Lesson 122: Doktrina at mga Tipan 109–110

Doktrina at mga Tipan 109

Ang Templo ng Panginoon: Isang Bahay ng Kaluwalhatian at Kapangyarihan

Ang mga Banal ay nagtrabaho nang halos tatlong taon upang itayo ang Templo ng Kirtland, ang unang templong itinayo sa dispensasyong ito. Ang Doktrina at mga Tipan 109 ay ang panalangin ng paglalaan na inihayag ng Panginoon kay Propetang Joseph Smith. Ang panalanging ito ay naglalaman ng mga pagpapalang matatanggap natin ngayon. Ang lesson na ito ay makatutulong sa mga estudyante na makadama ng mas matinding hangaring dumalo sa templo at tanggapin ang mga ipinangakong pagpapala ng Panginoon.

Mga Posibleng Aktibidad sa Pag-aaral

Mga nadarama tungkol sa templo

Maaari kang magpakita ng mga larawan ng iba’t ibang templo. Maaari mong tanungin ang mga estudyante tungkol sa ilang katotohanan tungkol sa templo, tulad ng kung ilang templo ang kasalukuyang ginagamit, ilan ang ibinalita sa huling pangkalahatang kumperensya, kung aling templo ang pinakamalapit sa lugar ng klase mo, at iba pa.

• Bakit nasasabik ang ilang tao na dumalo sa templo? Bakit hindi nasasabik ang ilan?

  Ipakita ang mga sumusunod na pahayag at hikayatin ang mga estudyante na pagnilayan kung gaano katindi ang kanilang pagsang-ayon sa bawat pahayag. Bilang alternatibo, maaari mong anyayahan ang mga estudyante na isulat sa kanilang study journal ang mga nadarama nila tungkol sa pagdalo sa templo.

• Ang templo ang bahay ng Diyos.

• Mahalaga sa akin ang paghahanda o pagdalo sa templo.

• Naniniwala ako na may mga makabuluhang pagpapala na ibibigay sa akin ang Panginoon sa pagsisikap na maging karapat-dapat na dumalo sa Kanyang bahay.

Isipin ang anumang tanong o alalahanin na mayroon kayo tungkol sa paghahanda at pagdalo sa templo. Habang nag-aaral kayo ngayon, maaari ninyong ipanalangin sa Ama sa Langit na tulungan kayong makadama ng mas matinding hangaring dumalo sa Kanyang banal na templo.

Ang Templo ng Kirtland

Magpakita ng larawan ng Templo ng Kirtland, tulad ng kasama sa simula ng lesson. Magbahagi sandali ng ilang impormasyon tungkol sa kasaysayan ng templong ito gamit ang sarili mong mga salita o ipabasa sa dalawang estudyante ang mga sumusunod na talata.

Sa pagitan ng Hunyo 1833 at Marso 1836, ang mga miyembro ng Simbahan ay nagsakripisyo ng panahon, pera, at ari-arian upang makatulong sa pagtatayo ng unang templo sa dispensasyon na ito. Nagtrabaho nang mahusay ang kalalakihan sa pagtatayo ng gusali, at nagtahi ng mga kasuotan at nagbigay ng matutuluyan sa mga manggagawa ang kababaihan. Ang ilang Banal sa mga Huling Araw ay nagbigay ng malaking bahagi ng kanilang kayamanan sa pagpapatayo ng templo. Tinatayang 60,000 United States dollar ang halagang nagastos sa templo—isang napakalaking halaga sa panahong iyon, lalo na kung iisipin ang kahirapan ng mga Banal.

Inilaan ang Templo ng Kirtland noong Marso 27, 1836. Maraming Banal sa mga Huling Araw na dumalo sa mga seremonya at pangyayari na nauugnay sa paglalaan ang nakaranas ng mga dakilang espirituwal na pagpapakita. Kabilang dito ang pagdinig ng tunog ng rumaragasang malakas na hangin, pagsasalita sa iba’t ibang wika, pagkakita ng mga pangitain, at pagsaksi sa pagdalaw ng mga anghel.

Ang Doktrina at mga Tipan 109 ay ang panalangin sa paglalaan na inihayag ng Panginoon kay Propetang Joseph Smith. Binasa nang malakas ang panalanging ito sa mga serbisyo ng paglalaan. Nagpapatuloy ang huwarang ito sa kasalukuyan, sa pamamagitan ng inspiradong panalangin ng paglalaan na binabasa sa bawat sesyon ng paglalaan ng templo.

Maaari mong itanong kung may mga estudyanteng nakadalo na sa isang paglalaan ng templo. Kung mayroon, maaaring ibahagi ng isang estudyante ang naaalala niya tungkol sa panalangin ng paglalaan.

Basahin ang Doktrina at mga Tipan 109:1–4, at alamin kung paano nagsimula ang inspiradong panalangin ng paglalaan na ito.

• Ano ang makabuluhan para sa inyo sa mga talatang ito?

Habang nagbabahagi ang mga estudyante, maaari kang magtanong pa gaya ng “Ano ang inihahayag ng mga talatang ito tungkol sa Panginoon?” o “Ano ang pinakanapansin ninyo tungkol sa pag-uugali ng mga Banal?” (para sa mga halimbawa, tingnan sa talata 1 at 4).

Mga layunin at mga pagpapala ng templo

Tiyaking may sapat na oras ang mga estudyante para sa sumusunod na aktibidad sa pag-aaral. Maaari mong isulat sa pisara ang mga salitang Mga Layunin at Mga Pagpapala.

Maaaring makipagtulungan ang mga estudyante sa isang ka-partner upang gawin ang sumusunod at markahan ang malalaman nila.

Basahin ang Doktrina at mga Tipan 109:5, 11–16, 20–24, at alamin ang ilan sa mga layunin ng Panginoon sa pagpapatayo ng Kanyang templo at ang mga ipinangakong pagpapala sa paggawa nito.

Pagkatapos ng sapat na oras, sabihin sa mga estudyante na talakayin sa kanilang mga ka-partner kung aling mga layunin at pagpapala ang pinakamahalaga sa kanila at kung bakit.

Anyayahan ang bawat magka-partner na gumawa ng pahayag ng katotohanan batay sa isa sa mga makabuluhang kabatirang nalaman nila. (O, depende sa laki ng klase, maaari mong anyayahan ang bawat estudyante na magbahagi.) Maaari kang magbigay ng maliit na piraso ng papel na masusulatan ng mga estudyante ng kanilang pahayag at maipapaskil sa pisara. Pagkatapos ay maaaring ibahagi ng mga estudyante ang kanilang pahayag, ang talata o mga talata kung saan nakabatay ang mga ito, at kung bakit mahalaga ito sa kanila.

Maaaring magbahagi ang mga estudyante ng mga katotohanang katulad ng sumusunod:

• Sa templo, maipapakita ng Panginoon ang Kanyang sarili sa atin. (talata 5, 12–13) (Paalala: Tulungan ang mga estudyante na maunawaan na maipapakita ng Panginoon ang Kanyang sarili sa maraming paraan. Tatalakayin ito sa susunod na lesson.)

• Sa templo, mabibigyan tayo ng Panginoon ng Kanyang kapangyarihan, proteksyon, at tulong. (talata 13, 22)

• Ang templo ay isang lugar ng pagkatuto. (talata 14–15)

• Ang pagsamba sa templo ay makapaghahanda sa atin na paglingkuran ang Panginoon at ipangaral ang Kanyang salita. (talata 22–23)

• Ano ang maitutulong ng mga katotohanang ito sa matututuhan natin tungkol sa Ama sa Langit at kay Jesucristo? Bakit iyon mahalaga sa inyo?

Maaari mong anyayahan ang ilang estudyante na basahin ang mga sumusunod na pahayag mula sa kabataan tungkol sa kanilang mga karanasan sa templo. Sabihin sa mga estudyante na maghanap ng mga halimbawa ng mga pagpapalang nakalista sa itaas pati ng mga karagdagang pagpapala.

Mga nakasisiglang ideya ang tanging pumupuspos sa aking isipan sa templo. Isang napakagandang pakiramdam ang mag-isip ng mga bagay na magagawa mo upang tulungan ang iba. [Chloé D.] …

… Ang regular na pagbisita sa templo ay nakatulong sa akin na madama nang mas madalas ang Espiritu. Talagang mas napalapit nito sa isa’t isa ang mga kaibigan ko. Gayundin, maraming kaklase namin ang nagtatanong tungkol sa pagpunta namin sa templo. …

… Natanggap ng isang kaibigan … ang kanyang unang limited-use recommend, at magandang makita ang naging positibong epekto nito sa kanyang buhay. [Annalise K.] …

… Sa simpleng paglalakad lang sa [templo], naramdaman kong nawala na lang ang lahat ng problemang nararanasan ko sa paaralan at saanman. Napapanatag ako kapag nasa templo. Napuspos ako ng kaligayahan. Kapag nasa templo ako, natutulungan akong magtuon sa kailangan kong gawin sa simbahan at sa iba pang mga tungkulin. Talagang kamangha-manghang makaalis at makalayo sa lahat ng problema ko. [Kole E.] (“Youth Voices: Attending the Temple,” New Era, Abr. 2013, 5–7)

Pagdalo sa banal na templo ng Panginoon

Maaari mong ipanood ang video na “The Blessings of the Temple” (3:37) o “Strength beyond My Own” (3:47). Sabihin sa mga estudyante na pagnilayan ang mga pagpapalang nadama nila sa paghahanda o pagpasok sa templo. Ang isa pang opsiyon ay ang kantahin ang “Espiritu ng Diyos” (Mga Himno, blg. 2), na isinulat para sa paglalaan ng Templo ng Kirtland o iba pang himno tungkol sa templo.

Pinatotohanan ni Pangulong Russell M. Nelson:

Bahay Niya [ang templo]. Puno ito ng Kanyang kapangyarihan. Huwag nating kalimutan ang ginagawa ng Panginoon para sa atin ngayon. … Ipinapangako ko na ang mas madalas na pagpunta sa templo ay magpapala sa inyong buhay na hindi matatamo sa ibang paraan. (Russell M. Nelson, “Magtuon sa Templo,” Liahona, Nob. 2022, 121)

• Kailan kayo nakaranas o ang isang taong malapit sa inyo ng mga pagpapala ng templo?

Sabihin sa mga estudyante na alalahanin ang kanilang mga sagot sa simula ng lesson tungkol sa dahilan kung bakit maaaring hindi nasasabik ang ilang tao na dumalo sa templo.

• Ano ang natutuhan o nadama ninyo na makatutulong sa isang tao na harapin ang kanyang mga alalahanin o mabigyan siya ng inspirasyong makadama ng iba tungkol sa templo?

• Paano naimpluwensyahan ngayon ang sarili ninyong damdamin tungkol sa Panginoon at sa Kanyang banal na templo?

Maaari mong anyayahan ang mga estudyante na magdispley ng larawan ng templo sa isang lugar na madalas nila itong makikita. Hikayatin ang mga estudyante na patuloy na manalangin sa Ama sa Langit para sa ibayong pagmamahal at hangaring dumalo sa Kanyang mga banal na templo.

Karagdagang Resources

Paano makatutulong sa akin sa pang-araw-araw na buhay ang pagdalo sa templo?

Pinatotohanan ni Elder David A. Bednar ng Korum ng Labindalawang Apostol:

Hindi tayo nagpupunta sa templo para magtago o tumakas sa mga kasamaan ng mundo. Sa halip, nagpupunta tayo sa templo para lupigin ang mundo ng kasamaan. Kapag inaanyayahan natin sa ating buhay ang “kapangyarihan ng kabanalan” [Doktrina at mga Tipan 84:20–21] sa pamamagitan ng pagtanggap ng mga ordenansa ng priesthood at paggawa at pagtupad ng mga sagradong tipan, binibiyayaan tayo ng lakas na higit pa sa sarili nating lakas upang madaig ang mga tukso at hamon ng mortalidad at gumawa ng mabuti at maging mabuti. (David A. Bednar, “Ang Bahay na Ito ay Itayo sa Aking Pangalan,” Liahona, Mayo 2020, 86)

Saan ko malalaman pa ang tungkol sa paglalaan ng Templo ng Kirtland?

Maraming mahimala at banal na kaganapan ang nangyari sa paglalaan ng Templo ng Kirtland. Maaaring makatulong ang sumusunod na resources:

• Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 [2018], 242–247, 269–274

• “Mga Tinig ng Pagpapanumbalik” mula sa lesson na “Doktrina at mga Tipan 109–110” sa Pumarito Ka, Sumunod Ka sa Akin—Para sa mga Indibiduwal at Pamilya: Doktrina at mga Tipan 2021, 168–169

Doktrina at mga Tipan 109:24. Ano ang ibig sabihin ng “hahawak ng pangalan at katayuan” sa templo?

Itinuro ni Elder David A. Bednar ng Korum ng Labindalawang Apostol:

Ang pagtataglay sa ating sarili ng pangalan ni Jesucristo na nagsimula sa binyag ay nagpapatuloy at lumalawak sa bahay ng Panginoon. Noong tayo ay nabinyagan, sinimulan natin ang paglalakbay patungo sa templo. Sa pakikibahagi natin sa sakramento, ibinabaling natin ang isipan sa templo. Ipinapangako natin na aalalahanin sa tuwina ang Tagapagligtas at susundin ang Kanyang mga utos bilang paghahanda para makibahagi sa mga sagradong ordenansa ng templo at makamit ang pinakamataas na pagpapala na makakamit sa pamamagitan ng pangalan at awtoridad ng Panginoong Jesucristo. Kung kaya’t sa mga ordenansa ng banal na templo natin ganap at lubusang tinataglay sa ating sarili ang pangalan ni Jesucristo. (David A. Bednar, “Marangal na Humawak ng Pangalan at Katayuan,” Liahona, Mayo 2009, 98)

Doktrina at mga Tipan 109:79–80. Ano ang Sigaw na Hosanna?

Ang mga dumadalo sa paglalaan ng isang templo ay nakikilahok sa Sigaw na Hosanna. Ang sigaw na ito ay nakapagpapaalaala sa mga papuri ng mga disipulo ni Jesucristo sa Kanyang matagumpay na pagpasok sa Jerusalem [tingnan sa Mateo 21:1, 8–9; Marcos 11:8–10; Juan 12:12–13]. Ang kongregasyon ay nakatayong nagwawagayway ng puting panyo at magkakasamang sinisigaw nang tatlong beses ang mga salitang, “Hosana, Hosana, Hosana sa Diyos at sa Kordero.” Ang sigaw ay nagtatapos sa “Amen, Amen, at Amen.” (Mga Paksa sa Kasaysayan ng Simbahan, “Paglalaan ng Templo at Mga Panalangin Nito,” ChurchofJesusChrist.org/study/history/topics)

Sa ilalim ng patnubay ng mga lider ng Simbahan, ang Sigaw na Hosanna ay maaaring isama sa paglalaan ng iba pang mahahalagang gusali ng Simbahan. Halimbawa, pinamunuan ni Pangulong Gordon B. Hinckley ang mga miyembro ng Simbahan sa Sigaw na Hosanna sa paglalaan ng Conference Center sa Salt Lake City, Utah.

Kung minsan, ang sagradong gawaing ito ng papuri sa ating Ama sa Langit at kay Jesucristo ay isinasagawa bilang pag-alaala sa mahahalagang pangyayari. Noong Abril 5, 2020, pinamunuan ni Pangulong Russell M. Nelson ang mga miyembro ng Simbahan sa Sigaw na Hosanna bilang paggunita sa Unang Pangitain ni Joseph Smith tungkol sa Ama at sa Anak.

Mga Karagdagang Aktibidad sa Pag-aaral

Panalangin ng paglalaan ng iyong templo

Maaaring interesado ang mga estudyante sa pagbabasa ng panalangin ng paglalaan para sa inyong lokal na templo. Piliin ang pangalan ng templo sa “Temple List” sa temples.ChurchofJesusChrist.org; at pagkatapos ay mag-scroll sa “Milestones” para makahanap ng link sa panalangin ng paglalaan.

Para sa karagdagang impormasyon, tingnan sa Mga Paksa sa Kasaysayan ng Simbahan, “Paglalaan ng Templo at Mga Panalangin Nito,” ChurchofJesusChrist.org/study/history/topics.

Doktrina at mga Tipan 109:36–37. Ang Templo ng Kirtland at ang araw ng Pentecostes

Upang matulungan ang mga estudyante na maunawaan ang mga talatang ito, maaari mong ipabasa nang malakas sa isang estudyante ang Mga Gawa 2:1–4. Ipaliwanag na sa araw ng Pentecostes, tumulong ang Espiritu Santo sa paghahanda ng mga Apostol ng Tagapagligtas at ng iba pang disipulo na “[maging] mga saksi [ni Jesucristo] … hanggang sa kadulu-duluhang bahagi ng lupa” (Mga Gawa 1:8). Ang matinding pagbuhos ng Espiritu Santo na natanggap ng mga naunang Apostol at disipulo noong araw ng Pentecostes ay naranasan ng maraming Banal sa paglalaan ng Templo ng Kirtland.

Maaari mong ibahagi ang isa o mahigit pang salaysay ng saksi tungkol sa mga sagradong pangyayaring naganap sa paglalaan ng Templo ng Kirtland, tulad ng mga matatagpuan sa “Karagdagang Resources.” Sabihin sa mga estudyante na isipin kung paano tumulong ang Espiritu Santo na maihanda ang mga naunang Apostol at Banal sa Kirtland na ibahagi ang ebanghelyo sa mga huling araw.

Karagdagang media

• “Practice, Celebration, Dedication: Temple Blessings in El Salvador” (5:51)—Ang paglalaan ng templo ay tumulong sa isang pamilya na bumalik sa pagiging aktibo sa Simbahan.

• “Standing in Holy Places” (5:36)—Naranasan ng isang dalagita ang mga pagpapala ng pagdalo sa templo.

• “The Temple Landmark for Eternity: Karen” (3:48)—Nalaman ng isang dalagitang nasa malaking lungsod ang kahalagahan ng pagdalo sa templo.