“Lesona 121—Fanazaran-tena fifehezana fotopampianarana 8: Fampiharana ireo fitsipiky ny fahazoana fahalalana ara-panahy,” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Fanazaran-tena fifehezana fotopampianarana 8,” Fotopampianarana sy Fanekempihavanana: Boky torolalana ho an’ny mpampianatra seminera
Lesona 121: Fotopampianarana sy Fanekempihavanana 106–108
Fanazaran-tena fifehezana fotopampianarana 8
Fampiharana ireo fitsipiky ny fahazoana fahalalana ara-panahy
Ny fifehezana fotopampianarana dia afaka manampy ireo mpianatra hanorina ny fototry ny fiainan’izy ireo amin’i Jesoa Kristy sy ny filazantsarany. Ity lesona ity dia hanampy ireo mpianatra hampihatra ireo fahamarinana hita ao amin’ireo andalan-tsoratra masina fifehezana fotopampianarana sy hianatra sy hampihatra ireo fitsipika masina hahazoana fahalalana ara-panahy.
Sahanasa fianarana azo atao
Famerenana fifehezana fotopampianarana: Ampiharo
Hevero ny hanome tapa-taratasy kely iray ho an’ny mpianatra tsirairay. Asao ny mpianatra hanoratra amin’ny taratasiny toe-javatra sarotra iray izay atrehin’ny olona iray fantany ary hametraka ny taratasiny ao anaty fitoeran-javatra iray. Angataho ny mpianatra tsy hampiditra anarana na antsipiriany izay mahakasika loatra ny tena manokana.
Apetraho tsiroaroa ny mpianatra ary asaivo misafidy taratasy roa avy ao amin’ilay fitoeran-javatra ny tsiroaroa. Asao ny tsiroaroa hamerina hijery ireo andalan-tsoratra masina fifehezana fotopampianarana amin’ny Fotopampianarana sy Fanekempihavanana amin’ny alalan’ny fampiasana ilay lisitra ao amin’ny Tahirin-kevitra fototra ho an’ny fifehezana fotopampianarana ary hifanakalo hevitra momba ny fomba hampiharana ireo andalan-tsoratra masina isan-karazany amin’ny toe-javatra iray farafahakeliny ao amin’ny taratasiny. Raha iriany dia afaka mampiasa andalan-tsoratra masina avy amin’ny boky soratra masina hafa ihany koa ireo mpianatra. Rehefa avy nomena fotoana ampy dia asao ny tsiroaroa hizara amin’ny iray kilasy hoe nahoana ireo andalan-tsoratra masina noresahiny no mihatra amin’ny toe-javatra iray ao amin’ny iray amin’ireo taratasiny.
Raha mila fanampiana amin’ny toe-javatra iray izay tsy resahin’ny andalan-tsoratra masina fifehezana fotopampianarana mazava tsara ny mpianatra dia azonao atao ny mitarika azy ireo any amin’ny andalan-tsoratra masina iray izay mety mihatra amin’ny toe-javatra rehetra, toy ny Fotopampianarana sy Fanekempihavanana 8:2–3 na ny 2 Nefia 32:3.
Alamino tsara mba haharitra 10–15 minitra ihany ity sahanasa ity mba hanomezana fotoana ampy hanaovana ny fanazaran-tena fifehezana fotopampianarana any aoriana amin’ny lesona.
Mianatra sy mampihatra ireo fitsipiky ny fahazoana fahalalana ara-panahy
Ny ambiny amin’ny lesona dia natokana hanampiana ireo mpianatra hampihatra ireo fitsipiky ny fahazoana fahalalana ara-panahy amin’ny toe-javatra tena misy eo amin’ny fiainana. Raha ilaina dia azonao atao aloha ny manasa ireo mpianatra hamerina hijery ireo fitsipika ao amin’ny andiam-pehezan-teny 5–12 ao amin’ny fizarana “Mahazo fahalalana ara-panahy” ao amin’ny Tahirin-kevitra fototra ho an’ny fifehezana fotopampianarana. Ireo sahanasa famerenana naroso dia ao amin’ny “Asa famerenana fifehezana fotopampianarana” izay hita ao amin’ny tovana ho an’ity boky torolalana ho an’ny seminera ity.
Hevero ny hampiseho sarina zatovovavy iray tahaka izao manaraka izao. Asao ny iray kilasy hamorona fohifohy ny antsipiriany momba ny fiainany mifototra amin’ireo mpikamban’ny Fiangonana eo amin’ny faritra misy anao. Ohatra, afaka mizara izay eritreriny momba ny fianakaviany sy ny zavatra mahaliana azy ary ny zavatra tsapany momba ny Fiangonana ny mpianatra.
Asehoy ity rafi-tantara manaraka ity. Angataho ny mpianatra hizara fitsipika momba ny fahazoana fahalalana ara-panahy izay afaka manampy zatovovavy iray ao anatin’io toe-javatra io ary nahoana.
(Azonao atao koa ny mamela ireo olana asongadina ao amin’ilay rafi-tantara ho banga ary asao ireo mpianatra hameno ilay rafi-tantara amin’ny fanoratana eny amin’ny solaitrabe ireo fanontaniana na olana mety ananan’ilay zatovovavy momba ny vehivavy sy ny fisoronana. Ny fanasana ireo mpianatra hampiditra antsipirian’ireo toe-javatra dia afaka mamela azy ireo haneho malalaka ny ahiahiny manokana izay manan-danja eo amin’ny fiainany.)
Teo am-piomanana ny hampianatra ny kilasin’ny Zatovovavy ny alahady i Andrea no nanomboka nandalina ny Fotopampianarana sy Fanekempihavanana 107. Rehefa avy namaky ny andininy 8 izy, dia niato ary nanomboka nanontany tena ny amin’ny fomba hampiharana ny fisoronana amin’ny zatovovavy. Nanjary niahiahy izy ary nanontany tena raha matoky ny zanany lahy mihoatra noho ny zanany vavy Andriamanitra. Tsaroany ihany koa ny nahitany vao haingana horonan-tsary iray an-jotra izay mirakitra hevitra momba ny fitondrana ny vehivavy ao amin’ny Fiangonan’i Jesoa Kristy. Nisy olona iray nanakiana ny Fiangonana tamin’ny filazana fa voasakana ny vehivavy noho ny tsy fihazonana anjara fanompoana ao amin’ny fisoronana.
Omeo fotoana betsaka ireo mpianatra hifanakalo hevitra momba ireo fitsipika izay tsapany fa afaka manampy an’i Andrea. Miainga avy amin’ny fifanakalozan-kevitra nataon’izy ireo, afaka misafidy fizarana avy amin’ny lesona sisa tavela ianao izay afaka manampy azy ireo hahatakatra kokoa ireo fitsipika izay tsy noresahin’izy ireo lalina loatra.
Manao asa amim-pinoana
Hevero ny handamina ireo mpianatra ho vondrona kely, asehoy ireto fanontaniana manaraka ireto, ary asao ny mpianatra hifanakalo hevitra momba ny valin-tenin’izy ireo miaraka amin’ny vondrona misy azy ireo. Mandehandehana manodidina ny efitrano ary henoy ny fifanakalozan-kevitra ataon’izy ireo, ka ampio hevitra na fitarihana araka izay ilaina.
-
Ahoana no ahafahan’ny fanontaniana sy ny ahiahin’i Andrea ho fahafahana ho azy hanamafy orina ny finoany an’i Jesoa Kristy sy ny fanoloran-tenany ho an’ny Fiangonany?
-
Inona no mety hakan’i Satana fanahy azy hataony manoloana ireo fanontaniana sy olana izay mety hitarika azy hanalavitra an’i Jesoa?
-
Ahoana no hanoloranao hevitra azy ny amin’ny fomba hamaliany ny fanontaniany sy ny ahiahiny amim-pinoana?
Mamakafaka ireo hevi-dehibe sy ireo fanontaniana amin’ny fomba fijery mibanjina ny mandrakizay
Asao ny mpianatra hamaky ny andiam-pehezan-teny 8 ao amin’ny fizarana “Mahazo fahalalana ara-panahy” ao amin’ny Tahirin-kevitra fototra ho an’ny fifehezana fotopampianarana, ka hitady ireo fahamarinana izay mety hanampy an’i Andrea.
Ity sahanasa manaraka ity dia fomba iray ahafahan’ny mpianatra mizara ny zavatra hitany. Angataho ny mpianatra hamita ny dingana voalohany etsy ambany. Andraso ny fahavitan’izy ireo ny dingana tsirairay alohan’ny hanasana azy ireo hamita ny dingana manaraka.
-
Raketo ao amin’ny diary fandalinanao ny fahamarinana iray avy amin’ny andiam-pehezan-teny 8 izay heverinao fa afaka manampy an’i Andrea sy ny anton’izany.
-
Mandehandehana manodidina ny efitrano ary miezaha hitady mpianatra iray hafa izay nisafidy ny fahamarinana mitovy amin’ilay anao. Ifanakalozy hevitra ny fomba ahafahan’izany manampy an’i Andrea.
-
Ampio fahatakarana manan-danja izay nozarain’ilay mpianatra hafa taminao ao amin’ny pejin’ny diarinao.
-
Mandehandehana manodidina ny efitrano indray ary mitadiava mpianatra iray hafa izay nisafidy fahamarinana tsy mitovy amin’ny anao. Mifampizarà ireo hevi-baovao avy amin’ny diarinareo.
Aorian’ny sahanasa fifampizarana teo aloha dia mety hanampy amin’ny famoronana fifanakalozan-kevitra ao an-dakilasy ny sasany amin’ireto fanontaniana manaraka ireto izay mety hitarika ho amin’ny hevi-baovao misimisy kokoa.
-
Eritrereto hoe tsy afaka mahita valiny mazava mikasika ny antony tsy ananan’ny vehivavy anjara fanompoana ao amin’ny fisoronana i Andrea. Inona no fantatrao momba ny drafitry ny Ray any An-danitra sy ny zavatra tsapany momba ireo zanany vavy izay tianao hotsaroany?
-
Inona avy ireo andalan-tsoratra masina fifehezana fotopampianarana ao amin’ny Fotopampianarana sy Fanekempihavanana (na ireo boky soratra masina hafa) izay afaka manampy amin’ny fampahatsiahivana an’i Andrea ny drafitr’ Andriamanitra sy ny zavatra tsapany momba azy?
Mikatsaka fahatakarana bebe kokoa amin’ny alalan’ireo loharanom-pahalalana nofidin’ Andriamanitra
Hevero ny hanasa ny mpianatra hifanakalo hevitra amina namana iray momba ireto tari-dresaka manaraka ireto. Asao ny mpianatra manolo-tena iray avy eo hizara ny zavatra noresahiny amin’ny iray kilasy.
-
Manan-danja ny loharanom-pahalalana ampiasain’i Andrea hitadiavana fampahalalana satria…
-
Ho toroiko hevitra i Andrea mba hitady valiny ao amin’ny… fa tsy hitady valiny any amin’ny …
Afaka mitady sy mizara ohatra avy ao amin’ny soratra masina, na ny tantaran’ny Fiangonana, na ny fiainan’ny vehivavy amin’izao androntsika izao izay maneho ny fitiavan’ny Ray any An-danitra sy ny fatokisany ireo zanany vavy mahatoky ny tsiroaroa.
Afaka mikaroka sy mizara fanambarana avy amin’ireo mpitarika ny Fiangonana maoderina izay afaka manampy an’i Andrea ihany koa ny tsiroaroa. Raha ilaina dia azonao atao ny manolotra loharanom-pahalalana toy ireto manaraka ireto:
-
Lahateny avy amin’ny fihaonamben’ny Fiangonana maneran-tany toy ny “Ireo harena ara-panahy” (Russell M. Nelson, Liahona, nôv. 2019, 76–79)
-
Fampianarana avy amin’ny Fiadidian’ny Fikambanana Ifanampiana Maneran-tany toy ny “Relief Society General Presidency Addresses Four Key Questions about Women and the Priesthood” (Aubrey Eyre, Church News, 2 May 2019, thechurchnews.com)
-
Teny notsongaina avy ao amin’ny Boky torolalan’ny Fiangonana maneran-tany toy ny “Fitsipiky ny Fisoronana” (toko 3 ao amin’ny Boky torolalan’ny Fiangonana maneran-tany: Manompo ao amin’ny Fiangonan’i Jesoa Kristy ho an’ny Olomasin’ny Andro Farany, ChurchofJesusChrist.org)
Famaranana
Azonao atao ny mamarana ny fotoam-pianarana amin’ny fanasana ireo mpianatra hamaly ombam-bavaka ny iray amin’ireto fanontaniana manaraka ireto ao anatin’ny diary fandalinany:
-
Inona no tsapanao fa tian’ny Ray any An-danitra hataonao amin’ireo fanontanianao na olanao?
-
Ahoana no ahafahan’ny fisafidianana ny hanaraka ireo fitsipiky ny fahazoana fahalalana ara-panahy hisy fiantraikany amin’ny fifandraisanao amin’ny Ray any An-danitra sy i Jesoa Kristy rehefa misy fanontaniana na olana miseho?