Lesona 122: Fotopampianarana sy Fanekempihavanana 109–110

Fotopampianarana sy Fanekempihavanana 109

Ny tempolin’ny Tompo: Tranon’ny voninahitra sy ny hery

Niasa efa ho nandritra ny telo taona ny Olomasina mba hanorina ny Tempolin’i Kirtland, ilay tempoly voalohany naorina tamin’ity fotoampitantanana ity. Ny Fotopampianarana sy Fanekempihavanana 109 dia ilay vavaka fanokanana nambaran’ny Tompo tamin’ny Mpaminany Joseph Smith. Mirakitra fitahiana azontsika raisina ankehitriny io vavaka io. Afaka manampy ireo mpianatra hahatsapa faniriana miavosa handeha any amin’ny tempoly sy handray ireo fitahiana nampanantenain’ny Tompo ity lesona ity.

Sahanasa fianarana azo atao

Fahatsapana mikasika ny tempoly

Hevero ny hampiseho sarina tempoly samihafa. Azonao atao ny manontany vetivety ny mpianatra fampahalalana vitsivitsy momba ny tempoly, toy ny hoe firy ny tempoly miasa amin’izao fotoana izao, firy no nambara tamin’ny fihaonamben’ny Fiangonana maneran-tany farany, iza no tempoly akaiky indrindra ny toerana misy ny kilasinao, sy ny sisa.

• Nahoana ny olona sasany no mety ho mientanentana mikasika ny fandehanana any amin’ny tempoly? Nahoana no mety ho tsy mientanentana ny hafa?

  Asehoy ireto teny nambara manaraka ireto ary amporisiho ny mpianatra hisaintsaina hoe hatraiza ny faneken’izy ireo ny teny nambara tsirairay. Raha tsy izany dia azonao atao ihany koa ny manasa ireo mpianatra hirakitra ny fahatsapany manokana momba ny fandehanana any amin’ny tempoly ao amin’ny diary fandalinany.

• Ny tempoly dia tranon’ Andriamanitra.

• Zava-dehibe ho ahy ny fiomanana na ny fandehanana any amin’ny tempoly.

• Mino aho fa hanome fitahiana lehibe ho ahy ny Tompo rehefa miezaka ny ho mendrika ny hiditra ao an-tranony aho.

Saintsaino izay fanontaniana na olana rehetra anananao momba ny fiomanana sy ny fandehanana any amin’ny tempoly. Rehefa mandalina ianao anio dia azonao atao ny mivavaka amin’ny Ray any An-danitra mba hanampy anao hahatsapa faniriana miavosa handeha any amin’ny tempoliny masina.

Ny Tempolin’i Kirtland

Mampisehoa sarin’ny Tempolin’i Kirtland iray, toy ilay hita tany am-piandohan’ny lesona. Mizarà fampahalalana ara-tantara momba io tempoly io ao anaty fotoana fohy amin’ny alalan’ny teninao manokana na manasà mpianatra roa hamaky ireto andiam-pehezan-teny manaraka ireto.

Teo anelanelan’ny jona 1833 sy martsa 1836, dia nahafoy fotoana sy vola ary fananana ireo mpikamban’ny Fiangonana mba hanampiana amin’ny fanorenana ny tempoly voalohany amin’ity fotoampitantanana ity. Ny lehilahy dia nampiasa ny fahaizany manokana tamin’ny fanorenana trano, ary ny vehivavy dia nanamboatra ny akanjo sy nikarakara ny fonenan’ireo mpiasa. Nanolotra ny ankamaroan’ny hareny ho an’ny fanorenana ny tempoly ny Olomasin’ny Andro Farany sasany. Nitentina teo amin’ny 60.000 dôlara amerikana teo ny tempoly—izay vola be tamin’izany fotoana izany, indrindra raha ny fahantran’ny Olomasina no jerena.

Notokanana tamin’ny 27 martsa 1836 ny Tempolin’i Kirtland. Maro tamin’ireo Olomasin’ny Andro Farany izay nanatrika ireo lanonana sy zava-nitranga tao anatin’ny fanokanana no nahita fisehoana ara-panahy lehibe. Anisan’izany ny fandrenesana ny feon’ny rivotra mahery mifofofofo, ny fitenenana amin’ny fiteny tsy fantatra, ny fahitana fahitana, ary ny fanatrehana ny fitsidihan’ny anjely.

Ny Fotopampianarana sy Fanekempihavanana 109 dia ilay vavaka fanokanana izay nambaran’ny Tompo tamin’ny Mpaminany Joseph Smith. Novakina mafy nandritra ny fotoam-panokanana io vavaka io. Mitohy ankehitriny io lamina io, dia ny famakiana ny vavaka fanokanana nentanim-panahy mandritra ny fotoam-pivoriana fanokanana ny tempoly tsirairay.

Azonao atao ny manontany raha toa ka nisy mpianatra efa nanatrika fanokanana tempoly. Raha izany no izy dia afaka mizara ny zavatra tadidiny momba ny vavaka fanokanana ny mpianatra iray.

Vakio ny Fotopampianarana sy Fanekempihavanana 109:1–4, ka tadiavo ny fomba nanombohan’io vavaka fanokanana nentanim-panahy io.

• Inona no zavatra nisongadina taminao tao amin’ireo andininy ireo?

Eo am-pizaran’ny mpianatra izany dia azonao atao ny mametraka fanontaniana mampitombo ny fahatakarana toy ny hoe “Inona no ambaran’ireo andininy ireo momba ny Tompo?” na “Inona no manaitra anao mikasika ny fihetsik’ireo Olomasina?” (ohatra, jereo ny andininy 1 sy 4).

Ireo tanjona sy fitahian’ny tempoly

Makà antoka fa manana fotoana ampy ny mpianatra ho an’ity sahasa fandalinana manaraka ity. Azonao soratana eny amin’ny solaitrabe ny teny hoe Tanjona sy Fitahiana.

Afaka miara-miasa amin’ny mpiara-mianatra iray ny mpianatra mba hanao izao manaraka izao ary hanisy marika ny zavatra hitany.

Vakio ny Fotopampianarana sy Fanekempihavanana 109:5, 11–16, 20–24, ka tadiavo ny tanjon’ny Tompo sasany amin’ny fanorenana ny tempoliny sy ireo fitahiana nampanantenaina ateraky ny fanaovana izany.

Rehefa avy nomena fotoana ampy dia asao ny mpianatra hifanakalo hevitra amin’ny mpiara-mandalina aminy momba ny tanjona sy fitahiana izay manan-danja indrindra amin’izy ireo ary nahoana.

Asao ny mpiara-mandalina tsirairay mba hamorona fanambarana fahamarinana mifototra amin’ny iray amin’ireo hevi-baovao manan-danja hitan’izy ireo. (Na, arakaraka ny haben’ny kilasy dia azonao atao ny manasa ny mpianatra tsirairay hizara.) Hevero ny hanome taratasy kely ho an’ny mpianatra hanoratany ny fanambarany sy hampisehoany izany eny amin’ny solaitrabe. Azon’ny mpianatra atao avy eo ny mizara ny fanambarany, ny andininy iray na maro izay mifototra amin’izany ary ny antony maha-zava-dehibe izany amin’izy ireo.

Afaka mizara fahamarinana mitovitovy amin’izao manaraka izao ny mpianatra:

• Afaka maneho ny Tenany amintsika ny Tompo ao amin’ny tempoly. (andininy 5, 12–13) (Fanamarihana: Ampio ny mpianatra hahatakatra fa misy fomba maro ahafahan’ny Tompo maneho ny Tenany. Mbola horesahina ao amin’ny lesona manaraka izany.)

• Afaka mampirongo antsika amin’ny heriny sy ny fiarovany ary ny fanampiany ny Tompo any amin’ny tempoly. (andininy 13, 22)

• Ny tempoly dia toeram-pianarana. (andininy 14–15)

• Afaka manomana antsika hanompo ny Tompo sy hitory ny teniny ny fitsaohana any amin’ny tempoly. (andininy 22–23)

• Inona no mety hanampian’ireo fahamarinana ireo antsika mba ho azo momba ny Ray any An-danitra sy i Jesoa Kristy? Nahoana no sarobidy aminao izany?

Hevero ny hanasa ny mpianatra maromaro hamaky ireto teny nambara manaraka ireto avy amina zatovo mikasika ny zavatra niainan’izy ireo tany amin’ny tempoly. Asao ireo mpianatra hitady ireo ohatra momba ireo fitahiana voatanisa etsy ambony sy ireo fitahiana fanampiny.

Hevitra mampahery ihany no mameno ny saiko any amin’ny tempoly. Mahavariana ny mieritreritra zavatra azonao atao mba hanampiana ny hafa. [Chloé D.] …

… Nanampy ahy hahatsapa ny Fanahy matetika kokoa ny fitsidihana tsy tapaka ny tempoly. Tena nampifanakaiky kokoa an’ireo namako tokoa izany. Ankoatra izany, maro amin’ireo mpiara-mianatra aminay no manontany momba ny dianay mankany amin’ny tempoly. …

… Nisy namana iray … nanana fahafahana nahazo ny fahazoan-dalana voafetra voalohany, ary mahafinaritra ny mahita ny vokatra tsara naterak’izany teo amin’ny fiainany. [Annalise K.] …

… Vantany vao nandeha tao amin’ [ny tempoly] aho dia nahatsapa fa tsy nisy intsony tsotra izao ireo olana rehetra niainako tany an-tsekoly sy tany an-kafa. Nahatsapa fiadanana aho tao amin’ny tempoly. Nahatsiaro ho feno fahasambarana aho. Nanampy ahy hifantoka amin’ny zavatra tokony hataoko any am-piangonana sy ao amin’ny andraikitra hafa ny fandehanana any amin’ny tempoly. Tena nahatalanjona ny nahafahako nandeha sy niala kely tamin’ireo olana rehetra nananako. [Kole E.] (“Youth Voices: Attending the Temple,” New Era, apr. 2013, 5–7)

Manatrika ny tempoly masin’ny Tompo

Hevero ny haneho ilay horonan-tsary “The Blessings of the Temple” (3:37) na ny “Strength beyond My Own” (3:47). Asao ny mpianatra hisaintsaina ireo fitahiana niainany teo am-piomanana na rehefa niditra ny tempoly. Safidy iray hafa azo atao ihany koa ny mihira ny “Fanahin’ny Ray” (Fihirana sy hiran’ny ankizy, p. 56), izay nosoratana ho an’ny fanokanana ny Tempolin’i Kirtland, na hira hafa momba ny tempoly.

Nijoro ho vavolombelona ny Filoha Russell M. Nelson hoe:

[Ny tempoly] no tranony. Ahitana ny heriny izany. Aoka isika tsy ho very fifantohana amin’ireo zavatra izay ataon’ny Tompo ho antsika amin’izao. … Mampanantena aho fa ny fotoana lany betsaka kokoa any amin’ny tempoly dia hitahy ny fiainanareo amin’ny fomba izay tsy misy na inona na inona hafa hahavita izany. (Russell M. Nelson, “Mifantoha amin’ny tempoly,” Liahona, nôv. 2022, 121)

• Oviana ianao na ny olona akaiky anao no niaina fitahiana avy amin’ny tempoly?

Asao ireo mpianatra hitadidy ny valiny nomen’izy ireo tany amin’ny fiandohan’ny lesona mikasika ny antony mety tsy hahatsapan’ny olona sasany fientanentanana amin’ny fandehanana any amin’ny tempoly.

• Inona no zavatra nianaranao na tsapanao izay afaka manampy ny olona iray hiatrika ny ahiahiny na hitaona azy hananana fahatsapana hafa mikasika ny tempoly?

• Inona no tsapanao androany fa niova teo amin’ny fahatsapanao manokana momba ny Tompo sy ny tempoliny masina ?

Asao ny mpianatra hametraka sarina tempoly iray eo amin’ny toerana iray izay hahitany izany matetika. Amporisiho ny mpianatra hanohy hivavaka amin’ny Ray any An-danitra mba hahazoany fitiavana miavosa ho an’ny tempoliny masina ary faniriana miavosa handeha any amin’ny tempoliny masina.

Loharanom-pitaovana fanampiny

Amin’ny fomba ahoana no hanampian’ny fandehanana any amin’ny tempoly ahy eo amin’ny fiainana andavanandro?

Nijoro ho vavolombelona ny Loholona David A. Bednar ao amin’ny Kôlejin’ny Apôstôly Roambinifolo hoe:

Tsy mankany amin’ny tempoly isika mba hiafina na hitsoaka ny faharatsian’izao tontolo izao. Fa mankany amin’ny tempoly kosa isika mba handresy ny tontolon’ny faharatsiana. Rehefa manasa eo amin’ny fiainantsika ny “herin’ny toetra araka an’Andriamanitra” [Fotopampianarana sy Fanekempihavanana 84:20–21] isika amin’ny alalan’ny fandraisana ireo ôrdônansin’ny fisoronana sy ny fanaovana sy fitandremana fanekempihavanana masina, dia mahazo tanjaka mihoatra izay ananantsika mba handresena ny fakam-panahy sy ny olana eto amin’ny fiainana an-tany ary hanaovana soa sy hahatongavana ho olona tsara. (David A. Bednar, “Aoka izany trano izany haorina ho an’ny anarako,” Liahona, mey 2020, 86)

Aiza no ahafahako mianatra misimisy kokoa momba ny fanokanana ny Tempolin’i Kirtland?

Tranga mahagaga sy masina maro no niaraka tamin’ny fanokanana ny Tempolin’i Kirtland. Mety hanampy ireto loharanom-pitaovana manaraka ireto:

• Olomasina: Ny tantaran’ny Fiangonan’i Jesoa Kristy amin’izao andro farany izao, boky 1, Ny fanevan’ny fahamarinana, 1815–1846 [2018], 210–214, 235–239

• “Feon’ny Famerenana amin’ny laoniny” avy amin’ny lesona “Fotopampianarana sy Fanekempihavanana 109–110” ao amin’ny Avia, hanaraka Ahy—Ho an’ny isam-batan’olona sy ny fianakaviana: Fotopampianarana sy Fanekempihavanana 2021, 168–169

Fotopampianarana sy Fanekempihavanana 109:24. Inona no dikan’ny hoe “hitana … ny anarany sy ny toerany” ao amin’ny tempoly?

Nampianatra toy izao ny Loholona David A. Bednar ao amin’ny Kôlejin’ny Apôstôly Roambinifolo:

Ny dingan’ny fandraisana eo amintsika ny anaran’i Jesoa Kristy izay niantomboka teo amin’ny ranon’ny batisa dia mitohy ary mivelatra kokoa any amin’ny tranon’ny Tompo. Rehefa mijoro eo amin’ny ranon’ny batisa isika dia manomboka ny diantsika ho any amin’ny tempoly. Rehefa mandray ny fanasan’ny Tompo isika dia miandrandra ny tempoly. Maneho fahavononana isika fa hahatsiaro ny Mpamonjy mandrakariva ary hitandrina ny didiny ho fiomanana handray ireo ôrdônansy masin’ny tempoly ary handray ireo fitahiana avo indrindra izay azo amin’ny alalan’ny anarana sy fahefan’i Jesoa Kristy Tompo. Noho izany, ao anatin’ireo ôrdônansin’ny tempoly masina isika dia mandray tanteraka ny anaran’i Jesoa Kristy. (David A. Bednar, “Honorably Hold a Name and Standing,” Liahona, mey 2009, 98)

Fotopampianarana sy Fanekempihavanana 109:79–80. Inona no atao hoe Fihiakana ny Hosana?

Ireo izay manatrika fanokanana ny tempoly dia mandray anjara amin’ny Fihiakana ny Hosana. Mampahatsiahy ny fiderana nataon’ny mpanara-dia an’i Jesoa Kristy tamin’ny fidirany tamim-pandresena tao Jerosalema io hiaka io [jereo ny Matio 21:1, 8–9; Marka 11:8–10; Jaona 12:12–13]. Mitsangana ny mpanatrika, manofahofa mosara fotsy ary miray hina mihiaka intelo manao hoe: “Hôsanà, Hôsanà, Hôsanà ho an’ Andriamanitra sy ny Zanak’ondry.” Mifarana amin’ny hoe “Amena, Amena, ary Amena” ilay hiaka. (Sujets de l’histoire de l’Église, “Consécrations et prières de consécration des temples,” ChurchofJesusChrist.org/study/history/topics)

Eo ambany fitarihan’ireo mpitarika ao amin’ny Fiangonana dia azo ampidirina ao anatin’ny fanokanana trano lehibe hafa ny Fihiakana ny Hosana. Ohatra, nitarika ny mpikamban’ny Fiangonana tao amin’ny Fihiakana ny Hosana tamin’ny fitokanana ny Foiben’ny Fihaonambe tao Salt Lake City, Utah ny Filoha Gordon B. Hinckley.

Indraindray io fihetsika masina fiderana ny Raintsika any An-danitra sy i Jesoa Kristy io dia atao ho fahatsiarovana ireo zava-nitranga manan-danja. Tamin’ny 5 aprily 2020, ny Filoha Russell M. Nelson dia nitarika ny mpikamban’ny Fiangonana tao amin’ny Fihiakana ny Hosana ho fankalazana ny Fahitana Voalohan’i Joseph Smith an’ny Ray sy ny Zanaka.

Sahanasa fianarana fanampiny

Vavaka fanokanana ny tempolinao

Mety ho liana amin’ny famakiana ny vavaka fanokanana ny tempoly eo an-toerana misy anao ny mpianatra. Safidio ny anaran’ny tempoly ao amin’ny “Liste des temples” ao amin’ny temples.ChurchofJesusChrist.org; dia midira ao amin’ny “Faits marquants” mba hahitana rohy mankany amin’ny vavaka fanokanana.

Ho fampahalalana misimisy kokoa dia jereo ny Sujets de l’histoire de l’Église, “Consécrations et prières de consécration des temples,” ChurchofJesusChrist.org/study/history/topics.

Fotopampianarana sy Fanekempihavanana 109:36–37. Ny Tempolin’i Kirtland sy ny andron’ny Pentekosta

Mba hanampiana ireo mpianatra hahatakatra ireo andinin-tsoratra masina ireo dia manasà mpianatra iray hamaky mafy ny Asan’ny Apostoly 2:1–4. Hazavao fa tamin’ny andron’ny Pentekosta, ny Fanahy Masina dia nanampy tamin’ny fanomanana ireo Apôstôlin’ny Mpamonjy sy ireo mpianatra hafa mba “ho vavolombelon’i [Jesoa Kristy] … hatramin’ny faran’ny tany” (Asan’ny Apostoly 1:8). Ny firotsahan’ny Fanahy Masina lehibe noraisin’ny Apôstôly sy ny mpianatra tany am-boalohany tamin’ny andron’ny Pentekosta dia niainan’ny Olomasina maro tamin’ny fanokanana ny Tempolin’i Kirtland.

Hevero ny hizara tantara avy amin’ny vavolombelona iray na maromaro nanatri-maso ireo zava-nitranga masina nanodidina ny fanokanana ny Tempolin’i Kirtland, toy ireo hita ao amin’ny “Loharanom-pitaovana fanampiny.” Asao ny mpianatra hieritreritra ny fomba nanampian’ny Fanahy Masina tamin’ny fanomanana ireo Apôstôly tany am-boalohany sy ireo Olomasin’i Kirtland mba hizara ny filazantsara amin’ny andro farany.

Haino vaky jery fanampiny

• “Practice, Celebration, Dedication: Temple Blessings in El Salvador” (5:51)—Nanampy ny fianakaviana iray hiverina amin’ny fahavitrihana ao amin’ny Fiangonana ny fanokanana ny tempoly.

• “Standing in Holy Places” (5:36)—Miaina ireo fitahiana avy amin’ny fandehanana any amin’ny tempoly ny zatovovavy iray.

• “he Temple Landmark for Eternity: Karen” (3:48)—Mianatra ny hasarobidin’ny fankanesana any amin’ny tempoly ny zatovovavy tao amin’ny tanàn-dehibe iray.