Lesson 123: Doktrina at mga Tipan 109–110

Doktrina at mga Tipan 110, Bahagi 1

Ipakikita ng Tagapagligtas ang Kanyang Sarili sa Kanyang mga Banal sa Templo

Noong Abril 3, 1836, nagpakita ang Panginoong Jesucristo kay Joseph Smith at Oliver Cowdery sa Templo ng Kirtland, tinutupad ang Kanyang pangako na “ipakikita [ang Kanyang] sarili sa [Kanyang] mga tao sa bahay na ito” (Doktrina at mga Tipan 110:7). Ang pangakong ito ay maiaangkop sa atin ngayon. Ang lesson na ito ay makatutulong sa mga estudyante na maunawaan kung paano tayo inihahanda ng ating pagiging karapat-dapat na mas mapalapit sa Panginoon sa Kanyang templo.

Mga Posibleng Aktibidad sa Pag-aaral

Kung makakapiling ninyo ang Tagapagligtas

Para simulan ang klase, sabihin sa mga estudyante na isipin na kunwari ay nagkaroon sila ng pagkakataong makita nang personal ang Tagapagligtas na si Jesucristo.

Bilang alternatibo, maaari kang magpakita ng larawan ng ministeryo ng Tagapagligtas sa mga tao sa lumang Amerika o ipanood ang video na “Nagpakita si Jesucristo sa Lumang Amerika” mula sa time code na 11:52 hanggang 14:05. Sabihin sa mga estudyante na isipin na kunwari ay naroon sila. Pagkatapos ng video, maaari mong itanong ang tulad ng mga sumusunod:

• Ano ang ilang pagpapala na maaari ninyong matanggap dahil kapiling ninyo ang Tagapagligtas?

• Paano maaaring makaapekto ang mga pagpapalang ito sa inyong buhay?

Sa pag-aaral ninyo ngayon, maghanap ng mga paraan kung paano kayo espirituwal na mas mapapalapit sa Panginoon at kung paano ninyo matatamasa ang mga pagpapalang ninanais Niyang ibigay sa inyo.

Nagpakita ang Tagapagligtas sa Templo ng Kirtland

Upang maihanda ang mga estudyante sa pag-aaral ng pagpapakita ng Tagapagligtas sa Templo ng Kirtland na nakatala sa Doktrina at mga Tipan 110, maaari mong ipaalala sa kanila ang mga pagpapalang ipinangako ng Panginoon sa mga Banal kung magtatayo sila ng templo (tingnan sa Doktrina at mga Tipan 97:15–16). Maaari ding balikan ng mga estudyante ang ilan sa mga pagpapalang ipinagdasal ni Joseph Smith sa paglalaan ng templo (tingnan sa Doktrina at mga Tipan 109:12).

Ang sumusunod na talata ay maaaring basahin nang malakas o ibuod upang magbigay ng konteksto sa kasaysayan para sa Doktrina at mga Tipan 110. Sabihin sa mga estudyante na isalarawan sa isipan ang mga pangyayaring ito at kung ano kaya ang pakiramdam nila kung naroon sila.

Noong hapon ng Linggo ng Pagkabuhay, Abril 3, 1836, idinaos ang isang sacrament meeting sa bagong inilaang Templo ng Kirtland. Matapos ibigay ang sakramento sa kongregasyon, pumunta sina Joseph Smith at Oliver Cowdery sa likod ng kurtinang tumatakip sa altar upang tahimik na manalangin. Doon nila nakita ang magkakasunod na banal na pagdalaw na nakatala sa Doktrina at mga Tipan 110. (Tingnan sa Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 [2018], 274–76.)

Paalala: Ang susunod na lesson (“Doktrina at mga Tipan 110, Bahagi 2”) ay sumasaklaw sa mga pagdalaw mula sa langit na kasunod ng pagpapakita ng Tagapagligtas sa templo.

Habang binabasa ninyo ang Doktrina at mga Tipan 110:1–4, pagnilayan kung ano maaaring maisip o madama ninyo kung kasama ninyo sina Joseph at Oliver sa panahong nakita nila ang pangitaing ito.

• Ano ang pinakanapansin ninyo tungkol sa paraan ng pagpapakilala ng Tagapagligtas sa Kanyang sarili sa talata 4?

• Ano ang ibig sabihin sa inyo na ang Tagapagligtas ang ating Tagapamagitan sa Ama? (tingnan sa Doktrina at mga Tipan 45:3–5).

Nangangako ang Tagapagligtas na ipapakita Niya ang Kanyang sarili sa atin sa templo

Basahin ang Doktrina at mga Tipan 110:5–10, at alamin ang mga dahilan kung bakit sinabi ng Tagapagligtas na dapat magsaya ang lahat ng Kanyang Banal.

Pagtuunan ang mga alituntuning nagpapabalik-loob: Ang gawaing ito ay maaaring makatulong sa mga estudyante na tumukoy ng alituntuning nagpapabalik-loob. Para sa karagdagang pagsasanay sa pagtuon sa mga alituntuning nagpapabalik-loob, tingnan ang training na may pamagat na “Magtuon sa mga katotohanang humahantong sa pagbabalik-loob at nagpapalakas ng pananampalataya kay Jesucristo” sa Mga Kasanayan para sa Pag-unlad ng Guro: Ituro ang Doktrina. Maaari kang magsanay na gamitin ang kasanayang “Magtanong ng mga bagay na makatutulong sa mga estudyante na matukoy at mabigyang-diin ang mga alituntunin na nagpapabalik-loob.”

• Anong mga salita o parirala mula sa mga talatang ito ang makabuluhan o interesante para sa inyo?

• Paano tayo matutulungan ng talata 5 at 8 na maghandang mas mapalapit sa Panginoon sa templo?

  Sa mga katotohanang maaaring matuklasan ng mga estudyante mula sa mga talatang ito, tulungan silang maunawaan na kung susundin natin ang mga kautusan at magsisikap tayong maging malinis sa harapan ng Panginoon, ipakikita Niya ang Kanyang sarili sa atin sa Kanyang templo.

• Bukod sa pisikal na pagpapakita, ano ang ilan pang paraan na maipapakita ng Tagapagligtas ang Kanyang sarili sa atin sa templo? (Ang ilang halimbawa ay makikita sa talata 8–9.)

Ang iba pang paraan na maaaring ipakita ng Tagapagligtas ang Kanyang sarili sa atin ay kinabibilangan ng pakikipag-usap sa atin sa Kanyang tinig (talata 8) at pagbibigay sa atin ng mga pagpapala at ng endowment, o kaloob na espirituwal na kapangyarihan mula sa kaitaasan (talata 9). Sa templo, maaari tayong makatanggap ng ilan sa mga pagpapala na maaaring naisip din ng mga estudyante sa simula ng lesson. Maaaring kabilang sa mga pagpapalang ito ang mas makilala ang Tagapagligtas at tumanggap ng patnubay, kapayapaan, at paggaling.

Pagsunod sa mga kautusan ng Panginoon at pagiging malinis

Upang matulungan ang mga estudyante na mas maunawaan ang tungkol sa pagsunod sa mga kautusan at pagsisikap na maging malinis, iparebyu sa kanila ang mga tanong sa temple recommend, at alamin ang inaasahan ng Panginoon sa atin bago tayo makapasok sa Kanyang bahay (tingnan sa Para sa Lakas ng mga Kabataan: Isang Gabay sa Paggawa ng mga Pagpili ([2022], 36–37). Maaaring may nagawa nang katulad nito ang mga estudyante nang pag-aralan nila ang lesson na “Doktrina at mga Tipan 97.”

Maaari mong idrowing o anyayahan ang isang estudyante na idrowing sa pisara ang sumusunod na diagram. Maaaring kopyahin ng mga estudyante sa kanilang study journal ang larawan. Maaari nilang ilista sa landas ang natutuhan nila mula sa pagrerebyu ng mga tanong sa temple recommend.

• Sa inyong palagay, bakit nais ng Panginoon na sikapin nating sundin ang mga kautusan upang mas mapalapit tayo sa Kanya sa templo?

• Ano ang ibig sabihin sa inyo ng pagiging malinis o karapat-dapat sa harapan ng Panginoon?

Itinuro ni Brother Bradley R. Wilcox ng Young Men General Presidency:

Ang mensahe ng Diyos ay ang pagiging karapat-dapat ay hindi pagiging walang kamalian. Ang pagiging karapat-dapat ay pagiging matapat at masikap. Dapat tayong maging matapat sa Diyos, sa mga priesthood leader, at iba pang nagmamahal sa atin, at dapat tayong magsumikap na sundin ang mga kautusan ng Diyos at huwag sumuko dahil lamang sa tayo ay nagkamali. …

… Tandaan na ang pagbabago ay posible, ang pagsisisi ay isang proseso at ang pagiging karapat-dapat ay hindi pagiging walang kamalian. Ang pinakamahalaga ay alalahanin na handa tayong tulungan agad ng Diyos at ni Cristo. …

… Sinabi ni Elder Dieter F. Uchtdorf: “Hindi kailangan ng Diyos ang mga taong walang kamalian. Hinahanap Niya ang mga maghahandog ng kanilang mga ‘puso at may pagkukusang isipan’ [Doktrina at mga Tipan 64:34], at gagawin Niya silang ‘ganap kay Cristo’ [Moroni 10:32–33].” (Bradley R. Wilcox, “Ang Pagiging Karapat-dapat ay Hindi Pagiging Walang Kamalian,” Liahona, Nob. 2021, 62, 67)

• Paano makatutulong ang mensaheng ito sa isang taong iniisip kung karapat-dapat siyang pumunta sa templo at sa presensya ng Tagapagligtas?

Ipakita ang inyong naunawaan

Upang matulungan ang mga estudyante na maipakita ang kanilang naunawaan, maaari kang magbigay ng mga sitwasyong tulad ng sumusunod:

Ipagpalagay na iniisip ng isang kaibigan kung may saysay bang magsikap na maging karapat-dapat na sumamba sa templo. Isa pang kaibigan ang nag-iisip kung posibleng maging karapat-dapat siyang pumasok sa templo. Pumili ng isa sa mga sitwasyong ito, at sagutin ang mga sumusunod na tanong:

• Mula sa natutuhan ninyo ngayon, paano ninyo sasagutin ang mga alalahanin ng inyong kaibigan?

• Ano ang inaasahan ninyong mauunawaan ng inyong kaibigan tungkol sa Ama sa Langit, kay Jesucristo, at sa templo?

Anyayahan ang mga estudyante na ibahagi ang kanilang mga saloobin. Maaari mong ibahagi ang iyong damdamin tungkol sa pangako ng Tagapagligtas na ipakikita ang Kanyang sarili sa atin sa Kanyang mga templo kapag sinisikap nating sundin ang mga kautusan at maging malinis.

Karagdagang Resources

Bakit tayo nagtatayo ng mga templo sa iba’t ibang panig ng mundo?

Ipinaliwanag ni Pangulong Russell M. Nelson:

Ang templo ang sentro sa pagpapalakas ng ating pananampalataya at espirituwal na katatagan dahil ang Tagapagligtas at ang Kanyang doktrina ang pinakasentro ng templo. Ang lahat ng bagay na itinuturo sa templo, sa pamamagitan ng mga tagubilin at ng Espiritu, ay nakadaragdag sa nauunawaan natin tungkol kay Jesucristo. Ang Kanyang mahahalagang ordenansa ang nagbibigkis sa atin sa Kanya sa pamamagitan ng mga sagradong tipan ng priesthood. Pagkatapos, kapag tinupad natin ang ating mga tipan, pagkakalooban Niya tayo ng Kanyang nagpapagaling at nagpapalakas na kapangyarihan. At, talagang kakailanganin natin ang Kanyang kapangyarihan sa mga darating na araw. …

… Kapag dala ninyo ang inyong temple recommend, nagsisising puso, at hangaring matuto sa bahay ng Panginoon, tuturuan Niya kayo. (Russell M. Nelson, “Ang Templo at ang Inyong Espirituwal na Pundasyon,” Liahona, Nob. 2021, 93–95)

Ano ang magagawa ko upang madamang mas karapat-dapat akong pumasok sa bahay ng Panginoon?

Ipinaalala sa atin ni Sister Joy D. Jones, dating Primary General President:

Ipaliliwanag ko sa inyo ang pangangailangang masabi ang pagkakaiba ng dalawang mahalagang salita: halaga at pagkamarapat. Hindi sila magkapareho. Ang ibig sabihin ng espirituwal na halaga ay pahalagahan ang ating sarili ayon sa pagpapahalaga sa atin ng Ama sa Langit, hindi ayon sa pagpapahalaga sa atin ng mundo. Tukoy na ang ating halaga bago pa tayo pumarito sa mundong ito. “Ang pag-ibig ng Diyos ay walang hanggan at mananatili magpakailanman.”

Sa kabilang dako, ang pagkamarapat ay nakakamtan sa pamamagitan ng pagsunod. Kung nagkasala tayo, hindi tayo gaanong karapat-dapat, ngunit hindi kailanman nababawasan ang ating halaga! Patuloy tayong nagsisisi at nagsisikap na maging katulad ni Jesus nang hindi tayo nawawalan ng halaga. Tulad ng itinuro ni Pangulong Brigham Young: “Ang pinakamaliit at pinakaabang espiritu ngayon sa lupa … ay singhalaga ng mga daigdig.” Anuman ang mangyari, palagi tayong may halaga sa paningin ng ating Ama sa Langit. (Joy D. Jones, “Halagang Hindi Masusukat,” Liahona, Nob. 2017, 14)

Ano ang magagawa ko para mas makita pa si Jesucristo sa aking buhay?

Ipinaliwanag ni Sister Tracy Y. Browning ng Primary General Presidency:

Bilang mga anak ng tipan ng Diyos, mapalad tayong mabiyayaan ng saganang kagamitang pinili ng Diyos para mas maunawaan natin ang mga espirituwal na bagay. Ang mga salita at turo ni Jesucristo na nakatala sa banal na kasulatan at ang mga mensahe mula sa Kanyang hinirang na mga propeta, at ang Kanyang Espiritu na natatanggap sa araw-araw na panalangin, regular na pagdalo sa templo, at lingguhang ordenansa ng sakramento ay makakatulong na maibalik ang kapayapaan at mailaan ang kinakailangang kaloob na makahiwatig na naghahatid ng liwanag ni Cristo at ng Kanyang pag-unawa sa mga lihim ng ating buhay at sa isang mundong puno ng pagdududa. Ang Tagapagligtas ay maaari ding maging ating kompas at kapitan sa ating paglalayag kapwa sa mga payapa at sa magulong panahon ng buhay. Mapapadali Niya ang tamang landas patungo sa ating walang-hanggang destinasyon. Kaya ano ang nais Niyang makita natin, at saan Niya tayo gustong magpunta? (Tracy Y. Browning, “Makita pang Lalo ang mga Pagpapala at Patnubay ni Jesucristo sa Ating Buhay,” Liahona, Nob. 2022, 13–14)

Saan ko malalaman ang iba pa tungkol sa ilan sa mga pagbisita ng Tagapagligtas sa Kanyang mga templo?

• Lisa Olsen Tait and Brent Rogers, “A House for Our God,” sa Revelations in Context (2016), 165

• 3 Nephi 11:8–10 (ang pagpapakita ng Tagapagligtas sa mga Nephita sa templo sa lupaing Masagana)

• Isaias 6:1–9 (ang pagpapakita ng Panginoon kay Isaias)

• Eter 3:1–16; Moises 1:1–4 (ang pagpapakita ng Panginoon sa mga bundok, na karaniwang nagsisilbing mga templo)

• LeRoi C. Snow, “Pagdalaw ng Tagapagligtas,” Liahona, Set. 2015, 80 (ang pagpapakita ng Tagapagligtas kay Lorenzo Snow sa Salt Lake Temple)

Mga Karagdagang Aktibidad sa Pag-aaral

“Kabanalan sa Panginoon—Ang Bahay ng Panginoon”

Maaaring makatulong sa mga estudyante na mas maunawaan kung bakit kailangan ang paghahanda para makapasok sa bahay ng Panginoon.

Sabihin sa kanila na isipin kunwari na inanyayahan nila ang isang kaibigan sa bahay upang maghapunan.

• Anong mga patakaran ng pamilya ang gusto ninyong tiyaking naunawaan ng inyong kaibigan upang magpakita ng paggalang sa inyong pamilya at tahanan?

Pagkatapos ay magpakita ng isang larawan ng pinakamalapit na templo na nagpapakita ng mga salitang “Holiness to the Lord—The House of the Lord [Kabanalan sa Panginoon—Ang Bahay ng Panginoon].”

• Ano ang sinasabi sa atin ng inskripsyong ito tungkol sa bawat templo sa iba’t ibang panig ng mundo?

• Ano ang magagawa natin upang magpakita ng paggalang sa bahay ng Panginoon?

Pagkatapos ng talakayan, maaari mong ibahagi na isa sa mga bagay na ginagawa natin upang magpakita ng paggalang o pagpipitagan sa bahay ng Panginoon ay ang tiyakin na ang lahat ng pumapasok sa templo ay naghanda nang mabuti.

Ipinaliwanag ni Pangulong Russell M. Nelson:

Dahil sagrado ang templo, hinihiling ng Panginoon na protektahan ito upang hindi madungisan. Makapapasok ang sinumang kusang-loob na maghahandang mabuti para sa pribilehiyong iyon. Ang konsepto ng paghahanda ay nananaig sa iba pang larangan ng pagsisikap. Naaalala ko pa noong bata pa ako, sinabi ko sa mga magulang ko na gusto kong mag-aral sa unibersidad. Sinabi nilang magagawa ko lamang iyon kung magsisikap akong mabuti sa pag-aaral ko noong panahong iyon at masusunod ang lahat ng mga kailangan sa pagpasok sa unibersidad. Tulad nito, kailangan tayong maging marapat para makapasok sa templo. Naghahanda tayo sa pisikal, intelektuwal, at espirituwal. Ang pagiging marapat ay pinagpapasiyahan sa bawat taong humihingi ng recommend. …

… Simple lang ang mga kailangan. Maikli at malinaw na isinasaad na kailangang sundin ng isang tao ang mga kautusan Niya na may-ari ng bahay. Siya ang nagtakda ng mga pamantayan. Pumapasok tayo sa templo bilang Kanyang mga panauhin. (Russell M. Nelson, “Paghahanda para sa mga Pagpapala ng Templo,” Liahona, Okt. 2010, 42–43)