Leksiyon 125: Doktrina ug mga Pakigsaad 111–114

Doktrina ug mga Pakigsaad 111

“Ako Mohan-ay sa Tanan nga mga Butang alang sa Inyong Kaayohan”

Niadtong 1836, ang Simbahan dako kaayo og utang. Si Propeta Joseph Smith ug ang ubang mga lider sa Simbahan mibiyahe ngadto sa Salem, Massachusetts, diin naglaom sila nga makakitag ikabayad sa mga utang sa Simbahan. Niadtong Agosto 6, 1836, nadawat ni Joseph Smith ang pagpadayag nga narekord sa Doktrina ug mga Pakigsaad 111. Niini nga pagpadayag gipasaligan siya sa Ginoo bahin sa utang sa Simbahan ug sa kaayohan sa Zion. Kini nga leksiyon makatabang sa mga estudyante nga mas mosalig sa Langitnong Amahan ug kang Jesukristo.

Mga Posibleng Kalihokan sa Pagkat-on

Unsay resulta sa mga hitabo?

Sugdi ang klase pinaagi sa pagdapit sa mga estudyante nga hunahunaon ang mga hagit nga sagad giatubang sa mga tin-edyer nga makapaluya nila o makapahadlok nga basin og dili na moarang-arang ang kahimtang. Pwede kang magdrowing og sukdanan nga sama sa naa sa pisara ug dapita ang mga estudyante nga gamiton kini sa pagtubag sa pangutana sa ubos.

• Sa imong hunahuna, unsa ka masaligon nga ang kadaghanang tin-edyer nga mamaayo ra ang dangatan sa ilang kahimtang?

Pamalandongi kon pilay imong sukod sa imong kaugalingon niini nga sukdanan kabahin sa mga problema o mga hagit nga imong giatubang karon o atobangon tingali sa umaabot.

Usa ka lisod nga panahon para kang Joseph ug sa uban pa

Ikonsiderar ang pagdapit sa usa ka estudyante nga basahon ang mosunod nga pangkonteksto nga backgroundd, o pwede nimo kining mubo nga ipasabot sa kaugalingon nimong mga pulong. O, pwede nimong dapiton ang mga estudyante nga magbasa sugod sa kapitulo 22 sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 ([2018], 258–59), o pwede nimong i-play ang audio sa maong kapitulo (anaa sa saints.ChurchofJesusChrist.org) gikan sa time code 16:14 hangtod 17:00. Pwede nimong ipasiugda nga sama ra nga nag-atubang ta og makapaluyang mga problema sa atong kinabuhi, nakaatubang si Joseph Smith ug ang ubang mga lider sa Simbahan og mga problema niadtong 1836 nga nakapabalaka nila pag-ayo sa kaugmaon sa Zion.

Niadtong 1836, dako kaayog utang ang Simbahan tungod sa mga galastohan sa pagpatukod sa Templo sa Kirtland ug pagpamalit og mga yuta sa Ohio ug Missouri. Sa samang higayon, gipugos pa gyod pagpabalhin ang mga Santos sa Clay County. Missouri. Sa ulahing bahin sa Hulyo 1836, samtang nagproblema niining mga butanga, si Joseph ug Hyrum Smith, Oliver Cowdery, ug Sidney Rigdon mibiyahe og kapin sa 600 ka milya (965 ka kilometro) gikan sa Kirtland, Ohio, paingon sa Salem, Massachusetts. Bisag dili klaro kon nganong mibiyahe sila, milihok tingali sila base sa impormasyon nga posibleng makatabang nila aron mabayran ang utang sa Simbahan. Ang usa ka asoy miingon nga giingnan sa usa ka miyembro sa Simbahan si Joseph Smith bahin sa usa ka balay sa Salem diin naay gitagong dakong kantidad sa kuwarta. (Tan-awa ang makasaysayanong pasiuna sa “Pagpadayag, 6 Agosto 1836 [D&P 111],” 35, josephsmithpapers.org.)

• Sa imong hunahuna, unsa kaha ka masaligon si Joseph Smith nga maayo ra ang dangatan sa mga problemang giatubang sa Simbahan?

Samtang tun-an sa mga estudyante ang Doktrina ug mga Pakigsaad 111, dapita silang tinguhaon ang pagpadayag mahitungod sa mga pamaagi nga ang Ginoo makatabang kanato nga madugangan ang atong pagsalig nga maayo ra ang dangatan sa atong mga problema ug mga hagit.

“Bisan pa sa inyong walay pulos nga mga buhat”

Ikonsiderar ang pagsulat sa mosunod nga mga grupo sa bersikulo diha sa pisara. Ang usa ka paagi sa pagtuon niini mao ang pagbasa sa unang grupo, ug dayon pagdapit sa mga estudyante nga isulat ang ilang tubag sa duha ka pangutana diha sa piraso sa papel ug dayon ipasa kini sa ilang klasmeyt. Hisgoti kon unsay gisulat sa mga estudyante. Sublia ni nga kalihokan para sa nahibiling duha ka grupo sa bersikulo. Makatabang kini sa mga estudyante nga ipakigbahin ang ilang nakat-onan ug matudloan pinaagi sa ilang mga klasmeyt.

Kon kinahanglan, ipatin-aw nga ang walay pulos nga buhat nagtumong sa sayop nga panghukom.

Pagtutok sa Langitnong Amahan ug kang Jesukristo: Para mas makapraktis pa niini, tan-awa ang pagbansay nga nag-ulohan og “Pagtudlo mahitungod sa mga titulo, mga tahas, ug mga hiyas ni Jesukristo” sa Pagpalambo sa mga Kahanas sa Magtutudlo: Magpunting kang Jesukristo. Ikonsiderar ang pagpraktis sa kahanas nga “Paghimo og mga pangutana nga makadasig sa pagpangita og tubag aron matabangan ang mga estudyante sa pagtino sa mga tahas, mga titulo, mga simbolo, mga hiyas, ug mga kinaiya ni Jesukristo.” Human marebyo ang pagbansay, pwede nimong usbon o dugangan ang mga pangutana nga imong isukna sa mga estudyante bahin sa mosunod nga mga tudling sa kasulatan.

Basaha ang mosunod nga mga grupo sa bersikulo, ug para sa matag grupo, tubaga ang nagsunod nga duha ka pangutana:

• Doktrina ug mga Pakigsaad 111:1–4

• Doktrina ug mga Pakigsaad 111:5–8

• Doktrina ug mga Pakigsaad 111:9–11

• Unsa ang imong mga pangutana mahitungod niini nga mga bersikulo?

• Unsa nga mga kamatuoran ang imong makat-onan mahitungod sa Dios gikan niini nga mga bersikulo?

Sa ilang mga tubag sa ikaduhang pangutana, hisgotan tingali sa mga estudyante ang pipila ka kamatuoran o mga hiyas sa Dios. Pwede nga maapil niini ang mga kamatuoran nga sama sa mosunod: Ang Dios maluluy-on sa atong mga sayop (tan-awa ang bersikulo 1); nakighinabi ang Dios kanato pinaagi sa kalinaw ug gahom sa Iyang Espiritu (tan-awa ang bersikulo 8); mahimong han-ayon sa Dios ang tanang butang para sa atong kaayohan (tan-awa ang bersikulo 11).

• Sa unsang paagi nakatabang kang Joseph Smith ang mga kamatuoran nga imong gihisgotan dihang nakaatubang siyag mga hagit ug mga kabalaka?

• Sa unsang paagi kini makatabang nimo?

Mahimong han-ayon sa Dios ang tanang butang para sa atong kaayohan

Sunda ang paggiya sa Espiritu bahin sa kon unsang mga kamatuoran ang makatabang sa mga estudyante nga mas magtuon pa. Ang nahibiling bahin niini nga leksiyon nakatutok sa kamatuoran nga mahimong han-ayon sa Dios ang tanang butang para sa atong kaayohan. Ikonsiderar ang pagsulat niini nga kamatuoran diha sa pisara ug sa pagdapit sa mga estudyante nga markahan ang mga pulong sa bersikulo 11 nga nagtudlo niini.

Kon gikinahanglan, tabangi ang mga estudyante nga masabtan nga ang pulong mohan-ay niini nga bersikulo nagpasabot nga “mohusay.” Pwede nimong hisgotan ang sukdanan diha sa pisara ug dapita ang mga estudyante nga pamalandongan kon unsa sila ka masaligon nga kayang han-ayon sa Dios ang “tanang butang” para sa ilang kaayohan.

Ikonsiderar ang paghisgot sa mga estudyante nga kon gusto silang mas modako ang ilang pagtuo niini nga kamatuoran, pwede silang mag-ampo nga mas mapalawman ang ilang pagsabot ug pagtuo niini nga hiyas nga Dios.

• Sumala sa bersikulo 11, unsay kinahanglan natong himoon aron han-ayon sa Dios ang tanang butang para sa atong kaayohan?

Kon kinahanglan, ipasabot nga ang pagkahimong “maalamon ingon sa mga bitin ug apan walay sala” (bersikulo 11) nagtumong sa ideya nga kinahanglang usahon sa mga tinun-an sa Manluluwas ang kaalam uban ang pagkainosente ug kaputli.

Para sa mosunod nga kalihokan, pwede nimong grupohon og tinagtulo ang mga estudyante. Hangyoa ang kada estudyante sa grupo nga basahon ang lainlaing tudling sa ubos. Human mabasa ug mahisgoti sa mga estudyante ang mga tudling, ikonsiderar ang pagdapit nila nga moduol sa pisara ug isulat ang ilang nakaplagan. Pwede nila kining isulat palibot sa kamatuoran nga naa sa pisara, nga adunay arrow nga nagtudlo paingon sa kamatuoran.

Tun-i ang mosunod nga mga tudling, nga mangita kon unsay kinahanglan natong buhaton aron han-ayon sa Dios ang tanang butang para sa atong kaayohan. Ikonsiderar ang pagkonektar sa mosunod nga mga bersikulo sa Doktrina ug mga Pakigsaad 111:11.

• Mga Taga-Roma 8:28

• Doktrina ug mga Pakigsaad 90:24

• Doktrina ug mga Pakigsaad 100:15

Dapita ang mga estudyante nga basahon ang mosunod nga pamahayag ni Presidente Gordon B. Hinckley ug dayon idugang sa lista sa pisara ang ilang nakat-onan:

Si Presidente Gordon B. Hinckley (1910–2008) mipamatuod:

Mosalir ra kining tanan. Ayaw og kabalaka. Mosulti ko niana sa akong kaugalingon matag buntag. Mosalir ra kining tanan. Kon imong buhaton ang imong labing maayo, mosalir ra kining tanan. Ibutang ang imong pagsalig diha sa Dios, ug padayon sa unahan uban sa hugot nga pagtuo ug pagsalig diha sa umaabot. Ang Ginoo dili mobiya kanato. Dili Siya mobiya kanato. (“Pagtulun-an sa mga Presidente sa Simbahan: Gordon B. Hinckley, Kapiltuo 25: Padayon sa Unahan uban sa Hugot nga Pagtuo,” Mga Pagtulun-an ni Gordon B. Hinckley, 395)

Dapita ang mga estudyante nga itudlo sa usag usa ang ilang gisulat sa pisara. Pwede nilang ipasabot kon nganong makahuloganon kini kanila. Ang pipila sa mga pangutana makadasig sa panaghisgot:

• Unsay imong nakaplagan nga makapalig-on sa imong pagsalig nga kayang han-ayon sa Dios ang tanang butang para sa imong kaayohan?

• Sa unsang paagi ang pagbaton og mahangtorong panglantaw makatabang nimo nga mosalig nga kayang han-ayon sa Dios ang tanang butang para sa imong kaayohan?

• Kanus-a o sa unsang paagi gihan-ay sa Dios ang mga butang sa imong kinabuhi o sa kinabuhi sa imong kaila?

Ang mosunod nga kalihokan mohatag og panahon sa mga estudyante nga ikonsiderar kon unsay ilang nakat-onan ug gibati karon nga makaimpluwensiya sa ilang kinabuhi ug relasyon sa Langitnong Amahan. Pagkahuman sa mga estudyante og sulat sa ilang mga journal, pwede nimong dapiton ang pipila nga mopakigbahin sa klase.

Kompletoha ang usa o duha sa mosunod nga mga kapahayag sa imong journal:

• Ang akong pagsalig nga han-ayon sa Dios ang tanang butang para sa akong kaayohan nalig-on pinaagi sa …
  Unsa ang akong nakat-onan karon nakatabang nako nga atubangon ang akong problema pinaagi sa …
  Dihang mag-atubang ko og kalisdanan sa umaabot, gusto nakong hinumdoman nga …

Dugang nga mga Kapanguhaan

Doktrina ug mga Pakigsaad 111:1. Unsa ang ilang walay pulos nga mga buhat?

Ang walay pulos nga mga buhat mao ang usa ka sayop o kasaypanan sa paghukom. “Walay pulos nga buhat” para kang Joseph Smith ug sa iyang mga kauban nga mangitag kwarta ug mosalig sa ilang kaugalingon nga mga paningkamot sa pagsulbad sa pinansyal nga mga kalisod sa Simbahan. Hinoon, sa nahabilin sa tibuok nga pagpadayag nga girekord diha sa Doktrina ug mga Pakigsaad 111 maluluy-on nga gisaad sa Ginoo kanila ang mapadayonon nga pagtabang ug paggiya.

Ang pag-ila sa Ginoo sa mga sayop niini nga mga lider sa Simbahan nagtabang og klaro sa kalainan tali sa paghimo og sayop ug sa pagpakasala. Giila ni Presidente Dallin H. Oaks sa Unang Kapangulohan nga tanan kita masayop ug mitudlo nga ang atong mga sayop makatabang kanato sa pag-uswag:

Ang mga sayop dili kalikayan diha sa proseso sa pag-uswag dinhi sa mortalidad. Ang paglikay sa posibilidad sa kasaypanan mao ang paglikay sa tanang posibilidad sa pagtubo. Diha sa sambingay sa mga talanton, ang Manluluwas mi-istorya kabahin sa usa ka sulugoon kinsa matinguhaon nga mogamay ang risgo sa pagkawala pinaagi sa sayop nga pamuhunan nga gitago niya ang iyang talanton ug walay gibuhat niini. Kana nga sulugoon gipanghimaraot sa iyang agalon (tan-awa sa Mat. 25:24–30).

Kon kita gusto nga makorihian sa atong mga sayop … wala tuyoa nga mga sayop mahimong tinubdan sa pagtubo ug pag-uswag. (Dallin H. Oaks, “Sins and Mistakes,” Ensign, Oct. 1996, 67)

Doktrina ug mga Pakigsaad 111:8. Unsaon nako pag-ila ang impluwensiya ug gahom sa Espiritu?

Gihatag ni Presidente Henry B. Eyring sa Unang Kapangulohan ang mosunod nga panglantaw nga makatabang sa mga estudyante nga mas masabtan ang impluwensiya ug gahom sa Espiritu sa ilang mga kinabuhi:

Gibati ninyo ang malinawong pagpamatuod diha sa inyong kasingkasing ug sa hunahuna nga adunay usa ka butang nga tinuod. Ug kamo nasayod nga kini inspirasyon gikan sa Dios. Para sa pipila ninyo miabot tingali ni dihang gitudloan mo sa mga misyonaryo sa wala pa mo nabunyagan. Miabot tingali ni panahon sa pakigpulong o leksiyon sa simbahan. Mahimong miabot na kini karong gabhiona sa dihang ang usa ka butang nga tinuod gisulti o gikanta, sama sa akong gibati dihang nadungog nako ang pagkanta, sama sa pipila kaninyo. Ang Espiritu Santo mao ang Espiritu sa Kamatuoran. Bation ninyo ang kalinaw, paglaom, ug hingpit nga kalipay kon Siya namulong nganha sa inyong kasingkasing ug sa hunahuna nga ang usa ka butang tinuod. Hapit sa kanunay gibati nako usab ang usa ka pagbati sa kahayag. Ang bisan unsa nga pagbati nga maanaa ako kalabot sa kangitngit nawagtang. Ug midako ang tinguha sa paghimo sa maayo. (Henry B. Eyring, “Gifts of the Spirit for Hard Times” [Brigham Young University devotional, Sept. 10, 2006], 2, speeches.byu.edu)

Doktrina ug mga Pakigsaad 111:11. Unsay ipasabot sa “magmaalamon ingon sa mga bitin ug apan walay sala”?

Sa dihang ang Manluluwas mipadala sa Iyang mga tinun-an aron sa pagsangyaw sa ebanghelyo, giingnan Niya sila nga “magmaalamon kamo] ingon sa mga bitin, ug [magmalumo kamo] ingon sa mga salampati” (Mateo 10:16). Sa moderno nga mga panahon, ang Manluluwas mihatag og susama nga tambag ngadto sa Iyang mga disipulo, nagdeklarar, “Magmaalamon ingon sa mga bitin ug apan walay sala” (D&P 111:11). Ang duha ka istorya nagtudlo nga ang mga disipulo sa Manluluwas kinahanglang mohiusa sa kaalam uban sa pagkainosente ug kaputli. Ang Hubad ni Joseph Smith mihatag og gibug-aton sa kaimportante sa pagkamaalamon nga sulugoon sa Agalon: “Busa magmaalamon kamo nga mga sulugoon,ug magmalumo sama sa salampati” (Hubad ni Joseph Smith, Mateo 10:14; itandi sa Mateo 10:16). (Manwal sa Estudyante sa Bag-ong Tugon [2018], 36–37)

Doktrina ug mga Pakigsaad 111:11. Unsa pay akong mahimo aron “han-ayon [sa Dios] ang tanang butang alang sa [akong] kaayohan”?

Si Presidente Dieter F. Uchtdorf, sa Unang Kapangulohan kaniadto, mipamatuod:

Kadtong kinsa maminaw sa tawag sa kaugalingon ug magtinguha sa Dios, kadtong mag-ampo, motuo, ug maglakaw sa dalan nga giandam sa Manluluwas—bisan og sila madagma usahay niana nga dalan—makadawat sa makahupay nga kasiguroan nga “ tanan nga mga butang maghiusa sa paglihok alang sa [ilang] kaayohan” (Doktrina ug mga Pakigsaad 90:24). (Dieter F. Uchtdorf, “Tinguha alang sa Panimalay,” Liahona, Nob. 2017, 23)

Si Elder Gerrit W. Gong sa Korum sa Napulog Duha ka Apostoles mipahayag:

Ang tanang butang maglihok alang sa atong kaayohan kon kita “pagasantoson diha ni Kristo … nga anaa sa pakigsaad sa Amahan” [Moroni 10:33]. Ang matag maayo ug gisaad nga panalangin moabot niadtong kinsa magpabilin nga matinud-anon hangtud sa katapusan. Ang “malipayon nga kahimtang niadto nga naghupot sa mga sugo sa Dios” nga “bulahan sa tanan nga mga butang, sa temporal ug sa espirituhanon,” ug “mopuyo uban sa Dios diha sa … walay kataposan ang kalipay” [Mosiah 2:41]. (Gerrit W. Gong, “Pagkasakop diha sa Pakigsaad,” Liahona, Nob. 2019, 81)

Dugang nga mga Kalihokan sa Pagkat-on

Ang Dios makahan-ay gayod sa “tanang butang” para sa atong kaayohan

Aron tabangan ang mga estudyante nga mas mapalawman ang ilang pagsabot sa kamatuoran nga kayang han-ayon sa Dios ang tanang butang para sa ilang kaayohan, ikonsiderar ang pagpasalida sa “Life Is Incredibly Unfair—in Our Favor” (13:33). Sa dili pa ipakita ang bidyo, pangutan-a ang mga estudyante kon ang “tanang butang” ba gayod ang gipasabot ni Jesus diha sa Doktrina ug mga Pakigsaad 111:11. Samtang tan-awon sa mga estudyante ang bidyo, dapita silang mangita kon giunsa pagpangita sa asawa ang tubag sa maong pangutana.

Doktrina ug mga Pakigsaad 111:2. “Daghan ang mga katawhan niini nga dakbayan, kinsa Ako mopundok”

Kon makabenepisyo ang mga estudyante gikan sa dugang makasaysayanong konteksto, pwede nimong isulti ang asoy ni Elder Erastus Snow ug kon sa unsang paagi ang pagpadayag nga narekord sa Doktrina ug mga Pakigsaad 111 nakatabang niya sa pagtuman sa iyang misyon.

Sa 1841, lima ka tuig human ihatag ang seksiyon 111 gitawag si Erastus Snow aron moadto sa Salem, Massachusetts, aron tumanon ang pagpadayag sa pagpundok sa mga katawhan sa Salem ngadto sa gingharian sa Ginoo. Sa una, dili madinawaton sa mensahe sa ebanghelyo ang katawhan. Misalig si Elder Snow sa saad sa Ginoo nga “daghan [Siya og] mga katawhan niini nga dakbayan” (Doktrina ug mga Pakigsaad 111:2) ug mipadayon sa pagsangyaw bahin sa napahiuli nga Simbahan sa Manluluwas. Paglabay sa panahon, mituo ang mga tawo sa gipahiuli nga ebanghelyo ug nabunyagan. Pagka-Pebrero 1843, naa nay 110 ka miyembro ang Salem branch. Ang mga kinabig nga taga-Salem mipanaw paingon sa Nauvoo ug sa Rocky Mountains. (Tan-awa sa Elizabeth Kuehn, “More Treasures Than One,” in Revelations in Context [2016], 229.) Daghan sa mga kaliwat niini nga mga kinabig nga taga-Salem ang miyembro gihapon sa Simbahan hangtod karon (tan-awa ang Kim R. Burningham, “The ‘Insignificant’ Scripture” Ensign, Aug. 1990, 47–48).

Human isulti ang asoy ni Elder Erastus Snow, pwede nimong hisgotan ang mga leksiyon nga nakat-onan gikan niini nga kasinatian. Ang mosunod nga mga pangutana makatabang:

• Sa imong hunahuna, sa unsang paagi matuman ang mga saad sa Ginoo sa ilang panahon?

• Para nimo, nganong importanteng mga kinaiya ang pailob ug kakugi nga mga hiyas (tan-awa sa Doktrina ug mga Pakigsaad 4:6) sa dihang ipakigbahin ang ebanghelyo sa Manluluwas?

Doktrina ug mga Pakigsaad 111:11. Mahimong han-ayon sa Dios ang tanang butang para sa atong kaayohan

Kon makatabang, pwede nimong ikonsiderar nga dapiton ang mga estudyante nga maghunahuna og lain pang ehemplo gikan sa mga kasulatan o kasaysayan sa Simbahan diin gihan-ay o gihusay sa Dios ang usa ka butang nga negatibounya mahimong kaayohan. Mahimong maglakip sa mga ehemplo ni Joseph Smith ug Martin Harris nga nawad-an og 116 ka pahina sa manuskrito sa Basahon ni Mormon (Doktrina ug mga Pakigsaad 3:1, 7–10); si Joseph, ang anak ni Jacob, nga gibaligya ngadto sa Ehipto (Genesis 37, 39–45); si Abish nagtigom sa katawhan ni Hari Lamoni (Alma 19:28–29); ug ang pagkapriso ni Pedro ug Juan (Mga Buhat 5:17–20).