Leksiyon 127: Doktrina ug mga Pakigsaad 111–115

Sukda ang Imong Nakat-onan 8

Doktrina ug mga Pakigsaad 95–115

Ang pagpamalandong ug ang pagsukod sa atong espirituhanong pagkat-on makatabang kanato nga mas maduol sa Manluluwas. Kini nga leksiyon makatabang sa mga estudyante sa paghinumdom ug sa pagsusi kon sa unsang paagi ang ilang mga kasinatian sa pagtuon sa Doktrina ug mga Pakigsaad nakatabang kanila sa paglambo sa espirituhanong paagi.

Mga Posibleng Kalihokan sa Pagkat-on

Sukda ang imong espirituwal nga pag-uswag

Pagdala og mga bato sa klase nga lainlain og gidak-on, ug pahimoa ang mga estudyante og mga ilhanan sa dalan. Dapita ang mga estudyante nga patongpatongon ang pipila ka bato ug pangitaon ang lig-on nga pundasyon. (Ang Alternatibo, pwede kang magpakitag imahe sa ilhanan sa dalan.) Pwede nimong hisgotan nga sukad pa sa karaan hangtod karon, kini nga mga ilhanan sa dalan naghatag og kaluwasan ug direksiyon sa mga byahedor. Pwede nimong ipangutana ang mosunod bahin sa kalihokan.

• Unsa ang pipila sa lainlaing mga ilhanan sa dalan ang gibutang sa Langitnong Amahan ug ni Jesukristo aron giyahan kita sa dalan sa pakigsaad pabalik sa Ilang presensiya?

• Sa unsang paagi ang ilhanan sa dalan pwedeng mahimong simbolo sa Manluluwas?

Tabangi ang mga estudyante sa pag-ila nga ang mga tudling sa kasulatan nga ilang gitun-an, leksiyon nga ilang nakat-onan, ug mga pagtulun-an nga ilang gigamit sa ilang pagtuon sa Doktrina ug mga Pakigsaad mahimong sama sa gipatongpatong nga mga bato, nga naghatag og kaluwasan ug direksyon samtang nagsubay sila sa dalan sa pakigsaad. Dapita ang mga estudyante sa pagrebyo sa ilang mubo nga mga sulat nga gisulat ug mga gitun-ang kasulatan sa milabayng mga semana (Doktrina ug mga Pakigsaad 95–115), nga mamalandong sa mga kamatuoran na ilang nakat-onan.

Samtang imong pamalandongan ang imong kasinatian sa pagtuon sa Doktrina ug mga Pakigsaad, mainampoong dapita ang Espiritu aron tabangan kang mailhan ang imong pag-uswag paingon sa imong Langitnong Amahan ug sa imong Manluluwas, si Jesukristo.

Ipakita ang mosunod nga mga pangutana aron matabangan ang mga estudyante nga mamalandong sa ilang espirituwal nga pag-uswag. Dapita ang mga estudyante sa pagtubag sa usa o sa duha sa mga pangutana diha sa ilang mga journal sa pagtuon.

• Unsa ang pipila ka espirituwal nga kamatuoran ang imong nakat-onan o naggamit nga nakatabang nimo nga mobati nga mas duol sa Langitnong Amahan ug ni Jesukristo?

• Sa unsang paagi kini nga mga kamatuoran nakahatag nimog direksyon ug kaluwasan samtang nagsubay sa dalan sa pakigsaad?

• Unsang mga tudling sa kasulatan gikan sa Doktrina ug mga Pakigsaad ang nahimong makahuloganon para nimo? Ngano man?

Dihang igo na ang panahon nga gihatag sa mga estudyante aron marekord ang ilang mga tubag, dapita ang pipila ka boluntaryo sa pagpakigbahin sa ilang mga panabot nga dili kaayo personal. Pwede nilang ipakigbahin ang mga tudling sa kasulatan nga makahuloganon kanila ug kon ngano. Samtang mopakigbahin ang mga estudyante, pwede silang magdugang og mga bato sa ilhanan sa dalan.

Ikonsiderar ang pagdasig sa Espiritu ug ang mga panginahanglan sa mga estudyante samtang mamili ka kon asa sa mga kalihokan ang imong gamiton.

Ipasabot kon sa unsang paagi ang pagkapari ug mga yawe sa pagkapari sa Manluluwas nagpanalangin sa Iyang Simbahan

Tabangi ang mga estudyante sa pagsukod kon unsay bag-o lang nilang nakat-onan bahin sa pagkapari sa Manluluwas ug mga yawe sa pagpakapari. Sa ilang pagtuon sa Leksiyon 119: Doktrina ug mga Pakigsaad 107:1–20, nakat-onan tingali sa mga estudyante nga kadtong nagserbisyo sa Simbahan makakuhag gahom gikan sa Manluluwas pinaagi sa Iyang pagkapari. Sa ilang pagtuon sa Doktrina ug mga Pakigsaad 110, Bahin 2, nakat-onan tingali sa mga estudyante ang bahin sa pagpahiuli sa mga yawe sa pagkapari kang Joseph Smith ug Oliver Cowdery diha sa Templo sa Kirtland.

Pwede nimong ipakigbahin ang mosunod nga senaryo. Sa pagsulat sa ilang mga tubag, pwedeng irebyo sa mga estudyante ang ilang mubo nga mga sulat diha sa ilang mga journal o mga kasulatan nga ilang gimarkahan.

Si Becky ug Michael mga magsoon nga bag-o lang miapil sa Simbahan. Sila lang ang mga miyembro sa ilang pamilya. Silang duha adunay lig-ong mga pagpamatuod sa Basahon ni Mormon, ni Propeta Joseph Smith, ug sa napahiuli nga Simbahan ni Jesukristo, pero nahibalo sila nga daghan pa silang angayang makat-onan. Samtang anaa sa simbahan usa ka Dominggo niana, nakadungog sila nga adunay nag-istorya bahin kon sa unsang paagi mapanalanginan sa pagkapari sa Manluluwas ug sa mga yawe sa pagkapari ang matag miyembro sa Simbahan. Wala sila makasabot adto.

• Unsay pwede nimong gamiton gikan sa bag-o lang nimong nakat-onan diha sa Doktrina ug mga Pakigsaad aron tabangan si Becky ug Michael nga mas masabtan kon sa unsang paagi ang gahom sa pagkapari sa Manluluwas ug mga yawe sa pagkapari magpanalangin kanato isip mga miyembro sa Simbahan?

Kon nagkinahanglan og tabang ang mga estudyante, pwede nimong idrowing pag-usab sa pisara ang kahoy nga gikan sa Leksiyon 119: Doktrina ug mga Pakigsaad 107:1–20 ug markahan ang mga sanga sa lainlaing organisasyon sa Simbahan. Pwedeng ipakigbahin sa mga estudyante nga ang mga lalaki ug mga babaye nga nakadawat og mga calling sa Simbahan makakuha og gahom gikan sa Manluluwas sa pagserbisyo sa uban diha sa Iyang Simbahan. Isip bahin sa ilang mga pagpasabot, pwedeng gamiton sa mga estudyante ang mga bersikulo gikan sa seksiyon 107 aron ipakita nga ang tanang awtoridad ug katungdanan sa Simbahan sa Manluluwas konektado sa Melchizedek nga Pagkapari. Ang pipila sa mga bersikulo nga pwede nilang gamiton mao ang mga bersikulo 5, 8, 14, 18–20, o uban pang mga bersikulo nga ilang gipili aron itudlo kini.

Ang alternatibo, pwede nimong ipakita ang mga imahe sa pagbisita ni Moises, Elias, ug Elijah didto sa Templo sa Kirtland, nga gihulagway sa Doktrina ug mga Pakigsaad 110. Dapita ang mga estudyante sa pagpakigbahin kon kinsa kini nga mga bisita ug kon unsang mga yawe ang ilang gipahiuli. Dasiga silang gamiton ang mga bersikulo gikan sa seksiyon 110 diha sa ilang mga pagpasabot.

Pagbati og dakong pagsalig nga ang mga Apostol maoy talagsaon nga mga saksi ni Jesukristo

Sa kasamtangang leksiyon, nakat-onan sa mga estudyante kon sa unsang paagi ang Unang Kapangulohan ug ang Korum sa Napulog Duha ka Apostoles mga talagsaon nga mga saksi sa ngalan ni Kristo sa tibuok kalibotan (tan-awa sa Doktrina ug mga Pakigsaad 107:23). Hatagi og kahigayon ang mga estudyante sa pagpamalandong sa ilang pagpamatuod nga ang mga propeta ug apostoles maoy talagsaon nga mga saksi ni Kristo sa atong panahon ug mao ang gisugo ni Jesukristo nga tabangan kitang mapaduol Kaniya.

Ang usa ka paagi sa paghimo niini mao ang pagpakita sa kasamtangang litrato sa Unang Kapangulohan o Korum sa Napulog Duha ka Apostoles ug sa pagpangutana sa mosunod. Pwede nimong hatagan og panahon ang mga estudyante sa pagpamalandong ug pagrekord sa ilang mga hunahuna diha sa ilang mga journal sa pagtuon. Human niana, dapita ang pipila ka mga andam nga estudyante sa pagpakigbahin.

• Unsay bag-o lang nimong nahimo nga nakaapektar sa imong pagpamatuod nga ang mga propeta ug apostoles maoy talagsaon gayod nga mga saksi ni Kristo?

  Kon para nimo kinahanglan og dugang kalihokan ang mga estudyante aron molambo ang ilang pagsalig nga ang mga propeta ug apostoles maoy talagsaon nga mga saksi ni Kristo, pwede nimo silang dapiton nga himoon ang usa sa mosunod nga mga kalihokan:

• Pagpili og bag-o lang nga mensahe gikan sa Unang Kapangulohan ug sa Korum sa Napulog Duha ka Apostoles nga makahuloganon kanimo. Pamalandongi kon sa unsang paagi kana nga mensahe nakaimpluwensiya sa imong pagbati bahin kang Jesukristo.

• Tubaga ang social media nga pagdapit sa usa sa mga sakop sa Unang Kapangulohan ug sa Korum sa Napulog Duha ka Apostoles. I-share ang imbitasyon diha sa imong social media nga pahina.

• Sa social media, tubag sa usa ka post o pagpadalag direktang mensahe sa usa ka sakop sa Unang Kapangulohan o Kurom sa Napulog Duha ka Apostoles nga magpahayag og pagpasalamat sa bag-o lang nga mensahe nga nakatabang nimo nga mas maduol sa Manluluwas, si Jesukristo.

Human sa igo nga panahon, dapita ang pipila ka estudyante sa pagpakigbahin sa klase kon unsay ilang gisulat o gi-post.

Pagpangandam sa pagsimba sa Ginoo diha sa templo

Sa nangagi nga mga leksiyon, ang mga estudyante adunay oportunidad sa pagpangandam sa pagsimba sa Ginoo diha sa Iyang templo. Ania ang pipila ka sumaryo sa bag-o lang nga mga leksiyon nga nakatabang niini:

• Sa seksiyon 95, nahisgotan tingali sa mga estudyante ang pagsakripisyo aron mosimba diha sa templo.

• Sa seksiyon 97, girebyo tingali nila kon sa unsang paagi ang mga pangutana sa rekomend sa templo makatabang natong makabaton og putli nga kasingkasing.

• Sa seksiyon 109, nahibaloan sa mga estudyante ang mga panalangin nga may kalambigitan sa pagsimba sa templo ug ikonsiderar kon sa unsang paagi kini nga mga panalangin nakadasig nila sa ilang pagkinabuhi.

• Sa seksiyon 110, gihisgotan tingali sa mga estudyante kon sa unsang paagi ang ilang pagkahimong takos makatabang nilang mas maduol sa Ginoo diha sa Iyang templo (tan-awa sa Doktrina ug mga Pakigsaad 110:5–10).

Dapita ang mga estudyante sa pagrebyo sa piho nga mga tumong o plano nga nakatabang nila sa pagpangandam sa pagsimba Kaniya sa Iyang templo.

• Unsay kasamtangang mga paningkamot ang imong gihimo aron mas maandam sa pagsimba sa Ginoo diha sa Iyang templo?

Kon makabenepisyo ang mga estudyante gikan sa mas piho nga mga pangutana nga mo-follow up sa mga plano o mga tumong nga ilang ginapaningkamotan, pwede nimong ipakita ang mosunod nga teksto para sa mga estudyante ug patubaga sila diha sa ilang mga journal sa pagtuon.

Tinguhaa ang personal nga pagpadayag nga mogiya nimo samtang imong tubagon ang usa o kapin pa sa mosunod nga mga pangutana sa imong journal sa pagtuon:

• Unsang mga sakripisyo ang imong gihimo o andam himoon aron ipakita nga prayoridad sa imong kinabuhi ang pagsimba sa Ginoo diha sa templo?

• Unsang mga panalangin ang imong nakita diha sa imong kinabuhi samtang namalandong ka sa imong mga tubag sa mga pangutana sa rekomend sa templo isip pagpangandam sa pagsulod sa balay sa Ginoo?

• Unsay imong gihimo sa pagpaningkamot nga mahimong takos sa pagsimba sa Ginoo diha sa templo?

Hunahunaa kon sa unsang paagi ka napanalanginan tungod sa imong mga paningkamot. Unsay kinahanglan nimong ipadayon o sugdan sa paghimo aron mas maandam sa pagsimba sa Iyang templo?

Dasiga ang mga estudyante sa pagbuhat sa bisan unsang mga kausaban nga nadasig silang himoon samtang ilang girebyo ang ilang pag-uswag. Pwede nimong dayegon ang mga paningkamot sa mga estudyante sa pag-una sa Langitnong Amahan, ang atong Manluluwas, ug ang ebanghelyo diha sa ilang mga kinabuhi. Pwede nimong taposon pinaagi sa pagpakigbahin og usa ka pananglitan sa mga panalangin nga imong nadawat tungod sa mga pagpangandam sa pagsimba sa Manluluwas diha sa Iyang templo.