Leksiyon 126: Doktrina ug mga Pakigsaad 111–114

Doktrina ug mga Pakigsaad 112

“Ang Ginoo nga Imong Dios Moagak Kanimo Pinaagi sa Kamot”

Ang pagkamapainubsanon ni Jesukristo nakatabang Niyang masabtan ug matuman ang kabubut-on sa Iyang Amahan sa tibuok niyang pagpangalagad dinhi sa yuta (tana-wa sa Juan 5:30). Sa Doktrina ug mga Pakigsaad 112, gitudloan sa Manluluwas si Thomas B. Marsh nga makatabang nato ang pagkamapainubsanon aron madawat ang paggiya gikan sa atong Langitnong Amahan. Ang katuyoan niini nga leksiyon mao ang pagtabang sa mga estudyante nga mapainubsanong mangayo og giya gikan sa Langitnong Amahan.

Mga Posibleng Kalihokan sa Pagkat-on

Pagtinguha og balaan nga giya

Aron maandam ang mga estudyante nga makakat-on bahin sa pagdawat og giya gikan sa Langitnong Amahan, pwede nimong ipakita ang mosunod nga mga pangutana ug dapiton ang mga estudyante sa pagpamalandong sa ilang mga tubag. Pwede usab nimong papilion ang mga estudyante og usa o duha ka pangutana nga tubagon diha sa ilang mga journal sa pagtuon.

• Unsang mga giya ang imong gikinahanglan gikan sa Langitnong Amahan diha sa imong kinabuhi?

• Unsay makatabang nimo sa pagdawat sa paggiya sa Langitnong Amahan?

• Unsa usahay ang mga babag sa pagdawat sa giya sa Langitnong Amahan?

Samtang hisgotan nato ang mga pagtulun-an sa Manluluwas bahin sa pagdawat og balaang paggiya, bantayi kon unsay gitudlo kanimo sa Espiritu kon unsaon nimo pagpauswag ang imong katakos sa Iyang paggiya.

Ang pagkamapainubsanon moresulta ngadto sa balaang paggiya

Aron tabangan ang mga estudyante nga mas makasabot mahitungod sa konteksto sa Doktrina ug mga Pakigsaad 112 ug kon nganong nangayo og paggiya sa Ginoo si Thomas B. Marsh, pwede nimong ipakita ang mosunod nga impormasyon ug dapita ang usa ka estudyante sa pagbasa niini:

Niadtong 1837, si Thomas B. Marsh nagserbisyo isip Presidente sa Kurom sa Napulog Duha ka Apostoles. Milambo ang espiritu sa apostasya ug pagpangitag sayop taliwala sa pipila ka mga Santos sa Kirtland, lakip ang pipila ka sakop sa Kurom sa Napulog Duha ka Apostoles. Niadtong Enero sa 1837, giorganisar sa mga lider sa Simbahan ang bangko nga gitawag og Kirtland Safety Society. Kay nag-atubang og nagkadaiyang mga hagit, apil ang krisis sa kwarta sa tibuok nasod, sa kadugayan ang banko wala magmalamposon, nga nakapasamot sa kasoku batok kang Propeta Joseph Smith. Tungod sa kabalaka niini nga mga dili pagsinabtanay, mibiya sa iyang panimalay sa Missouri si Thomas B. Marsh ug mibiyahe sa Kirtland, nga gustong makigkita sa Napulog Duha ug mopakitag suporta ni Joseph. Pero, pag-abot niya, nahibaloan ni Presidente Marsh nga gipadala ni Joseph para sa mga misyon ang duha ka sakop sa Napulog Duha ngadto sa England. Isip presidente sa kurom, nasilo si Presidente Marsh nga wala usa siya konsultaha ni Joseph. Bisan pa niana, gibisita ni Thomas B. Marsh si Joseph Smith aron mangayog direksiyon sa Ginoo.

Desisyoni kon unsang matang sa pagbasa ang labing makatabang sa imong mga estudyante sa pagtuon sa mosunod nga mga bersikulo. Pwede nimong bahinon ang mga bersikulo ngadto sa indibiduwal nga mga estudyante o grupo sa mga estudyante. O pwedeng magboluntaryo ang daghang estudyante sa pagbasa og kusog sa grupo sa mga bersikulo samtang magsunod ang ubang sakop sa klase.

Basaha ang Doktrina ug mga Pakigsaad 112:2–3, 10, 12–15, 20–22, 28, 33–34, nga mangita sa tambag sa Ginoo ngadto kang Thomas B. Marsh nga makatabang niya sa pagdawat sa paggiya sa Ginoo.

• Unsang makahuloganong pulong o hugpong sa mga pulong ang imong nakita?

• Unsa ang pipila ka baroganan nga atong mailhan gikan niini nga mga bersikulo?

Pwedeng matino sa mga estudyante ang daghang baroganan gikan sa ilang pagtuon. Sunda ang pag-aghat gikan sa Espiritu Santo aron sa pagsukna og follow-up nga mga pangutana ug mapalawman ang pagsabot sa mga estudyante sa mga baroganan nga ilang naila. Ang nahibiling niini nga leksiyon magtutok sa kamatuoran nga kon mapainubsanon kita, giyahan kita sa Langitnong Amahan ug tubagon ang atong mga pag-ampo (tan-awa sa bersikulo 10).

Aron matabangan nga mapalawman ang pagsabot sa mga estudyante niini nga baroganan, ikonsiderar ang paggrupo-grupo sa mga estudyante aron hisgotan ang mosunod nga mga pangutana. Dayon pwede nilang basahon ang pamahayag ni Elder Soares ug hisgotan ang mosunod nga mga pangutana:

• Unsaon nimo paghulagway ang pagkamapainubsanon?

• Sa imong hunahuna, sa unsang paagi makatabang nato ang pagkamapainubsanon aron madawat nato ang tubag sa atong mga pag-ampo?

Si Elder Ulisses Soares sa Korum sa Napulog Duha ka Apostoles mitudlo:

Nagtuo ko, mga kaigsoonan, nga kadto lang mga mapainubsanon ang makaila ug makasabut sa mga tubag sa Ginoo sa ilang pag-ampo. Ang mapainubsanon matudloan, moangkon nga nagsalig gayud sila sa Dios ug nagtinguha nga mopaubos sa Iyang kabubut-on. Ang mapainubsanon malumo ug makaimpluwensya sa uban sa paghimo sa ingon. Ang saad sa Dios sa mga mapainubsanon mao nga Siya moagak kanila. Nagtuo gyud ko nga malikayan nato ang mga pagtipas ug mga kagul-anan sa atong kinabuhi kon naglakaw kita uban sa Ginoo. (Ulisses Soares, “Magmaaghup ug Magmapaubsanon sa Kasingkasing,” Liahona, Nob. 2013, 10)

• Unsa pay nakita nimo nga makatabang sa pagpalawom sa imong pagsabot sa bersikulo 10?

Pwede kang maghatag og mubong kahigayonan nga ipakigbahin sa mga grupo ang ilang nakat-onan sa ilang panaghisgot.

Mga paagi nga magmapainubsanon kita sa atong mga pag-ampo

Paghunahuna og mga paagi nga makatabang sa mga estudyante nga makasabot kon sa unsang paagi kita makapakita sa magmapainubsanon sa atong mga pag-ampo. Pwedeng ilista sa mga estudyante sa pisara ang ilang mga ideya. Pwede usab nilang tun-an ug hisgotan ang pipila sa mosunod nga mga ideya. Hatagi og higayon ang mga estudyante nga ipakigbahin kon unsay gitudlo kanila sa Espiritu.

Ang mosunod mao ang pipila ka paagi nga kita makapakita og kamapainubsanon sa dihang kita mag-ampo:

• Kita makapahayag og pagpasalamat (tan-awa ang ehemplo sa Manluluwas sa 3 Nephi 19:19–20, 27–28).

• Mahimo natong angkonon ang atong mga kahuyang ug ang gahom sa Langitnong Amahan (tan-awa ang ehemplo sa igsoon ni Jared sa Ether 3:1–6).

• Kita makatinguha og pagkorehir (tan-awa ang bidyo nga “Giunsa nako #Pagpaminaw Kaniya: Elder Neil L. Andersen” [2:51], nga anaa sa ChurchofJesusChrist.org; tan-awa usab ang Mga Hebreo 12:5–9).

Pwede usab nimong dapiton ang mga estudyante nga mamalandong sa mga panahon nga gitubag sa Langitnong Amahan ang ilang pag-ampo aron hatagan sila sa giya ug direksiyon nga ilang gikinahanglan. Pwedeng ipakigbahin sa pipila ka andam nga estudyante ang ilang mga kasinatian.

Ang mosunod gituyo aron sa paghatag og higayon sa mga estudyante nga maghimo og plano nga mapainubsanong magtinguha sa giya sa Langitnong Amahan:

Paminaw sa mga pag-aghat sa Espiritu Santo samtang tubagon nimo ang mosunod nga mga pangutana diha sa imong journal sa pagtuon:

• Unsang paggiya o direksiyon ang imong gitinguha sa Langitnong Amahan?

• Unsay imong himoon aron mapainubsanong tinguhaon ang Iyang paggiya?

Dapita ang mga estudyante nga molihok sa mga impresyon nga ilang nadawat. Pwede kang mopakigbahin og personal nga kasinatian mahitungod sa paggiya sa Langitnong Amahan sa imong kinabuhi.

Dugang nga mga Kapanguhaan

Asa ko makakat-on og dugang bahin sa makasaysayanong background sa Doktrina ug mga Pakigsaad 112?

Ang mosunod nga mga kapanguhaan naghatag og dugang makasaysayanong konteksto para sa seksiyon 112:

• “Matag Lit-ag,” Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 (2018), 294–308

• “Ang Kamatuoran Mopatigbabaw,” Mga Santos, 1:274–83

• Kay Darowski, “The Faith and Fall of Thomas B. Marsh,” in Revelations in Context (2016), 54

• Mga Hisgutanan sa Kasaysayan sa Simbahan, “Ang Kirtland Safety Society,” ChurchofJesusChrist.org/study/history/topics

Unsa ang pagkamapainubsanon?

Ang pagkamapainubsanon maoy pag-ila sa mapasalamatong paagi sa imong pagsalig diha sa Ginoo—ang pagsabot nga kita kanunay nga nanginahanglan sa Iyang suporta. Ang pagkamapainubsanon mao ang pag-ila nga ang atong mga talento ug mga abilidad mga gasa gikan sa Dios. Dili kini usa ka timailhan sa kahuyang, pagkamaulawon, o kahadlok; usa kini ka pagpakita nga kita nasayod diin ang imong tinuod nga kalig-on naggikan. (Mga Hilisgotan ug Mga Pangutana, “Pagkamapainubsanon,” topics.ChurchofJesusChrist.org)

Sa unsang paagi ang Manluluwas usa ka ehemplo sa pagkamapainubsanon?

Si Presidente Dieter F. Uchtdorf, nga kanhi sakop sa Unang Kapangulohan, mitudlo:

Sa tanang mga butang, si Jesukristo ang atong hingpit nga ehemplo. Sa laing bahin si Lucifer misulay sa pag-usab sa plano sa kaluwasan sa atong Amahan ug pag-angkon og dungog alang sa iyang kaugalingon, ang Manluluwas miingon, “Amahan, ang imong pagbuot mao ang matuman, ug ang himaya imo sa kahangturan” [Moises 4:1–2]. Bisan pa sa Iyang hilabihan nga kahanas ug mga kalamposan, ang Manluluwas kanunay nga malumo ug mapaubsanon. (Dieter F. Uchtdorf, “Garbo ug ang Priesthood,” Liahona, Nob. 2010, 57)

Si Elder Quentin L. Cook sa Korum sa Napulog Duha ka Apostoles mipasabot:

Ang ehemplo sa Manluluwas sa pagkamapainubsanon ug pagsakripisyo alang sa tanang katawhan mao ang labing tulukibon nga panghitabo sa kasaysayan. Ang Manluluwas, bisan isip miyembro sa Dios nga Kapangulohan, andam nga moanhi sa yuta isip ordinaryo nga masuso ug misugod sa pagpakabuhi nga naglakip sa pagtudlo ug pag-ayo sa Iyang mga kaigsoonan ug sa kataposan nag-antos sa dili mahulagway nga kasakit sa Getsemani ug sa krus aron mahingpit ang Iyang Pag-ula. Kining buhat sa gugma ug pagkamapainubsanon sa bahin ni Kristo nailhan isip ang Iyang pagpakig-angay. Gibuhat Niya kini alang sa matag lalaki ug babaye nga gilalang o ilalang sa Dios. (Quentin L. Cook, “Ang Mahangturong mga Butang nga Nahitabo Kada Adlaw,” Liahona, Nob. 2017, 52)

Dugang nga mga Kalihokan sa Pagkat-on

“Kon Sila Dili Magpatig-a sa Ilang mga Kasingkasing”

Aron matabangan ang mga estudyante nga masabtan kon unsay nahitabo sa Kirtland, Ohio, naidtong 1836 ug 1837, pwede nimong ipasalida ang bidyo nga “If They Harden Not Their Hearts” gikan sa time code 0:00 hangtod 6:12.

Human matan-aw ang bidyo, pwedeng basahon sa mga estudyante ang Doktrina ug mga Pakigsaad 112:2–3, 10, 12–15, 20–22, 28, 33–34, nga mangita sa mga pagtulun-an nga nakatabang sa mga Santos nga malikayan ang garbo ug madawat ang paggiya sa Ginoo. Dayon pwedeng ipakigbahin sa mga estudyante kon sa unsang paagi kini nga mga baroganan makatabang nilang malikayan ang garbo karon.

Dayon pwede nimong ipasalida ang nahibiling bahin sa bidyo, gikan sa time code nga 6:12 hangtod 11:21, aron makita kon unsang mga kalisdanan ang giatubang ni Thomas B. Marsh aron sundon ang tambag sa Ginoo. Gipakita usab niini ang iyang pagbalik sa Simbahan pila ka tuig ang milabay.

Mga Himno

Ikonsiderar ang ppagkanta o pagpaminaw sa himno nga makatabang sa mga estudyante nga makita ang mga panalangin nga gikan sa mapainubsanong pagtinguha sa giya sa Ginoo. Ang mga ehemplo naglakip sa “Magmapainubsanon Ka” (Mga Himno, num. 76), “Mapainubsanong mga Kasingkasing” (num. 100), ug “Sa Pagpaubos, Among Manluluwas” (num. 102). Dayon pwedeng ipakigbahin sa mga estudyante ang mga liriko nga mipatigbabaw kanila.

Doktrina ug mga Pakigsaad 112:10. “Imong Dios moagak kanimo pinaagi sa kamot”

Aron matabangan ang mga estudyante nga makasabot sa paghanduraw sa Langitnong Amahan nga naggunit kanato sa kamot pinaagi sa pagtubag sa atong mga pag-ampo, ipakita ang imahe sa usa ka bata nga naggunit sa kamot sa iyang ginikanan. Hisgoti ang mga rason nga tingali mogunit sa kamot sa ginikanan ang usa ka bata (alang sa paghupay, alang sa kaluwasan, alang sa kalig-on, aron magiyahan, ug uban pa). Tabangi ang mga estudyante nga makita nga sama ra nga mosalig ang bata sa kamot sa ginikanan, makasalig kita sa Langitnong Amahan pinaagi sa pag-ampo. Pwede nimong hisgotan kon sa unsang paagi ang Langitnong Amahan makahatag og mga panalangin nga sama sa madawat sa anak dihang mogunit siya sa kamot sa iyang ginikanan.

Mga baroganan sa pag-ampo

Aron matabangan ang mga estudyante nga masabtan kon unsay mahitabo dihang mapainubsanon silang moampo, ikonsiderar ang pagbasa sa mosunod nga pamahayag ni Presidente Steven J. Lund, Katibuk-ang Presidente sa Young Men:

Matag higayon nga kita mag-ampo, kita nagdapit sa Langitnong Amahan sa pagpanginlabot sa atong mga kinabuhi. Ang matag pag-ampo usa ka pag-ampo alang sa usa ka milagro. Bisan ang mga pag-ampo sa pasalamat naglaom sa pagpalig-on sa atong mga relasyon sa balaan. (Steven J. Lund, “Seminary, Institute, ug Ubang mga Butang nga Epektibo” [pakigpulong nga gihatag sa tinuig nga pagbansay sa pagsibya sa mga Seminary ug mga Institute, Ene. 27, 2023])

Ang pagrebyo sa mosunod nga mga baroganan sa pag-ampo mahimong makatabang sa mga estudyante nga makasabot sa mga pamaagi nga sila mag-ampo uban ang hilabihang pagpaubos:

Himoang makahuloganon ang atong mga pag-ampo.

Gamit og mga pulong nga nagpakitag gugma, respeto, pagtahod, ug pagkasuod.

Pagpasalamat kanunay sa Langitnong Amahan.

Tinguhaa ang giya ug kusog sa Langitnong Amahan sa tanan nimong gibuhat.

Hinumdomi ang panginahanglan sa uban samtang kita nag-ampo.

Tinguhaa ang giya sa Espiritu Santo aron mahibalo kita unsay iapil sa atong mga pag-ampo.

Dihang mohangyo kita pinaagi sa pag-ampo, kinahanglan natong himoon ang tanan aron matabanagn nga kini matubag. (gikuha gikan sa Mga Hilisgotan ug Mga Pangutana, “Pag-ampo,” topics.ChurchofJesusChrist.org)

Pwede nimong bahinon ang mga baroganan ngadto sa mga grupo sa mga estudyante. Dayon pwede silang mohatag og pipila ka ehemplo kon unsaon nila paggamit kini nga mga baroganan diha sa ilang mga pag-ampo.

Unang mga misyonaryo sa England

Gipadayag ang Doktrina ug mga Pakigsaad 112 sa samang adlaw nga nagsugod pagsangyaw sa ebanghelyo ni Jesukristo sila Elder Heber C. Kimball, Orson Hyde, ug John Goodson sa England. Pwede nimong ipasalida ang bidyo nga “The Eternal Everyday” gikan sa time code 5:51 hangtod 6:39 aron matabangan ang mga estudyante nga makakat-on mahitungod sa pagpaubos nga gikinahanglan niini nga mga misyonaryo aron sa pagsangyaw sa ebanghelyo sa unang higayon sa gawas sa Amihanang Amerika.

Dayon pwede nimong ipakita ang litrato sa River Ribble sa ubos ug ipakigbahin ang mosunod nga impormasyon sa mga estudyante: Usa ka semana human sa pagsugod og sangyaw sa mga misyonaryo, ang unang mga nakabig gibunyagan sa River Ribble. Duha niini nga mga nakabig ang mahinamon nga mabunyagan, nga naglumba sila paingon sa sapa. Si George D. Watt ang nakadaog sa lumba ug mao ang unang nabunyagan nga kinabig sa England. (Tan-awa sa Mga Santos, 1:316–318; Global Histories, England, “George D. Watt and the Journal of Discourses,” history.ChurchofJesusChrist.org.)