

  Asao ny mpianatra hamaly ity fanontaniana manaraka ity ao amin’ny diary fandalinan’izy ireo. Azonao atao ny mangataka mpianatra manolo-tena mba hizara ny valin-tenin’izy ireo.

• Inona no nianaranao androany momba ny maha-zava-dehibe ny fanovozana amin’ny herin’ny Mpamonjy sy ny fahefan’ny fisoronany rehefa manompo ao amin’ny Fiangonana ianao?

Ataovy tsianjery

Azonao atao ny manampy ireo mpianatra hitadidy ilay andinin-tsoratra masina fifehezana fotopampianarana sy ilay andian-teny manan-danja ao amin’ny soratra masina nandritra ity lesona ity, ary avereno jerena izany mandritra ireo lesona hafa any aoriana any. Ny andian-teny manan-danja ao amin’ny soratra masina dia ny hoe “Ny Fisoronana Melkizedeka [dia] manan-kery sy fahefana … hitantana ny zavatra ara-panahy.” Ireo hevitra ho an’ny sahanasa fanaovana tsianjery dia ao amin’ny fitaovana tovana etsy ambany “Sahanasa famerenana ny fifehezana fotopampianarana.”

Loharanom-pitaovana fanampiny

Fotopampianarana sy Fanekempihavanana 107:5. Ahoana no ifandraisan’ireo anjara fanompoana rehetra ao amin’ny Fiangonana amin’ny Fisoronana Melkizedeka?

Nampianatra ny Filoha Joseph F. Smith (1838–1918) hoe:

Tsy misy fanjakana misaraka sy mitokana, ambony, na ivelan’ny Fisoronana masina na ny fahefan’izany ato amin’ny Fiangonan’i Jesoa Kristy. … Tsy ivelan’izany na ambonin’izany, na tsy takatr’izany [ireo rafitry ny vondrona fanampiny]. Manaiky ny fitsipiky ny Fisoronana izy ireo. Na aiza na aiza misy azy ireo dia misy izy ireo mba hanatanterahana asa tsara; ho famonjena fanahy vitsivitsy na eo amin’ny ara-batana na ara-panahy. (Teachings of Presidents of the Church: Joseph F. Smith [1998], 341–42)

Nanazava ny Mpaminany Joseph Smith (1805–44) hoe:

Ny Fisoronana Melkizedeka … no fantsona izay hanambarana avy any an-danitra ny fahalalana rehetra, ny fotopampianarana, ny drafitry ny famonjena, ary ny zavatra manan-danja rehetra. (Joseph Smith, in History, 1838–1856 [Manuscript History of the Church], boky C-1, 1104, josephsmithpapers.org; nampanarahana toetrandro ny tsipelina, mari-piatoana, ary ny sorabaventy)

Fotopampianarana sy Fanekempihavanana 107:8. Ahoana no ampiasan’ireo vehivavy ato amin’ny Fiangonana ny fahefan’ny fisoronana avy amin’ Andriamanitra?

Nampianatra toy izao ny Filoha Dallin H. Oaks ao amin’ny Fiadidiana Voalohany:

Tsy mahazatra antsika ny fitenenana mikasika ny fananan’ny vehivavy ny fahefan’ny fisoronana ao amin’ny antson’izy ireo ato am-piangonana, saingy fahefana hafa inona ary izany? Rehefa atokana ny vehivavy iray, na tanora na antitra, hitory ny filazantsara amin’ny fotoana feno, dia omena fahefan’ny fisoronana izy hanatanterahana andraikitra iray izay an’ny fisoronana. Marina koa izany rehefa atokana amin’ny andraikitra toy ny mpiandraikitra na mpampianatra ao amin’ny rafitra iray ao amin’ny Fiangonana ny vehivavy iray eo ambany fitarihan’ny olona iray izay mihazona ireo fanalahidin’ny fisoronana. Na iza na iza miasa eo amin’ny toerana na antso iray voaray avy tamin’olona iray izay mihazona fanalahidin’ny fisoronana dia mampiasa ny fahefan’ny fisoronana eo am-panatanterahana ireo andraikitra nanendrena azy. (Dallin H. Oaks, “Ny fanalahidy sy ny fahefan’ny fisoronana,” Liahona, mey 2014, 51)

Aiza no ahafahako mianatra misimisy kokoa momba ny fifandraisana misy eo amin’ny vehivavy sy ny fisoronana?

Raha hianatra misimisy kokoa momba ny fomba ampiasan’ireo vehivavy ny hery sy ny fahefan’ny fisoronana mba hanatontosana ny asan’ Andriamanitra dia jereo ny fizarana “Les femmes et la prêtrise” ao amin’ny pejin-tranonkalan’ny Fikambanana Ifanampiana.

Sahanasa fianarana fanampiny

Fotopampianarana sy Fanekempihavanana 107:2. “Mpisorona avo tena lehibe tokoa i Melkizedeka”

Asao ny mpianatra hamaky ny Fotopampianarana sy Fanekempihavanana 107:2 ary hitady ny fomba amariparitan’ny Tompo an’i Melkizedeka.

• Inona no zavatra fantatrao momba an’i Melkizedeka ka nahatonga azy ho mpisorona avo tena lehibe?

Asao ny mpianatra hikaroka ny DJS Genesisy 14:25–40 na ny Almà 13:3–19, ka hitady ireo hevi-baovao momba ny mpaminany Melkizedeka izay afaka mampahatsiahy antsika momba ny toetra sy ny asa nanirahana an’i Jesoa Kristy.

Rehefa avy manao fikarohana dia angataho ny mpianatra hizara andian-teny na famariparitana izay mampahatsiahy azy ireo an’i Jesoa Kristy. Rehefa avy mitanisa toetra vitsivitsy ianao dia asao ny mpianatra hizara mikasika ireo fotoana nahitan’izy ireo olona iray nanompo tao amin’ny Fiangonana izay nanana toetra tsara mitovy amin’izany na nampahatsiahy ny mpianatra an’i Kristy.

Fotopampianarana sy Fanekempihavanana 107:14, 20. Herin’ny Fisoronana Aharôna

Asao ny mpianatra iray hamaky ny Fotopampianarana sy Fanekempihavanana 107:20 ary asao ny mpianatra iray hafa hamaky ny Fotopampianarana sy Fanekempihavanana 13. Asao ny mpianatra mba hitady ireo fitoviana sy ireo fahasamihafana misy amin’ireo andininy roa ireo.

• Rehefa fantatrao fa mifandray amin’ny herin’ny Mpamonjy ny Fisoronana Aharôna (jereo ny Fotopampianarana sy Fanekempihavanana 107:14) dia inona no fiantraikan’izany amin’ny fomba fijerinao ireo adidy sy andraikitry ny Fisoronana Aharôna?

• Inona ireo ohatra sasantsasany amin’ireo “ôrdônansy ivelany”?

Ampio ny mpianatra hahatakatra fa ireo ôrdônansy ireo dia ahitana ny batisa sy ny fikarakarana ny fanasan’ny Tompo.

• Oviana no nanampian’ny iray amin’ireo ôrdônansy anao hahatsapa ho akaiky kokoa an’i Jesoa Kristy?

Raha mila fampahalalana sy loharanom-pitaovana fanampiny momba ny herin’ny Fisoronana Aharôna dia jereo ny lesona Fotopampianarana sy Fanekempihavanana 13 ao anatin’ity boky torolalana ity.

Manovo amin’ny herin’ny Mpamonjy hiasa ao amin’ny antsontsika

Mba hanampiana ny mpianatra hahatakatra ny fomba ahafahan’izy ireo mahazo ny herin’ny Mpamonjy eo amin’ny antsony dia azonao ampiasaina ny iray na maromaro amin’ireto rafi-tantara manaraka ireto ary asao ny mpianatra hizara fomba ahafahan’ireo zatovo ireo mampifandray ny asa fanompoan’izy ireo amin’i Jesoa Kristy.

• Olona vaovao ao amin’ny paroasiny i Becca kanefa nangatahina ho filohan’ny kilasy misy azy ao amin’ny Zatovovavy izy. Misalasala amin’ilay antsony vaovao izy satria tsy misy fantany ireo zatovovavy hafa miray kilasy aminy.

• Mahatsapa i Miguel fa vesatra ho azy ny mitondra ny fanasan’ny Tompo any amin’ireo zokiolona izay tsy afaka mankany am-piangonana ao amin’ny paroasy misy azy. Mitaky adiny iray fanampiny aorian’ny firavan’ny fiangonana izany.

• Nangatahina i Kim mba hiara-hanompo amin’ny vehivavy zokiolona iray ao amin’i paroasy. Fianakaviana zatovovavy iray izay naneho haratsian-toetra tamin’i Kim tany aloha ny iray amin’ireo fianakaviana nampandraiketina azy ireo.

• Nantsoina ho filohan’ny kôlejin’ny mpampianatra i Adam. Mila mitady mpanolotsaina sy mpitan-tsoratra izy izao ary manomboka manao ny drafitr’ireo fiaraha-mientana sy manampy ireo zatovolahy ao amin’ny kôlejy misy azy, ary ny sasany amin’ireo dia tsy te ho any am-piangonana.

Fotopampianarana sy Fanekempihavanana 106

Ny Fotopampianarana sy Fanekempihavanana 106 dia fanambarana avy amin’ny Tompo ho an’i Warren Cowdery izay nomena antso hiahy sampana vitsivitsy ao amin’ny Fiangonana.

Azonao asaina ny mpianatra mba hamaky io fizarana io sy hanisy marika ireo hevi-baovao izay afaka manampy azy ireo hifandray amin’ny herin’i Jesoa Kristy amin’ny antson’izy ireo.